لقاء كارثي

عارفة يعني إيه الواحد يبقى محتاج حد يسأله مالك؟ وما يلاقيش.

وعارفة يعني إيه فرحة كبيرة تتكسر في ثانية.

يمكن عشان كده بقيت طول الوقت بحاول أسبق الحزن بخطوة.

ألم لمة الناس قبل ما تتفك وأطمن على اللي ساكت قبل ما يغرق في سكوته وأجري أحل أي مشكلة قبل ما تكبر.

كأني طول الوقت بحارب حاجة محدش شايفها غيري.

بحارب الزعل قبل ما يدخل بينا.
بحارب الفقد قبل ما ياخد حد مننا.
بحارب اللحظة اللي نصحى فيها ونكتشف إن حاجة حلوة كانت في إيدينا وضاعت.

وساعات كتير ببقى مرهقة يا عشري.
لأن الحقيقة إني مش بحاول أحميهم هما بس..

أنا بحاول أحمي قلبي أنا كمان
بحاول أحافظ على الفرحة وهي لسه موجودة.

بحاول أمسك الأيام الحلوة بايدي الاتنين قبل ما تسرقها الدنيا مني زي كل مرة.

بس تعرف ان المرادي معرفتش يا عشري و الحزن هو اللي سبقني بخطوه وده اللي واجعني

انا كنت راحه مع نعيمه وكل همي اصالحها هي وفضل مكنتش عيزاها تمشي وهي زعلانه منه و لا عيزاه يزعل و هي بعيده عنه تاني

فرحت اوي لما قدرت اصالحهم و ضحكوا فرحت لما شوفت فرحه نعيمه و هو فضل بيقولها انه رايحلها عالمطار كانت عامله زي الطفله نسيت زعلها في لحظه .

بس للاسف حصل اللي كان مستحيل يجي في دماغي انا للحظه يا عشري فكرت اني ذكيه و هخدع الحزن لما لمحت العربيه بالصدفه جايه بتجري ناحيتنا فكرت لما فاديتها اني حميت نفسي وحميت نعيمه بس ملحقتش حتي اقول كويس انها جات في العربيه ملحقتش يا عشري احمد ربنا ولاقيت فجأه العربيه الي هما فيها طايره قدامي كل حاجه وقفت وقفت يا عشري

عشري….قدرهم يا ليله جايز تقدري تمنعي حزن بس القدر صعب تمنعيه

ليله…..عارفه عارفه يا عشري بس موجوعه اوي اوي يا عشري

لدرجه اني مش عارفه ازعل علي ايه

ازعل علي نادر نسمه نوجا انكل عادل ازعل علي نعيمه واللي هي حاسه بيه ازعل علي سليم اللي موجوع هو كمان ازعل علي البنات

و لا ازعل علي زعلي من اللي حاصل
طيب اقولك حاجه انا خايفه يا عشري خايفه يكون توابع الموقف ده اكبر بكتير من شويه دموع وزعل و وجع

عشري…..انا اول مره اشوفك بالشكل ده يا ليله و متعودتش اشوفك باليأس ده اصلا انا عارف ومقدر الموقف و عارف انك خايفه يحصل اكتر من كده بس انا عايزك قويه ان شاء الله مش هيحصل اوحش من كده يا ليله ان شاء الله هيخرجوا وهنطمن عليهم و هيبقوا كويسين