لقاء كارثي

ناس كتير ماسكين الموبايلات و بيصوروا سواء تحت او فوق

ليله مسكت كتف نعيمه و هي بتصرخ صريخ مش طبيعي كان عندها هيستريا و الناس واقفين مصدومين نفس صدمتها و صعبانه عليهم و عرفوا من صريخها ان العربيه تبعهم ليله في اللحظه دي كأن العالم وقف حواليها لا صرخت ولا عيطت ولا نطقت بكلمه كل اللي كان عليها ماسكه نعيمه عشان متقعش و الناس كمان بيحاولوا يبعدوهم

و فوق عالكوبري الطريق وراهم وقف حرفياً و كان في زحمه حوالين العربيات اللي اتخبطت اللي فيهم طالع ماسك دراعه و بيصرخ و اللي فيهم مغم عليه محدش عارف من الخضه و الموقف و لا حصلوا حاجه و اللي بتصرخ و بتقول طلعوا ولادي

و ناس تانيه بيطلعوا سواق النقل اللي كان غرقان في دمه و فاقد الوعي و شكله مات

كان في حاله من الفوضي الغير عاديه و كانها القيامه قامت

مسكتها ليله من ايدها تشدها و هي مش عارفه تنطق من الصدمه و نعيمه عماله تصرخ و تزق في كل الي يمسكها و من ضمنهم ليله صريخها مكانش طبيعي

بلعت ليله ريقها بصعوبه عشان تحاول تخلي الكلام يطلع كان في غصه في حلقها بصتلها و مسكت وشها باديها

ليله….لازم نروحلهم بسرعه لازم ننزل يلا

شدتها بالعافيه و خدتها تاني عالعربيه فتحتلها الباب و ركبتها و لفت وهي رجلها بتترعش لدرجه انها بقت تتسند علي العربيه وهي بتلف كانت حاسه ان رجليها بتخونها و مش قادره تقف محتاجه تقعد كانت حاسه انها بتتشل بس لو فقدت السيطره علي نفسها في الوقت ده بالذات نعيمه هتنهار

ركبت و دورت العربيه بسرعه موبايلاتهم مكانتش مبطله رن بس كأن في حاجه ساده ودنهم من شدة الصدمه و مفيش واحده فيهم افتكرت اصلا الموبايل او انهم يتصلوا يستنجدوا بحد العقل كان في غياب تمام و مفيش في عينهم غير صوره العربيه و هي بتتقلب من فوق ..

داست ليله علي البنزين كان قدامها في عربيات كتير اللي مخبوط واللي واقع غير العربيه النقل اللي واقعه في وسط الكوبري من كتر ما الناس اتعاطفت معاهم بقوا الشباب و الرجاله يبعدواهم العربيات و يوسعولهم الطريق

صريخ نعيمه كان سادد ودن ليله و مخليها فاقده التركيز خالص مسطت كفها و بقت مركزه علي الشباب و هما بيشاورولها تيجي و تتحرك لحد ما عدوها في اللحظه دي حطت رجليها عالبنزين مشالتهاش

كان لازم تخلص الكوبري و تاخد اول لفه يمين و ترجع تاني لمكان الحادثه يمكن كانت المسافه متاخدش اربع خمس دقايق بس في الاوقات اللي زي دي الوقت لا بيعدي ولا يمشي و الثانيه بتبقي سنه كانت حاسه ان الكوبري مش بيخلص واللفه مش بتيجي و كل حاجه قدامها مش بتتحرك ..