لقاء كارثي

لقاء كارثي
أميره أسامه
صاحبة البطل الواحد

. البارت المئه 154.

………………………..
اسمي انواع الصداقه
هي الصداقة اللي مش بتتطلب تفسير ولا محتاجة إثبات صداقة بتبدأ بهدوء من غير وعود كبيرة ولا كلام تقيل لكن مع الوقت بتتحول لركن ثابت في الروح لحاجة بتسندك من غير ما تحس.

الصداقة اللي من غير شروط مش قايمة على المصلحة ولا على التواجد المستمر ولا حتى على الاتفاق في كل حاجة بالعكس هي مساحة آمنة للاختلاف وملجأ في وقت الضعف و ونس حقيقي في عز الوحدة

صداقة تقدر تغيب فيها شوية وترجع تلاقي كل حاجة زي ما هي كأن الوقت ماعداش.

في النوع ده من العلاقات مفيش حسابات مفيش أنا عملت وأنت ماعملتش ولا كنت مستنيك تقف جنبي كل حاجة بتيجي بطبيعتها

لأن اللي رابطكم أعمق من المواقف وأصدق من أي كلمات الصديق الحقيقي مش اللي بيكملك لكن اللي بيقبلك زي ما أنت بكل تناقضاتك بكل عيوبك من غير ما يحاول يغيرك.

واللي يفضل موجود مش عشان الظروف مناسبة لكن عشان قلبه اختارك من غير سبب.

يمكن أجمل ما في الصداقة الغير المشروطة إنها بتيجي من غير ما تطلبها وبتفضل من غير ما تمسك فيها.

بس أول ما تبقى جزء من حياتك بتدرك إن في علاقات مش محتاجة شروط عشان تفضل لأنها ببساطة صادقة و حقيقيه..

اما الحب ..
فا فيه نوع من الحب نادر لدرجة إن أغلب الناس بتمشي في الحياة من غير ما تقابله

ولو صادفوه يمكن ما يعرفوش يسموه حب مش قائم على مقابل ولا بيتحسب فيه مين قدم أكتر ولا بيتقاس بحجم التضحيات أو عدد المواقف حب بيجي هادي بس لما يستقر بيبقى أقوى من أي حاجة تانية.

الحب ده مش محتاج شروط عشان يكمل ولا بيتهز أول ما الظروف تتغير هو مش بيطلب الكمال ولا بيدور على صورة مثالية بالعكس هو بيشوف العيوب ويفضل يفهم الضعف ويطبطب عليه ويختار البقاء مش لأنه مضطر لكن لأنه عايز يفضل

في الحب ده الأمان مش وعد ده إحساس والوجود مش واجب ده رغبة.

كل حاجة فيه بسيطة بس عميقة لدرجة تخلي الروح ترتاح من غير ما تسأل ليه.

يمكن أصعب حاجة في الحب الصافي إنه بيبان عادي جداً لدرجة إن اللي متعود على التعقيد ممكن يشك فيه.

بس الحقيقة إن أنقى المشاعر عمرها ما كانت صاخبه دايماً بتيجي في هدوء وتفضل جوه القلب بثبات كأنها كانت مكتوبة من البداية.