لقاء كارثي

تقي…لا هي ولا نعيمه بيردوا

عدي…طيب اااا استني هكلم سليم هو في الكريق هو وفضل يمكن فضل يعرف حاجه او سليم

تقي….طيب بسرعه والنبي

عدي…يلا سلام

قفل معاها و اتصل علي سليم لانه عارف انه هيروحلها حكاله سليم اللي يعرفوا اتلغبط عدي اكتر مبقاش عارف يعمل ايه او يقول لتقي ايه معني ان نعيمه و ليله كمان بيصرخوا في حاجه و ياتري مين اللي بيصرخ عشان مين بدأ يتوتر و حس ان في مصيبه عرف ابوه واخواته كل الاحداث دي حصلت في عشر دقايق بعد ما نعيمه صرخت و هي مع فضل

و بقي كله يكلم كله و محدش عارف حاجه ولا حد فاهم المفروض يعمل ايه محدش فيهم بيتحرك و لا عارف يروح فين يمكن يلاقيهم محدش عارف المكان اصلا الدنيا زي ما وقفت في عيون ليله و نعيمه وقفت معاهم في عيونهم وعقلهم مكانش عارف ياخد اكشن…

و كل ده ليله حاسه ان طريقها مش بيخلص و نعيمه عندها هيستريا صريخ مش بيقف لفت ليله و خدت يمين و بدات ترجع عكس الطريق عشان توصلهم صوت عربيات الإسعاف كان عمال يقرب و كل ما يقربوا صريخ نعيمه بيعلي ماسكه في الباب مستنيه ليله توصل عشان تفتح و تجري تشوفهم

وليله مسكاها بكل قوتها بايدها ومبتنطقش كان الجزء اللي شغال فيها ايدها اللي قابضه علي كف نعيمه و رجليها اللي دايسه بنزين

لحد ما وصلوا الدنيا كانت زحمه زحام مرعب اصوات كتير و كلام بيتقال صعب ان حد يسمعه عن حاله اللي في العربيه لكن كان ربنا كان رحيم بيهم كانوا حقيقي مش سامعين و لا مفسرين كلام الناس كأن في ضغط علي ودنهم

و كلام الناس كان صعب يتسمع في الوقت ده اللي بيقول دول ماتوا كلهم و اللي بيقول دول مدعوكين و اللي بيقول الدم مغرق المكان

نزلت ليله جري وراء نعيمه و مسكتها من ايدها كانوا بيحاولوا يدخلوا وسط الناس و الناس واقفه جزء كبير منهم عندهم فضول مش عايزين يبعدوا و يعدوهم كأنهم بيتفرجوا علي حفله و مش حابين حد ياخد مكانهم و اللي كان بيبعد فيهم كان بيبعد بس من صريخ نعيمه و زقها في الكل كانوا بيخبطوا في الناس و الناس تخبط فيهم

لحد ما اخيراً وصلوا كانت الاسعاف بتشيل اخر حد فيهم العربيه كانت متدمره كان في اربع عربيات اسعاف ثلاثه منهم قفلوا الباب واخر واحده كانت خلاص بتقفل ملمحتش حد منهم وده كمان كان من فضل ربنا عليها متشوفهمش بالمنظر ده نعيمه بقت تصرخ و تخبط علي العربيات وتجري زي المجنونه وتنادي عليهم وليله وراها