لقاء كارثي
لقاء كارثي
تامر…..طيب طمني بالله عليك في حد حصلوا حاجه
الموظف…والله انا معرفش هما لسه واصلين من دقايق
تامر…طيب مين اللي واقع
الموظف….ولا دي لسه اعرفها والله مخدتش بيانات حد لسه الاسعاف الي جابتهم
تامر…طيب شكراً
دخل تامر جري علي جوه جري طرقه كبيره و بعدين لف يمين و جري في اخر الطرقه لمح من بعيد نعيمه و ليله اطمن شويه بس عرف كده ان العربيه التانيه كان فيها اهل نعيمه قرب منهم جري
بصتلوا نعيمه بضعف و انهارت تاني و بصتلوا ليله بذهول و في اللحظه دي بدأ عقلها يترجملها ان في ناس في حياتهم ممكن تلجأ ليهم او تطمن في وجودهم و من غير كلام قرب تامر منهم هما الاتنين حط كفوفه علي راسهم و ضمهم في حضنه بسرعه
نعيمه…..بانهيار امي وابويا واخواتي يا تامر
تامر…..اهدي اهدي هيبقوا كويسين والله هما جوه ؟
نعيمه…..جوه ابوس ايدك يا تامر اعمل حاجه و النبي اسال اي حد طمني عليهم هموت والله مش لاقيه حد يريحيني اعمل حاجه اعمل حاجه والنبي
تامر….طيب اهدي اهدي هنشوف حد انتوا فيكم حاجه طيب ؟
نعيمه….نسمه يا تامر بتموت و النبي الحقها
تامر…طيب اهدي والنبي مش هيحصلها حاجه والله انتي شوفتيهم
نعيمه….بدموع و هي ماسكه في هدومه و دراعه مشوفتش غير نسمه اعمل حاجه والنبي ليله اعملي حاجه
بصتلها ليله و منطقتش
تامر….ليله انتي كويسه ؟
بصتلوا ليله و هي عينها ثابته مش بترمش حتي مردتش هي سمعاه و عارفه انه بيتكلم بس كان عقلها مش مترجم عشان يرد
تامر….ليله فيكي حاجه ؟
هزت راسها بلأ وبصت تاني عالمكان اللي دخلوا منه.
تامر…..عشري و فضل و الكل هيتجنن عليكم هطمنهم ماشي انا جنبكم هنا
سندت نعيمه عالحيطه و نزلت لتحت كأنها قاعده علي الهوار حطت ايدها علي راسها و كانت منهاره قربت ليله بهدوء تبص من الباب اللي فاصل بينهم يمكن تلاقي حد جاي او تطمن او عشان تطمن نعيمه
مسك تامر موبايله و اتصل علي عشري اول ما جه يتصل الموبايل فصل شحن
تامر….قرب من نعيمه تاني و بص لليله الموبايل بتاعي فصل شحن موبايلك فين انتي او ليله ؟
نعيمه…..بدموع معرفش معرفش
تامر….وقع ولا في العربيه؟
نعيمه….بدموع معرفش
تامر…..طيب اهدي ليله موبايلك فين؟
مبصتش ولا ردت و فضلت واقفه تبص من الزجاج بتاع الباب
تامر كان مراعي حالتهم و عارف انهم في صدمه سابهم تاني و جري علي الريسيبشن يسأل علي شاحن
