لقاء كارثي

~° البارت الخامس°~
…………

عشري…..بس طلعتي مش سهله علي فكره يعني من غير ما تزعلي مني انا حسيت اكتر انك شخصيه خوافه

نادين….عشان اللي حصل يعني؟

عشري….اه حسيتك متوتره و مرعوبه طول الوقت الصبح لما جيتوا و شوفتك في حالتك دي قولت انتي فيكي حاجه و لما عرفت انك عندك بانيك اتاك و اتسالت الوقت من وجهة نظري مين فيكم صاحبة الفكره بصراحه استبعدتك خالص.

نادين ….لا خالص ملهاش علاقه

حسان….طيب بما أن الكلام علي نادين الوقت خلينا نتعرف عليها اكتر

نادين….اكيد اتفضل

حسان….طيب نشوف الشباب لحد ما يجيلي سؤال

عسال….انا هسأل ممكن ؟!

بصتلوا نادين بتوتر و هي عايزه تقولوا انت طول الوقت ساكت و بتكتفي بسؤال واحد بس و صوتك مش طالع ليه الوقت اتحمست

نادين بأبتسامه مرتبكه هزت راسها

نادين…..ممكن أسال

عسال…..انا عندي فضول اعرف البانيك اتاك ايه سببه و ليه بتخافي من التراب و الجو لما يقلب ؟

بصتلوا نادين بهدوء و حصلها حاله من صمت لمدة ثواني حتي صمت عن النفس.

سلامه….اه سؤال حلو و بتعملي ايه في الشتاء

نادين…ااااا

ليله….بأبتسامه بصت لنادين ايه هتتوتري

سلامه….لو هتتوتري بلاش خلاص

عسال….بالعكس احسن انها تتكلم عن اي حاجه بتخوفها أو توترها قولي يا نادين

نادين…ااا بص هو الموضوع مش اني اتوتر لو حكيت بالعكس لا مش كده هو أصلاً مش لدرجة اني اتوتر لو حكيت أو افتكرت بس كل الحكايه اني مش بحب اتكلم في الموضوع ده عشان بحس اني عبيطه شويه و بخاف حد يتريق عليا

عسال…..لا بالعكس خالص أصلاً مش حلو خالص أن اي شخص يتنمر أو يتريق عن اي حاجه بتخوف أو بتقلق شخص تاني مهما كانت بسيطه بالنسبالي مش من حقي اني استخف بيها في النهايه هي بتوترك و بتخوفك و بتعرضك لنوبة هلع كبيره.

ابتسمت نادين بهدوء علي طريقة كلامه و تفكيره.

سلامه…..احكي متقلقيش محدش فينا هنا هيشوفك عبيطه لو علي العبط انا عن نفسي بخاف من الصرصار اللي بيطير شوفتي اعبط من كده

ضحكوا كلهم و ضحكت نادين

ايه….علي فكره انا كمان اوي

سلامه….لا ده المفروض اي بني ادم طبيعي علي وجه الارض يخاف منه و يحترم الكائن ده هو صغير صحيح بس ليه هيبه.

ايمان….بضحك والله انت دمك خفيف يا سلامه ليه هيبه فعلاً

سلامه….اه والله فا متقلقيش يا نادين احكي عادي يلا

نادين….انا نقلت في شقتي قبل سنه من الكورونا يعني قبل ما أكون في شقتي اللي قاعده فيها حالياً دي كنت قاعده في شقه تانيه بس في التجمع بردوا فا انا كنت ساكنه في بيت اغلبه مش ساكت يعني حوالي خمس شقق بس اللي ساكنين و الباقي جديد فا كان في فالدور اللي تحت شقتي علي طول شاب و صاحبه ساكنين كانوا في حالهم بس كانوا أصحاب مزاج كانوا عاملين شواية في البلكونه و وقتها كنا في شتاء و نظام البيت اللي كنت ساكته فيه ده أن كل بلكونه بابص علي اللي تحتها يعني كانت شبه السلم كده واحده خاجره واللي فوقها داخله شويه واللي فوقها داخله اكتر فا كل اللي فوق كان بيشوف باقي البلكونات الا الدور الاخير عشان مفيش حد فوقيه فا انا بقي كنت واخده الاخير عشان اكون براحتي المهم كنت نايمه و صحيت علي صوت رعد جامد وقتها كنت تمام و في اليوم ده كان الجو مش حلو فا الدنيا كانت هاديه خرجت بصيت من البلكونه و انا لسه صاحبه و مش مركزه بمجرد ما فتحت شباك البلكونه لاقيت في وشي دخان كتير و ريحة حريقه و في اقل من ثانيه النار بقت بتوصل البلكونه عندي الهواء كان قوي فا النار مكانتش بتقف انا طبعاً اللي بحكيه ده حصل في اقل من ثواني بقيت سامعه صوت صريخ و صوت تكسير و صوت الرعد مع الهواء مع ورق و حجات بتطير من الحريقه و انا مش قادره اتكلم نفسي بيروح مش بس من الريحه انا بجد خوفت اوي لأن كنت لوحدي و خرجت علي البلكونه مره واحده لاقيت كل ده في وشي الناس بقت تنزل بسرعه من العماره و يخبطوا علي الابواب و انا رجلي مش بتتحرك مش عارفه امشي اروح حتي لحد باب الأوضاع اقولهم من بعيد اني جوه

لمدة نص دقيقه انا لا كنت عارفه اتحرك و لا صوتي كان بيخرج صدمة الموقف خلتني واقفه في مكاني النار بتطلع و شكلها مرعب بسبب الهواء و الموقف كله بشع لحد ما مره واحده حسيت رجلي بتمشي جريت علي الباب و انا معنديش نفس لحد ما وصلت لتحت و بعدين محستش بأي حاجه غير و انا في المستشفي

رشيد…..يعني البانيك اتاك ده بسبب الحريقه ولا بسبب الرعد و الهواء

نادين…..هو بسبب الحريقه في البدايه بس انا يمكن الهواء الشديد و الرعد مع اي ريحه تخليني مش قادره اتنفس تراب بقي حريقه بتخليني اوصل للحاله دي بفتكر اليوم ده بكل تفاصيلوا و افتكر قد ايه يومها انا بجد كنت بموت و كنت في موقف مرعب وانا مش قادره اتحرك اغلب الوقت بخاف اكون لوحدي بقي عندي وسواس ديماً اروح اشوف الغاز اتأكد أن الشبابيك مقفوله لما بيكون في مطر أو رعد بيبقي يوم صعب و غالباً بباقي البنات جايين عندي بسرعه و لو حد عارف أن الجو ممكن يقلب بيفضل معايا أو بروح انا اقعد عندهم يعني عشان مبقاش لوحدي

سلامه….يعني انتي الصبح لما تعبتي كان بسبب الهواء و التراب و الرعد

نادين…..انا كنت شايفه اليوم بيتكرر قدامي و انا لوحدي في اوضتي النار قدامي في البلكونه و الباب بتاع الاوضه قدامي و مش قادره اوصل ليه سامعه صوت خبط علي الباب مش عارفه اقوالهم انا هنا بجد اليوم ده كان صعب كأني في كابوس و جسمي متكتف لا بحب افتكر اليوم ده و لا بحب أعيشه.

سلامه….و اكيد سيبني الشقه بسبب اللي حصل

نادين…..مقدرتش اكمل فيها لان أولاً البلكونه و جزء كبير من الاوضه بتاعتي اتدمر خالص ثانياً كنت مقفوله منها و خايفه جداً

حسان…..طيب ليه يا نادين مقعدتيش مع ليله و نوني في نفس الشقه ده مثلاً عشان انتي بتحبي تعيشي لوحدك

ليله….أصلاً اللي حصل ده كان قبل الكورونا بسنه يعني مكنتش انا نزلت و لا قررت انا و نوني نسكن جنبها

عشري….بس انتي قولتي انك لما سافرتي نادين كانت هناك

ليله….ايوه ما نادين كانت بتروح و تيجي انا فضلت قاعده هناك و منزلتش ولا اجازه بس نادين كانت بترجع مصر و تيجي تاني علي الامارات وقت الحريقه اللي حصلت انا كنت في الامارات

حسان….طيب ده معناه انها نقلت و لما انتي نزلتي و قررتي انتي و نوني تعيشوا مع بعض هي كاتت ساكنه لوحدها اقصد بقي ليه مسكنتوش مع بعض

ليله…..لأن اوقات اخواتي بيجوا يزورني و نوني كمان ممكن اختها تجيلها فا محبيناش أن نادين تبقي مجبره انها كل شويه تلاقي حد جاي عندنا مع أن هي علاقتها بيهم كويسه بس كمان وارد يبات حد فيهم يوم او اتنين مع أن هي في مره قالت تعالوا ناخد شقه كبيره و نقعد مع بعض بس انا قولتلها خليكي براحتك خصوصاً عشان شغلها.

رشيد….نادين انتي كام سنه

بصتلوا نادين و سكتت و بعدين بطرف عينها بصت لعسال و بسرعه بعدت عينها

رشيد….بأبتسامه لو مبتقوليش سنك خلاص عدي السؤال

نادين….لا عادي انااااا خدت نفس بسيط انا 34 و بسرعه بصت بطرف عينها علي عسال تراقب ملامحه

لمحت عسال باصصلها نفس البصه مبتسم بهدوء و عينه مثبته علي عينها

رشيد….العمر كله يعني انتي و نوني قد بعض

نادين……اه بينا شهور بسيطه بس

عشري…..طيب ممكن سؤال يا نادين

نادين……اكيد

عشري…..انتي ليه مش عايشه من أهلك

نادين…..بنظره غريبه اتبدلت ملامحها انا اااا كده

عشري….اسف والله لو سؤالي ضايقك عموما احنا اتفقنا لو في سؤال مش حابين تجاوبوا عليه تمام

نادين….لا خالص عادي بس يعني انا تقريباً عمري ما عشت معاهم

سلامه….هما منفصلين اكيد؟

نادين….ااا اه هما منفصلين من و انا عندي 16 سنه بس كمان قبل ما ينفصلوا انا معشتش معاهم لو يعني حسبت الايام اللي عيشتها معاهم ممكن تطلع سنه او سنه و نص بالكتير من عمري كله.

فضل…..ده ليه كده أمال انتي كنتي عايشه فين ؟

حسان….طيب و سؤال كمان انتي مش ليكي اخوات

عشري….واحده واحده خلوها تجاوب

حسان….طيب جاوبي علي فضل

نادين….بابتسامه هاديه اااا انا مليش اخوات او تقدر تقول مؤخراً بقي ليا بس مش بشوفهم كتير انا بابا كان بيشتغل تبع السفاره المصريه في المغرب وأغلب الوقت كان بيسافر بره مصر و ماما كانت بتشتغل هنا بس لما انا اتولدت كانت بتضطر توديني عند جدتي لأن مكانش ينفع تسيبني لوحدي و لا كان في اي حد تسيبني معاه و وقتها كانت المسافه بين بيتنا و بين بيت جدتي كبيره فا كانت بتوديني و بعدين تروح علي شغلها فا اوقات كتير كانت بتتأخر فا مكانتش عارفه تعمل ايه و في نفس الوقت مقدرتش تستغني عن شغلها لأن راتبها كان كبير وقتها هي كانت بتشتغل في شركة تصنيع احذيه و هي كانت من ضمن المصممين فيها و كان عندها طموح أن هي تبقي الديزاينر الأولي في الشركه و نجحت فعلاً و قدرت توصل لحلمها .المهم لما حست أن المشوار اللي بتعملوا كل يوم ممكن يخليها تخسر الشغل ده قررت تلاقي حل و توديني مكان يهتموا بيا لحد ما تخلص شغل بس جدتي رفضت و قالتها خليها معايا دي لسه صغيره و كل اجازه تعالي قضيها معاها و فعلاً عملت كده بقت تيجي يوم الخميس بعد ما تخلص شغلها بليل و تمشي الجمعه بعد العصر عشان تلحق تروح و تنام بدري عشان شغلها السبت و لما بدأت تثبت نفسها في الشغل اكتر كان ممكن يعدي اسبوعين او ثلاثه متجيش تشوفني بابا كان بيجي اجازه كل ست شهور و اوقات كل سنه و الاجازه كانت بتبقي مدتها اسبوعين يا دوب يجي مره او اتنين يشوفني و باقي الايام مع ماما في بيتنا لأن هي كانت بيبقي عندها شغل و طبيعي هو صعب يكون جاي اجازه و يقعد بيا و فضل الوضع ده لحد ما كبرت حتي المدارس كانت جنب جدتي و بصراحه هي اتعلقت بيا اوي و مقدرتش تسيبني و امي و ابويا غالباً ما صدقوا لما بدأت اكبر في اعدادي و ثانوي كنت ديماً اطلب منها تاخدني أو تيجي تشوفني اكتر كانت ديماً تقولي حاضر و هاجي و انا افضل مستنيه متجيش ارجع اطلب تاني تقولي اوعدك السنه تخلص و هاخدك و ننقل الورق بتاعك في الاجازه عشان تبدأي السنه الجديده و انتي معايا افرح و اتحمس و تيجي الاجازه ميحصلش و تتهرب و تقولي مش فاضيه الشغل كتير بعدين.

المهم لما وصلت 16 سنه قبل انفصالهم بكام شهر ماما كانت بتشك في بابا و فضلت تدور وراه لحد ما عرفت بالصدفه أن هو متجوز من خمس سنين و عنده ولد اتجوز ست مصريه بس بتشتغل في المغرب وعايشه هناك

طبعاً امي مقبلتهاش علي نفسها و لا علي كرامتها و صممت علي الطلاق فكرة أنه اتجوز و كمان من خمس سنين و مخلف خلوها اتجننت و بابا فعلاً نفذ طلبها

بعد ست شهور بالظبط ماما اتجوزت مش عارفه عند بقي أو حبت ترجع كرامتها المهم انها اتجوزت المدير بتاعها و بعد شهور من جوازها سافروا بره مصر عشان الشغل بتاعها كان كبر جداً و بقوا يصدروا بره و كمان كان ليهم فروع فا اخو جوزها اللي هو المدير مسك هو الفرع هنا و هما سافروا مسكوا بره محدش فيهم فكر فيا اينعم كانوا بيسألوا عني و بيبعتوا لجدتي مصاريفي بس مبقوش في حياتي

وقتها فهمت أن بُعد بابا عني و اكتفائه بكام يوم كل سنه او كل ست شهور كان بسبب انه بقي اب أصلاً لطفل تاني و ولد

لدرجة أن اوقات لما كان بينزل كل سنه او سنتين مكنتش بعرف و كنت بعرف بالصدفه أن هو نزل لما كنت اكلموا ويغلط بالكلام قدامي و طبعاً هو لما اتجوز و طلق ماما حياته هناك بقت مستقره اكتر فا مبقاش ينزل كتير يعني انا اخر مره شوفته كان أول 2019 بقي عنده ولد وبنت حتي امي بقي عندها ولد و بنت

استقرت بره بتنزل كل سنتين تلاته مره يعني شوفتها من حوالي ثلاث سنين

لما كبرت شويه قررت اني مش عايزه منهم اي فلوس و وقتها قولت لا كده كفايه لازم اقف علي رجلي و محتاجش حد في حياتي اشتغلت في الشركه اللي كنت بشتغل فيها من وانا بدرس عشان كده انا البوزيشن بتاعي كان أعلي من ليله و قدرت اوصل لمكانه كويسه جداً بعد ما خلصت دراستي قررت اسافر روحت قعدت سنه بحالها في دبي و بعدين لما رجعت قررت اخد شقه لوحدي وبس كده