لقاء كارثي
((لقاءكارثي ))
لقاء كارثي
أميره أسامه
صاحبة البطل الواحد
~° البارت الرابع°~
……..
بعد مرور خمس ساعات متواصله من نوم عميق للكل في تمام الساعه العاشره مساءاً
فتحت نادين عينها بهدوء بصت حواليها في البدايه خدت كام ثانيه لحد ما أفتكرت هي فين وايه اللي حصل الكام ساعه اللي فاتوا اول ما افتكرت بدأت تبص حواليها الكل نايم مقتول كأنهم بقالهم كام يوم مناموش حركت نفسها بهدوء عشان متصحيش أي حد فيهم قامت بهدوء من علي الكنبه عدت من جنب التربيزه و بمجرد ما خدت خطوه كمان من جنب الكنبه اللي عشري وليله نايمين عليها حست بصوت مايه بصت تحت رجلها بسرعه و هي مصدومه لقت في مايه كتير بتدخل علي جوه بصت بسرعه علي الباب
لقت المايه خارجه و بعدين بصت لعشري بخوف و توتر و قربت منه بسرعه تهزه
نادين…..بهمس لكن مسموع صوتها كان مهزوز عشري عشري قوم قوم
فتح عشري عينه بسرعه وبصلها
عشري….ايه في ايه ؟
نادين….الحق بسرعه المايه دخلت علينا
عشري….ايه دخلت
فتح عسال عينه و قلقت ليله
عسال….في ايه ؟
عشري…..قوم بسرعه معايا يا عسال
ليله…ايه ده المايه دخلت جوه
الكل بدأ يصحي و يفوق و يتصدم
فضل…قام من علي السلم في ايه يا جماعه
رشيد….مفيش اهدوا المايه سربت واضح انها كترت بره
سلامه…..الشنط خرجت ولا ايه
عشري….لا زي ما هي بس سربت عايزين بسرعه نلم المايه دي و حد فيكم يجي يشيل الحجات اللي هنا.
ايمان….طيب نحط شنط تاني عشان نحبس المايه دي
نادين…..انا مش شايفه حاجه بره مفيش هنا نور ينور بره
عسال…..نادين تعالي انتي هنا ابعدي عن المايه يا جماعه خليكم بعيد احنا هنشيلها هي مش كتير الحمد لله
نادين…..بس هتفضل تنزل الشنط بتدخل مائه
عسال….هنشوف حل متخافيش
ليله…..انا رأيي نجرب الفكره اللي قولتلكم عليها ونفتح الباب ندخل شويه المايه اللي داخلين علينا دول و نسحبها
رشيد….بيتهيألي نجرب
عسال…..خلينا الاول نشوف المايه بره قد ايه لو كتير مش هينفع
رشيد….طيب شوف
عسال….بالكشافات بقي لأن واضح أن الكهرباء بره فصلت أو اللمبات اتكسرت
ليله….طيب لحظه خلينا ننور بالكشاف
عشري….خليكم بعيد لحظه نسحب المايه دي الاول
فضل عشري و حسان و فضل يسحبوا و سلامه وعسال شالوا الحاجه اللي جنب الباب
خمس دقائق وكانوا سحبوها
عشري…..المايه نزلت في الصرف الحمد لله خلينا نشوف المايه بره قد ايه هاتوا كشافات الموبايل
فتحوا الكشافات و نوروها في الشباك
عسال…..عشري بيتهيألي مش كتير أقل من شبر تقريباً
فضل…..بس شبر بأمتداد المساحه اللي بره متنساش يعني كمية المايه مش بسيطه
نادين….يعني ايه بامتداد المساحه اللي بره
فضل….يعني النص شبر اللي بيقول عليه ده في المساحه اللي بره كلها
عسال …يقصد يعني الجزء الزياده ده يا نادين مرتفع بحجم المساحه اللي بره فهمتي لازم الشبر أو النص شبر ده ينقص كله من المساحه اللي بره عشان ينزل من قدام الباب
نادين….اه فهمت طب كده كتير ممكن الصرف مينزلهاش
عشري……بتفكير هاااا نعمل ايه نجاذف ولا ايه؟
ايمان….طيب خلينا نسحبها واحده واحده يعني نسيب الباب زي ما هو و كل ما يدخل شويه مائه نسحبهم
ليله….مين فاضي يفضل واقف بالمساحات قدام الباب انا رأيي افتح واخلص
نعيمه….ليله بلاش تهور مش ناقصه جنان لازم نعمل حسابنا لو المكان غرق هنا مش هقدر نقعد فيه
ليله….وسعوا كده
عسال…رايحه فين
ليله….عسال تعالي معايا لحظه
عشري…..هتعمل ايه دي ؟
ايمان….معرفش
دخلت ليله علي الحمام اللي جنب الباب بتاع الڤيلا و جنب المطبخ علي طول
عسال…..ايه عايزه ايه
ليله….لحظه هقولك حالاً
فتحت ليله حنفيه مايه قريبه من الارض و فتحت الدش علي الارض و خدت جردل بتاع التنضيف
ليله…..عسال املأ الجردل ده علي آخره و ارمي المايه في الأرض
عسال….بتختبري الصرف صح
ليله….ايوه نشوف لو المايه كتير هتقدر تسحبها ولا لا
عشري….وبتقولي عليا انا مختل انتي فاكره كميه المايه اللي هترموها علي الارض قد اللي هتدخل
ليله….لا بس انا بختبر الصرف نفسه حتي لو هياخد وقت في سحب كمية المايه دي كلها المهم أنه مش مسدود و بيسحب
عشري….ليله المايه كتير
ليله….واحنا مش هنخسر اي حاجه و ليك عليا يا سيدي لو الصرف مسحبهاش انا هفضل اشيل المايه و ارميها من الشباك تاني
عشري…لا والله
فضل….بابتسامه اعجاب باصرارها صراحه تجربه مش وحشه و انا معاها و لو حصل هساعدها
ليله….بابتسامه شكراً يا فضل
عشري….طيب خلينا نشوف الصرف الاول
عسال….وسعوا طيب كده
نزل الجردل في الارض و وقع المايه و الصرف سحبها بسرعه
عسال….بيسحب يا عشري
عشري….طيب خلينا نروح نرفع اي حاجه ممكن تتغرق و انتوا يا بنات هتطلعوا كلكم علي الدرج عشان محدش يتغرق.
نادين….بخوف بلاش و النبي
ليله….رفعت حاجبها بقولك ايه بلاش انتي تبقي جبانه انتي مش بتثقي فيا يبقي متخافيش احنا مش غرقانين في سفينة تيتانك دول كلهم شوية مايه لو مخلصناش منهم هتفضل تحت رحمة شويه اكياس بلاستيك
ضحكوا كلهم علي كلمه سفينة تيتانك
عسال….بابتسامه طيب اهدي انتي بس كده و براحه عليها هي خايفه عادي
ليله….ايوه خايفه من ايه احنا ما صدقنا السيول والمطر وقفوا شويه خلينا نتخلص بقي من الحبه دول احسن المطر يرجع تاني
عسال…..طيب تمام و انتي يا نادين متخافيش اعتبري أن الشقه غرقانه عادي بتحصل
هزت نادين راسها و سكتت
عسال….يلا تعالوا اقفوا كده فوق اطلعي يا نادين معاهم يلا
ايه…..ميلو فين ؟ استنوا
حسان…اهو اخو خدي
ايه….تعالي يا ميلو
عشري…..في اي حاجه تاني علي الارض
سلامه….بضحك لا كله تمام يلا افتح و ربنا معانا هنغرق يا نودي
عسال….يا عمممم اسكت بقي شويه
ايمان….بيخوفوكي يا عبيطه
ابتسمت نادين بتوتر و عينها كانت علي الباب
عشري…..يلا بسم الله
وقف سلامه و عسال كل واحد فيهم بمساحه فتح عشري الباب و بمجرد ما فتح بدأت المايه تدخل باندفاع لجوه لحد ما وصلت لاول درجه من كميتها و الشباب بسرعه كانوا بيسحبوها مش بيقفوا
رشيد….هات يا سلامه اسحب شويه
خدها منه و فضل يسحب مع عسال شويه و حسان خدها منه
ليله….شوفوا السحب الصرف كويس
رشيد..كويس بس الحمام اتملأ
عشري….اسحب اسحب المايه كتير
فضلوا الشباب السته يبدلوا مع بعض اكتر من نص ساعه بيسحبوا المايه و تدخل غيرها و الصرف كان بيسحب بس من كتر المايه كان بيسحب براحه
قربت ليله من الباب كان لسه في مايه كتير جوه الڤيلا بس لحد كبير بدأت المايه تقل اللي قدام الباب من بره
ليله…..المايه بتقل الحمد لله
فضل…..فكرتك يا ليله
عشري…..طلع يجي منك اهو
ليله….اتريق اتريق مش احسن ما اعمل فيها ساحر و افضل اسد بشنط
عشري….لا والله تنكري أن الشنط دي خلت المايه تتسد لوقت طويل
ليله….لا منكرش بس في الاخر المايه اللي اتسدت بقت كتير و في الاخر دخلناها
حسان….بااااس بلاش خناق المهم اننا حلينا الموضوع
رشيد….بضحك تعالي يا اللي بتتخانق اسحب شويه ايدي و جعتني
عشري….وسعي كده
ليله…..ايه ساده المكان عنك ما تدخل
ايمان…..نيجي نساعدكم طيب
رشيد….زي ما انتي متجيش احنا هنعمل كل حاجه
بصت ليله علي العربيات و هي بتوجه الكشاف عليهم
ليله….بحزن عربياتنا اكيد باظت يا ايمي
ايمي….غرقانه خالص
ليله…..العجل مش باين اصلا و طلعت لفوق
فضل…..متقلقيش هنظبط كل حاجه و أن شاء الله هترجع تشتغل
رشيد…..هنصلح عربية ايمي بس خلي ليله ترجع مشي
ليله….مش هرد عليك علي فكره
ضحك عشري وراح قعد علي الكنبه بتعب
عشري….ااااه و أخيراً
حسان….مفيش مايه تاني في المكان
عسال….لا كلها اتسحبت المهم بره ايه خلوني اشوف
ليله…..نزلت تاني لاول درجه الحمد لله
عسال…طيب كويس الحمد لله و سعوا كده بقي شويه
راح نام علي الكنبه من التعب
عشري…ايه خلصت ؟
عسال….اه والله
عشري….فكرة الاستاذه ليله واقفه هي و احنا طالع عيننا
ليله….بضحك بس النتيجه نجحت
سلامه….تعالوا يا بنات انزلوا خلاص
عشري…انا نسيتكم صحيح انزلوا و اقفين كده ليه
نادين….طيب مش هتقفلوا الباب
سلامه….بابتسامه هنقفلوا اكيد تعالي متخافيش
ايمان…..بت انتي متستفزنيش دي ليله عندها حق تتعصب عليكي
نادين…..ايه انا عملت حاجه!
ايمان….محسساني أن في عفاريت و فضائين هيدخلوا علينا من الباب
عشري….هما مالهم ومالك يا نادين مستقصدينك ليه
نادين…..مش عارفه رخمين
رشيد….حسان انت بتعمل ايه انت وفضل؟
فضل…..بناخد كام جردل كده عشان المايه بره تخف شويه
حسان…عايز المايه تنزل شويه اكتر من الدرج عشان فوق المكان قدام الباب يبقي ناشف شويه يعني مش معقول طول الوقت هتفضل قافلين الباب و مخنوقين كده
رشيد….بس المايه كتير هتتعبوا
حسان….اهو شويه بسيطه بس و الحمام مش بعيد
رشيد….الصبح هحاول انا اشوف حوار الصرف اللي بره غالباً مسدود من ورق الشجر
حسان….ماشي بكره نشوفوا سوا
قربت نادين منهم تبص
نادين…..المنظر صعب اوي و مرعب ضلمه خالص
حسان…اه اللمبه دي اتكسرت و دي كمان مكسوره
فضل…..ممكن اصلا المطر يكون بوظ الكهرباء هنا
حسان….لا ميتهيأليش هما بس عايزين لمبات جديده
دخلت نادين قعدت جوه و بعد شويه كلهم دخلوا بس سابوا الباب مفتوح
غيروا هدومهم اللي اتغرقت و نزلوا
نزل عسال من جوه بهدوء كانوا كلهم بيتكلموا مع بعض اللي قاعد بره واللي في المطبخ.
مسك كرسي من بتوع السفره و خرج علي بره
سلامه…..خرج بره انت بتعمل ايه
عسال…امسك كده اللمبه دي خليني اجرب اغيرها
سلامه….جبتها منين دي
عسال…..خدت من اوضتنا واحده و من الأوضاع التانيه واحده خلينا نجرب كده لو اشتغلوا نخليهم عشان متبقاش الدنيا ضلمه كده
سلامه….طيب و الاوض فوق
عسال…..لا فيها نور أصلاً في تلاته في كل اوضه انا خدت واحده من كل اوضه يعني منوره متقلقش
سلامه….طب خلي بالك احسن تتكهرب
عسال…..متقلقش هات كده لمبه
سلامه….امسك
ركبها عسال و نزل عشان يروح التانيه يركبها
سلامه…..منورتش شكلها بايظه
عسال ….لا انا قافل النور عشان متكهربش خليني اركب دي و بعدين نجرب
سلامه….طب يلا اطلع
طلع عسال وقف فك الدوايه المكسوره و خد اللمبه التانيه من سلامه ركبها ونزل
سلامه…..ايه اجرب ؟
عسال….اه روح كده افتح النور
دخل سلامه علي جوه
عشري…..بتعملوا ايه بره يا سلامه
سلامه…..عسال بيركب نور يمكن يشتغل
عشري….قام وقف خلي بالك يا عسال احسن تتكهرب
بصت نادين بهدوء علي بره و سكتت
عسال….متقلقش ركبت خلاص ما تفتح يا سلامه يلا
فتح سلامه النور و المكان نور بره
عشري….الله ينور
سلامه….نهار ابيض ايه المايه دي كلها
عسال….المهم أن الكهرباء مش بايظه خلينا بكره نشوف حل احسن العربيات شكلها مش هتتحرك من مكانها بالشكل ده
رشيد….الله ينور يا ميدو
عسال….حبيبي سلامه خد الكرسي ده دخلوا
سلامه….ماشي بقول ايه تعالوا بقي ندخل و نشوف لو هناكل
عشري….انا عايز قهوه عربي
سلامه….لا مع نفسك انت و فضل بقي مش بنعرف نعملها
عشري……يلا انا هعملها ادخلوا وسيبوا الكرسي ده هنا عشان لو حد حابب يقعد قدام المنظر الحلو ده
ضحكوا كلهم
عسال….اه نعتبر نفسنا علي البحر
رشيد….علي فكره الجو بقي حلو يعني مش برد اوي
سلامه….هي بس لو تفضل كده و متمكرش تاني يبقي تمام
رشيد….أن شاء الله مش هتمطر تاني مبقاش فاضل حاجه تبوظ في البلد غير البيوت و الڤلل
دخلوا كلهم مع بعض
عشري…..المكان بره نور تاني عسال ركب نور متقلقيش خلاص يا نادين
دخل عسال من وراه و بص علي نادين بهدوء و ابتسم
بصت نادين علي عشري و بعدين بصت لعسال و بسرعه بعدت عينها
ليله….يارب نبطل خوف بقي مبقاش في ضلمه شكراً يا عسال عشان رحمتنا من وجع الدماغ
عسال…..العفو بس فداها وجع الدماغ المهم تبقي متطمنه
ابتسمت نادين بتوتر و بصت علي الارض و هي بتلعب في شعرها
حسان…..هي الساعه كام معاكم ؟
سلمي….داخله علي 11 هو انتوا بتعملوا ايه في المطبخ
حسان….مش عارف بس غالباً بيعملوا اكل
ايمان….مش عايزين مساعده
عشري…تعالي تعالي
قامت ايمان من مكانها
ايمان…ايه بتعملوا ايه ؟
عشري….سلامه عايز يعمل اكل بس مش عارف يعمل ايه
ايمان…..ايه يا سلامه عايز ايه
سلامه….مش عارف انا جعان تفتكري ينفع نعمل اكل الوقت ولا نقضيها حاجه خفيفه
ايمان….براحتكم بس بيتهيألي نقضيها حاجه خفيفه
عشري….بضحك وهو بيعمل القهوه يبقي ملهاش في الطبخ و بتقولك بلاش احراج
ايمان….بضحك عيب عليك انا بعرف اعمل اكل بس اقصد أن كلنا باين علينا التعب لسه محدش فينا ارتاح كفايه من السفر و و المجهود غير الحوارات اللي حصلت دي بقول خليها بكره
ليله…..قعدت علي كرسي البار انتي بتشرحيلوا ليه بتعرفي أو مبتعرفيش حاجه متخصهوش
عشري…..بابتسامه اللهم اغزيك يا شيطان
ليله….قصدك ايه انا شيطان
عشري….قصدي انك بتجري شكلي وانا مش هرد عليكي
سلامه….بضحك هو مش المفروض انكم عملتوا اتفاقية سلام
عشري…والله يا ابني انا مجاش جنبها من الاول أصلاً و بعدين انا بكلم ايمي هي بتدخل ليه
ليله….عشان صاحبتي و بتتريق عليها
عشري….انا متريقتش و بعدين انتي ايه اللي دخلك في الحوار اصلا و لا الكلام جه علي الجرح و مش بتعرفي تطبخي
ايمان….بضحك حصل
ليله….تصدقي انا غلطانه اني بدافع عنك و يلا لو سمحت بقي انا جعانه و مش عامل حاجه خفيفه اتفضلي اطبخي
عشري…..مفيش طبخ بقي ايمي معاها حق هنالك حاجه سريعه لو مصممه بلا تعالي ورينا مهاراتك في الطبخ عشان محدش فينا قادر
ليله…..انت بتذلني يعني و بعدين انت بتعمل ايه دي شوربه
ضحك سلامه بصوت عالي
عشري….بنظره صدمه شوربه دي قهوه
ليله….قهوه ازاي يعني ؟
عشري….ايه عمرك ما شربتي قهوه عربي؟
ليله…..اااااااه عرفتها لا دوقتها قبل كده بس وحشه اوي بتشربوها ازاي
عشري….وحشه اوي أذواق
ليله…..اه طبعاً أذواق دي قهوه تتشرب دي شوربه و الله
فضل….بابتسامه وقف جنبها وسند علي البار ايه ده ايه بتتكلمي عن القهوه العربي كده ازعل انا كده
ليله…..انت بتشرب البتاعه دي انت كمان
فضل…..طبعاً
ايمان…..يا بنتي كل البدو والعرب بيشربوها دي قهوتهم المفضله و مشهورين بيها كمان و علي فكره حلوه اوي انا بحبها
عشري….بتشرحي لمين انتي دي واحده مش بتعرف تطبخ و ملهاش في المطبخ
ليله….بضحك مش هرد عليك
بعد و قت بسيط خرج سلامه و ايمان و فضل معاهم اطباق فيها سندوتشات و خضار و فاكهه و قعدوا بره
ايمان….يلا يا جماعه العشاء جاهز
حسان….تسلم ايدك
ايمي….سلامه وفضل ساعدوني كمان
حسان…تسلم ايد الجميع يلا تعالوا اقعدوا
رشيد….خلينا بقي هنا علي الكنب و قرب التربيزه
قعدوا كلهم كلوا مع بعض و خلصوا اكل
قام عشري جاب ترمس القهوه العربي هو وفضل و تمر و فناجين و راحوا قعدوا.
رشيد….حد عايز شاي
حسان…انا يا رشيد
عشري…..في قهوه يا حسان
حسان…..ماشي بس خليني اشرب شاي الوقت
ايه…..هي ده قهوه خضراء
عشري….هي لونها اخضر شويه بس مختلفه عن القهوه الخضراء تجربي
ايه….بحماس ماشي
ليله….بنظره قرف هتشربيها
ايه….ايه هي وحشه
ليله…..ريحتها عامله زي الشوربه
عشري….بضحك مالك ومال القهوه طيب جربيها الاول
ليله….جربتها قبل كده بس معجبتنيش
حسان…..حلوه علي فكره هتعجبك و بعدين كل واحد وليه طريقته جايز اللي شربتيها مكانتش حلوه
نعيمه….طيب انا عايزه اجرب
عشري…..استني هحطلك
حطلهم عشري داقت ايه و استغربت الطعم
ايه….هي حلوه بس يمكن عشان انا مش متعوده عليها
سلمي….دوقيني كده
عشري….استني هحطلك
سلمي….لا خليني ادوقها من ايه الاول
نعيمه….طب والله مش وحشه
فضل….كلي معاها تمر هتعجبك اكتر
عشري….ايه رأيك يا سلمي
سلمي….عادي مش وحشه يعني تتشرب
عشري….شايفه الناس اللي بتفهم
نادين….بهمس مسموع لايه انا هموت علي نسكافيه
ايه…..في نسكافيه جوه انا شوفته وهما بيفضوا الشنط
نادين….ماشي الوقت اقوم اعمل
ايمان…..تسلم ايدك يا عشري بجد حلوه اوي انا شربتها كتير بس دي من احسن المرات اللي شربتها فيها بيتهيألي في ناس بتعملها تقيله مش بتبقي حلوه
عشري….لا تتحل تقيله ولا خفيفه يعني هي ليها ظابطه خصوصاً علي حسب الحاجه اللي هتحطيها فيها
سلمي….طيب انا عايزه ممكن
عشري….طبعاً هات يا سلامه
سلامه….استني انا هحطلها
مسك سلامه فنجان و حط فيه قهوه للآخر
عشري بصلوا بصدمه و ظهر العرق العرباوي فجأه
عشري…..ايش بك يا رچال شن علييهِ
سلامه….بضحك في ايه انا هببت ايه
عشري…..لييهِ سويتها كذيه فضل سلامه يدربي راسه ذا ما يتعلم انت ضايفها.
كلهم ضحكوا والبنات مكانوش فاهمين
ايمان…..انت قولت ايه دي تعويذه
فضل….بضحك طيب هات يا سلامه
سلامه….والله انت ما بيعجبك العجب
ليله….هو انتوا بتضحكوا يعني فاهمين يقصد ايه؟
سلامه…..بضحك لا متحطيش في بالك هو كان بيشكر فيا
حسان….كذاااااب
نعيمه…..لا بجد انزل بالترجمه
عشري….بابتسامه هز راسه عصبني بس
نعيمه….ايوه طيب ترجم عشان نفهم العصبيه ليه
رشيد….انا هقولك اللي فهمته لأن في كلام لحد الوقت مش بفهم شن عليه يعني بصلي صح يا عشري
عشري….بضحك ايوه صح
رشيد….بس حلو كده عليا
نعيمه….طب وباقي الكلام
فضل….يدربي راسه يعني مبيفهمش من الاخر
سلامه….بضحك شكراً يا فضل عالترجمه
ايه….طيب مش بيفهم ايه انا مش فاهمه
ليله….لحظه هو انا اكيد مفهمتش الحوار بس تقريباً فهمت الموقف هو فضل مسك الفنجان فضاه تاني في الترمس ده و بعدين حط حبه صغيرين نهار اسود لو زعلان أنه ملأ الفنجان للآخر
سلامه….بضحك اه والله هو التعصب عشان مليته علي الاخر
ليله…..اااااه طلعت بخيل كمان
عشري…..بخيل ايه هفهمك
ليله….فهمني يلا
ايمان….بضحك هو تقريباً بيفضل يعني أن الفنجان ميبقاش علي آخره صح
عشري….صح بس ده لسبب لأن عندينا عيبه كبيره انك تملي الفنجان لاخره هو لازم يكون كذيه
ليله…كذيه ايه و بتاع ايه احنا بنسكر
ضحكوا كلهم علي ليله
عشري….بضحكه جميله لا بس يعين لما يكون في ضيف ميصحش في عوايدنا انك تملي الفنجان و كأنك بتقولي يعني بعد ما تشرب دول ضيافتك خلصت لازم يكون شويه شويه يعني معناها انت في دارك
ليله…لا والله
فضل….بضحك اه والله هو بيتكلم صح ميصحش نملأ الفنجان للآخر احنا بنحط قدام الضيف الفناجين و الغوري
نعيمه….لحظه لحفظه قفشت كلمه ايه الغوري ده ؟
فضل….بضحك يعني الابريق أو الترمس زي ما بتقولوا انتوا المهم يعني بنحطهم قدامه و هو يفضل يشرب براحته فهمتي
ليله….طب افرض انا مش بحب الفنجان ناقص و هشرب تاني عادي
فضل….براحتك بس لو احنا اللي بنضايفك ميصحش يكون علي اخره هاذي عوايدنا
عشري….شوفتي كيف ظلمتيني
ليله….بضحك ااااه ظلمتك
ايه….الله انا عايزه اروح اعيش معاكم
عشري…بضحك تنوري نشيلك عراسنا
عسال…..اهو انا بقي مش بحب احط لاي حد عشان مسمعش الكلمتين دول لاني بحب احط الفنجان لاخره
ليله….انت صح سيبك منه و بعدين انت مش عايش في القاهره تمشي علي عوايدنا احنا
عشري…في مثل عندينا بيقول قطع الورايد و لا قطع العوايد وعموماً الغوري قدامك اشربي براحتك
ليله….لا شكراً مش بحبها
قامت ايه وخرجت و قفت علي الباب و هي شايله ميلو راحت نادين وراها بهدوء.
ايه ….الجو بقي حلو
نادين…..اه كويس أنهم حطوا اللمبات دي تنور شويه كان المنظر مرعب
ايه…..بضحك تحسي أن في بيسين قدامنا بفكر انزل في المايه انا و ميلو نلعب
نادين….بابتسامه اه عشان لما نقول روحنا البحر نبقي صادقين
ايه….عملتي النسكافيه بتاعك
نادين….لا هروح اعملوا الوقت مش عايزه
ايه….لا مش قادره شويه كده اعمل
نادين….ماشي
دخلت نادين علي المطبخ لمحت عسال واقف ارتبكت اول ما شافتوا وبصت بعيد عنه
قرب منها عسال و هو في أيده كوبايه نسكافيه
عسال….اتفضلي انا مزودتش سكر عشان مش عارف بتشربي قد ايه
نادين….ايه ده ؟ ده ليا
عسال….بابتسامه اااا اه سمعتك من شويه بتقولي عايزه نسكافيه فا عملتلك
نادين….بتوتر اكبر من اهتمامه الغريب اللي هي بتهرب منه اااا لا لا شكراً انا كنت جايه أصلاً اعمل اشرب انت انا هعمل
عسال….بأبتسامه انا مليش اوي في النسكافيه ده عشانك امسكي
مسكت نادين منه الكوبايه من غير ما تتكلم او حتي تشكره و سألها عسال و خرج لما حس انها محرجه
بصت نادين بهدوء عليه راح عسال قعد بص للشباب و هما بيتكلموا و يضحكوا وبعدين رفع عينه بهدوء بصلها بسرعه بصت نادين قدامها و هي بتداري ابتسامتها.
خرجت بعد دقيقه و راحت عليهم من غير ما تبصلهم
سلمي…..تعالي يا نودي هنا
بصت نادين علي المكان جنب سلمي عسال كان قاعد بعد شويه و وسعلها المكان
راحت قعدت من سكات جنبه هو وسلمي
عسال…..بهمس بسيط السكر كويس
بصتلوا نادين بإحراج و هزت راسها
نادين…اااا اه اه كويس اااا شكراً تعبتك
فضل عسال باصص قدامه و ساكت واول ما حس انها بصت قدامها همس بهدوء و هو باصص علي الشباب و البنات
عسال….العفو انا مبسوط مفيش تعب
حست نادين أن قلبها بيدق جامد هي من اول ما وصلت بتحاول تتخطي نظراته و طريقته واهتمامه لكن مش عارفه.
دخلت ايه تاني و فضلت واقفه و هي شايفه ميلو
قام عسال وقف و بص لايه
عسال….ايه تعالي اقعدي
ايه….ايه ده انت قومت ليه لا خليك والله
عسال….روحي بس انا هقعد هنا
ايه…..انا هقعد علي كرسي السفره بالله عليك خليك
عسال….روحي بقولك انا هقعد هنا جنب عشري
حط عسال مخده و قعد علي الارض و هو عينه علي نادين
ارتبكت اكتر قعدتها جنبه كانت موتراها بس اتوترت اكتر لما راح قعد قدامها و كأنه قاصد عينه تكون عليها اكتر
حط عشري فنجان لعسال
عسال…..امسك يا عسال
عسال…..حبيبي
رشيد….صحيح انتوا عايشين فين في القاهره ؟
ايمان….انا في مدينتي و العيال دول ساكنين جنبي
رشيد…..مين ؟
سلمي….انا وايه
ليله…..وانا و نوني و نادين في التجمع
رشيد….علي فكره احنا تقريباً مش بعيد عن بعض
ليله…..انت منين يا رشيد
رشيد….انا قاعد في الرحاب انا و حسان
ليله….بجد احنا بينا تلت ساعه تقريباً
رشيد…اه قريبين اوي و عسال و سلامه كمان قريبين اوي منكم
ايمان….قاعدين فين يا سلامه
سلامه….احنا في مدينة نصر في عباس العقاد
ايمان…..بجد والله احنا قريبين اوي من بعض
نعيمه…..طيب وعشرين و فضل فين في القاهره
فضل…..بضحك احنا في الجنب التاني في اخر الدنيا
ليله…..ايه اكتوبر
فضل….بابتسامه في زايد
نعيمه….يالهوي علي الحدفه
فضل…..مش حدفه اوي يعني بينا حوالي ساعه إلا ربع او اقل كمان حسب الطريق
حطت نادين شعرها وراء و دنها و بهدوء راحت بعينها علي عسال لاقيته باصص عليها و في نظره ابتسامه هاديه و جميله علي وشه لفت وشها بسرعه و هي بتحاول تسيطر علي ابتسامتها العبيطه .
حسان….طيب انتوا اللي في مكان واحد عايشين مع بعض ولا لا
ايمان….لا انا مع اهلي
سلمي….وانا وايه مع بابا عادي
حسان…..ساكنين في مدينتي من زمان بقي
سلمي….لا لحد من خمس سنين كنا ساكنين في الزمالك بس نقلنا بقي بعد إقناع كبير لبابا و روحنا جنب ايمي
سلامه….طب اشمعني جنب ايمي ليه مش جنب ليله و نادين و نوني
ايمان….بضحك انت جاي توقعنا في بعض ولا ايه
سلامه….بضحك لا والله سؤال برئ
ايه……عشان سلمي و ايمي بيتابعوا الشغل في المطعم مع بعض
سلامه….مطعم ايه انتوا فاتحين مطعم؟
ايمان…..اه بس مش بتاعي انا وهي بس ده شرك بيننا كلنا
سلامه…..حلو براڤو طب اسمه ايه يمكن نكون عارفينه
ايمان….اسمه موكا
سلامه….موكا !!
ايمان…..هو بقاله سنه بالظبط يعني يعتبر لسه جديد و مش مسمع اوي
رشيد….بس والله براڤو عليكم انكم مشاركين بعض
سلمي….احنا مشاركين بعض في كذا حاجه بس كمان كل واحده فينا عندها شغلها الخاص
رشيد…..طيب هو حاجه حلوه انكم تشاركوا بعض طبعاً بس بصراحه كده الشراكه بينكم حلوه أصل يعني من غير زعل اللي اعرفوا أن البنات مش بيتفقوا مع بعض اوي زي الشباب حتي لو بيحبوا بعض و بالمناسبه انا و الشباب في بينا شراكه في شغلنا بس احنا تمام الحمد لله
سلمي….بالعكس احنا مفيش بينا حوارات البنات دي
ايه…..أصلاً انا عن نفسي يعني بحس أننا بنكمل بعض
ليله…..طول ما في اتفاق و أننا ناخد رأي بعض بيبقي الموضوع اسهل كتير و مريح و الاهم كمان أن في ثقه كبيره بينا مش بس في الماديات لا في القرارات يعني لو في قرار اي حد فينا خده الباقي مش بيعترض لأنهم بيبقوا عارفين أن ده اكيد في مصلحة الشغل
عشري…..طيب المطعم ده فكرة مين اكيد ايمي بما انها بتحب الطبخ
ايمي….لا والله ده فكرة سلمي بس انا بما اني بحب الطبخ و المطبخ وافقت اينعم مش انا اللي بعمل بأيدي و في شيفات بس طول ما انت بتحب الموضوع نفسه و فاهم فيه بتبقي متحمس للفكره
سلامه….طيب انتوا ليه بقي مش قاعدين جنبهم في مدينتي ؟
ليله….عادي هي جات صدفه أصلاً أولاً انا و نوني قاعدين مع بعض في نفس الشقه تمام نودي هي اللي قاعده في شقه لوحدها
بصت بسرعه نادين علي عسال لاقيته مبتسم ليها و مضيق عينه باستفهام كأنه عايز يعرف ليه عايشه لوحدها ابتسمت ابتسامه بسيطه و بعدت عينها عنه
ليله…..في البدايه خالص نادين هي اللي ساكنه من قبلنا في التجمع من سنين يعني انا يعني حصل معايا حجات كتير المهم يعني كنت بشتغل في الامارات كذا سنه و لما نزلت خالص وقت الكورونا قررت اني اقعد جنبها و في نفس الوقت نعيمه كانت قررت تستقل و تشوف مكان لوحدها تعيش فيه فا اتفقت انا وهي نعيش مع بعض بس.
عشري…..عسال قهوتك
بص عسال علي الفنجان لقي عشري حطلوا قهوه تاني
عسال….حبيبي
حسان….طيب ايه رايكم كل واحده فيكم تحكي كده عن نفسها و تعرفنا اكتر علينا و اكيد احنا كمان هنعرفكم علي نفسنا
عشري…..بسخريه بص لليله و ابتسم ما بلاش كلام شخصي عشان في ناس شكلها مش حابه
ليله….بضحك اه انا شايفه كده بردوا
فضل…..سبحان الله قط و فار
ليله…..لا أصله كان بيتكلم معايا قبل ما ننام و حسيت اني مش شايفه قدامي و لما هو سألني قولتله بعدين نكمل عشان هنام فا شكلوا مش ناسيها
فضل….اه بيأنبك يعني
ليله….حاجه زي كده يا فضل
عشري….بابتسامه لا والله بس انا الوقت بتكلم جد يعني احنا اكيد الوقت بينا طويل اوي و يمكن نكون زهقانين و محتاجين نضيع وقت بالكلام و أننا نتعرف علي بعض بس لو في حد اتسأل اي سؤال شخصي و مش حابب يجاوب اكيد هنحترم ده
رشيد….ايوه عشري معاه حق اللي مش حابب يتكلم في اي حاجه خاصه بلاش يتكلم
ايه….طيب ايه رايكم نمشيها اسئله
نعيمه….بضحك ايه عايزه تحسي أننا في رحله و كده و نمشيها اسئله
ايه….يا ستي سيبيني في حالي اهو اي حاجه تحسسنا بجو الرحلات بدل ما الرحله باظت كده خالص
سلمي….استني بس انتي عايزه تمشيها لعبة الصراحه والجو القديم ده
ايه….لا صراحه ايه اقصد يعني اللي يتكلم و يجي عليه الدور كل واحد فينا يسألوا و يتعرف عليه بطريقته و لو حد سأل سؤال التاني يشوف غيره يعني نختصر لحد ما كل الاسئله للشخص ده تخلص
رشيد….حلو خلينا نبدأ من فين بقي
ليله….ممكن تبدأوا بيا انا
رشيد…..حلو يلا نبدأ من عند ليله بما انها جاهزه
فضل…..انا عندي سؤال و تقريباً البنات مش بتحب حد يسأله اكيد عرفتيه
ليله….بابتسامه عندي كام سنه اكيد
فضل….بالظبط لو مش حابه تجاوبي عادي
ليله….لا خالص انا 36 سنه
فضل….العمر كله
ليله…..تسلم
حسان….طيب ليله انتي كنتي مرتبطه أو مرتبطه
ليله…..لا مش مرتبطه كنت مرتبطه من قبل ما اسافر و سيبنا بعض انا قعدت في الامارات ثلاث سنين يعني تقدر تقول اني مفيش حد في حياتي من حوالي ثمان سنين
حسان….ثمان سنين طب ليه مفكرتيش يعني شايف انها فتره طويله
سلامه….اكيد كرهها في الارتباط
ليله….لا بالعكس خالص احنا سيبنا بعض بكل احترام هو كل الحكايه كان رافض موضوع سفري و لما صممت علي قراري قالي أنه مش هيقدر و انا احترمت صراحته و نهينا الموضوع بكل احترام و عرفت بعد كده لما رجعت أنه اتجوز و كان عنده بيبي و زمانه خلف تاني
رشيد….طيب زعلتي ؟
ليله….خالص والله هو كان معايا حد محترم و لما نهينا اللي بينا نهينا كل حاجه باحترام و بس
عسال…..طيب انا هسألك سؤال
ليله….اكيد اتفضل
عسال…..ليه لما رجعتي و استقريتي مجربتيش انك تجربي تاني
ليله…..عادي والله يا ميدو كل الحكايه اني محستش اني لاقيت الشخص المناسب
فضل….طيب قوليلي يا ليله بصراحه يعني اكيد انتي لسه صغيره و زي القمر بس عمرك ما فكرتي انك محتاجه ترتبطي عشان العمر ميجريش بيكي
ليله….بالعكس أنا بشوف أن العمر ده اخر حاجه اي بنت المفروض تفكر فيها يعني متحاولش انها تدي فرصه لنفسها انها تتأثر بكلام الناس و اسألتهم و لا تحس انها كبرت و بقت عانس المصطلح اللي بجد مش بحبه خالص انا عندي افضل عايشه لوحدي ولا اني اتجوز جوازه اندم عليها و اظفن نفسي فيها بالحياه
رشيد….برافو عليكي والله
ليله….كمان في حاجه اهم و اسفه ليكم يعني مش قصدي بس انا بالنسبالي الجواز مش حلم كبير لازم احققه بسرعه و لا هو قطر زي ما بيقولوا بيفوت اللي مش بتتجوز في سن معين انا يا جماعه اكيد نفسي احب و اتحب بس كمان محتاجه لما اعمل كده اختار راجل بجد ابقي واثقه أن اللي باقي في حياتي هعيشه معاه في امان و حب و ود
حسان….انتي صح و ياريت الكل يكون بيفكر بنفس الطريقه و مش بس انتوا كا بنات لا حتي الشباب المفروض يفكروا بنفس الطريقه
رشيد….علي فكره انا مع أن خطوة الجواز دي تكون متاخره شويه انا ضد الجواز بدري
ليله…..انا كمان علي فكره بحس أن البنت او الشاب لو اتجوزوا و هما لسه في أول العشرينات بمجرد ما بيوصلوا لنص الثلاثينات بيزهقوا من بعض ولو في بينهم ولاد بتبدأ المسؤوليه تزيد عليهم و بيبعدوا عن بعض من غير ما يحسوا و بتحصل مشاكل كتير بحس انهم بيتوهوا عن بعض و كل واحد فيهم بيبقي غرقان في مسؤوليات ملهاش نهايه.
حسان…..فعلاً بيحصل
سلامه…..طيب قوليلي يا ليله انتي يعني عموماً فاتحه قلبك ولا قفلاه
ليله….لا طبعاً اكيد فاتحه قلبي ليه هقفله بس زي ما قولتلك لسه النصيب مجاش يعني مستنيه اللي احس معاه بالامان مستنيه احس أن هو ده الراجل اللي بدور عليه.
خبط عشري علي كتف عسال اول ما عسال بصلوا شاور عشري بعينه علي الفنجان بتاعه.
عشري…..قهوتك
عسال….بنفاذ صبر بصلوا بطرف عينه حبيبي
فضل….طيب بقول ايه عشان متفضلش نسأل في شخص واحد بس خلي الاسئله تكون علي الكل يعني اللي عنده سؤال لحد معين يسأل
ايه….ماشي احسن بردوا كده هنقعد سنه
عشري….طيب قبل ما تسأل ا بعض انا عندي سؤال ليكي يا ليله
ليله….بابتسامه رفعت حاجبها خير يارب
عشري…..بابتسامه جميله لا خير متقلقيش قوليلي انتي ليه عايشه لوحدك يعني فين اهلك و السؤال ده ليكي يا نوني انتي و نادين
ليله….طيب انا هرد عن نفسي انا اكيد عندي أهل أولاً احنا اربع اخوات ثلاث بنات و ولد انا اصغر واحده فيهم اخواتي الثلاثه متجوزين بابا متوفي وانا في ثانوي كنت عايشه مع ماما لحد ما اتوفت هي كمان و هي اتوفت في 2016 بعد وفاة ماما اخواتي حاولوا اني اروح اعيش معاهم بس انا مرضتش لا كنت هرتاح ولا كنت هريحهم لأن انا عارفه نفسي كويس ليا طبع وهما ليهم طبع تاني خالص اخويا طيب كده وفي حاله و طول عمري مش قريبه منه اوي طبعاً مفيش بينا مشاكل بس هو أكبر مني بحوالي 14 سنه فا مفيش بينا كيميا خالص اخواتي البنات قريبين مني جداً واحده فيهم أكبر مني بست سنين و الكبيره بتاعتنا بقي أكبر مني ب16 سنه دي بقي روحي يعتبرها امي التانيه حتي جوزها قريب مني جداً و محترم و كتير اوي بعد موت ماما طلبوا مني اعيش معاهم وانا رفضت اسيب البيت فضلت عايشه في البيت بعد وفاة ماما حوالي اربع شهور بس بصراحه لما ماتت كانت نفسيتي زي الزفت مكنتش قادره اتخطي موتها لأن هي ماتت و هي كويسه جداً و ماتت بشكل غريب كنت قاعده انا و هي بنتفرج علي فيلم و كنت نايمه في حضنها و بنضحك وفجأه راسها وقعت فكرتها نامت حاولت اصحيها مصحيتش و وقتها انا انهارت .
سكتت شويه و عينها دمعت و بعدين ابتسمت و رفعت عينها لفوق عشان دموعها متنزلش
عشري….انتي كويسه
ايمان….بتأثر لا عشان خاطري اوعي تعيطي
ليله….بضحكه مكسوره لا لا انا كويسه
قام عسال راح علي المبطخ
عشري…..حقك عليا خلاص متحكيش حاجه انا معرفش والله
ليله….بابتسامه لا عادي والله انا تمام
عسال…..اشرب يا ليله
ليله…..بابتسامه ميرسي يا ميدو
مسكت الكوبايه في ايدها و خدت نفس
ليله…اااا المهم يعني فضلت اربع شهور مش تمام و بعدها بالصدفه جه قدامي حوار السفر فا قولت اكيد مش هيخرجني من الحاله دي غير اني اسافر و اشتغل وقتها انا كنت شغاله هنا في شركة تسويق و كان ليها فرع في الإمارات و كانوا طالبين موظفين هناك طلبت اني اسافر و لاقيت كل حاجه بتخلص بسرعه و بتتسهل و طبعاً وقتها انا كنت مرتبطه زي ما قولتلكم لما عرف رفض و قالي خليكي هنا بس انا مكنتش قادره وقتها قالي انا يصعب عليا اني ابعد عنك و اسيبك في الظروف دي بس انا بني ادم و مش هقدر اتحمل انك تشتغلي بره احترمته و قولت ده رأيه و يمكن معاه حق بس كمان انا مش قادره كنت محتاجه اخرج بسرعه من الحاله دي و سافرت علي اول السنه قعدت من 2017 لآخر 2019 و علي بداية 2020 لما بدأت الكورونا تظهر بصراحه خوفت و قررت انزل. و بس هي دي كل الحكايه لما نزلت بقي محبتش اقعد في بيتنا عشان كنت ماصدقت اخرج من الحاله دي و وقتها نادين كانت عايشه في التجمع و نعيمه كمان كانت مقرره تستقل بنفسها فا اتكلمنا مع بعض و خدنا القرار.
حسان….بس انتي علاقتك باخواتك كويسه صح
ليله…..اه طبعاً دول حياتي كلها و مرتبطه جداً بولادهم
سلامه….طيب انتوا صحاب من زمان يعني كل الأحداث اللي حكتيها دي كنتوا مع بعض فيها و لا لأ.
ليله…..احنا صحاب من سنين كتير اول حد كنت اعرفه كانت ايمي كانت تعرف اختي اللي هي قبلي علي طول كانوا صحاب بس مش للدرجه و بعدين اتعرفنا علي نوني و بعد كده لما اشتغلت في الشركه اعترفت علي نادين وكان وقتها ماما عايشه و انا اشتغلت في الشركه دي قبل وفاتها بسنتين
يعني من 2015 أو 2014 بس نادين كانت في بوزيشن اعلي مني و كانت بتسافر و تيجي بين مصر و الامارات عرفتها في مصر الاول و بقينا صحاب شويه و بعد كده هي سافرت قعدت هناك كام شهر متواصل و ساعتها لما سافرت في الامارات بقينا صحاب اكتر أما سلمي و ايه بقي ايمي اللي كانت تعرفهم لأن والد ايمي صاحب والد سلمي و طبعاً قبل ما ينقلوا علي مدينتي كنا بنشوفهم كده كل فين وفين لما نقلوا بقي بقينا صحاب اوي
سلامه….يعني نقدر نقول إن أقل فتره صحاب بينكم اللي هي سلمي و ايه من خمس ست سنين كده
سلمي….اه احنا لما رجعت كنا يادوب بننقل شوفنا بعض كام مره كده و بعدين الكورونا انتشرت فضلنا كام شهر في بيتنا القديم و بعد كده نقلنا و بقينا صحاب اوي بقي.
عشري…..طيب و انتي يا نوني عرفينا علي نفسك
نعيمه….عايزين تعرفوا ايه بالظبط
عشري….يعني اللي تحبي أننا نعرفه
نعيمه…..طيب انا عندي 34 سنه و كنت عايشه مع اهلي و حالياً انا انفصلت عنهم
سلامه…..بمعني ايه انفصلتي عنهم يعني بعيده عنهم خالص
نعيمه….لا لا طبعاً هما موجودين و بشوفهم مرتين في الاسبوع و ممكن ثلاثه و بقضية معاهم يوم او اتنين في العيد و في رمضان كمان بروح افطر معاهم كذا يوم و اوقات ممكن لو طولت في بيان معاهم
فضل…..طيب ليه انفصلتي عنهم يعني ظروفك زي ظروف ليله كده؟
نعيمه….لا ظروفي مختلفه عن ظروف ليله انا امي و ابويا عايشين ربنا يبارك في عمرهم عندي اخ و اخت اصغر مني انا الكبيره بس انا يمكن زي ليله شويه طباعي مختلفه خالص و الكيمياء بتاعتي مش ظابطه مع امي و ابويا خالص
رشيد….مشاكل اسريه يعني ؟
نعيمه…..بالعكس مش مشاكل بمعني الكلمه يعني ممكن تبقي مشاكل عاديه زي اي بيت مصري بس انا هقولك انا ابويا و امي بيتخانقوا كتير اوي بشكل مش طبيعي و مش خناق اللي هو بيلموا الناس علينا لا بس طول الوقت بيناقروا في بعض او بمعني اصح امي اكتر
فضل….بضحك اه الطبيعي بتاع اي ست يعني
ايمان….قصدك ايه يا سي فضل أننا ندين
فضل….لا ده انتوا ملايكه
نعيمه….شوف انا هقولك علي حاجه و هعترفلك اعتراف مفهمتهوش غير لما كبرت أولاً رغم الخلاف اللي بينهم ده بيحبوا بعض جداً و لا هو يطيق عليها حاجه ولا هي تطيق عليه حاجه و بيخافوا علي بعض جداً بس امي حساسه جداً و زمان شويه كنت بحس أن امي ظالمه ابويا لأن انا ابويا من النوع الاهدي شويه ليه طقوس و نظام حياه مختلف عنها
حسان……بمعني ايه يعني عقليات
نعيمه…..هنمشيها تحت بند عقليات بس هقولك علي حاجه زمان زي ما قولت كنت ديماً بحس أن هي اللي غلطانه و لما كبرت شويه و كنت اقعد اسمع من الاتنين كنت بحس اني متلغبطه يعني بشوف أن كل واحد صح بس بطريقته أولاً انا ابويا كان شغال في البترول طول عمره هو مهندس بترول و كان ديماً بيسافر اسماعيليه و السويس يعني عشان طبيعة شغله
و امي كانت ست بيت مش بتشتغل طول عمرها بتشتكي أن هو وقت ما بيجي من السفر مش بيعوضها يعني هي بتبقي مشتاقه انها تخرج معاه يسافروا يروحوا يجوا حقها بس طبعاً هو كان بيرجع تعبان مش عايز اي حاجه غير أنه يقعد في البيت وبس و طبعاً بابا شخص بيحب القراءه جداً احلي لحظه في حياته أنه يقعد مع القهوه و السيجاره و الكتاب و بس طبعاً هي مكانش بيعجبها الوضع ده
لما كنت اقعد مع بابا يقولي انا تعبان طول الوقت في شغلي انا بره البيت محتاج لما ارجع اقعد وسطكم و بس مش عايز اي حاجه تاني بس لو هي عايزه تخرج تروح تيجي براحتها عمري ما اقولها لا تخرج و تتفسح و تجيب كل اللي نفسها فيه مش شرط تكون معاها.
بيني و بينك كنت بحس أن ابويا معاه حق و بشوف أن امي مكبره المواضيع ما الراجل بيديكي رزمة الفلوس و يقولك اعملي اللي يعجبك حتي لو عايزه تروحي تصيفي و تسافري خدي اولادك و اهلك و روحي ..
كنت اقعد مع ماما تقولي ماهو طول ما هو مسافر انا قاعده بيكم من المدارس للدروس للدكاتره مش بروح اي مكان و من حقي اخرج و اشم نفسي و اخد انا كمان اجازه لما يرجع كانت تصعب عليا بس وقتها لاني مكنتش فاهمه كنت ببقي متحامله عليها و اقولها هو معندوش مانع انك تعملي كل ده .
لما زمان كان يحصل مشاكل و ابويا عشان يتفادي المشاكل دي كان بيوافق يخرج و اوقات كان بيسافر معانا المصيف و طبعاً عشان ابويا راجل ليه دماغ و بيحب البيت اوي كان يقعد في البلكونه بفنجان القهوه و لو جينا خرجنا تحس ان هو مش مبسوط عايز يرجع البيت بأي شكل فا الخروجه أو السفريه تقلب نكد هو شايف أنه جه علي نفسه و خرج أو سافر و هي شايفه أنه خارج غصب عنه و مش طايق نفسه و ماشي يمد عشان الخروجه تخلص بسرعه و يرجع.
وقتها علي قد ما كنت بتعاطف مع ابويا و بشوف هو قد ايه بيتعب مكنتش فاهمه اوي بصراحه بس لما كبرت علي قد ما انا لحد الوقت بحس أنه حقه يرتاح بس لا امي كان معاها حق امي مش ست نكديه
حسان….هو الاتنين معاهم حق علي فكره بس عموما الراجل طول الوقت في الشارع فا بيحب وقت إجازته يرتاح لأن هو مش مشتاق للشارع هو لسه سايبه
نعيمه…..ايوه بس هي كمان طول الوقت بتشوف شغلها مع ولادها و بتتعب و بتربي و بتعمل كل حاجه لوحدها من حقها هي كمان تاخد اجازه
سلامه….بس انتي بتقولي أنه مش بيرقص و واضح من كلامك أن والدك حد حنين يعني مش بخيل
نعيمه…..خااااالص ابويا ده احنا حد في الدنيا و علي قد ما انا مبقتش اتفق مع الاتنين بس صدقني ابويا و امي دول احن اب وام في الدنيا ابويا زي ما بيقولوا اللي في أيده مش ليه لدرجه ان ابويا من كام سنه لما كبرنا انا واخواتي قرر أنه يقسم فلوسه علينا و هو عايش و مش بس كتب كل حاجه باسمنا و باسم امي لا ده فتح لكل واحد فينا حساب و حطلنا الفلوس فيها وقال انتوا كبرتوا شوفوا حياتكم حتي امي مظلمهاش و حطلها فلوسها في حسابها و ساب جزء بسيط يعيشوا منه و قال لو جرالي حاجه الجزء ده محدش فيكم يمد أيده عليه ده هيكون خاص بأمكم عشان تصرف منه و متمدش أيدها علي حسابها في البنك.
سلامه….بابتسامه للدرجادي
نعيمه…ووووواكتر والله ابويا مفيش منه و كان هو سبب في اني اشارك البنات في شغلنا مع بعض لما قسم الفلوس بتاعته علينا لان ابويا كان مرتبه كبير اوي يعني اكيد انتوا عارفين مهندسين البترول عاملين ازاي وقتها احنا رفضنا بس هو كان ليه وجهة نظر قالنا انا عايز اوزع عليكم الورثة وانا عايش عشان محصلش خلاف مع اني أنا عارف انكم بتحبوا بعض بس كمان مش هسمح أن الشيطان يلعب في عقل اي حد فيكم ثانياً انتوا كده كده هتورثوني لما اموت يبقي ليه اسيبكم تتبهدلوا و تتمنولي الموت عشان حياتكم تبقي احسن مع أنه هو بردوا عارف أننا مستحيل نعمل كده بس ده كان رأيه ديماً كان بيقول الملايكه ممكن الظروف الوحشه تحولهم شياطين فا كان حابب يمنع اي فتحه بينا للشيطان أو أنفسنا و قال خلوني وانا عايش اشوفكم هتعملوا ايه بفلوسكم عشان أما اموت اطمن عليكم
كان نفسه يشوفنا واحنا بننجح و نكبر قدامه
ايمان….علي فكره ابوها ده انا بجد بموت فيه و محترمه اوي حد متزهقش من القاعده معاه و بردوا لما تقعد مع امها تحس ان هي ست جميله مرحه بتحب الضحك و الحياه و حنينه اوي الاتنين بجد مفيش منهم و بيحبوا بعض بس ديماً في خلاف بينهم و علي حجات بسيطه لكن بيني و بينكم اوقات كتير بحس أن هي بتصعب عليا
رشيد….بس واضح أنه شخص محترم و مش مقصر في اي حاجه
نعيمه…..لما تسمع ماما يا رشيد هتعرف ايه هي اكبر مشاكل الست صدقني لا هي مشاكل فلوس أو مستقبل أو كل الحجات اللي ليها علاقه بالماديات
رشيد…ايوه بس انتي قولتي أن حتي هي سابلها نصيبها يعني خايف عليها و مهتم بيها
نعيمه….صح و امنها وهو عايش و امنها كمان عشان لو لا قدر الله جراله حاجه و كان ديماً يقولي امك طيبه و غلبانه عايز لما اموت ابقي ساترها و حتي انتوا متحتاجش ليكم بس لما كنت اروح اقول كده لماما عشان يعني تفهم دماغه و تعرف قد ايه هو شايل همها كانت بتقولي كلمه عمري ما قدرت انساها أو اتخطاها كانت بتقولي هيسيبلي فلوس بس مش هيسيبلي ذكريات حلوه اعيش عليها
كانت بتقولي تسوي ايه الدنيا و احنا قاعدين نحوش في فلوس و انا وهو علي طول بعيد عن بعض انا محتاجه لما يكون معايا اخرج معاها و اشوف نفسي قدام الناس و انا ماسكه في ايد الراجل اللي بحبه محتاجه اخرج و أسهر و الف الدنيا حتي لو علي رجلي معاه محتاجه يكون ليا في كل ركن ذكري محتاجه لما اسافر يبقي معايا و هو مش مضايق مش اروح انا وانتوا من غير راجل محتاجه اسمع كلمه حلوه مش عايزه فلوس
ليله…..الست قلبها في ودنها زي ما بيقولوا
هو بيحبها بطريقته و خايف عليها حتي لو مات و عايز يأمنها بطريقته يعني بيعمل أفعال و مواقف بس للاسف الميزان معاه اختلف نسي أن الست بتحب الاهتمام و الكلام الحلو و الحنيه و الطبطبه نسي أن الست محتاجه امانه هو مش امان فلوسه
محتاجه لما يرجعلها من السفر إجازته متبقاش بس في البيت لأن هي بالشكل ده مش هاخد اجازه و بعدين نسي اهم حاجه الست لو مش هتسمع كلمه حلوه مش هتحس بحنيه و طبطبه من الراجل اللي بتحبه هتقدر تاخد كل ده من مين
نعيمه….بالظبط عشان كده لما كبرت فهمتها و حطيت نفسي مكانها يعني انا اتجوز الراجل اللي بحبه وابقي محافظه علي بيته و ولاده ابقي ام و اب و ابقي طباخه و شغاله و دكتوره و مدرسه و ابقي بحل محله في كل حاجه و هو مش موجود و لما يرجع ميعوضنيش بكلمه بخروجه بذكري طب و بعدين انا عن نفسي مقدرش لاني في النهايه ست محتاجه اعيش كل حاجه حلوه مع الراجل اللي حبيته مش حياتي تخلص بمجرد ما اجيب اطفال ابقي انا شايله البيت كله و هو بيشتغل ليل نهار و الوقت اللي خلاص هيبقي بتاعنا لما يرجع يرفض يخرج من البيت أو يعمل اي حاجه تبقي ذكري بينهم
لا مش حاجه حلوه علي فكره ليه استنساه يرجع عشان اسافر كام يوم من غيره أو عشان اخرج خروجه مع اهلي أو صحابي
طب هو فين في حياتي و بعدين امي كانت ديماً تقوله انت فاكر انك بترضيني بالفلوس و بترضيني لما تأمن حياتي بعد وفاتك طب افرض انا موت قبلك وقتها هتحس بأيه و انا سيبالك الفلوس و سيبالك كل حاجه و روحت من غير ما الحق اتبسط معاك و انا عايشه لا بجد امي مش ست نكديه ابويا حد كويس و مفيش منه بس كمان كل واحد فيهم كان بيفكر في الحياه من وجهة نظره عشان كده عمرهم ما اتفقوا و امي بتتلكك ليه علي اتفه الأسباب و بصراحه اخر كام سنه حسيت اني مش قادره و طبعاً السن عليه عامل كل ما بيكبروا عقلهم بيبقي اصغر اقول كلمه لبابا يقولي انتي بتحبي امك اكتر اقول كلمه لماما تقولي ما طبعاً طول عمرك واقفه في صف ابوكي بس لما تتجوزي و جوزك يعاملك بنفس الطريقه وقتها هوحسي بيا صراحه وصلت لدرجه اني مبقتش عارفه أراضيهم فا قررت اني انفصل عنهم.
سلامه….طيب هما عملوا ايه مع قراراك ده
يعني وافقوا بسهوله ولا كان في مشاكل
نعيمه….انا مروحتش قولتهم اني هنفصل عنهم و اعيش في مكان لوحدي لأن ابويا نفسه مكانش هيوافق بس انا وقتها كنت بشتغل في شركه و كانت بعيده و طبعاً بعد ما كتب الفلوس باسمنا و عملنا مشروعنا مع بعض بقيت اتلكك اقولهم انا هقعد مع ايمي انهارده مش هقدر اجي مفيش وقت عشان هنزل بدري و مش الحق. مره تانيه لقولهم انا هبات مع ليله لحد ما شويه شويه هما اتعودوا أن بضطر ابات غصب عني بعيد عنهم و في الوقت ده كنت خدت الشقه اصلا انا وليله بس كنت مفهماهم انها بتاعت ليله وانا ببات معاها و هما كانوا بيحبوها و عشان عارفين انها عايشه لوحدها مكانوش بيرفضوا بس و بعد كده خلاص عرفوا أننا بقينا قاعدين مع بعض عشان ظروف الشغل و اتأقلموا
عشري…..رغم أن انا مع موقف والدتك جداً لأن انا بشوف أن الست فعلاً محتاجه تحس باهتمام إلا أن واضح فعلا أن والدك حد محترم و احترمت طريقه تفكيره
نعيمه….بابا ده حد جميل و علي قد كده والله اي حد جرب يقعد معاه عمره ما حس بملل منه
ايمان…..ابويا بيجبه جداً وهو و والد سلمي بيتفقوا جداً مع بعض لأن الثلاثه بيحبوا القرانيه و طباعهم شويه قريبه من بعض فا تحس ان والد نعيمه بيرتاح معاهم اوي جوجو بس اللي ملهاش في الفلسفه و السياسه و الجو ده فا عشان كده مش بتحب تتناقش معاه في اي حاجه
سلامه…..جوجو مين
نعيمه….بضحك تقصد ماما اسمها نجلاء
سلامه….ربنا يخليهالك يارب
نعيمه…..يارب
حسان….طيب هما ايه موقفهم من بعض الوقت
نعيمه….ولا حاجه بيحبوا بعض اوي بس توصل لنقطة الاهتمام تحس الدنيا ولعت بينهم و علي قد كده ماقدرش تخرج أو تروح اي مكان و هي مش محضراله اكل كام يوم و مجهزه ليه لبسه و كل حاجه
و هو كمان لو خرج حتي لو مشوار ساعه يرجع جايبلها اللب و الأساليب والفاكهة و كل حاجه بتحبها
رشيد….بابتسامه طب والله واضح انهم بجد بيحبوا بعض
نعيمه….اوي والله و انا بموت فيهم و في حبيتهم بس مقدرش لو قعدت معاهم واحد فيهم هيتبري مني و يفكرني مش واخده صفه
عسال….طيب بعيداً بقي عن الأهل وكده ايه ظروفك مع الحب يعني التجربه اللي انتي عيشها مع أهلك خليتك تخافي تجربي و لا في حد في حياتك
نعيمه….لا خالص مخوفتش بس كمان مفيش حد في حياتي انا اتخطبت مره بس سيبنا بعض بعد شهرين يعني اعترفت عليه قبل الخطوبه بحوالي خمسة شهور مش هقول اني حبيته بس اتعلقت بيه و بعدها اتخطبنا شهرين يعني فضل في حياتي سبع شهور بس منفعش و انفصلنا
فضل…ليه بقي انفصلتوا
نعيمه….هو انا مش حابه اجيب سيرته يعني خلاص كل واحد راح لحاله بس بصراحه كان ودني اوي و مش بيعمل ايه حاجه غير لما يسأل ماما
عشري….بضحك امال لو كنتي جيبوتي سيرته
نعيمه….بضحك الله اكدب يعني
فضل….يعني ايه بيسمع كلام امه هو مين فينا ميتمناش رضي امي
نعيمه….انك ترضي امك حاجه و انك تسألها علي كبيره و صغيره و تشوف هتوافق ولا لا دي حاجه تانيه و بعدين انا واحده شخصيتي قويه محتاجه اكون مع راجل شخصيته اقوي مني مش واحد يوصل بيه رضي أمه أنه يبعتلها صور اللبس اللي بيشتريه و يقولها اجيب اللون و الاستايل ده ولا لا
عشري….لا مش للدرجادي كده ابقي خربانه خالص
نعيمه….خالص خالص و مواقف كتير قفلتني منه مش موقف واحد
سلامه…..طيب قولولي انتوا بتقولوا انكم مشاركين بعض ده في المطعم بس ولا عندكم شغل تاني
ايمان….لا المطعم ده مؤخراً احنا مشاركين بعض في العقارات
سلامه….عقارات ازاي
ايمان….وقت ما قررنا أننا نتشارك مكانش حد فينا عارف ممكن نعمل مشروع ايه يجمعنا كلنا خصوصاً أن كل واحد فينا كان شغال حاجه مختلفه يعني انا و نعيمه و ليله و نادين في شركات بس كل واحد كان تخصص و سلمي كان دكتورة اسنان و ايه عندها محل حيوانات
حسان….انتي دكتوره يا سلمي
سلمي….بابتسامه اه
حسان….و مستمره ولا لا يعني عندك عياده وكده
سلمي….اه ده شغلي الأساسي الحمد لله
حسان….براڤو والله
ليله….وقت بقي ما انا رجعت من الامارات انا و نادين و قبلها كذا سنه ايمي كمان كانت بتشتغل ما بين الإمارات و قطر كل واحده فينا كانت راجعه معاها مبلغ كويس و انضمت لينا نوني بفلوس والدها اللي كتبها باسمهم و قررنا نقعد نفكر في حاجه كويسه و بعدها ايمان قالت إن سلمي و ايه حابين يشاروكونا معاهم مبلغ محترم و حابين يشغلوا فلوسهم فا قررنا أننا نجيب شقق و نفسها و نأجرها للعرب اللي بيجوا مصر أو اي حد لسه متجوز مثلاً كده يعني و خدنا الشقق دي وقتها في التجمع و بعد وقت بسيط الايجار كان بيعلي بطريقه كبيره فا العائد محدش فينا كان متوقعه احنا بدأنا بشقه و بعدها بقوا ثلاث شقق و بعدين المطعم
عشري……والله انتوا بنات مفيش منكم أصلاً فكرة أن بنات تشتغل في المجال ده مش سهله بس اللي انا عايز اعرفوا بقي مين كان صاحب فكرة انكم تستثمروا فلوسكم في العقارات
رشيد….انا اقول من وجهة نظري
ليله….بابتسامه طب قولي يلا وروني هتختاروا صح ولا لا
رشيد…..ايمي ؟
ليله….طيب و انتوا قولوا بردوا
سلامه….طيب هي ايمي ولا ايه
ليله….قولوا وفي الاخر هنقولكم صح او لا
سلامه….صراحه انا شاكك في ايمي و انتي
فضل….انا شايف نوني يعني بما أن والدها قالهم أنه حابب يشوف هي واخواتها كل واحد فيهم هيفكر ازاي يشغل فلوسه فا احتمال تكون هي
نعيمه….بأبتسامه طيب و انت يا حسان
حسان…..انا مع الشباب انتوا الثلاثه بصراحه شخصيتكم قويه طبعاً مقصدتش أن الباقي شخصيته مش قويه اكيد اقصد يعني حاسس ان انتوا الثلاثه عمليين بس لو هحط احتمال رابع فا سلمي يعني دكتوره بقي و ليها في الشغل و اكيد بتقابل ناس كتير و جايز يكون حد قال قدامها علي مشروع زي ده كده يعني ده من وجهة نظري.
رشيد…و الله احتمال كمان تكون ايه هي لحد الوقت واضح انها اصغر واحده فيكم بس كمان قالت إن هي عندها محل حيوانات يعني دماغها فيها شغل
سلامه…..اه ممكن بردوا أصلاً شغلانة ال pet grooming دي مش سهله و غالبا مش بتبقي شغلانه بنات لان احيانا بيدخل عندك كلاب احجام كبيره محتاجه شاب يعني فا وارد والله
ايه….بابتسامه اه والله انا بيدخل عندي كلاب اطول مني و تهدأ الحيل في تنظيفها
رشيد….طيب انا بردوا مع ايه.
ليله…جميل و انت يا عشري
عشري…..مش عارف بس انا بينك انتي و ايمي اكتر
ليله….طيب واخر واحد انت يا عسال
عسال….بأبتسامه انا بقول نودي
بصتلوا نادين و ابتسمت بإحراج و سكتت
رشيد….لا مظنش
ليله….اسمعني يعني اختاروا اصغر واحده فينا و هي لا
ايمان….ايوه صح اشمعني
رشيد….مش عارف ممكن بس لا مش راكبه بحس أن نادين اهدأ واحده فيكم و بحس أن هي دماغها مش شغل اوي
ايه….ايوه بس هي كمان بتشتغل من سنين او تقدر تقول طول عمرها يعني ايه دماغها مش دماغ شغل
رشيد….لا مش شرط انها بتشتغل تبقي حد دماغه في الشغل كده في كتير بيشتغلوا بس عشان لازم يشتغلوا مش حباً في الشغل يعني بحس أن نادين هاديه و رايقه مش دماغها
سلمي….بضحك بعيداً عن موضوع الشغل بس معلش مين دي اللي هاديه و رايقه
رشيد….بابتسامه نادين
ليله….تصدق بالله انت راجل طيب
ضحكت نادين و حطت أيدها علي وشها
عشري….علي فكره فعلاً اكتر حد هادي وقليل الكلام فيكم
حسان….نادين أقل واحده اصلا شاركت بالكلام فيكم من وقت ما وصلتوا
نعيمه….بسخريه في مثل بيقول اللي تفتكروا موسي يطلع فرعون
سلامه….لا متقوليش نادين فرعون
ابتسم عسال و فضل عينه عليها و هي بتضحك بهدوء
ليله….احب اعرفكم علي نادين و من غير لما حد يستغرب اللي هقولوا ده أولاً نادين ساكته و باينه هاديه عشان هي كانت تعبانه الصبح و عشان القلق اللي حاصل بره فا هي مش في المواد خالص و غالباً لما بيحصلها بانيك أتاك بتاخد من يومين لثلاثه لحد ما ترجع تاني تفك لكن نادين أعرفكم أقوي شخصيه فينا كلنا و براڤو يا عسال صاحبة فكرة المشروع كانت هي
نادين شخصيه عمليه لابعد حد ممكن تتخيلوا دماغها في الشغل ولا اجدعخا دماغ محاسب و اداري و بلا فخر تقوم بعشر شركات لوحدها
ايمان…..و الاهم من كل ده بقي أن هي مش هاديه خااااالص
نعيمه….بضحك هي تبان ملاك لكن نادين شقيه جداً و قويه اوي بجد بتموتني من الضحك طفله و في نفس الوقت جد
عشري….اوباااااا ايه كل ده بتضحكي علينا يا نادين
نادين….بأبتسامه لا خالص والله
رشيد….ده طلعت المظاهر خداعه زي ما بيقولوا
فضل….اه والله دي اول حد استبعدتوا
حسان…..وانا والله
رشيد….انا حسيت ايه و محستهاش
نعيمه….طب انت ليه قولت نادين يا عسال كملت بضحك عشان محدش اختارها يعني
عشري…..اه انا حسيت أنه قال ميزعلهاش والله
عسال….لا خالص بس حسيت مش اكتر انا اتفاجئت أن هي مش هاديه زي ما بتقولوا بس قولت يعني أن ديماً اكتر شخص هادي ليخرج منه افكار حلوه
ليله…..لا خالص مش هاديه بس انت صح نادين كانت صاحبة الفكره و تقريباً نادين هي اللي ماسكه الشغل كلوا
نادين….ايوه بس مينفعش يعني أن البنات كمان شايلين الشغل معايا و ليله و ايمي و نوني و سلمي و ايه دماغهم حلوه بجد و ليخرج منهم افكار تجنن
عشري…..بس طلعتي مش سهله علي فكره يعني من غير ما تزعلي مني انا حسيت اكتر انك شخصيه خوافه
نادين….عشان اللي حصل يعني
عشري….اه حسبتك متوتره و مرعوبه طول الوقت الصبح لما جيتوا و شوفتك في حالتك دي قولت انتي فيكي حاجه و لما عرفت انك عندك بانيك اتاك و اتسالت الوقت من وجهة نظري مين فيكم صاحبة الفكره بصراحه استبعدتك خالص.
نادين ….لا خالص ملهاش علاقه
حسان….طيب بما أن الكلام علي نادين الوقت خلينا نتعرف عليها اكتر
نادين….اكيد اتفضل
حسان….طيب نشوف الشباب لحد ما يجيلي سؤال
عسال….انا هسأل
بصتلوا نادين بتوتر و هي عايزه تقولوا انت طول الوقت ساكت و بتكتفي بسؤال واحد بس و صوتك مش طالع ليه الوقت اتحمست
نادين بأبتسامه مرتبكه هزت راسها
نادين…..أسال
عسال…..انا عندي فضول اعرف البانيك اتاك ايه سببه و ليه بتخافي من التراب و الجو لما يقلب ؟
بصتلوا نادين بهدوء و….
للحديث بقيه……
لقاء كارثي
أميره أسامه
صاحبة البطل الواحد
