لقاء كارثي
لقاء كارثي
فضلوا قاعدين حوالي ربع ساعه و شويه و الكل انضم ليهم تاني حتي البنات الي كانوا تعبانين
قربت منها ايمي
ليله….تعالي يا قلبي تقعدي جنبها
ايمي…..ماشي
ليله… انتي كويسه ؟
ايمي….كويسه يا ليله
قامت ليله و بصت نعيمه لايمي و رجعت عيطت
نعيمه….حقك عليا والنبي حقكم عليا كلكم اوعي تتعبي والنبي يا ايمي
ايمي……بحزن ابتسمت انا زي الفل كويسه والله متخافيش
نعيمه….انا السبب والله في كل ده
ايمي….بت متقوليش كده كلنا بخير وانتي مش سبب في حاجه بطلي الكلام ده واهدي شويه قلبك هيقف
نعيمه……قلبي وقف خلاص والله
حماده قرب منها وباس راسها
نعيمه…..ابويا و امي راحوا يا حماده
حماده….بحزن و دموع في عينه اسمعيني كويس يا نعيمه انا
عارف إن الوجع اللي جواكي أكبر من أي كلام وعارف إنك حاسة إن الدنيا كلها اتسحبت من تحت رجلك في لحظة ولو مين قالك ايه يريحك مش هترتاحي بس اسمعيني
أبوكي وامك مراحوش لوجع ولا لخوف ولا لتعب دول راحوا لرب كريم و رحيم أرحم بيهم من الدنيا كلها ومن كل اللي فيها.
و احنا أهل الإيمان يا بنتي بنزعل وبنبكي وحتى سيدنا محمد بكى على اللي حبهم لكن عمرنا ما بنفقد الأمل في رحمة ربنا
نعيمه….بانهيار حسوا بايه يا حماده لما العربية وقعت اتوجعوا خافوا حصل فيهم ايه
حماده…بابتسامه وهو دموعه نازله و صوته مهزوزو
ولا حااااجه ده ربك مفيش.احن منه افتكري إن أول لحظة عدت عليهم بعد ما سابوا الدنيا كانت أهون عليهم من كل تعب الدنيا ده وإنتِ النهارده مش مطلوب منك غير حاجة واحدة تدعيلهم كل دعوة منك نور وكل صدقة منك فرحة ليهم وكل آية قرآن بتقريها بتوصلهم
نعيمه….بدموع انا السبب يا حماده انا اللي قولت نسافر
حماده….ده يابختهم بيكي يا حبيبتي انتي فاهمة بتقولي إيه؟
إنتي كنتي وخداهم في طريق طاعة مش في طريق معصية إنتي ما قولتيش يلا نروح نعمل حاجة تغضب ربنا إنتي قولتي يلا نروح نعتمر ونزور بيت ربنا يبقى إزاي تلومي نفسك على حاجة ما كتبهاش غير ربنا؟
احمد….لو كل واحد حصل له مصيبة قعد يدور على سبب يحمل نفسه الذنب يا نعيمه عمره ما هيرتاح اللي حصل ده قدر ربنا يا بنتي قدر مكتوب قبل ما تتولدي إنتي وقبل ما يتولدوا هم
حماده….طبطب علي كفها أبوكي وأمك كانوا رايحين وهم فرحانين بيكي وفخورين بيكي ومستبشرين برحلة كانوا بيحلموا بيها معاكي انتي واخواتك ما تخليش الشيطان يقنعك إنك السبب يا بنتي السبب الوحيد هو القدر اللي ربنا كتبه وإحنا عباده بنرضى ونقول الحمد لله.
