لقاء كارثي
لقاء كارثي
حماده…..طمننا يا دكتور بالله عليك
بص لهم الدكتور ثواني طويلة وكأنه بيدور على أقل الكلمات وجع رغم إنه عارف إن مفيش كلام هيهون اللي جاي.
نعيمه….بدموع ارجوك اوعي تقول اي خبر وحش اللي جوه دول اهلي انا مليش غيرهم امي و ابوايا واخواتي والله ما ليا غيرهم
الدكتور…..بنظره حزن قبل اي حاجه لازم تعرفي ان مفيش اي حد فينا او في الطاقم الطبي قصر معاهم كلهم
الحادثه مكانتش سهله نهائي فا انا مقدر حجم الوجع و الخوف بس عايزك تتقبلي كل كلمه هقولها
بالنسبه لحاله الشاب و البنت…
الحمد لله خرجوا الوقت من العمليات و هما حالياً في العنايه ولازم تكونوا عارفين ان حالتهم لسه خطيره انا طبعا عارف ان كلامي ممكن يكون قاسي في الظرف اللي انتوا فيه بس انا لازم اكون صريح معاكم زي ما قولت حالتهم لسه خطيره..
البنت كان وضعها أفضل نسبياً لأنها كانت قاعدة في النص علي حسب كلام المسعفين وده خفف جزء من قوة الصدمة عنها لكن عندها كسر في الكتف وكسرين في الضلوع وارتجاج بسيط في المخ وكدمات ونزيف داخلي بسيط قدرنا نسيطر عليه.
بمجرد وصولها دخلت عمليات فوراً واتركبلها أنابيب وصرفنا النزيف والحمد لله استجابت للعلاج.
نعيمه كانت بتسمع الكلام ده وهي منهاره ومش قادره تقف و ليله وفضل بيحاولوا يمسكوها سليم اطمن شويه بس قلبه وجعه و لما سمع حالتها كان منهار في حضن محمود اخوه..
نعيمه…..بدموع يعني ايه يعني هتبقي كويسه صح قول صح والنبي
الدكتور…..هي حاليا استجابت زي ما قولتلك و حالتها شبه مستقره
اما بالنسبه للشاب للاسف حالته كانت اصعب كتير
قلوبهم كلهم اتقبضت و بصت رهف بحزن فظيع و الحزن بان علي وش تامر وحودا مصطفي عدي سليم صاحبهم و اتوجعوا عليه حتي فضل وكل الشباب بصوا بتركيز
احمد….بوجع يعني ايه حالته اصعب فيه ايه يا دكتور؟
الدكتور….عنده كسر مضاعف في الفخذ وكسر في الذراع وعدة كسور في القفص الصدري وفيه إصابة شديدة في الرئة بسبب الكسور دي خلت الرئة يحصل فيها تهتك ونزيف.
أول ما وصل كان ضغطه نازل جداً بسبب كمية الدم اللي فقدها احتاج أكياس دم بشكل عاجل ودخل غرفة العمليات فوراً قدرنا نوقف النزيف الداخلي ونركب أنبوبة صدر لتفريغ الدم والهواء اللي كانوا ضاغطين على الرئة.
كمل بصوت هادي
كمان فيه إصابة في الرأس و ارتجاج شديد جداً وعشان كده هو حالياً تحت الملاحظة الدقيقة وحطيته على أجهزة متابعة كاملة.
