لقاء كارثي
لقاء كارثي
الانهيار مش متاح يا عشري كلهم محتاجين حد يقويهم و انا وايمي ديما بنعمل كده بس الوقت مفيش غيري و انا لا حمل تعب ايمي او ايه او اي واحده فيهم كفايه اوي وجعي علي نعيمه…
فضل باصصلها ثواني و ساكت مش عارف يقولها ايه عايزها بس تتكلم لانه عارف انها موجوعه اوي و كان خايف ترجع تتعب تاني
حست ليله بالوجع اللي في بطنها بيزيد اكتر حطت ايدها بهدوء علي بطنها و ملامحها اتحولت لحزن اكبر حتي في نبره صوتها..
ليله….بس انت عارف ايه اللي قاهرني اوي يا عشري؟
عشري….بحزن فظيع ايه يا قلب يا عشري ؟
ليله….خدت نفس طويل و بصتلوا اني من يوم ما جيت عالدنيا دي وديما فرحتي مش كامله
ضغطت علي بطنها بحزن
كل ما افرح او احلم الاقي الفرحه بتتسحب مني ..
كأن الفرح عندي ضيف مستعجل يدخل يسلم ويمشي قبل ما ألحق أفرح حتي بيه.
عارف الإحساس لما تبقى واقف قدام حاجه نفسك فيها من زمان ولما تيجي تلمسها تلاقيها بتبعد خطوه؟ هو ده أنا طول عمري.
كأن نصيبي من الفرح اتفاق غريب معاه.
يديني الحلم علشان أشوفه بس نادر أوي ما يسيبني أعيشه كامل.
انا مش زعلانه يا عشري انا راضيه بس نفسي احضن فرحتي بايدي للنهايه قبل ما الحزن يسرقها مني
عشري…..مش يمكن ربنا بيحبك و عايزك ديماً تبقي فكراه او تلجأي ليه
ليله…..انا عمري ما نسيته و طول الوقت بلجأ ليه بس انا تعبت يا عشري و ده غصب عني اوقات حتي لو انت راضي بيجي عليك وقت و تتعب و تقول كفايه و انا نفسي فرحه تيجي من غير ما يكون قبلها تعب او بعدها تعب
هتصدقني لو قولتلك اني بقيت اخاف افرح لاني عارفه ان في حاجه هتستكتر عليا الفرحه دي و تدخل تسرقها طيب اقولك حاجه
عشري….قولي يا قلبي
ليله…..بيقولوا اني جدعه و صاحبتها صاحبها و ديما في ضهر الكل وشايله همهم جايز اكون كده بس يمكن الموضوع يكون بالنسبالي مش مقصود يبقي جدعنه او ان يتقال عني ليله واقفه في ضهر الكل
أنا يمكن بعمل كل ده عشان خايفة يا عشري…
عشري….من ايه يا قلبي
ليله…..بحزن خايفة من الزعل قبل ما يجي.
لو حد اتأخر أسأل عليه لو حد سكت أجرى وراه لو حد شكله متغير أفضل أزن عليه لحد ما يتكلم.
مش عشان أنا قوية ولا عشان بحب أبقى مسؤولة عن الكل…
عشان أنا عارفة الوجع لما ييجي من غير ما حد يحس بيك بيبقي عامل ازاي.
