لقاء كارثي

عادي زي ما بيجي فرح بيجي حزن ده بيعدي و ده كمان بيعدي

ليله….وانا خايفه ميعديش يا عشري

عشري….هيعدي يا ليله و الله هيعدي انا جنبك و كلنا مع بعض اكيد هيعدي ادعيلهم تعدي بس الكام ساعه دي علي خير و كل حاجه هتعدي

بصت تاني علي الباب و هزت راسها بهدوء و سكتت

قرب منها باس راسها وضمها ليه

عشري……هتعدي يا قلبي الدعاء بيغير القدر و انا دعيت كتير اوي انك تبقي كويسه كنت هموت عليكي يا ليله قلبي كان هيقف لمجرد اني بتخيل ان فيكي حاجه بس ربنا سمع مني و شوفتك قصاد عيني ادعي يا ليله ادعي يا قلبي

ليله……يارب

عشري…..تعالي يا قلبي ارتاحي شويه

راحت معاه تاني بهدوء و قعدت جنبهم مكانش في كلام يتقال كان في حاله من الحزن العميق دعاء دموع وجع استغفار انفاس خارجه بتقل نظرات كلها ترقب حاسه سمع مرتبكه مع كل خطوه رايحه وجايه..

علا وشادي كانوا منتظرين حسان وسلمي يجوا ياخدوا هنا ولما اتاخروا عرف شادي اللي حصل وراح بسرعه هو وعلا يقفوا معاهم في النهايه هما جمعهم مناسبه واتعرفوا علي بعض و قضوا وقت جميل و كان لازم يشاركوهم حزنهم..

والحقيقه ان الكل كان بيواسي بعضه نجود و امينه و ماريز و حنان مسابوش نعيمه والبنات كمان

شيرين شويه تواسي بنتها في حزنها وفرحتها اللي اتكسرت وشويه تواسي نعيمه والبنات اميمه وقمر شويه مع نعيمه يهدوها وشويه يطمنوا علي ايمي وامنيه الاتنين حوامل ومش مبطلين عياط

الشباب شويه مع سليم و شويه مع البنات و رايحين جايين..

كان في حاله كبيره من الحزن و مشاركه الحزن….

الوقت عمال يعدي ساعه وراء التانيه محدش بيقول حاجه وكل اللي يخرج من جوه يسألوه يقول خير ادعولهم و اللي تقول الدكتور شويه و يخرج مكانش في رد يريح بس كان عندهم امل ان ادام مفيش اي خبر وحش يبقي هما بخير لسه…

من الساعه سبعه لحد الساعه 11 و نص و هما منتظرين لحد ما اخيراً الباب اتفتح و خرج منه دكتور استشاري كبير و معاه اتنين دكاتره

خرجوا من بخطوات بطيئة ووشهم كان باين عليه الإرهاق بشكل يخوف.

أول ما الكل شافهم قاموا كلهم مرة واحدة وكأنهم مستنين ينطقوا بأي كلمة المهم يطمنوهم…

وكان في كام حد من اهل السواق هما كمان قربوا عشان يطمنوا

وقفت نعيمه و هي مرعوبه و ماسكه في ايد ليله وفضل الكل بان عليه الخوف و التوتر