لقاء كارثي
لقاء كارثي
وإزاي القدر قدر يخطف الفرح من وسط الزغاريد ويحول الضحكات لدموع والأماني لوجع والحياة كلها لحكاية عمر أصحابها مكانوش متخيلين إن نهايتها هتتكتب بالشكل القاسي ده؟
للموت ريحة مش شرط الأنف يشمها لكن الروح بتحس بيها ريحة غريبة تقيلة أول ما بتدخل مكان بتحس إن الدنيا كلها اتغيرت من غير ما تعرف إيه اللي اتغير.
الأصوات بتبعد و الوشوش بتبقى باهتة والزمن نفسه كأنه بيبطأ خطواته وهو ماشي.
الموت مش بس غياب شخص الموت لحظة ذهول كاملة لحظة العقل فيها يرفض يصدق اللي عينه شايفاه والقلب يرفض يستوعب اللي حصل والروح تفضل متعلقة بأمل مستحيل أمل إن كل ده يكون غلط أو حلم أو سوء فهم هيخلص بعد شوية.
ساعات الإنسان بعد الصدمة بيبقى عامل زي اللي واقف بين الغفوة والصحوة لا هو قادر يفوق بالكامل ولا قادر يرجع ينام ويهرب من الحقيقة.
يسمع الكلام حواليه كأنه جاي من بعييييييد ويبص للناس و كأن بينهم وبينه حجاب.
كل حاجة موجودة لكن ولا حاجة حقيقية.
ويمكن دي أقسى لحظة في الموت..
مش لحظة الرحيل نفسها لكن اللحظة اللي بعدها اللحظة اللي بتدرك فيها إن اللي راح مش هيرجع إن الصوت اللي كنت متعود تسمعه سكت.
وإن المكان اللي كان مليان حياة بقى ناقص حاجة عمرها ما هتتعوض.
بيبقى في ثقل هابط على القلب يخليه يحارب عشان يصدق حقيقة هو رافضها من جواه.
عشان كده الموت ليه هيبة مختلفة عن أي وجع تاني لأنه الوجع الوحيد اللي مفيش بعده فرصة أخيرة ولا كلمة أخيرة ولا مرة تانية.
مجرد نهايه بتتكتب للشخص اللي فارق ومات و نهايه بتتكتب للشخص الحي كمان ..
……………………
وده بالظبط نفس اللي حصل مع ابطالنا…
ساعتين زمن و حرفياً الدنيا اتقلبت
لكن اللي حصل في الساعتين دول مكانش حدث عادي كان حدث يهز بجد حدث يخلي اي حد مكانهم يتمني من كل قلبه انه يبقي في حلم مزعج او كابوس مرعب يتمني يصحي و يفوق منه..
ساعتين زمن كانوا قادرين يبدلوا حال لحال تاني خالص يبدلوا حياه عاديه لحياه فيها وجع كبير
ولكن قبل الساعتين دول الحدث كان قاسي جداً…
فلاش بااااااك..
نعيمه و ليله كانوا بيضحكوا و مبسوطين..
نعيمه مبسوطه بصلحها مع فضل و خوفه علي زعلها و تصميمه انه يروح يشوفها قبل ما تسافر و يسلم عليها
اما ليله كانت مبسوطه لانها مش حابه تشوفهم متخاصمين يمكن كانت عارفه انهم كده كده هيتصالحوا و عارفه ان نعيمه زعلها غيرة بنت علي حبيبها بس فرحت اكتر انهم اتصالحوا قبل سفرها
