لقاء كارثي

لقاء كارثي
أميره أسامه
صاحبة البطل الواحد

~° البارت السادس°~
…………

طلع البنات و الشباب علي الاوض عشان يناموا بس كالعاده البنات بعد اي حاجه جديده عليهم لازم يقعدوا شويه و يتكلموا مع بعض

دخلوا كلهم في الاوضه اللي هينام فيها ايمي و سلمي و ايه

ليله…..بت انتي وهي انا هموت وأفرد جسمي علي السرير مجرجراني وراكي ليه

ايمان…اقعدي ننم عليهم شويه

ليله…..علي مين الشباب

نادين….بضحك تموتوا في النم انتوا

نعيمه…..وانتي يا ست سلمي لسه خايفه منهم

سلمي…..صراحه حساهم محترمين بس بردوا ميمنعش اني كنت خايفه ما هو مش طبيعي نقعد في مكان واحد مع ست شباب منعرفهمش

نعيمه….اتنيلي ده خلفهم أتقطع من اللي حصل في الجو يعني مفيش منهم خوف

ضحكوا البنات كلهم

سلمي….والله انتي سافله

ايمان….ماهي عندها حق مكدبتش المهم قولولي ايه رأيكم فيهم

ليله….ايه مالك يا ست ايمي عاجبينك

ايمان…..بطلي عبط انا بتكلم في العموم يعني بس أن جيتي للحق هما حلوين

ليله….من ناحية حلوين فا مقدرش اقول غير كده

ايه….طيب مين فيهم اللي عجبك يا ليله

ليله….عجبني من ناحية ايه بالظبط

ايه…يعني شكل شخصيه كده يعني

ليله…..هو شخصيه بصراحه مقدرش احكم عليهم في النهايه انا اتعودت مصدقتش اي حد اتعرف عليه من الاول حتي لو بنات لان في العموم بيظهروا احسن ما فيهم بس لو علي الشكل بصراحه كلهم قمرات ولاد اللذينه

ايه….ايوه بس لو قولنا اختاري حد مثلاً يكون استايلك

ليله….اه انتي شكلك ناويه تشتغلي خاطبه مع ايمي

ايه….لا والله بنرغي عادي قولي بقي متبقيش رخمه

ليله….امممم بصراحه حلوين اوي كلهم يعني عشري حلو و فضل كمان زي القمر و سلامه و رشيد كمان كلهم الاستايل بتاعي

ايه….يعني حسان و عسال لا

ليله…..لا بالعكس زي القمر بس يعني حسان واضح أنه عاقل كده و رزين زيادة عن اللزوم مش التايب بتاعي بس بصراحه لو شخصيته اللي اتعامل بيها مع طليقته دي حقيقيه يبقي يابخت اللي هتكون في حياته أما عسال فا ده بقي حكايه لوحده قمر و استايلي علي فكره و باين أن دمه خفيف بس هو سنه اصغر مني فا مقدرش احكم عليه

ايه….طيب وانتي يا ايمي

ايمي…..صراحه زي ما ليله قالت كلهم حلوين بس بما أن انا اكبر واحده فيكم فا اكتر حد احس انه اساتيل العقل بتاعي هو حسان و رشيد

ايه….مع اني كنت شاكه تقولي عشري

ايمان…..عشري قمر مقدرش أنكر بس حسان و رشيد استايلي اكتر يعني بحب انا السن الرايق ده

ليله….ياواد انت يا رايق بس علي فكره رشيد يمشي مع استايلك اكتر من حسان كمان

سلمي….بضحك هو انا ليه حاسه انكم بتقسموا الشباب و عينكم عليهم

ليله….انا مالي انا كنت رايحه انام انتوا اللي قولتوا تعالوا ننم شويه عليهم

سلمي….مليش دعوه انا مقولتش ايمي اللي قالت

ايمان….ايمي اللي قالت طب يلا يا اختي قولي ايه رايك فيهم

سلمي….بضحك الله وانا مالي

ايه….اختاري بقي متبقيش رخمه

سلمي….يا بنتي اختار ايه بلاش هبل

ايه….عادي يا سلمي بنتسلي قولي من وجهة نظرك رايك فيهم

سلمي…..حلوين كلهم و محترمين يعني ميكس كده بين الشقاوه و الجنان و كمان العقل صراحه كلهم زي القمر

نعيمه….طيب لو انتي الوقت مجبره تختاري حد فيهم يتناسب مع الاستايل بتاعك تختاري مين يعني لو من اول نظره كده هتقرري هتختاري مين

سلمي…..بصوا انا موضوع الشكل ده مبقتش احبه لأن لما اتشديت للشكل قبل كده خدت اكبر مقلب في حياتي بس يعني لو هختار بالشكل بعيداً عن ان كلهم حلوين بس في الشكل اكتر اكيد عشري و فضل و ممكن سلامه بس لو هختار الشخصيه بيتهيألي يعني اللي يمشي معايا حسان و عسال و رشيد بصراحه حاسه كده أنهم عاقلين أو أنضج شويه مع أن عسال سنه صغير بس بصراحه باين عليه حد كويس
بس طبعاً زي ما ليله قالت مقدرش احكم عليه شخصيتهم غير بالمواقف في النهايه كل واحد حكي عن نفسه بطريقته

ايمان….طيب وانتي يا نوني

نعيمه…..صراحه كلهم قمر و بعيداً عن الشخصيه يعني في العادي اب بنت فينا لما بتشوف مجموعه شباب بتختار أحلامهم يمكن لما تتعامل مع الشخص الحلو اللي هي اختارته ده تلاقيه مش مناسب و شخصيته مش حلوه بس لازم نتفق أن اول حاجه بنبص عليها الشكل و صراحه اللي يكسب فيها فضل و عشري

ايمان….طيب ولو شخصيه

نعيمه…..لا انا لسه معرفش شخصيتهم يمكن مواقفهم في الحكايات اللي حكوها جميله خصوصا حسان و رشيد بس هما مش الاستايل بتاعي صراحه

ليله….وانتي يا نودي

نادين……انا متفقه معاكم أن الشكل اول حاجه بنبص عليها بس كمان انا بتفرق معايا الشخصيه اوي يعني لو هتكلم علي الشكل بصراحه كل واحد فيهم احلي من التاني و انا ممكن استايلي يركب علي اساتيل فيهم

ايمان….بضحك داخله علي طمع انتي

نادين…..بأبتسامه لا والله بس حقيقي كلهم حلوين مقدرش اظلم حد فيهم بس صراحه انا بحب الشاب الاسمر اكتر يعني ممكن عسال سلامه رشيد بحب انا لون البشره دي فضل و عشري حلوين اوي بس انا مش بحب الراجل الحلو اوي كده بس لو هتكلم علي اكتر حد حسيت أنه شبههي اوي فا هو عسال يعني بيتهيألي اقرب حد في الشخصيه مني بس خساره أن سنه صغير

ايمان……فعلاً انا قولتها عسال وضعه و حكايته تشبهك اوي طيب مين غير عسال

نادين….صراحه حسان كمان عجبني خصوصاً لما عرفت موقفه من بنته في البدايه اضايقت أنه انفصل و هو عنده بنت لأن الموضوع ده بيضايقني اوي انا عشت نفس الظروف و تعبت و عانيت كتير فا محبش أن اي طفل يحس نفس الاحساس ده حتي لو كان ولد بس لما حكي عن طريقه تعامله معاها حتي بعد الانفصال وقد ايه هو بيحاول يعوضها اكتر ما كانت في حضنه هو وامها كنت مبسوطه

ليله…..انا كمان احترمته بصراحه

نعيمه….طيب وانتي يا ايه

ايه…..هما كلهم بصراحه زي القمر بس اللي حسيت انهم استايلي في الشكل و الروح
يعني فضل و سلامه حتي عشري مع أنه أكبر مني و عسال كمان موقف القهوه ضحكني و حسيت أنه باين عليه كوميدي

نعيمه….بضحك فطسنب من الضحك والله

ليله….وانا لاقيته مره واحد قام و هو مش طايق عشري فصلت ضحك

سلمي….بصراحه كلهم حلوين و قعدتهم جميله

ايمان…..بس قوليلي يا نادين ليه بتقولي خساره أن سن عسال صغير

نادين….عشان هو فعلاً سنه صغير

ايمان….يعني انتي متقدريش ترتبطي بواحد سنه صغير

نادين…..بابتسامه توتر هو انتوا ليه بتتكلموا علي اساس أننا نختار حد فيهم بجد

ليله…..ايمي بقت خاطبه

ايمان….لا والله بتكلم في العموم يعني بعرف رأيك

نادين….رأيي في ايه اكيد صعب يا ايمي انا 34 و هو 29

ايه….هو قال داخل علي 30

نادين….وانا داخله علي 35 يعني في العموم بينا خمس سنين

ايمان….طيب وايه مشكلتك انتي مع السن

نادين…..اكيد مشكله مقدرش مستحيل طبعاً طبيعي البنت بتبقي أنضج من الشاب و عشان نكون مستوي تفكيرنا واحد لازم يكون هو الأكبر علي الاقل بالخمس سنين دول مش العكس

ايمان…..بس بيتهيألي كلنا اجمعنا علي أن عسال عاقل و شخصيته حلوه

ليله….صراحه اه يبان اكبر من سنه بكتير و رغم أن حسان و رشيد اكبر منه بس انا متأكده أنهم لما كانوا في سنه مكانوش بالعقل ده بس انا فاهمه نادين من ناحية موضوع السن ده

ايمان….انتوا بجد عبط اوي و مستغرباكم فيها ايه السن ليه شايفين أنه ازمه

نادين…..انا مش هنكر أن عسال عقليته و شخصيته و أسلوبه اكبر من سنه غير أنه بجد جذاب و غصب عنك تحسي انك بتتشدي لطريقته بس انا لو هتكلم عن نفسي مقدرش أبداً اتخطي موضوع السن في الارتباط

ايمان….يعني لو فرضنا أن عسال اتقدملك و انتي متعرفيش سنه توافقي

نادين…..احتمال كبير اه اوافق بس سنه هيبقي الحاجز الوحيد اللي بينا أنا صراحه مقدرش اتخطي حاجتين في الارتباط السن و الطول يعني ممكن أتغاضي عن اي حاجه في الشكل و الطباع لكن سن و طول صعب لأن انا هفضل طول الوقت شايفه فرق السن اللي بينا

نعيمه….صراحه انا معاكي و يمكن دول الحاجتين اللي انا كمان مقبلهمش بس لو هختار ما بينهم هقبل بالسن لكن الطول مستحيل

سلمي…..طيب لو حبيتي شخص و هو اصغر منك يا نودي ايه الحاجه اللي لو عملها تخليكي تنسي موضوع السن

نادين….مستحيل صدقيني

سلمي….يعني لو مجبره مثلاً ايه اكتر حاجه تخليكي تنسي موضوع السن

نادين….اكيد هو نفسه طريقته معايا مواقفه محاولاته الكتير والافعال اللي تخليني انسي موضوع السن

سلمي….مواقف وأفعال زي ايه مثلاً

نادين….لا معرفش زي ايه بس اللي أقصده أن المواقف عموماً بتخليكي تكتشفي الشخص إذا كان بيمثل ولا دي شخصيته الحقيقيه أحياناً في مواقف بتخلي اللي قدامك يتكشف قدامك يعني مثلاً موقف يبين رجولته عقله شخصيته بجد موقف صعب يبين هو جواه طفل ولا بجد راجل عاقل و ناضج قد المسؤوليه و لا صعبه عليه كده يعني

ليله…..المواقف فعلاً بتظهر الشخص و بتبين كل التفاصيل الصغيره اللي مستحيل نقدر تاخد بالنا منها يعني نقدر نعرف حجم عصبية الشخص اللي قدامنا لأن انا عندي قناعه شخصيه أن كل حد فينا عصبي خصوصا لو اتحط في موقف يستدعي العصبيه دي

نعيمه….بس العصبيه درجات

ليله….بالظبببببط اهو ده اللي بقوله درجة عصبية كل شخص بتختلف يعني في شخص يتعصب علي قد الموقف في شخص تاني يبان أنه متعصب لكن تقدر تكمل معاه نقاش و في شخص تالت خالص لو وصل العصبيه مستحيل حد يقدر يوقفه فالعصبيه متفاوته عند كل واحد فينا

سلمي…..و في مننا ممكن منتحملش نوع عصبيه معينه يعني انا مثلاً مستحيل اتعامل مع شخص بمجرد ما يتعصب يكسر كل اللي قدامه أو يفقد.عقله و ياذيني أو ياذي اي شخص عموماً حتي لو معاه الحق انا مستحيل اقبل في حياتي شخص مؤذي يعرض حياة غيره للخطر

ليله…..بالظبط فا المواقف بتظهر الشخص قدامك وهنا بقي بيجي دورك تقدري تتحملي الشخص ده اولا و كمان بعيداً عن العصبيه موقف مثلاً زي اللي رشيد قاله مراته حست أن هو مش سند ليها ولا وقف معاها ضد اخواته أنا شخصياً لو في حد في حياتي و اتعرضت قدامه لموقف زي ده لا أحب أن هو يدافع عني و يجيب حقي

ايمان….بس هو متصرفش غلط يا ليله هو محبش يقف قدام اخواتها خصوصاً أنه قال اخواتها كويسين و كمان عرض عليها أن هو اللي يدفع لها نصيبها من حقها لتفادي المشاكل

ليه…ااااايوه هي دي بقي النقطه اللي اقصدها لو هتكلم علي موقف رشيد فا هو مليون فالميه كان جدع وراجل و شهم و مقدر معني الصله اللي بتربطه باخواتها انا بس خدت الموقف كمثال وهو قال إن هي كانت أعصابها تعبانه و بتحاول تعوض نقصها بالمشاكل والعصبيه فا خلينا نقول ليها عذرها هو الراجل طلع محترم و قدر مشاعرها لكن كمان حب يرضيها أنه هو اللي يتكفل بحقها بس يعني لو فرضنا أن لو كان الموقف غير كده و اخواتي واكلين حقي و محدش راضي يديني نصيبي و هو واقف ساكت لا الموضع مختلف و وقتها هحس أنه مش سند و حتي لو قرر عشان يتفادي المشاكل يدفعلي هو نصيبي من ورقي وقتها هحس أنه جبان و مش قادر يقف قدامهم فا الموقف هنا يختلف طبعاً

نعيمه……ايوه طبعاً يختلف يعني انا احترم موقف رشيد لكن لو زي ما بتقولي الموقف اتعكس لا طبعاً مش هيبقي حلو و مرفوض

سلمي…..طيب لو فرضنا يا نودي أن مثلاً عسال أو اي شخص انتي معجبه بيه بس هو اصغر منك وده الحاجز اللي بينكم و حصل اكتر من موقف قدامك زي اللي البنات قالوا كده و كان معاكي راجل و واقف في ضهرك لا بيتعصب عليكي بالشكل المبالغ فيه ولا بيسمح لاي حد أنه يتعدي علي حقوقك و بيسمعك و بيتناقش معاكي و في اسوء ظروفك و نفسيتك جنبك و منين ما بتحسي انك لوحدك تبصي فجأه تلاقيه جنبك و بيطمنك وقتها ممكن تغيري رأيك في موضوع السن ده

ايمان…..سؤال حلو اوي

نادين…..بابتسامه اااامممم مش عارفه بصراحه يمكن انا الوقت مش هقدر اقول رد لأن انا الموضوع بالنسبالي مرفوض عموماً لكن لو اتحطيت فيه اااااا معرفش معرفش

ايمان……لا لازم تعرفي لو لاقيتي الراجل اللي بتحلمي بيه يعني شكله حلو شخصيته جميله مواقفه معاكي رجوليه بجد هتعملي ايه لو سنه اصغر منك

نادين……ممكن بس كمان صدقيني موضوع السن ده بالنسبالي مشكله احتمال مواقفه معايا تجبرني اغير رأيي بس كمان مقدرش اقول اني اه هوافق لأن ممكن وقت الجد مقدرش

ليله….الموضوع ده محدش يقدر ياخد قرار فيه غير لو حب الشخص يعني لو نادين حبت شخص اصغر منها صدقوني وقتها مش هتفكر في موضوع السن لأن باختصار احنا البنات عموماً لما بنحب بجد لا بنفكر في شكل ولا سن و في مننا كمان ممكن يقبل بطباع مش بيحبها في مقابل أنه يكمل مع شخص بيحبه

ايمان…..طيب انتي ياليله تقبلي

ليله….هو انا محبش صراحه ارتبط بواحد اصغر مني بس لو الراجل اللي قدامي بيحبني و في كل الصفات اللي انا بتمناها ممكن وقتها افكر بقلبي مش بعقلي

ايه…..وايه الفرق بقي بين قلبك و عقلك

ليله….لا فرق كبير انا باختصار شخص بفكر بقلبي و عقلي مع بعض بس لو في موقف زي ده لو فكرت بعقلي وقتها احتمال كبير المبدأ يبقي مرفوض عندي لان لو فتحت المجال لعقلي يفكر و قتها عقلي هينتصر علي عقلي

نادين…..صح ليله بتتكلم صح انا عن نفسي بفكر بعقلي اكتر و ديماً بحسبها حتي العلاقات اللي دخلت فيها قبل كده كنت كل مره بسبب الشخص و ابعد عنه عشان بفكر بعقلي لاني لو كنت وقتها فكرت بقلبي ولو ثواني كان احتمال كبير افضل مع واحد فيهم يعني كان ممكن اتخطي اي عيب عشان اكمل بس مقدرتش

ليله…..التفكير في الحب بين العقل والقلب يا جماعه حرب و غالباً لو العقل دخل بينتصر علي القلب مفيهاش كلام عشان كده اوقات بحس أن البني ادم عموماً في بعض الحجات لازم يمشي شويه وراء قلبه لأن باختصار مش كل حاجه احنا عايزنها هنلاقيها في الشخص

ايمان…..بالظبط مفيش حد كامل

ليله….ايووووه طبعاً لازم تلاقي حاجه ناقصه يعني عسال ده مثلاً اكبر من سنه و عقليته حلوه و باين انه حنين و طيب و الاهم أنه بيقدر الجميل اللي بيتعمل عشانه
و كمان شاب حلو محدش فينا ينكر ده بس بالنسبه لاي بنت اكبر منه السن المشكله فا اللي بيحب بجد هيقدر يتخطي حاجه مش عجباه ده رأيي

ايمان….طيب انتي يا سلمي توافقي علي شخص اصغر منك

سلمي….والله لو في كل المواصفات الحلوه دي اكيد اوافق طبعاً ليه ارفض ما انا ممكن ملاقيش اللي انا عايزاه في شخص قدي أو اكبر مني

ايمان…..وانتي يا ايه

ايه….بضحك انا 27 سنه اصغر مني اكتر من كده تبقي كارثه بس كمان لو راجل ليه لا معنديش مشكله بس مش كتير يعني أخري سنن أو شهور

ايمان….وانتي يا نوني

نعيمه….انا قولت لا طول ولا سن بس لو هختار بينهم لا عادي اختار السن خصوصاً لو مش عقلية طفل و لا مراهق يعني يكون راجل

نادين….طيب انتي يا ايمي

ايمان….صراحه معنديش مشكله خالص و لا عمري حسيت أن موضوع السن ده مشكله أصلاً بس اهم حاجه انها يحسسني ديماً اني اصغر يتعامل معايا علي اني طفله يحتويني خصوصاً ان احنا الستات خلينا نعترف أن بيجي علينا اوقات بنصغر. عقلنا فا لو هو في الوقت ده اتعامل علي أنه راجل بجد و مصغرش عقله معايا يبقي حلو كملت بضحك و بعدين انا واحده عديت الاربعين بس جوايا لسه بنت عندها عشرين سنه يعني مش لازم اتجوز واحد يمشي مع سني ايه المشكله لو خدته صغير و دلعته و دلعني

ضحكوا البنات كلهم

ليله….تموتي في قلة الأدب

ايمان….مش قلة ادب انا واحده بحب الحياه يعني لو فكرت اتجوز حد سنه اصغر مني عمري ما هخليه يحس بفرق السن و ديماً هعمل كل اللي في أيدي عشان لما العمر يعدي بينا ميحسش انه لسه صغير وان انا كبرت خلاص

ليله….علي فكره هو موضوع السن ده بيحتاج مجهود

ايمان….بضحك غمزلتها عشان كده لو سنه صغير هيبقي حلو

ليله…..مش قصدي يا سافله انا اقصد يعني بيحتاج مجهود من الست انها تفضل محافظه علي شكلها وجمالها و اهتمامها بنفسها و بيحتاج مجهود أكبر من الراجل عشان يقدر يحسس البنت او الست اللي قدامه أنه قادر علي فرق السن ده يعني لازم يكون بيتصرف ديماً كاراجل مسؤول لأن الست لو استصغرت الراجل بتبقي مشكله

نعيمه…..صح احنا لما بنقفل مش شخص و خصوصاً راجل خلاص مستحيل يفضل في حياتي

ليله….وانا كمان

نعيمه….بابتسامه طيب انا شايفه يا ايمي أن الموضوع معاكي تمام فا ايه رايكم يا بنات ايمي لايقه علي عسال مش كده

ايمان…..يا شيخه حرام عليكي مش للدرجادي انا ممكن اقبل بشخص اصغر مني يعني لو نفس الفرق اللي بينهم و بين نادين حلو خمس سنين مش ظاهرين سبعه بالكتير إنما أنا حوالي 12 ولا 13 سنه

نادين….علي اساس خمس سنين عادي

ايمان….اه عادي علي فكره مش الفرق الظاهر و القوي بالعكس و بعدين هو ماشاء الله طول بعرض و عضلات انتي جنبه مش باينه

ايه….بضحك هو انا ليه بجد حسيت انكم بتقسموا الشباب علينا

ايمان….وليه لا

ليله….بضحك هو ايه اللي وليه لا انتي الموضوع عجبك بجد ولا ايه

ايمان…..اه عجبني و بعدين انا شخص بيآمن بالصدف و بصراحه شايفه أن دي صدفه ما هو مش طبيعي بردوا نأجر نفس الڤيلا اللي كان فيها الشباب و لا معقول أن الدنيا تدمر بره كده و نضطر نقعد مع بعض و لا حتي معقول أن عددنا يبقي نفس عددهم مش يمكن لينا نصيب مع بعض و حتي لو مش كلنا يعني مش وارد واحده فينا او اتنين يبقي ليهم نصيب في شاب او اتنين مش جايز مثلاً بعيد عن الارتباط يكون ربنا جمعنا بيهم عشان هما كويسين و نكسبهم ما اصدقاء و اخوات و بعدين بعيداً عن الصدف دي كلها.

انا شخص عقلاني ليه لا بجد ليه منجربش

سلمي….بضحكه جميله نجرب ايه انتي عبيطه هنروح نقولهم تعالوا ترتبط

ايمان….اكيد لا بس علي الاقل اتعرفوا عليهم انتوا خسرانين ايه في النهايه احنا قاعدين تحت سقف واحد و مضطرين نتكلم مع بعض لأن مفيش حاجه تانيه نعملها

نادين….بابتسامه متفكرنيش والنبي كنت هموت وانزل البحر و اقعد قدامه

ايمان….و محصلش يا ست نادين ننكد علي نفسنا بقي و نبوظ السفريه كده علي الفاضي فكروا بالعقل شويه

ليله….بابتسامة ايوه و ايه هو التفكير بالعقل من وجهة نظرك يا استاذه ايمي

ايمان…..أن كل واحده فينا عاجبها شخص تتعرف عليه اكتر ليه ديماً بنمشي علي حسب دماغ الراجل ونسيبه هو اللي يعلقنا بيه

نعيمه…..ليه هو في ست مبيعجبهاش الراجل اللي معاها اصلا الست طول الوقت بتتعاكس و هي اللي بترفض يعني لو مش مع الراجل اللي معاها بمزاجها مش هتقبل

ايمان….صح بس كمان في رجالة شاطره اوي في انها تجذب الست ليها يعني يشوفوا ايه اكتر حاجه بتعجبها و بيعملوها عشان تبقي معاهم و محدش فيكم ينكر أن كل راجل داخل حياتها انجذبت ليه عشان قدر يكمل الجزء الناقص فيها واللي هي بتدور عليه في الراجل عشان كده خدوخا مني نصيحه بقي و لتعلموا انا الدنيا مسحت بيا بلاط الارض

ليله…..بابتسامه ايوه نعمل ايه بقي يا خبيرة العلاقات العاطفيه؟

نعيمه…..اول و اهم حاجه اوعوا تتكلموا عن الصفات الحلوه اللي نفسكم تلاقوها في الراجل ولا تتكلموا عن نقاط ضعفكم و لا حتي تشاورا علي النقص اللي في حياتكم من غير ما تقصدوا في وسط الكلام والأهم كمان أن محدش فيكم يتكلم عن سلبيات العلاقه اللي معجبتكمش في الشاب اللي كنتوا معاه

سلمي….بضحك شكراً انا كده مش معاكم لاني فضحت نفسي و قولت الإهمال

ايمان…..لا عادي مش شرط تكوني بتبعدي عن الشخص عشان الإهمال بس في صفات كتير بيتهيألي محدش يقبل بيها لو في الراجل زي ما ليله قالت لو عصبي اوڤر لو بتاع أمه زي خطيب نعيمه لو بخيل لو معندهوش طموح و سلبي لو قاعد في البيت و مستني اصرف عليه لو حرامي زي خيبتها اللي كان معايا لو توكسيك أو نرجسي صفات كتير علي فكره و محدش فيكم بيتهيألي يرضي بعلاقه زي دي يعني مش شرط أن موضوع الإهمال بس اللي يخليكي تنفري من الشخص

ايه….صح ممكن يكون بيهتم بس عصبي يعني يتعصب عصبيه اوڤر بس شويه و يرجع يصالحك و يهتم بيكي انا عن نفسي مقدرش

ايمان….اهي الصغيره اللي فيكم قالتها و قيسي بقي علي كده كتير ممكن يكون بيتهم مشاعر و حنين فيها أو بس بخيل في الماديات بردوا صعب فا انا رأيي الشخصي اتعرفوا عليهم بدل ما كانت بتيجي رجلنا مع واحد عرف يجيبنا صح و يوقعنا في حبه احنا اللي نجيب رجل الشاب اللي عاجبني نتعرف عليهم و اللي تحس ان الشخص ده عاجبها تقربه بطريقتها

ليله….بضحك والله انتي فاضيه انا رايحه انام

نعيمه…..استني بس يا ليله و النبي طيب قوليلي يا ايمي بما انك جامده كده وفاهمه انتي من وجهة نظرك شايفه مين يمشي مع كل واحده فينا

ليله….لا انتي اتهبلتي فعلاً

نعيمه….يا ستي هتخسري ايه خلينا نشوف رأيها و رأيكم انتوا كمان اكيد

ليله…..هخسركم انتوا يا حيلتها

نعيمه ….وهتخسرينا ليه ؟

ليله…..عشان افرضي أن اللي عجبك عجبني أو عجب حد من البنات هنخسر بعض عشان راجل يا هبله خصوصاً يعني في اجماع علي كل الشباب أنهم حلوين و استايلنا ايه هنقطع بعض علي الشباب

نعيمه….بضحك اه صح هنعمل فيها ايه دي يا خبيرة العلاقات العاطفيه

ايمان…..ولا حاجه انا قولت نتعرف وارد اصلا اللي عاجبك لما اقعدي معاه تحسي شخصيته مش اوي عادي هتخسري ايه ولا حاجه اعترفتي و بعدين يعني انتي مثلا يا ست ليله قولتي أن استايلك عشري و فضل و سلامه و رشيد بس لو مثلاً قولتلك اختاري واحد بس هتختاري مين؟

ليله….اااا يعني عادي الاربعه حلوين

ايمان….اختاري واحد بس منهم مع اني يعني عارفه الاجابه

ليله…..بابتسامه احراج رفعت حاجبها لا والله مين بقي ؟

ايمان….بضحك قولي بس انتي

ليله…اااا يعني ممكن عشري

ايمان…..بضحك طب والله كنت عارفه

ليله….يا سلام اشمعني

ايمان…..عشان بداية الحب يا قلبي بتبدأ بخناق و انتوا ماشاء الله من وقت ما اتعرفتوا علي بعض و عاملين زي توم اند چيري نانقر ونقير

ليله….مش للدرجادي يعني هو اللي استفزني و بعدين حب ايه انتي عبيطه
يعني ممكن اعجاب ماشي أعديها لكن حب!!

ايمان….بأبتسامه ماشي يا ستي ولا تزعلي اعجاب المهم و نعيمه اختارت عشري بردوا و فضل و سلامه تقريباً بس لو قولتلك اختاري واحد

نعيمه…..بضحك صراحه فضل قمر اوي

ليله….علي طول كده يا سهله

نعيمه…الله مش بقول الصراحه

ايمان….سيبك منها المهم انتي يا سلمي قولتي حسان و رشيد باين و مين تاني

سلمي…..عسال

ايمان…..طب اختاري واحد

سلمي….انا افتكر انك قولتي انتي كمان حسان و رشيد فا اختاري انتي كده الاول

ايمان….وانتي مالك ومالي

سلمي….الله ما تردي انتي الاول

ليله….بضحك خايفه تختار اللي عينك منه

سلمي….بضحك اه والله

ايمان….لا قولي عادي والله شيفاني واقعه في حبهم ده مجرد اعجاب و بكذا شخصيه

سلمي….قولي بس انتي

ايمان….صراحه رشيييد

ليله…احيه و بتلحنيها كمان ايه خبيرة العلاقات وقعت

ايمان….بضحك لا قمر كده و طول و عرض و شخصيته باين انها كاريزما

ليله…..وانتي يا ست يا سلمي كنتي هتختاري مين رشييييييد ولا حسان

ضحكوا البنات كلهم عليها و هي بتقلد ايمان

سلمي…لا صراحه حسان يمكن اكتر حد شدتني شخصيته و عقله كده

ايه…..ايوه بس ده كان متجوز وعنده بنت

ضربتها سلمي علي رأسها

سلمي…..اسكتي انتي كمان شيفاني هتجوزه

ليله….لا استني انتي كده ايه المشكله أنه معاه بنت

ايه….يعني سلمي متجوزتش قبل كده يوم ما تتجوز تتجوز واحد معاه بنت

سلمي….خلاص اتعديتي من ايمي و جوزتيني كمان

ليله…يابت قولتلك اسكتي انتي لحظه

سلمي….بضحك حاضر أديها

ليله….وايه المشكله يا حيلتها يعني ممكن نقول السن اكبر منها بشويه ممكن نقول مش استايلها شخصيته مش اوي هيبقي اعتراض مقبول لكن عشان كان متجوز وعنده بنت فين المشكله يروح يوئدها يعني عشان حضرتك تتبسطي عادي واحد علاقته كانت فاشله و هيرتبط تاني دي ام البنت نفسها اتجوزت و خدت بنتها و بعدين ايه اللي يعيب الراجل الا لو مش راجل اصلا

ايمان….سيبك منها دي هبله

ايه….الله مش بقول رأيي

ليله…خليه لروحك يا اختي

ايمان…..طب وانتي يا ست ايه

ايه…..صراحه كلهم قمر انا موافقه اتجوزهم ست ايام في الاسبوع و اريح يوم

ضحكوا البنات كلهم علي ايه

ليله…..حرمه سعرانه

ايه….الله انتوا مالكم

ايمان….لا بجد اخلصي

ايه….بضحك صراحه انا المفروض مرتبطتش انا أعتبر منطقه محذوره كل اللي كان في حياتي عمل حادثه ومات امي و ابويا و جوزي الله يرحمه

نعيمه…..اه نحس يعني

ايه…..اه عشان كده بلاش انا حرام الشباب زي القمر بس لو مصممين يعني سلامه حلو و لو فضل مش ماشي مع نعيمه ممكن تجرب

ليله….دايسه في اي حاجه انتي

نعيمه….بضحك بت يا ايه تعالي نتعرف عليه احنا الاتنين

ليله…..لا دي هبت منكم علي الاخر اكيد ده تأثير النوم

ايمان…..بقول ايه اتحلت اهي و مش فاضل غير نودي و عسال شكلوا من نصيبك

نادين….لا والله خلاص قسمتوا التقسيمة

ايمان…والله حلو

نادين….لا شكرا يا ست ايمي حلال عليكم الشباب بألف هنا ملكوش دعوه بيا

نعيمه…..الله اتعرفي وجربي مش يمكن يعجبك

نادين….بضحك انا بس في سؤال هموت واسئله

ايمان….سؤال ايه

نادين….بضحك بجد انتوا شاربين ايه عالصبح بتختاروا الشباب و بتقسموهم و قاعدين تختاروا و مش بس كده انتوا متخيلين أن مستوي النقاش و صل أننا نصفي من اللي اخترناهم عشان نطلع بواحد

ليله….بضحك اه والله و انا ست مهزقه اني قاعده أتناقش معهم

نادين….لا والله ما الحوار عاجبك وقعدتي

ليله….بضحك ايمي اللي جرجرتني والله

نادين….وسعوا كده انا رايحه انام و انتوا قوموا معايا يلا انا خايفه

ايمان….اقعدي يا بت هنا لسه مخلصتش كلامي

نادين….ايه بتفكري تعملي تبديل

ايمان….بضحك بابت اسكتي بقي والله بتكلم جد

نادين…..ما هي دي المصيبه انتي عارفه انا حسيت للحظه أن هما اتقدموا لينا و احنا قاعدين نتناقش هنوافق ولا لا قاعدين نختار و نقسم و هما ولا هنا

ايمان….ايه نروح نقولهم يعني

نادين….ماهو ده اللي ناقص مع اني مستبعدش بعد النقاش الجامد ده

ايمان…..طب نتكلم جد بقي والله العظيم انا فعلا بتكلم جد فيها ايه لما نتعرف حصل و عجبونا اكتر و لاقينا أن هي دي الشخصيه اللي بندور عليها مخسرناش محصلش بردوا مخسرناش هنكسبهم اصدقاء اخوات كده يعني و بعدين فين المشكله لما يعجبنا راجل و ناخد الموضوع جد اشمعني هما

نادين….يا بنتي هما غلابه اصلا اوعي تصدقي أن في راجل ممكن يوقع الست الست هي اللي بتقدر تجذب الراجل يعني انتي عايزه تقنعيني أن لو في راجل انتي عجباه يقدر يخليكي تبقي معاه لو هو مش عاجبك اكيد لا بس ينفع العكس لو في راجل عاجب الست تقدر تلفت انتباهه و تجذبه و توقعه كمان بذكائها و حتي لو الراجل مكانش شايفها اصلا و لا في دماغه هيعجب بيها

ليله….صراحه انا اتفق جداً يا ما رجاله كتير حاولوا معايا بس انا صديت

ايمان….وانا متفقه علي فكره علي كلامكم و هو ده تقريباً اللي بقولوا انتوا اختارتوا اللي عاجبكم يلا بطريقتكم بقي اجذبوهم
و لو حسيتوا لما تتعرفوا إنهم مش شبهكم خلاص بس نجرب

ليله….طيب سؤال مهم بقي قبل ما نروح ننام افرضي اللي عجبني مقدرش يجاريني أو ينجذب بيا عشان عينه علي حد فيكم يبقي الوضع ايه وقتها

ايمان….ولا حاجه انتي ست و ذكيه وهتقدري تفهمي ده بسهوله انا مش بقول روحوا قولوا ليهم أنهم عاجبينكم انا بقول كل واحده فيكم تقعد مع اللي معجبه بيه و تتكلم في مواضيع عامة لو الراجل حابب قعدتك و معجب يا خيبه انتي وهي مش هيحب ان القاعده تخلص و هتلاقيه بيفتح مواضيع و بيفتح قلبه و بيلمح بنظراته و بيعمل حجات كتير انما لو مش حابب هيقعد شويه و يقوم و هتلاقيه راح عند اللي عجباه و وقتها هتفهمي

نعيمه….بضحك لا خبيره بجد

ليله…..اه و بعد ما افهم اروح للاحتياطي أو الاختيار التاني

ايمان….طب ما انتي فاهمه اهو

ليله…..الله يخربيتك انا بتريق بقولكم ايه انا همسي قبل ما ارتكب فيها جريمه

نادين….خديني انا كمان معاكي قبل ما اخنقها

ايمان….ماشي يا ست ليله انتي و ست نادين بكره نقعد علي الحيطه

ليله….هنقعد و ماله يلا تصبحوا علي خير بت انتي بقولك ايه لو سمعت صوت ميلو هاجي ارميكي انتي و هو في المايه

ايه….حرام عليكي ده قاعد مستمع جيد و مؤدب

نعيمه….بضحك صحيح هو مركز معانا ليه هو فاهم

ليله….مستني خبيرة العلاقات تجيب الدور عليه و تسأله يلا تصبحوا علي خير

البنات….وانتوا من أهل الخير

دخلوا البنات علي اوضتهم

نادين….ليله ليله

ليله…..نعم

نادين….تفتكري واحنا نايمين ممكن يحصل حاجه

ليله….يلا يا نادين نامي هيحصل ايه اكتر من كده

نادين….طيب خليكي جدعه و خديني جنبك

نعيمه….بضحك تعالي نامي جنبي بكرامتي ليله مش بتحب حد يشاركها في السرير

ليله….طب بالعند فيكي هاخدها و هتنام في حضني كمان

نادين….بأبتسامه حبيبتي يا لولي

نعيمه….براحه احسن بردوا علي الاقل انام لوحدي علي السرير يلا تصبحوا علي خير

ليله….وانتي من أهله

نادين…..انام بره و لا جوه

ليله…..اللي يعجبك بس اسمعي لو فضلنا تخبطي فيا هرميكي علي الارض انا بقولك اهو

نادين….لا والله انا مش بتحرك

ليله….بحب طب يلا نامي

نادين….نايتي

ليله….نايتي يا قلبي

……………….

في صباح يوم جديد الساعه كانت واحده الضهر صحيت نادين اتقلبت بهدوء في حضن ليله و جابت الموبايل بتاعها بصت علي الساعه وبعدين سابته تاني

نادين….لولي لولي

ليله….ااااايه

نادين….بأتسامه يا ساتر عليكي علي طول كده بتتخانقي مع دبان وشك

سكتت ليله و فضلت مغمضه

نادين…..يا لولي لولييي

ليله….الله يخربيت لولي علي اللي جابوا لولي فيه ايه عالصبح

نادين….صبح ايه الساعه واحده الضهر يلا قومي

ليله…..حضرتك احنا ورانا شغل و انا ناسيه ما تبقي واحده ولا اتنين و لا حتي بعد العشاء

نادين…..هتفضلي نايمه يعني

ليله…..اه سبيني شويه يلا قومي انتي وسعي بقي مش عارفه انام منك

نادين….علي فكره انتي اللي نومك زي الزفت و طول الليل حاطه رجلك عليا و مكتفاني

ليله….فتحت نص عين و زقتها لو عاجبك متبقيش تنامي معايا تاني

نادين….وقعت من علي السرير و قعدت علي ركبها تبصلها بضحك قومي بقي متبقيش رخمه انا صحيت خلاص

ليله…..وحياة امك ايه عشان صحيتي اصحي انا كمان ولا تكوني عيزاني اقوم احضرلك الببرونه

نادين….بضحك لا مش للدرجادي بس تعالي يلا نفطر انا جعانه

ليله…..متروحيش تطفحي انا قافله الثلاجه بقفل

نادين…..متبقيش رخمه بقي انا مش عايزه انزل لوحدي خايفه يكون حد من الشباب صحي و مكسوفه يلا شجعيني

ليله….نودي نودي نودي حلو كده التشجيع غوري يا بت هما هياكلوكي

نادين…..بضحك ايه يابت خفة الدم دي علي الصبح قومي بقيييي

ليله….طب روحي و انا هنزل وراكي أو اقولك صحي نعيمه و خديها

نادين…..نوني مقتوله مش نايمه كملت بضحك بصي فاتحه بوئها ازاي

رفعت ليله راسها و فتحت نص عين وضحكت و حطت وشها في المخده و بعدين رفعت وشها تاني

ليله…..بضحك هي عامله كده ليه ايه المنظر ده

نادين…..اروح اصورها

ليله….والله تقوم تنفخك دي متشرده

نادين….بضحك استني شششش

ليله….انتي حره انا مليش دعوه

مسكت نادين الموبايل و صورتها وهي بتضحك

ليله…..نوني نونييييي انتي يا جزمه

نادين….متحاوليش مقتوله والله

ليله….طيب بقولك ايه روحي يلا وهاجي وراكي

نادين….لا مش هنزل من غيرك و بعدين انا عايزه اخد شاور لسه

ليله….طيب و بتصحيني ليه يا جزمه

نادين…..عشان عايزه اخد رأيك البس ايه

ليله….ما تتنيلي تلبسي اي حاجه انتي رايحه فرح و لا كلام ايمي عجبك يا ست نادين و عايزه تشقطي الشباب

نادين….ضربتها بالمخده اتلمي شويه ايه أسقط شباب دي انا مش عارفه بجد البس ايه اغلب الفساتين قصيره و انا مكسوفه اقعد قدامهم كده و اكيد مش هنزل ببچامه

ليله….وفيها ايه هو ده مش لبسك البسي اي حاجه و بعدين احنا كنا عارفين انهم هيبقوا معانا

نادين….يعني ايه

ليله….يعني البسي اي حاجه و سبيني و بعدين يا اختي معملتش حسابك انها تبرد جايبه كله قصير

نادين…..عادي الجو مش برد يعني و بعدين انتي مالك اصلا

ليله…..تصدقي انا غلطانه قومي يا بت من وشي يلا

نادين…..هدخل اخد شاور و اطلع الاقيكي صحيتي

ليله…..طب يلا اتكلي علي الله

قامت نادين فتحت الشنطه و خدت منها لبسها و بعدين دخلت علي الحمام.

بعد ما دخلت بدقيقه دخلت ايه عليهم بصت في الاوضه ملاقتش غير ليله و نعيمه راحت علي الحمام خبطت

نادين….ايوه

ايه…..انتي هنا يا نودي

نادين….ايوه باخد شاور

ايه….طيب كويس انا صحيت

نادين….بقولك ايه صحي الجزم دول عشان مش راضين يصحوا

ايه….طيب يلا بس خلصي انتي

نادين….اوك

ايه…..لولي لولي

ليله……هو يوم مش فايت عايزه ايه عالصبح

ايه…..صباح الفل

ليله….صباح الزفت

ايه….بضحك الله ليه مالك عالصبح

ليله….يعني اخلص من الجزمه اللي في الحمام تطلعي انتي

ايه….الساعه واحده قومي بقي مالكم مقتولين كده ليه يلا انا صحيت ايمي و سلمي

ليله…..طب عايزه مني انا ايه

ايه…..اصحي خلينا ناخد اليوم من أوله

ليله…..لا والله ايه هنطلع علي البحر و لا هنروح نعمل تان يا بت احنا محبوسين في الڤيلا

ايه…..بضحك عادي بردوا ناخد اليوم من الاول اقولك خلينا ننزل نشقط الشباب

ليله….اااااه قولي كده انا بردوا بقول ليه النشاط ده عالصبح منك لله يا ايمي

ايه….بضحك يلا بقي قومي و انتي يا ست نعيمه قومي

مسكت المخده و حدفتها عليها

نعيمه…ااااه في ايه انتي عبيطه يا بت

ايه…..بضحك يلا قومي الساعه واحده

نعيمه….اعملك ايه يعني غوري يا بت علي اوضتك

ليله….اديها مترحمهاش

ايه….علي فكره بقي انتوا عيال رخمه انا نازله افطر و اقولكم هعاكس الشباب كلهم

ليله…..يلا مبروك عليكي

نعيمه…..غمضت عينها بت اوعي تيجي جنب فضل

ايه….بضحك ده اول واحد هعاكسه

نزلت ايه علي تحت كانت لابسه شورت چينس و تيشرت لمحت رشيد في المطبخ كان هو بس اللي صاحي و الباب كان مفتوح.

ايه…..صباح الخير

رشيد….بابتسامه اهلا بالقمر الصغير أخيراً حد صحي في الڤيلا

ايه……بأبتسامه اه نادين صحيت بس بتاخد شاور و صحيتهم كلهم بس غالباً كملوا نوم تاني و غالباً بردوا هاكل علقه منهم لما ينزلوا

رشيد….بضحكه جميله اااااه يبقي رخمتي عليهم

ايه…..صراحه اه ما هما كمان سايبني لوحدي و مفيش حد فيهم راضي يصحي

رشيد….يمكن عشان نايمين متأخر و بعدين خدي بالك احنا امبارح نمنا شويه حلوين علي الكنب بس نومة الكنب مهما كان مش بتريح خصوصاً امبارح انتوا كنتوا جايين من سفر و قبلها مش نايمين و احنا كمان كنا سهرانين و بعدها حصل اللي حصل في الجو فا كنا مرهقين

ايه…..ايوه فعلاً كملت بضحك بس ده ميمنعش اني هتضرب

رشيد….بأبتسامه لا متخافيش هحوشهم عنك

ايه…..بابتسامه ماشي بقولك صحيح

رشيد….قولي

ايه…..الجو بره تمام محصلش حاجه صح

رشيد….بابتسامه هو الوقت تمام بس علي الساعه 11 كده مطرت جامد و رجعت وقفت

ايه….ايه ده بجد محستش بحاجه حتي البنات بيتهيألي محسوش

رشيد….ماهو مطر بس مفيش لا تلج ولا رعد

ايه….بس باين أن الجو حلو تقريباً

رشيد….هو في هواء جامد بس و برد شويه بس خير ان شاء الله

ايه….مفيش جديد في الاخبار طيب

رشيد….انا فتحت الموبايل شويه كده الأرصاد بتقول أن في استقرار بسيط لكن المطر هيفضل مستمر

ايه….المهم ميبقاش في سيول عشان المايه متدخلش هنا

رشيد…..انا لما نزلت من شويه خدت كام جردل كده قولت ارميهم جوه اهو بدل الرياضه

ايه….بضحك ايوه صح اعتبر رمي المايه تمرين صباحي

رشيد….بالظبط بس زعلت والله في حجات كتير باظت بسبب اللي حصل بيوت وقعت كتير بسبب الزلازل خصوصا البيوت اللي كانت آيله للسقوط و كمان بيوت بسيطه في القري و حرايق غير الناس اللي شغلهم اتدمر بسبب السيول بيتهيألي الخساره كبيره اوي

ايه….ايوه انا شوفت امبارح صور و ڤديوهات كتير صعبوا عليا اوي

رشيد….ربنا يعوض عليهم أن شاء الله و يارب علي بكره او بعده كل حاجه ترجع لوضعها الطبيعي

ايه….هو اصلا ليه حصل كل ده يعني غريب أن يحصل ده واحنا لسه مدخلناش علي الشتاء

رشيد….والله مش عارف في ناس بتقول أن ده بسبب انهيار جليد و في ناس بتقول بسبب ذوبان الجليد في القطب الشمالي بس احنا بعيد عشان كده ملناش علاقه و بتوع الأرصاد بتقول أن دي ظاهره فريدة من نوعها عموما اللي حصل حصل مفيش حاجه بعيده عن ربنا المهم بس الموضوع ميتطورش اكتر من كده عشان الناس

ايه…..يارب بس هو اكيد مش عشان الجليد خصوصا موضوع الزلازل ده هي اكيد ظاهره غريبه المهم بتعمل ايه

رشيد….بابتسامه ولا حاجه انا لاقيت نفسي صحيت لوحدي و زهقان قولت احضر الفطار للكل واللي ينزل يفطر
ايه مش جعانه

ايه….صراحه جعانه انا و ميلو هو انت فطرت

رشيد…..لا لسه والله و عموما هفطرك احلي فطار انتي و الاستاذ ميلو بس الاول هو بياكل ايه

ايه….لا سيبك من ميلو انا هقوم احطله فطاره بياكل دراي فود

رشيد…..انتي قولتي أنه ولد صح

ايه….اه ولد

قامت ايه حطتله اكل علي جنب و سابته

ايه….طيب قولي اساعدك في ايه بدل ما انا قاعده كده

رشيد…اممممم ولا حاجه خليكي انتي

ايه…..لا خليني اتسلي معاك اهو علي الاقل لما يصحوا ويلاقوني مساعده في الفطار يعفو عني

رشيد….بضحك واضح انك رخمتي عليهم اوي

ايه…..بضحك صراحه علي ايمي و سلمي اكتر

رشيد….طيب بصي سخني العيش في الميكروويف و قطعيه كده انصاص

ايه….ماشي بس علي فكره الفطار شكله حلو واضح انك بتحب تهتم بالشكل

رشيد…..والله مش اوي علي حسب النود يعني هي جات كده لو عليا أنا لما ببقي لوحدي اغلب الوقت مش بفطر بشرب بس القهوه و لما بحس اني جعان هو اي ساندوتش و خلاص بس لما بنبقي مع بعض يهتم شويه

ايه…..صحيح هي مامتك و بباك عايشين

رشيد…..اه عايشين ربنا يهديهم الصحه

ايه….يارب طيب ليه مش عايش معاهم و عايش لوحدك

رشيد…..لأن انا بعدت عنهم لما اتجوزت 12 سنه تقريباً و بعد الانفصال ثلاث سنين يعني قولي 15 سنه فا خلاص اتعودت و بعدين انا مش صغير فكرة اني ارجع اعيش معاهم و انا في السن ده مش حلوه بالنسبالي مهما كان خلاص بقي ليا مساحتي الخاصه عايز اكون براحتي مش مجرد اوضه في بيت كمان بنزل شغلي برجع في وقت متأخر براحتي مش بقلق حد صحابي بيجوا عندي ديماً و ممكن نبات سوا كده يعني بس بزورهم ديماً

ايه…..ايوه فهمت هو بصراحه كمان اللي اتعود أنه يعيش لوحده مش بيعرف يعيش مع حد

رشيد….مستحيل فكرة انك تكوني مستقله البيت بتاعك لوحدك بتنامي وقت ما انتي عايزه تصحي وقت ما انتي عايزه تنزلي تطلعي يجيلك صحابك صراحه حياه تانيه هي مش حلوه اوي خصوصاً للناس الاجتماعيه بس حلوه للناس الرايقه اللي بتحب الراحه النفسيه فهمتي

ايه….طيب وانت ايه اجتماعي و لا بتحب الوحده

رشيد….لا والله انا اجتماعي بس هي بتفرق كمان من راجل لست يعني انا واحد طول اليوم في الشارع ما بين المعرض و بين المعرض الجديد اللي هنفتحه بخلص مشاوير شغل طول الوقت بروح لتوكيلات يعني مش بقعد فا بيتهيالي لو بفضل في البيت معظم الوقت كنت هتخنق

ايه…..بابتسامه ايوه بس في مشكله

رشيد….اللي هي

ايه….يعني أنك اتعودت علي الوحده افرض حبيت تتجوز مثلا

رشيد….بضحكه هاديه لا ده موضوع تاني بقي و بعدين لو حبيت اتجوز اكيد هبقي عارف أن الحياه هتتغير

ايه…..هو انت ليه مفكرتش في الجواز بعد ما انفصلت يعني اقصد كنت مثلا عامل حسابك ترجعوا تاني لأن انت قولت أنك كنت بتحبها يعني الامل متقطعش

رشيد….لا فكرة رجوعي دي خلاص محسومه يعني الباب اتقفل لأن كمان القرار ده انا اللي خدته اكيد كنت بحبها و مقدرش اقول اني كرهتها أو حاجه زي كده خالص بس مبقاش في حب

ايه….هو الحب بيخلص

رشيد….طبعاً مهما كان حبك للشخص اللي قدامك وان انتي اللي اختارته بإرادتك مع الوقت تصرفاته ممكن تجبرك أن حبك يخلص خصوصاً لو انتي كنتي الطرف اللي بيدي اكتر في العلاقه

ايه…..يعني انت كنت بتحبها اكتر ما هي بتحبك

رشيد….بالعكس أنا وهي متجوزين عن حب و هي كانت بتحبني جداً بس بعد موضوع الحمل ده لما عرفت انها مستحيل تجيب اطفال اتغيرت طبعاً أنا عاذرها بس كمان انا شخص واقعي شويه بمعني أن مثلا انا فجأه تعبت جامد او جالي مرض خطير

ايه….بعد الشر

رشيد….مثلاً يعني مهما كانت خطورة المرض انا في أيدي ايه او هو جالي خلاص اعمل ايه طيب اكتئابي و عياطي و انهياري هيقدروا يغيروا اي حاجه يعني استغفر الله ربنا مثلاً لما يلاقيني في الحاله دي هيرجع في كلامه و يشيل عني المرض ده

ايه….اكيد لا في علاج يعني في امل

رشيد….براڤو عليكي في امل اني اتعالج يبقي ليه افضل ابكي علي الاطلال و ابوظ نفسيتي اكتر والمرض عندي يتأثر اكتر و انا في أيدي احاول يمكن اقدر انتصر

ايه…..بس ده في حالة المرض مش الحمل والأطفال انت بتقول مستحيل

رشيد….بالظبط بس انا بشوف أن المرض اقوي يعني هي ربنا ابتلاعها بحاجه مفيهاش الم جسدي مفيهاش مثلاً معاناه مفيهاش صحه كل يوم بترجع الف خطوه و طبعاً كلامي ده مش معناه اني بقلل من حجم و جعلها النفسي في النهايه هي ست و اهم حاجه عند الست انها تكون ام و الدليل اني فضلت معاها سنين و انا بحاول تخفف عنها و اكون راضي لأن فعلا انا كنت راضي مش بمثل عليها انا اختارت اكمل معاها من غير ولاد لاني كنت بحبها بجد بس اللي أقصده انتي عرفتي انك مستحيل تجيبي اطفال و عرفتي كمان أن انا مستحيل اتخلي عنك يبقي نعمل ايه نزعل شويه نتأثر نعيط نكتئب حبه حلوين بس في الاخر لازم نقوم و نكمل الحياه

لازم نقول الحمد لله مش نفضل سنين في نفس الوضع حياتنا كئيبه زي البيت اللي مش بتدخل شمس بمجرد ما افتح الباب بعد يوم طويل خناق و نكد و عصبيه علي ابسط المواضيع عدم اهتمام بالشخص اللي فضلك علي الاطفال وأنه يكون اب انا عارف أنه غصب عنها بس كمان انا ضحيت عشانك و مش ذنبي اللي انتي فيه صدقيني يا ايه لو كان في حتي امل واحد في الميه انها تكون ام لو كنت هصرف فلوسي لآخر جنيه مكنتش هقول لا و مش عشان اكون اب والله عشانها هي بس منفعش و مش بايدي يبقي ليه انا اعيش كل السنين دي في الحياه دي و في الاول والاخر انا راجل و مفيش راجل بيحب النكد حتي لو انا شخص نكدي مبحبش النكد فهماني

ايه….فهماك ومعاك حق بصراحه بس كمان بما اني ست يعني يمكن انا لسه مجربتيش موضوع الحمل واني اسعي اكون ام بس بيتهيألي الموضوع بيختلف

رشيد…..بالعكس زي ما انتوا حابين تكونوا امهات احنا كمان حابين نكون ابهات علي فكره يا ايه انا شخص لو سألتي اي حد قريب مني ايه هي نقطة ضعف رشيد هيقولك الاطفال انا يمكن ابان حد عاقل و رزين بس قدام الاطفال انا اصغر منهم بعشقهم بجد عندي طويل بال معاهم رهيبه مستعد اقضي يوم بحاله العب معاهم من غير ما ازهق اي تجمع عائلي كان بيحصل فيه اطفال تبقي الرجاله كلها قاعدين يتكلموا و يشربوا الشاي والقهوه وانا قاعد مع الاطفال بلعب بحبهم بجد و ياما حلمت انا وهي بلادنا في المستقبل

و بعد ما اتجوزنا و عرفت انها مش هتخلف بقيت أراعي شعورها لدرجه ان كان ممكن أتفهم غلط بس مكنتش بهتم بنظرة الناس انا بطلت العب مع اطفال العيله قدامها ولاد اخواتها ولاد اخواتي معارفنا كنت قريب منهم و الولاد كانوا بيحبوني جداً بس عشان هي متحسش اني متعلق بالأطفال و بحاول امثل عليها مبقتش اقرب منهم كنت بحس بنظره الكل أنهم فاكرين عشان موضوع الخلفيه اني غيران أو مضايق مكانش بيفرق معايا لحد ما فهموا مني اني بعمل كده مراعاة لشعورها يعني انا عملت عشانها حجات كتير صدقيني

ايه….انا بجد اسفه لو فتحت الموضوع وضايقتك

رشيد….لا خالص بالعكس مش بضايق بس اللي أقصده أن احنا كابشر ضعاف جداً مناظر علي الفاضي مهما حصل احنا مش هنقدر نغير القدر في اواقات لما بيكون الأمر مستحيل لازم نستسلم الاكئاب و سواد الحياه مش حل أننا نعافر و نحاول و منستسلمش حاجه كويسه بس لو في امل غير كده مفيش في ايدنا غير الحمد لله

ايه…..معاك حق فعلاً انت صح

نزل في الوقت ده سلامه و حسان

سلامه….اهلاااا صباح الفل

حسان….صباح الخير

ايه….بابتسامه صباح النور

رشيد….أخيراً صحيتوا

سلامه….ايه فطرتوا من غيرنا؟

رشيد….لسه كنا بنتكلم بس خلاص الفطار خلص تعالوا تفكر يلا

حسان…..الهواء بره فظيع

رشيد…اه دي مطرت الصبح

حسان….بجد محستش

رشيد…..انتوا نايمين نومة أهل الكهف هتحسوا ازاي

حسان….اه والله جسمي كان مكسر المهم فين البنات صحيح و باقي الشباب

ايه…..نادين بس اللي صحيت و الباقي رخمت عليهم و نزلت الوقت يجوا

رشيد….عشري و فضل و عسال لسه نايمين

سلامه…..لا عسال صحي بس بياخد شاور الوقت ينزلوا ها كنتوا بترغوا في ايه

حطوا الاكل علي البار و قعدوا الاربعه

رشيد…..ولا حاجه بنتكلم علي حجات كتير يعني اني ليه مش قاعد مع اهلي و عن اللي حصل معايا في الجواز كده يعني

سلامه….امممم صحيح يا ايه انتي مفكرتيش تنفصلي زي باقي البنات

ايه….لا بصراحه و بعدين مش كلنا انفصلنا يعني انا وسلمي و حتي ايمي عايشه مع اهلها انا عن نفسي مقدرش و اصلا بابا مش هيوافق

حسان….بابتسامه عجباني علاقتك اوي يعني و بتنادي بابا و واضح انك بتعملي حسابه

ايه….طبعاً هو اللي رباني و عمري ما حسيت معاه اني مش بنته و بعدين هو بيتعامل معايا علي أن بنته بجد يعني مثلا يوافق علي حجات يرفض حجات زي ما بيعمل معايا بيعمل مع سلمي عارف انا كان ممكن احس بفرق لو كان عاملني مثلا احسن شويه من سلمي

حسان….ايوه فاهمك كنتي هتحسي أنه مثلا بيجي علي بنته عشان هي بنته

ايه….بالظبط بس هو عمره ما فرق عن معاملتنا أبداً و بعدين هو شخص بيتعامل معايا بأبوه في كل حاجه طبيعي احس انه ابويا غير بقي انه حنين اوي طيب يعني هو أقصي حاجه في عصبيته أنه يبصلنا و هو باين علي وشه الزعل و يمشي و يسيبنا ويدخل علي اوضته لا عمره رفع صوته ولا مد أيده و لا اتكلم بأسلوب مش حلو بالعكس حد جميل اوي عشان كده هو مش مضايقني أو ممكن افكر اني انفصل بالعكس أنا بحب اوي اقعد واتكلم معاه قاعدته جميله و طول عمره بيقول مش هتطلعي من بيتي غير علي بيت جوزك

حسان….ربنا يحفظه

سلامه……صحيح يا ايه انتي قولتي أن كان مكتوب كتابك و اتوفي في حادثه صح

ايه…..ايوه

سلامه….كنتي بتحبيه

ايه…..صراحه اه هو مش الحب الفظيع بس اه كنت بحبه كان شخص جميل و محترم يعني بتحب بصراحه

رشيد…..اسمعني انتي بقي اللي اتجوزتي بدري

ايه….اممم عادي هو نصيب و بعدين انا وقتها كان عندي 24 سنه و هو اتقدملي و هو جاهز خالص فا عادي وافقت و بابا وافق

سلامه….هو مات ازاي طبعاً لو مش هضايقك وافكرك

ايه….لا عادي هو احنا كتبنا الكتاب قبل الفرح بأربع ايام لأن هو عمه كان مأذون و هو كان عايزه هو اللي يكتب كتابنا بس عمه التوقيت اللي احنا حجزنا فيه كان مسافر يعمل عمره فا قررنا نكتب قبلها بكام يوم و بس قبل الفرح بيومين كان رايح يعمل بروڤا علي البدله بتاعته عشان كان بيظبطها يعني و وقتها كانت عربيته بيظبطها قبل الفرح يعني بيرشها وكده لأننا كنا هنركب فيها فا قال يسببها عشان الدهان ينشف اكتر و ركب تاكسي هو وصاحبه بس فا نزل وراح علي المكان استلم البدله و كان وقتها بيكلمني وهو خارج و فجأه سمعت صوت قوي و بعدين مسمعتش انا لما كنت معاه علي الخط حسيت أن الموبايل وقع فا قولت عادي يمكن وقع من أيده حاولت اتصل لاقيته مغلق مجاش في بالي أبداً أنه عمل حادثه قولت اكيد الموبايل اتكسر وهيكلمني من عند صاحبه أو هيتصرف يعني المهم انا كنت مطحونه أصلاً و ملخومه في كذا حاجه خلاص يومين و هتجوز و مكنتش بنام بصراحه دخلت ريحت علي السرير شويه و مفيش نص ساعه او ساعه إلا ربع لاقيت صاحبه بيكلمني و بيقولي ايه احمد عمل حادثه اتصدمت بصراحه و حسيت اني بحلم لحد ما استوعبت اني لا انا صاحيه حاول يهديني وقالي متخافيش هو كويس بس أيده تعبانه و هنروح المستشفي جريت علي بابا و سلمي و انا بعيط و قولتهم و نزلنا جري علي هناك و اول ما وصلت انا كنت تقريباً اعرف صحابه كلهم لاقيتهم هناك استغربت يعني دي حادثه بسيطه علي حسب كلام صاحبه بس قولت عادي واقفين معاه و اتخضوا عليه و جايين يطمنوا بنفسهم دخلنا جوه شويه و بقيت سامعه صوت عالي و صريخ و انهيار لما ركزت في الصوت حسيت أن ده صوت أخته و أمه وقتها انا للحظه كده بقيت شويه منفصله عن العالم المسافه بينا وبين الصوت كانت كام خطوه بس انا كنت بمشي والطرقه الطويله بتاعت المستشفي مش بتخلص حاجه شبه الافلام

بس لحد ما وصلنا قدامهم سلمي بصتلي بصدمه و لاقيتها بتحضني و بابا جري عليهم يفهم سمعت صوت أمته بتقولوا احمد مات انا فضلت واقفه في مكاني لا سامعه ولا شايفه مش بعيط مش بعمل ايه حاجه انا بجد كنت مصدومه و مش وعيي

عرف بابا من صاحبه أن وهما خارجين من المكان و بيبعدوا الشارع و هو ماسك البدله في أيده عربيه خبطته و نزل علي الرصيف علي راسه و تقريباً راح المستشفي و هو خلاص بيخرج اخر نفس
و بس انا فضلت علي نفس حالتي لحد تاني يوم لما اتدفن بمجرد ما شوفته خارج من التابوت انا وقتها شوفت شريط كامل قدامي و احنا بنفرش شقتنا سوا و بنجهز كل حاجه و نازلين نشتري ده وده و مش بنقعد حتي اخر مكالمه بينا و بدأت انهار وقتها و فوقت بعد الدفن بيوم في المستشفي حصلي انهيار عصبي وبس مع الوقت بدأت اتحسن كده يعني

رشيد…..ربنا يرحمه يارب بجد صعبه يعني عريس و فاضل يومين يبقي في بيته

حسان……هو عريس في الجنه ان شاء الله

ايه…..أن شاء الله انا متأكده أن هو في مكان احسن لان هو كان شخص جميل والكل بيحبه و جنازته كانت مجهوله بجد و مفيش حد مكانش حزين عليه خصوصاً أمه بجد

سلامه…..طيب علاقتك معاهم اتقطعت ولا لا

ايه….لا بالعكس علاقتي معاهم حلوه اوي و بشوفهم كل ما ابقي فاضيه عشان شغلي يعني و هما ناس محترمين بجد و أمه دي كانت حد محترم و بتحبني حتي بعد ماهو مات صممت اني اخد ورثي منه لأن هو كان عنده شغله الخاص و حد طموح بس انا رفضت طبعاً و بصراحه مكانش ينفع هما عملوا اللي عليهم و أنا صراحه اي حاجه بالنسبالي مكانش ليها لازمه بعده يعني و بس علاقتنا حلوه

سلامه….ربنا يرحمه يارب

حسان….طيب قوليلي بصراحه انتي مرتبطيش بعده عشان كنتي بتحبيه و مقدرتيش تتخطي ولا عشان الناس

ايه….هو الأكيد أن الموقف اللي كنت فيه صعب اتخطي بسرعه يعني شخص كان في حياتي عملنا بيتنا سوا و خلاص كان فاضل يومين واكون في بيته فا مستحيل طبعاً ادخل علاقه بعده بالسرعه دي انا مش مؤهله نفسياً ثانياً احترام للشخص اللي كان في حياتي ده بني ادم في النهايه مش جماد انا بقي كلام الناس لا عمري ما حبيته في دماغي أصلاً لأن كده او كده الناس بتتكلم و في النهايه انا لو ارتبطت أو اتجوزت محدش ليه حاجه عندي لان الطبيعي انا لسه صغيره و اكيد قدامي حياه بس لازم كل حاجه تاخد وقتها حتي الحزن

رشيد….اكيد طبعاً و عشان البني ادم يكون احسن لازم يدي الحزن حقه سيبك بقي من كلام الناس و العبط ده زي ما قولتي الناس بتتكلم في العموم

سلامه….طيب و بعد ما فات كام سنه اهو لسه بردوا مش حابه تدخلي في علاقه

ايه….بضحكه عبيطه لا عادي خلاص بقي بس بيني وبينك بقي عندي عقده شويه يعني ابويا و امي عملوا حادثه و ماتوا و الشخص اللي كنت هتجوزه كمان عمل حادثه انا مشفقه علي الشخص اللي هيدخل حياتي بصراحه

سلامه….بضحك ااااه بقيتي نحس يعني

حسان….بضحك يا ابني عيب عليك لا يا ستي انتي زي الفل و بعدين ده نصيب كل واحد فينا مكتوبله هيموت أمته وازاي

ايه….تفتكر ؟!

حسان…..اه اطمني مش نحس والله

رشيد….أن شاء الله تتجوزي و تعملي بيت و عيله و اي ذكري مش حلوه تقدري تتخطيها و بعدين انا شايف انتي شخصيه حلوه و جميله و فاهمه أن ده نصيب و هتقدري تتخطي

ايه…..لا متقلقش الحمد لله علي كل حال يعني في ناس بيحصل معاهم اكتر من كده بكتير المهم يعني تسلم ايدك علي الفطار الحلو ده.

رشيد….ايه ده لحقتي احنا قاعدين بنرغي و مكلتيش كويس

ايه….بضحك لا متقلقش عليا انا برغي وانا باكل عادي و شبعت والله قولولي حد يشرب نسكافيه او قهوه

سلامه…..انا خلاص هقوم اهو وهعمل خليكي

ايه…لا كمل أكلك انا هعمل قولي بس تشرب ايه

سلامه….ماشي نسكافيه معاكي

ايه….وانت يا حسان

حسان…..انا كمان نسكافيه.

ايه…ورشيد هتشرب ايه

رشيد…انا قهوه و لو مش بتعرفي شاي

ايه….لا عيب كده انت بتشتمني انا عليا فنجان قهوه ميتشربش

رشيد….بضحك طيب شكراً

ايه….بضحك لا والله بهزر

نزل عسال علي تحت

عسال….صباح الخير

الجميع….صباح النور

عسال….ايه محدش صحي غيركم

رشيد…..لا الوقت ينزلوا تعالي يلا افطر

عسال…..طيب شويه بس كده

حسان…تعالي يلا افطر احنا فكرنا خلاص

قام حسان و رشيد و سلامه

ايه…..عسال انا بعمل نسكافيه و قهوه لينا اعملك حاجه

عسال…..لا لا تسلم ايدك يا ايه بعد الفطار

ايه….طيب تمام

وقف رشيد و حسان علي الباب يشربوا سيجاره و سلامه راح يشيل الاكل و هو واقف مع ايه.

وقف عسال قدام البار و هو بيقلب في الموبايل و عينه علي السلم عشان سمع صوت.

ثواني و نزلت نادين و ايمي و سلمي

ابتسم عسال بهدوء اول ما لمح نادين وهي بعدت عينها عنه عشان مترتبكش

ايمان…..صباح الخيرررررر

الجميع….صباح النور

رشيد….أخيراً صحيتوا الواحد كان حاسس انه قاعد لوحده خصوصا أن بره هدوء فظيع

ايمان….شكلك صاحي بقالك كتير

رشيد….اه والله انا اول واحد صحي بس ايه صحيت و اتسلينا شويه

ايمان….ده ايه دي ليلتها سوده معايا

ايه….بضحك حبيبتي يا ايمي علي فكره احنا محضرين فطار هنا اهو و انا اهتميت بالقطار عشانك

ايمان….لا والله

رشيد…..معلش خليها عليكي هي بدأت بالصلح

ايمان…..دي جزمه هي وكلبها

ايه….خلاص بقي يا ايمي يلا تعالوا شوفوا هتاكلوا ايه كل ده جاهز

سلمي…انتوا فطرتوا

حسان….كلنا فكرنا معادا عسال هو لسه صاحي يفطر معاكم بقي

ايمان…..يا سلام القمر بنفسه يفطر معانا

عسال….بابتسامه انتي اللي قمر والله

ايمان…..يلا يا ايه هاتي الفطار

ايه….بضحك ده عقاب صح

ايمان…..اه عاجبك ولا لا عشان تبقي رخمي علينا وتصحينا بالشكل ده

سلمي…احسن تستاهلي

عسال….خلاص خليها عليكي انا هحيب الفطار اقعدوا يلا

ايمان….طيب خلينا نفطر هنا علي البار عشان اللي عايز يقعد

عسال….طيب تمام مفيش مشكله

رشيد….خليكم براحتكم احنا واقفين شويه

ايمان…لا لا عادي هنا كويس

رشيد….تمام.

قعدوا كلهم و فضلت نادين تحاول تكون ديما بعيد عن عسال حتي لو بنظراتها فطروا مع بعض و فجأه صرخت نادين و جريت.

وللحديث بقيه……