لقاء كارثي

و في عز ضحكهم و فرحتهم و جات فجأه من وراهم عربيه نقل كبيره لمحتها ليله في المرايا كانت جايه طايره و كان صاحبها واضح انه تحت تأثير مخدر حاولت ليله تكون سريعه البديهه و تاخد يمين بسرعه لانه كان جاي من شمالها هي و فعلاً خدت يمين لكن مش يمين كامل تتفادي بيه بسرعه العربيه لان كان في يمينها عربيات كتير و متقدرش تنحرف بسرعه عن طريقها

و جات العربيه من جنبها خبطت الباب اللي وراء خبطه قويه صرخت نعيمه و حاول ليله تتحكم في الدركسيون بسرعه اتصدموا و ليله بالاخص خدت صدمه قويه خلتها في حالة ذهول بصوا لبعض الموبايل كان في ايد نعيمه بس من الخضه مكانتش قادره ترد علي فضل اللي عمال ينادي عليها

و قبل ما تطمنه صرختها هزت فضل و سليم ..

لمحت نعيمه و ليله العربيه النقل طيرت عربيه اهلها خبطتها خبطه قويه من وراء خلت العربيه طارت من فوق الكوبري كسرت الحاجز و نزلت علي تحت.

فرمل صاحب النقل فرمله قويه قلبت عربيته علي الكوبري بس موقعش زحف كتير و بقي عمال ياخد في طريقه كذا عربيه لحد ما وقف..

سابت نعيمه الموبايل من ايدها و نزلت جري و ليله سابت العربيه وسط الكوبري و طارت وراها و كل العربيات وقفت علي الكوبري الكل نزل بسرعه يبص الكل كان عنده حالة ذهول حادثه بشعه و كل ده حصل في ثواني

في اللحظه دي و هو فضل عمال ينادي و صوته عالي و سليم باصصله بصدمه من صوت الصريخ

بدأوا يسمعوا اصوات كتير حواليهم ناس بتزعق و ناس بتصرخ و اصوات تخبيط وتكسير غير مفهومه اصوات فرامل عاليه جداً

ناس بتقول العربيه اتقلبت من فوق الكوبري.

ناس تانيه تقول حط يتصل بالاسعاف و ناس بتقول لاحول ولا قوة الا بالله اكيد ماتوا

صوت شباب بتصرخ و باين انهم بيجروا عمالين يقولوا

ده مووووتهم
دول اكيد ماتوا
ده خبط العربيات كلها
يا ابن الكاااالب

هنا فضل فقد السيطره علي اعصابه و بقي يصرخ في التليفون

فضل….نعيييييييمه ررررردي ليلللللله

مسك سليم الموبايل بقي يتصل علي نسمه زي المجنون مش بترد و يتصل علي نادر و علي نجلاء و علي عادل محدش بيرد خالص اللي جرس واللي مقفول

و في نفس اللحظه نعيمه وليله وصلوا مع الناس عند الحاجز اللي اتكسر و شافوا العربيه وهي واقعه و عالم تحت ملموم صوات وصريخ و اصوات عاليه شباب و رجاله بيحاولوا يعدلوا العربيه و ناس بتصرخ و بتقول اسعاف و واحد ماسك طفايه حريق بيطفي جزء بسيط جنب البنزين ولع و لحقه