لقاء كارثي

وبدل ما تقولي أنا السبب قولي يارب تقبل نيتهم وارحمهم واشفي إخواتي وقويني أكمل الطريق اللي كانوا بيتمنوا يشوفني ماشية فيه ده اللي هيفرحهم وده اللي هينفعهم

نعيمه….بدموع طيب ليه ربنا مطملش الطريق معاهم و خلاهم يسافروا ليه مخلانيش افتكر اخر ذكري ليهم واحنا مع بعض ليه مستناش يديهم الاجر

عشري الكبير….لا لا يا بتي اياك تقولي كده إنتي فاكرة إن الأجر بس في الوصول؟ لا يا نعيمة ربنا بيكتب الأجر على النية قبل ما يكتبها على العمل يمكن أبوكي وأمك من ساعة ما نووا العمرة وفرحوا بيها واستعدوا ليها ربنا كتب لهم من الأجر اللي إحنا ما نعرفوش

إحنا بنبص للطريق ونقول ليه ما كملش؟ لكن ربنا سبحانه وتعالى شايف الرحلة كلها من أولها لآخرها يمكن اللي إحنا شايفينه انقطاع عند ربنا كان اكتمال

وأما ليه ربنا اختار اللحظة دي؟ فدي إجابة عند ربنا وحده لكن اللي أعرفه إن ربنا أرحم بيهم منك ومني والعبد المؤمن لما يقف قدام حاجة قلبه مش فاهمها يقول يا رب أنا لا أعلم لكني أثق في رحمتك.

حماده….الله ينور عليك يا حاج عشري شوفتي الكلام بقي و بعدين
بتقولي ليه ما خلاكيش تفتكري آخر ذكرى وأنتم فرحانين؟ مين قال إن الذكريات الحلوة راحت؟ سنين العمر كلها راحت فين يا نعيمه؟
ضحكهم حضنهم كلامهم وقفتهم جنبك فرحتهم بيكي دول مش ذكرى واحدة يا بنتي دول عمر كامل

إوعي تسيبي اللحظات الأخيرة تسرق منك العمر كله. أبوكي وأمك مش الحادثة وبس يا نعيمه أبوكي وأمك عشرات السنين من الحب والرحمة والتعب عشانكم دول اللي لازم تفتكريهم

نعيمه….بدموع و صوت يقطع القلب بس مش قادره والله والله ما قادره استوعب حاسه اني في كابوس يا حماده حاسه اني مش راضيه من جوايا و مش عايزه عدم رضايا ده يكون ذنب ليهم

البنات كانوا باصينلها و منهارين في صمت لكن صوت شهاقتهم واضحه

قرب عسال بهدوء بكرسي

عسال…..قعد يا عم حماده

طبطب حماده علي ايده وقعد قدام نعيمه

حماده….لا يا بنتي لا اللي إنتي فيه ده مش عدم رضا ده وجع.
هز راسه بهدوء و بصلها

في فرق كبير بين القلب الموجوع والقلب المعترض إنتي مش بتقولي ليه يا رب؟ اعتراضاً على حكمه.

إنتي بتقوليها لأنك بنت فقدت أبوها وأمها في لحظة واحدة لأن قلبك اتكسر فجأة

اتنهد بوجع و كمل بصوت مهزوز من الدموع خلي ايمي و كل البنات بصولوا بوجع و دموعهم كانت بتجري عارفين انه موجوع علي موت عادل..