لقاء كارثي

عسال….بابتسامه تمام انا يا ستي اسمي محمد عسال تقدري تناديني عسال أو ميدو والدي كان شغال مهندس بترول زي والد نعيمه بس للاسف حصل معاه حادثه و اتوفي كان وقتها عندي اربع سنين ونص

امي كانت بتحبه اوي يعني قصة حب كبيره حسب ما اتحكالي يعني المهم امي بعد وفاة ابويا تعبت اوي دخلت في اكتئاب كبير مكانتش بتكلم حد ولا بتشوف حد جدتي جات قعدت معانا فتره لأن هي كانت في دنيا تانيه و مكانتش قادره تاخد بالها مني حالتها كانت بتسوء يوم عن يوم ودوها لدكتور نفسي فضلت متابعه معاه و استمرت علي المهدئات و المنوم مكانتش بتاكل غير بطلوع الروح لحد ما بقي يتركبلها محاليل و قبل المحاليل دي كانت حتي المايه مش بتشربها فا بدأت الكلي عندها تتعب اوي خصوصاً أن مرض الكلي ده وراثه في عيلتها لحد ما جه عليها وقت تعبت اوي و بعدها حصل تلف في جزء كبير من الكلي بقت تغسل طبعاً غسيل الكلي مع تعبها النفسي دمروها اكتر و اكتئبت اكتر و ست شهور بالظبط للاسف هي كمان اتوفت رفضها لموت ابويا ضيع حياتها المهم بقيت لوحدي و طبعاً جدتي مكانتش هتقدر تهتم بطفل عنده خمس سنين لوحدها هي مكانتش صغيره و انا كنت خلاص شويه و هدخل علي مدارس و محتاج رعايه تانيه

فا خالتي اللي هي تبقي ام سلامه قالت لجدتي أن هي هتاخدني و هتربيني مع ولادها اللي هو سلامه و اخوه و أخته و قاتلها هعتبر أن عندي اربع عيال فا جدتي قاتلها تمام بس انا كمان موجوده معاكي و اي وقت تحسي انك مش قادره محمد هعيش معايا.

المهم خدتني خالتي و فضلت معاهم اول اسبوع روحت فيه عندهم بدأت المشاكل بينها و بين جوزها اللي هو والد سلامه

و الحقيقه في كلام كتير جوايا قولته كتير وفي كلام اكتر عمري ما قولته لأن مهما اتكلمت في حق الست دي عمري ما هقدر اوفي أو اسد جزء ولو واحد في الميه من اللي عملته معايا الست دي انا لو رميت نفسي تحت رجلها عشان تمشي عليا بدل ما تدوس علي الارض و تتعب انا بردوا مش هقدر ارد اللي عملتوا عشاني بالنسبه ليا انا بشوفها أعظم ست في الدنيا دي كلها و مش عشان سلامه قاعد هو عارف رأيي في الموضوع ده أولاً هي مش خالتي هي امي بجد و انا طول عمري بقولها ماما

بيتهيألي لو امي نفسها عايشه مكانتش هتقدر تعمل معايا اللي هي عملتوا المهم بدأت المشاكل بينهم هو رفض اني افضل معاهم و شاف انها مسؤوليه كبيره طبعاً حقه واحد معاه ثلاث اطفال وفلوسه ضايعه عليهم و في الوقت ده لما ابويا مات فلوسه اتحجزت لأن كنت لسه صغير مقدرش المسهم غير لما أتم السن القانوني فا بالتالي معنديش اي مصدر اصرف بيه غير اهلي جدتي كانت بسيطه يادوب معاش جدي بيكفيها فا مكانش قدامي غير خالتي طبعاً حاولت معاه كتير بس هو رفض و قالها يعني لو لزم الأمر يجي مره كل اسبوع يبات فيها معاكي لكن انا مش ملزم بيه خالص و لا بمصاريفه هو عايز مصاريف مدرسه و حجات كتير انا مش هقدر عليها فا هي قالتله وانا مش هسيبك ابن اختي المشاكل كبرت اوي حاولت جدتي تمنعها وقالت لخالتي خلاص انا هاخده بس هي رفضت قاتلها ابن اختي هيتربي وسط ولادي كفايه عليه حرمانه من أمه وأبوه.

البنات كانوا بيسمعوا بتأثر قوي و هو كان بيتكلم بهدوء وابتسامه جميله

ايمان……بأبتسامه حزن انا هعيط بجد

عسال….بابتسامه لا متعيطيش المهم وصل الموضوع للانفصال ناس كتير اتدخلت بينهم بس هي كانت مصممه وهو كمان كان مصمم و قال إن انا مغلطتش لما قولت اني مش هقدر الموضوع وصل لمكان مسدود و فعلاً انفصلت عنه و مكملتش معاه قالتلي ولادك انت هتصرف عليهم بس انا هشتغل وهصرف علي محمد و علي نفسي و اتفقوا علي كده

هي كانت طيبه اوي و حنينه علي الكل مش بس عليا و طبعاً شافت أن هي لو انفصلت عنه هو هيمشي و مش هيبقي عنده مكان يقعد فيه لان وقتها أمه وأبوه كانوا متوفين و الشقه بتاعت العيله اتباعت و القسم فلوسها زمان عليه هو وأخواته فا مكانش عنده مكان قالتله أن هي هتسيب الشقه ليه و هتقعد مع جدتي علي الاقل لما تنزل تشتغل تبقي متطمنه عليا انا وسلامه و اخواتنا

و فعلاً روحنا عيشنا مع جدتي و فضلت معاها مسابتنيش اشتغلت اكتر من شغلانه في الاول كانت بتعمل سندوتشات واكل في أطباق و تنزل علي المحلات تلف علي رجلها و تبيع و بقت في البيت تجهز اكل للموظفين و تبيع و بعد كده بقت تدي دروس لاطفال صغيره في البيت اشتغلت حجات كتير اوي و شقيت بجد عشان تقدر تحافظ عليا و تربيني وسط ولادها وابقي واحد منهم اتعرضت لمواقف كتير اوي

الأهل و المعارف بقي حاولوا كتير معاها اللي يقولها ارجعي لجوزك واللي يقولها انتي لسه صغيره ليه تشيلي شيله مش بتاعتك خلي الولد مع امك راعيه من بعيد لبعيد عشان بيتك ميتخربش و ولادك يتربوا مع ابوهم و اللي يقولها انتي مش وش بهدله و شغل و شقي عمرها ما سمعت كلام اي حد و هي حقيقي اتبهدلت و اوي و كان اصلا وقتها هي صغيره يعني في الثلاثينات لأنها اتجوزت صغيره

بس كملت طريقها بعد كده بقي لما جوزها فقد الامل خالص قرر أنه يتجوز جالها تاني قبل جوازه و عرض عليها يرجعوا و تسيبني بس مرضيتش و قالتله اتجوز وفعلاً اتجوز في الشقه و عدي وقت طويل و هو عشان فتح بيت تاني الوضع مكانش احسن حاجه و بقت هي شبه بتصرف علينا احنا الاربعه و جدتي كانت بتحاول تساعدها علي قد ما تقدر انا بقي كبرت و فهمت التضحيه اللي هي ضحتها عشاني
و وقتها خدت عهد علي نفسي اني مخيبش أملها فيا كنت متفوق في دراستي جداً و في ثانوي اشتغلت انا وسلامه هو كان بيشتغل قبلي أصلاً عشان يساعدها بس قررت انا و هو نعمل مشروع صغير

لحد ما الحمد لله وصلنا لمكان يليق بيها و قدرنا نريحها و نعوضها وبس.

سلمي….طيب و البانيك اتاك كان من ايه

عسال….بالنسبه للبانيك اتاك انا عمري ما كنت بخاف من اي حاجه و كنت شخص طبيعي جداً خوفي من الضلمه مش خوف بمعني الكلمه انا شخص مستحيل انام في النور بس كنت بتوتر لما النور يقطع فجأه أو لما اكون في مكان و حد يقفل النور حتي لو بالغلط و كانت بتوصل معايا لمراحل خوف مش حلوه مع أن الأمر طبيعي عادي

ايمان….طيب بسبب ايه ؟

عسال…..جدتي اتوفت وانا في اخر سنه في الجامعه و روحنا ندفنها و عند المقابر و احنا بننزل الجثمان بتاعها للقبر كان تحت ضلمه اوي و لمحت الكفن بتاع امي يومها انا طلعت بسرعه و انا مش قادر اتنفس و عندي حاله خوف رهيبه معرفش ليه قلبي اتقبض من الكفن و اني اعرف أن دي امي و المكان المقبض ده كمان حزني علي جدتي كل ده دخلني في نوبه مش حلوه بس انا بقي عكس نادين في النهايه انا شاب و مش حاجه لطيفه خالص اني يحصلي بانيك اتاك من الضلمه فا مترددتش لحظه اني اروح لدكتور و قدرت الحمد لله بسرعه اتخطي الموضوع قعد معايا شهور بس كان بيخف بالتدريج لحد ما قدرت اتعافي و كلامي مع نادين كانت خطوات انا اتعالجت بيها و نفعت معايا و الحمد. لله كله بيعدي .

ايمان….مش قولتلكم أن احنا فينا حجات من بعض يعني قصتك شويه شبه ايه و حالتك تشبه نادين بشكل كبير

سلامه…..اه انتوا ولاد خاله انتي كمان والدتك و والدك متوفين

ايه…..اه بس كنت اكبر شويه هما عملوا حادثه و عشت مع خالتوا و جوزها و سلمي واخواتها بس الفرق أن بابا اللي هو والد نادين كان شخص جميل و عمره ما فرق بيني و بين ولاده بالعكس كنت بحس اني بنته عمل معايا حجات كتير عمري ما اقدر انساها دلع و اعياد ميلاد و فسح و سفر ولبس و تعليم حد بجد مفيش زيه و للاسف خالتو كمان اتوفت بس مش من بعيد اوي و فضلت مكمله معاهم و انا وسلمي تحديداً غالين عنده اوي بس

رشيد….ربنا يرحمهم يارب انتي كام سنه يا ايه

ايه….انا عندي 27 سنه

عشري….انتي اصغر واحده فيهم صح

ايه….اه انا و بعدين سلمي و نوني و نودي بعدينا و بعدين ليله و ايمي الكبيره بتاعتنا

ليله…..عارف يا عسال انت بجد شوقتني اوي اعرف الست الجميله دي

عشري…..بابتسامه حنون اسم علي مسمي بجد لو عرفتها هتحبيها اوي علي فكره هي أقرب ام لينا كلنا

ليله….زي زوزو مامت ايمي

ايمان….اه امي حبيبة الكل و بتموت فيهم و صاحبتهم اوي

عشري…..حنون كده بردوا بحبها اوي حد كده واخد من اسمه كل صفاته الحلوه

ليله….اسمها حنان

عشري….اه بس بجد عندها كمية حب و حنان الست دي مش طبيعيه يعني تقدري تاخدي من عينها بس كمية حب و قبول مش طبيعيه.

سلامه….حبيبي هي كمان بتحبكم اوي لما نرجع بأذن الله اكيد هناقابل و هعرفكم عليها

ليله….طيب سؤال ليك انت يا سلامه و تجاوب بصراحه

سلامه….طبعاً اتفضلي

ليله…..هو الأول انت كبير اخواتك ؟

سلامه….اه انا و ريهام و بعدين ميدو هما بينهم شهور و الاخير مصطفي

ليله….طيب قولي يا سلامه بصراحه كده عمرك ما حسيت أن مامتك كانت غلطانه او بمعني صح مجتش في يوم علاقتها و قولتلها انك اتحرمت من والدك بسبب قراراها و شوفت أن عسال كان سبب في بعدكم عن ابوكم.

الشباب….في نفس واحد لااااا

سلامه…..اهم ردوا عليكي بس هتصدقيني ؟

ليله….اكيد .

سلامه…..اللي يعرفني كويس عارف عسال عندي ايه يمكن انا اكبر منه بس صدقيني اوقات كتير انا بحتاج ليه اكتر ما هو بيحتاجني من غيره بحس اني زي العيل الصغير انا مبحسش اني مرتاح و في احسن حالاتي غير و هو جنبي طول ما هو بعيد أو في مشوار انا مش بقفل معاه الموبايل كتير كانوا بيقولولنا بنفكركم توأم طبعاً الشكل مش واحد بس كا ارتباط و روح انا عشانه ارمي نفسي في النار من غير ما افكر و انا يمكن حقيقي مكانش ليا اب قايم بدوره في حياتي بس امي عرفت تختار ليا سند و ضهر انا عمري ما حسيت أن ميدو ابن خالتي ديماً بقول أن ربنا خلقني مقسوم نصين نص انا و نص هو يمكن كمان عسال اقربلي من اخواتي احنا الحمد لله علاقتنا حلوه اوي احنا الاربعه بس هو اقربلي بكتير فا فكرة اني ازعل أو الوم امي أو احس ان هي سبب لا عمري ما حسيتها و بالمناسبه اللي بيقولك أنه لو عمل ايه مش هيعرف يردلها اللي عملته

احب اقولك أن عسال عمل مع امي كتير اوي يمكن عسال كان رزق امي اللي ربنا شايله لوقت معين طلعها حج و اكتر من مره عمره كمل بضحك و في مره الكلي بتاعها تعبت شويه مسك الدكتور كان هيقتلوا لولا أن انا لحقته و كان مصمم أنه يتبرعلها بالكلي و الدكتور يقولوا يا ابني افهم هي مش محتاجه و هو أبداً و في مره انا كمان تعبت و بردوا عمل نفس الموضوع مدير المستشفي خرج قالوا يا ابني انت الكلي دي مش لزماك كل ما حد فيهم يتعب تيجي تقولوا خدوا الكلي بتاعتي يا هموتكم فا عسال بجد فظيع

ايه….بضحك صحيح انا مستغني عن الكلي بتاعتك