لقاء كارثي
(لقاءكارثي)
لقاء كارثي
أميره أسامه
صاحبة البطل الواحد
~° البارت السابع°~
…………
بمجرد ما خلصوا اكل صرخت نادين و جريت اول ما نعيمه مسكتها من كتفها
نعيمه……بتصوريني انا ده انتي يومك مش فايت
نادين….بضحك اسمعي بس هقولك
نعيمه….والله ما هسيبك
رشيد…..بابتسامه في ايه عملت ايه نادين
نعيمه…..لحظه بس الله يكرمك عشان دي فيها حق عرب
رشيد….عرب يبقي عشري و فضل لازم يعملوا معاكم قاعده و تتصافوا
جريت نادين جوه علي المطبخ و هي بتضحك
نادين…..استني متفرجيش الناس علينا
نعيمه……تمسحيها حالاً
نادين…..حاضر بس ليله اللي قالتلك صح
ليله….بضحك اه عشان تبقي ترخمي علينا اوي خليها بقي تروق عليكي
نعيمه…..ده انتي يومك مش فايت معايا
ليله….بضحك انا مالي حد قالك تنامي كده
حسان….هو في ايه
ليله….بضحك صورتها وهي نايمه مقتوله
عسال……بابتسامه خلاص يا نوني معلش امسحيها فيا انا
نعيمه….امسح فيك ايه ده انا همسح بيها بلاط الڤيلا لو مش مسحتها
نادين….بضحك طب مش همسحها بقي واللي عندك اعمليه و اقولك هفرجهم كلهم عليها
نعيمه….لا وسع كده يا عسال
وقف عسال علي مدخل المطبخ و هو بيضحك و مرضيش يدخلها
عسال…..خلاص هتمسحها صدقيني
نعيمه….تمسحها حالاً
نادين…..متتشرطيش عليا همسحها وقت ما احب
نعيمه…..لا الموضوع كده مش نافع
طلعت فوق كرسي البار و قعدت علي الرخامه عشان تنط من فوق
عسال…..خلاص قولتلك هتمسحها
نزل فضل و عشري في الوقت ده بسرعه بعد ما سمعوا صوت نادين و هي بتصرخ
عشري…..في ايه
فضل….مين بيصرخ وانتي قاعده كده ليه
نعيمه….والله ما هسيبها
ايمان….بضحك بابنتي اقعدي بقي انتي اللي فضحتي روحك
عشري….حصل ايه
ليله….بضحك نادين صورتها وهي نايمه و فاتحه بوئها
فضل…..بضحك عايز اشوف
نعيمه….نهار اسود تشوف ايه والله يا نادين يومك ازرق معايا
نادين….بضحك حاضر يا فضل عيوني
نعيمه….عيوني لا هقتلها
فضل….بضحك يا بنتي انزلي هتقعي
نعيمه….امسحؤها يا نادين هزعلك
نادين….طيب اطلبي بأدب
نعيمه…..اللهم طولك يا روح يابت ادب ايه انا مش بتحايل علي حد
نادين….طيب مش همسح
سلامه……بضحك يا ستي فيها ايه كلنا لما بننام بتفتح بوئنا عادي
فضل….بضحك اتكلم عن نفسك انا بنام عادي
سلامه….ياعم اسكت انت كمان انا بقولها كده انت بتسخنها
نعيمه….اه بقيت تريقتكم انا و ربنا لا هقتلك يا نادين
نادين….خليكي مؤدبه و انا امسحها
نعيمه….طيب يلا امسحي
نادين …بضحك طيب مش عايزه تشوفيها الاول
نعيمه…..بابتسامه غيظ امسحي يا نادين
نادين….طيب خلاص همسحها والله
طلعت نادين الموبايل و جابت الصوره
نادين….اهو عايزه تشوفي كمان وانا بمسح
نعيمه….لااااا يخربيتك بتجيبها عليهم امسحي يلا
نادين….بضحك خلاص مسحتها والله
نعيمه…..احلفي
نادين…والله مسحتها
نعيمه….ماشي يا نادين ليكي يوم هتروحي فين و انت مالك واقفلي كده ليه
عسال….بضحك انتي هتقلبي عليا
نعيمه…..ما انت عاملي فيها سور الصين العظيم و سادد المكان
عسال….ما انا لو سبتك هتدخلي عليها
نعيمه….اتقل بس عليا هقفشها
عسال….ما هي حلفت خلاص أن هي مسحتها خلاص بقي عشان خاطري انا
نعيمه…..ماشي يا عم عسال بس يكون في علمك مش هنساها ليك انت كمان
فضل….بضحك الله يرحمك يا عسال و انت اهدي يا وحش شويه
نعيمه….حرقت دمي الجزمه دي مش اول مره
قربت نادين من الرخامه و سندت راسها علي أيدها و طلعتلها لسانها
نعيمه….بغضب هقطعهولك أن شاء الله
نادين….علي فكره انا ممكن ارجع الصوره عادي يعني متقلقيش ادبك
نعيمه…..والنبي اضربها بسرعه
عسال….بابتسامه جميله لا خلاص عشان خاطري و انتي اسكتي شويه متسخنيهاش
ابتسمت نادين بإحراج و استوعبت انها واقفه وراه و بتتحامي فيه و بتتكلم معاه عادي بسرعه بعدت عينها عنه و ابتسامتها اختفت شويه و بان عليها التوتر
نادين….اااا طيب خلاص متزعليش مسحتها والله
نعيمه….ماشي يا ست نادين
عشري…..طب ايه نفطر بقي ولا لسه هنسلك بينكم
نعيمه…..ما تفطر ده كل اللي همك مستقبلي في صوره مش كفايه اسمي
ضحكوا كلهم علي نعيمه
عشري…..بضحك طيب براحه بتزقي ليه
فضل…..ده كل اللي همك الصوره شكلها حوار
نعيمه….نعم انت كمان في حاجه
فضل…..بضحك بقي الوش الملاك ده ينام وهو فاتح بوئه
نعيمه…..بضحكة احراج و غيظ اه بفتح بوئي و انا نايمه و شعري بيبقي منكوش في حاجه معاك
فضل….بضحك لا خالص يا ستي قمر في كل حالاتك اهدي يا وحش
نعيمه…منك لله يا نادين و سعد يا عم عسال بقي عايزه افطر و اشرب قهوه
نادين…..اوعي تضربي
نعيمه….لو عليا عايزه اقتلك بس خلاص عدي يلا اخلصي
وسع عسال شويه وخلاها تخرج جري وراحت علي ايمان
نعيمه…اجري اجري علي اساس انا لو عايزه اقولك مش هعرف
فضل…انا لو منك اعملي فيها سوبر مان و طيري عليها
نعيمه….ايه ده ايه ده بتسخني علي صاحبتي ولا ايه طب تصدق مش هاجي جنبها
ليله…اوباااااا شكلك وحش
نادين….نوني خدي بوسه
نعيمه….بابتسامه مش طيقاكي بردوا
فضل…تصدقي انا غلطان
عشري…..بضحك الحافظ نازل و الباني طالع
ليله…..ايه ده يعني ايه
فضل…..بابتسامه دي زي من حفر حفرة لأخيه كده
عشري….حبيت توقعهم في بعضهم جاتلك في نص راسك و وقعت انت فيها
فضل….ماهو كده اللي يعمل معروف بيقع فيها
نادين….احسن عشان تبقي تسخنها عليا
فضل….ماشي يا ست نادين
ليله…..انا عايزه افطر بقي بطلوا رغي
عشري…..اقعدي هنا هجيبلك الفطار
ليله….بابتسامه ماشي
بعد حوالي ساعه الكل كان فطر خلاص و قعدوا عشان يبدأوا يومهم الجديد اللي محدش فيهم عارف ممكن يحصل فيه ايه.
أما البنات فا كل واحده فيهم علي قد ما عارضت فكرة ايمي علي قد ما كل واحده فيهم من جواها كانت حابه الفكره اوي و شايفه أنه ليه لا يمكن هما عارضوا الفكره قدام بعض و شافوا أنها مش فكره حلوه
لكن ايمي قدرت تقنعهم لدرجة أنهم فكروا ينفذوا بس من غير ما يعترفوا انها عجبتهم.
إلا نادين علي قد ما الفكره عجبتها و كمان كانت شايفه أن ايمي بتتكلم بمنطق عقلاني شويه و هو التعارف علي الاقل لكن مقدرتش موضوع العمر و فارق السن اللي بينها و بين عسال كان ازمه كبيره لدرجه ان بينها وبين نفسها اتمنت أنه يكون أكبر منها خصوصاً أنها حست أن من بداية ما شافت عسال و هي منجذبه ليه بشكل غريب في حاجه بتشدها ليه شخصيته اللي قريبه من شخصيتها طريقته في الكلام اللي بتجبر الكل يسمعه و هو بيتكلم حتي لما كانت تعبانه كل الشباب و البنات اللي اكبر منه سابوا هو يتعامل معاها غير اهتمامه بيها و عينه اللي ديماً عليها من بعيد نظراته اللي بتسببلها ارتباك اول مره تحس بيه عشان كده قررت تبعد عنه علي قد ما تقدر تتجاهله عشان يضايق و يبطل يهتم بيها متوجهش ليه اي كلام لأنها خافت و حست أن في آنذار خطر دق في قلبها.
أما عند عسال فا كان هيتجنن و يقعد معاها حتي لو خمس دقايق كل شاب و بنت قاعدين يتكلموا مع بعض و هو مش عارف يقفشها شويه عارف أن هي بتهرب منه و يمكن كان هيتجنن عشان يلاقي فرصه تجمعه بيها و لو دقايق لكن متزعلش من هروبها ولا تجاهلها ليه لان هي بطريقتها دي خليته يفهم أن هروبها مقصود و ربط ده بموضوع السن لأن لما قالت سنها عينها كانت عليه و لما هو قال سنه ملامحها اتبدلت غصب عنها و قرر عسال أنه يحارب عشان يثبتلها أن العمر مجرد رقم حتي لو هيحارب من بعيد لبعيد
لأن هو كمان من اول ما شافها و في جزء جواهر مش قادر يتخطاها أبداً
وقرر يلعب معاها بطريقه ذكيه و فيها ضغط عليها اكتر و هي عن طريق نظراته اللي اكتشف قد ايه بتربكها و توترها بمجرد ما عينه تيجي في عينها و كان واثق اوي من جواه أن نظراتها و ارتباكها و طريقتها وراهم مشاعر قويه نفس مشاعره من ناحيته لأن طريقتها مع باقي الشباب غير بتتكلم و تضحك و ترد عليهم عينها في عينهم عكس طريقتها معاه و اللي حتي لو صادف و سأل سؤال بترد و هي مش باصه عليه كل دي حجات كانت بتأكد شعوره.
وقف عسال عند الباب شرب سيجاره كل شاب كان قاعد مع بنت لكن كلهم جوه قاعدين جنب بعض لمح بهدوء نادين لقاها مندمجه شويه مع عشري و ليله و شويه مع ايه و سلامه لأنها كانت قاعده في وسطهم.
دخل بهدوء و قعد علي كرسي من كراسي السفره و هو عينه عليها.
لمحت نادين خياله و عرفت أنه دخل قعد مجابتش عينها عليه خالص فا فضل مركز في حوار الكل من بعيد
سلامه…طيب انا سؤالي واضح تحبي لما تتجوزي تفضلي تشتغلي و لا تقعدي في البيت
ايه…..ما انا بقولك وانت مش فاهمني لو هتكلم عن طبيعة شغلي انا فا موضوع المطعم و الشقق والكلام ده مش محتاج شغل و دي مش بتاعتي اصلا اللي متابع الموضوع ده نادين و المطعم ايمي و سلمي و ممكن ليله معاهم انا لا انا شغلي الاكتر في المكان بتاعي في موضوع الحيوانات و بالنسبالي هو شغل مرهق جداً فا لو قعدت منه اكيد هرتاح و مفيش حد مبيحبش الراحه يعني اقعد في البيت و كل طلباتي اوامر و اخرج و أسافر و اعيش حياتي ليه لا بس بردوا لما اجي ابص من ناحيه تانيه ده شغل انا بحبه ليه اسيبه فاهمني
سلامه….بابتسامه لا انتي بتجاوبي و بترجعي في كلامك يعني مش قادر افهم تقعدي من شغلك ولا لا
ايه….بضحك طب أقوله ايه ده
سلامه…طيب انتي فاهمه يا نادين يمكن انا غبي
نادين…..اه بص هي تقصد أن هي ممكن تقعد و ترتاح لأن شغلها اصلا متعب بس في نفس الوقت لما بتفكر بتحس أن هي ممكن تمل لان هي متعوده علي الشغل و كمان هي بتحب شغلها اوي يعني هي في حيره ما بين انها تسيب الشغل اللي بتحبه و بين انها ترتاح من الشغل اللي بتحبه و في مجهود كمان عليها
سلامه….يعني محتاره طب ما تقولي كده من الاول
ايه….ما انت اللي مش فاهمني
سلامه…..لا انتي اللي مش عارفه تفهميني عموماً انا بردوا سؤال لو ارتبطتي بشخص و قالك اقعدي من الشغل توافقي
ايه…..صراحه لا و ده لأسباب كتير أولهم انا مبحبش العلاقه يكون فيها شروط و بعدين لو الشخص ده حابب أنه يرتبط ببنت مش بتشتغل يبقي يروح يدور علي واحده مش بتشتغل مش يرتبط بواحده عندها شغلها و حياتها و يغير هو اللي مش عاجبه انا لو حابه مكملش و هو معايا اوك حابه اكمل اوك حابه بردوا اسيب الشغل و ارتاح و بعد فتره حسيت اني حنيت للشغل هرجع ميقوليش لا
سلامه…..طيب وافرضي انتي و هو بتحبوا بعض هتتخلب عنه بسهوله كده
ايه…..اكيد لا بس ادام في حب يبقي اكيد كان في نقاش من البدايه علي نقط كتير بيتفقوا وبيختلفوا فيها يعني مش طبيعي بردوا أننا نفضل مع بعض فتره ميجيبش سيرة الشغل و بمجرد ما يحس اني حبيته يفرض عليا و يهددني بعلاقتي بيه
سلامه…امممم حلو
نادين….طيب سؤال ليك انت يا سلامه انت من الأشخاص اللي ممكن تجبر بنت علي انها مثلا تسيب شغلها تغير طبع فيها تتحكم في لبسها في صحابها في الأماكن اللي بتخرج فيها
سلامه….بصي انا حد بيكرهه التحكم و القيود بس أحياناً ممكن اعلق علي حاجه مش عجباني
ايه….زي ايه
سلامه…..يعني مثلاً هي حابه تشتغل أو هي بتشتغل انا عمري ما اقدر أمانع تروح و تنزل و تتعامل بس لو مثلاً حسيت أن شغلها ده في حاجه مش تمام هيبقي لازم تغير المكان
ايه….يعني ايه في حاجه مش تمام ؟ حد بيضايقها مثلاً
سلامه…..يعني في شباب معاها مش تمام في صاحب شغل عينه زايغه في مسؤوليه أكبر منها أو اكبر من ان هي تتحملها و ممكن تأذيها يعني في بنات اه حابه تشتغل بس شخصيتهم هاديه طيبين ميقدروش علي ضغط شغل و تحمل مسؤوليه مبالغ أو أوراق فا طبيعي ده ضغط عليها و وارد تعرض نفسها للاذي فا وقتها هقولها تشوف غيره لكن مش تقعد خالص
نادين…..حلو يعني ده من مبدأ انك خايف عليها
سلامه….اكيد
ايه….طيب و اللبس و الصحاب و كده يعني
سلامه…..بردوا هتكلم فيهم و هعترض لو في حاجه مش عجباني يعني انا مش شخص يتحكم في موضوع اللبس لا البسي اللي يعجبك و اللي علي ستايلك لكن ميبقاش لبس يعني ملفت للدرجه متبقيش ماشيه كل الناس عينها عليكي و بطريقه مش حلوه حتي صحابك لو شايف أن في واحده مش تمام هقولك خصوصا أن الراجل ديماً عنده نظره مختلفه غيركم انتوا البنات و بعدين هي لو صاحبتك مش هتقدري تشوفي فيها عيب لكن اللي بره عنك يشوف اكتر خصوصا زي ما قولت لو شاب من الاخر انا مش بحب التحكم بس بحب ألفت النظر لحجات واثق أن هي ممكن متبقاش واخده بالها منها و بيتهيألي دي حجات متزعلش
نادين….صراحه لا عندك حق
…………
عشري…..تقصدي ايه بالاستحقاق
ليله….يعني لازم كل واحد فينا يحب نفسه اكتر من اي حاجه و بعدين يبدأ يحب اللي حواليه انا لو حبيت نفسي يا عشري و قدرتها عمري ما هتكسر و لا عمر حد هيقدر يتجرأ و يجي عليا
عشري…..هو عادي علي الفكره أن الشخص يحب نفسه دي مش انانيه
ليله….اكيد مش انانيه انا لازم اعمل نفسي و اهتم بنفسي بالطريقه اللي تحب أن الناس تتعامل بيها معايا انا استحق اتحب استحق لما اكون في حياة شخص ابقي من أولوياته استحق الاهتمام استحق التضحيه استحق الخوف استحق الكلام الحلو ماهو انا لو محستش اني استاهل كل ده او مثلاً قولت عادي مش لازم كلام حلو عادي مش لازم اكون اهم شخص وقتها التنازل ده هيسحب وراه حجات كتير عشان كده انا شخص بتعامل بنظريه الاستحقاق انا استحق كل حاجه كويسه تتعمل عشاني صدقني اهتمام الشخص واحترامه لنفسه بيجبر اللي قدامك يعرف قيمتك
عشري….بإبتسامه اعجاب اكيد انتي صح طيب قوليلي يا ليله ايه اكتر حاجه بتحبها في الشخص و ايه اكتر حاجه بتكرهيها
ليله…..لا بحب حجات كتير و بكرهه حجات كتير
عشري….طيب قولي واحده او اتنين من اللي بتحبيه و من اللي بتكرهيه
ليله……لا ما هو اللي بحبه مقدرتش أتنازل عنه و اللي بكرهه كمان مقدرش أتنازل عنه
عشري….ده في العلاقه ولا الصداقه
ليله…..في كله يا عشري اي شخص هيدخل حياتي هياخد مني حجات كتير حلوه لأن انا بطبعي شخص بيدي بدون مقابل يعني عندي استعداد ادام بحبك لو طلبت عيني هديهالك بس مش معني أنه بدون مقابل اني ملاقيش اللي محتاجاه اه انا مستحيل اطلب يعني مش هروح اقول للشخص اللي في حياتي انت مش بتهتم انت مش بتقول كلام حلو انت مش بتغير بس اكيد هيبقي مستنيه منه حجات زي دي من غير ما اتكلم
عشري……بس بردوا لازم تعرفي يا ليله أن مش كل حاجه بنتمناها في الشخص سواء شريك حياه او صديق بتبقي موجوده فيه يعني احياناً لازم يكون في تنازلات عن حاجه بنحبها عشان الدنيا تمشي
ليله….مفيش حد كامل يا عشري الكمال لله وحده بس ده بيتوقف علي ايه هي الحاجه اللي ممكن أتنازل عنها و لو اتنازلت هتأثر علي حياتي معاه بنسبة كام في الميه و هل هي حاجه عبيطه فا مش مهم اعديها ولا حاجه متتعداش
عشري….طب لو سألتك ايه الحاجتين اللي مستحيل ليله تعدي فيهم
ليله…..الخيانه و الكدب
عشري…..خيانه من انهي نوع
ليله……الخيانه بالنسبالي يا عشري مبتتجزأش لأن انا بشوف أن الشخص لو حب من قلبه و روحه وعقله و أمنك علي حياته و فتحلك قلبه و اداك كل الثقه و حطها بين ايديك مستحيل يبقي جزاءه الخيانه و بعدين انا ممكن اعدي اي موقف لاي شخص عادي و محسبش أن اللي عمله ده تحت بند الخيانه بس لو الشخص اللي عمل معايا كده قريب مني مبقدرش لانه بالنسبالي شخص غير متوقع أنه يعمل معايا كده
عشري…..بس كمان في فرق في موضوع الخيانه ده يا ليله يعني مينفعش مثلا راجل وست يخربوا بيتهم عشان مثلا نظره مكالمه انا بشوف أن الخيانه الجسديه دي اقوي خيانه للست
ليله…..لو الست يا عشري بتحب الراجل اللي معاها بجد مش هتقبل نظره حتي و هتشوف ان مفيش فرق بين نظره و خيانه جسديه و هو ده اللي كنت بتكلم عليه الاستحقاق انا استحق اكون مع شخص بيحترمني بيقدرني شخص عارف قيمة الست اللي معاه ليحافظ علي كرامتها
لأن وقت ما انا هشبل اسم الراجل ده هخلي ديماً اسمه عالي في السماء بيلمع زي النجوم هقدره محترمه هحافظ عليه و علي عرضه هكون تحت رجلها بمعني الكلمه بس لو يستاهل اما بقي لو هو ميستاهلش هو اللي هيبقي تحت رجلي
عشري…..بابتسامه قويه انتي بردوا يا ليله
ليله…..ليه قويه ليه الراجل بيشوف الست و هي بتدافع عن نفسها قويه
عشري…..مش حكايه بتدافع عن نفسها بس انتي عموما شخصيتك قويه
ليله….ودي حاجه وحشه ولا حلوه
عشري…..بابتسامه جذابه بص ثواني في عينها دي قمر اوي
ابتسمت بإحراج و ارتبكت
عشري….طيب قوليلي يا ليله لو اضطريتي
انك تسامحني في حاجه من الاتنين تسامحني في الكدب و لا الخيانه
ليله….وليه اضطر انا مش مجبره
عشري…..يا ستي بقول لو
ليله…..هو ايه اللي لو يعني اشوف جوزي أو حبيبي في حضن واحده تانيه و لا اشوفه بيتكلم و يقابل و اعدي لا طبعا
عشري….يعني تعدي في الكدب
ليله….ولا الكدب مستحيل ما هو الاتنين مرتبطين ببعض ما انا ممكن اشك فيه و اسأله يقعد يحلف أو ممكن اقفشه و يقعد يتعذر و يحلف بردوا أنه مش هيكررها و تسامحه و يرجع يقررها و قوتها هبقي اتنازلت من غير ما أحس عن اكتر حاجتين مش بحبهم
عشري….طيب معلش خديني علي قد عقلي و اختاري واحده لو بتحبي الشخص و مستحيل تقدري تعيشي من غيره و انتي واثقه أنه بيحبك اوي و غلط تسامحي في
انهي غلط الخيانه ولا الكدب
ابتسمت ليله و رفعت حاجبها وسكتت
عشري…..ايه يلا
ليله….بتفكير يلا ايه
عشري…..قولي
ليله…..صعبه يا عشري اوي اوي مقدرش
عشري….معلش اختاري
ليله….امممم طيب اسمع ولو اني يعني مش مقتنعه باللي هقوله بس هقوله عشان انت مصمم اختار فا ممكن اختار الخيانه
عشري…..رفع حاجبه بعدم فهم ايوه تسامحي فيها ولا متسامحيش فيها
ليله…..بابتسامه اسامح
عشري…..بصدمه نعم
ضحكت ليله و حطت أيدها علي وشها مسك أيدها وبعدها عن وشها و هو بيضحك
عشري….لا بصيلي لحظه
ليله….هو انت مش عايز اجابه
عشري….يعني انتي تسامحي في الخيانه و متسامحيش في الكدب
ليله….اه
عشري….لا افهم ماهو مثلا ممكن يقولك انا في الطريق اهو وهو لسه قاعد مع صحابه في القهوه بيشرب اخر حبه في كوبايه الشاي
ليله بضحك
عشري….استني متضحكيش خليني اكمل
ليله….بضحك طيب كمل
عشري…..عايزه تقنعيني انك لو اكتشفتي أنه مكانش جاي في الطريق وقعد رع ساعه زياده هتخربي بيتك عشان كده
و تسامحي عادي في الخيانه
ليله…..اسمعني بس هفهمك
عشري….اتفضلي
ليله…..الكنبه الصغيره زي الكدبه الكبيره و عشان تتأكد أن بالنسبالي الاتنين مرتبطين ببعض سواء خيانه أو كدب هنرجع لنفس النقطه و مش هقدر اختار بينهم لو كدب عليا مره في حاجه صغيره المره اللي بعدها مش هيبقي قاعد مع صحابه يشرب اخر حبة شاي و هيبقي مع غيري و انا هصدقه لاني واثقه فيه
عشري…..لا سيبك بقي من الاتنين مرتبطين ببعض بس يا ليله في كدب ابيض و في كدب يعني يعدي عادي
ليله…..مفيش حاجه اسمها كدب ابيض يا عشري الكدبه البيضه مع الوقت بتسود و الكدبه الصغيره مع الوقت بتكبر
عشري….ما يمكن مثلا بيكدب عليكي عشان عارف انك ممكن تزعلي انا سايبك كل ده وقاعد في القهوه مع صحابه و هو مش عايزك تزعلي عشان بيحبك
ليله…..عادي ممكن يقولهالي بطريقه شيك و لما يرجع هيعرف يراضيني و يضحك عليا بكلمه حلوه او حضن
عشري….بابتسامه جميله و هدوء و هتسامحيه
ليله….مش هبقي زعلانه منه اصلا بس اكيد هحب اهتمامه و هو جاي عامل حسابه أنه لازم يراضيني و بعدين انا واحده بقدر اوي علاقه الصحاب ببعضها و مهما كنت بحب شخص أو شخص بيحبني في النهايه قاعدته و قعدتي مع صحابنا بيكون ليها طعم تاني الست الذكيه لازم تقدر تفرق بين علاقه الحب و علاقه الصداقه و الست اللي تقولك هو لو بيحبني هيعتبرني بدل صحابه و نفس الكلام علي الراجل صدقني ميعرفوش حاجه عن الذكاء لأن في فرق كبير اوي
عشري….انا معاكي في حاجه زي دي الصحاب نعمه و مفيش علاقه حتي لو علاقه حب تعوضهم ولا هما يقدروا يعوضوا علاقه الحب
ليله….بالظبط.
عشري….طيب لما انتي مش هتزعلي اصلا و شايفه أن الموضوع بسيط ليه متعديش من الاول لو مقالش
ليله…..عشان ده مبدأ يا عشري لو قال يبقي بيحترمني و انا في المقابل لازم اوافق بس لو مقالش مش هيبقي بيحترمني و هيبقي في نظري كداب و جبان و اقولك علي حاجه اكبر
عشري….قولي يا ست ليله ده انتي طلعتي حوار
ليله…..انا ممكن اسامح في الخيانه و الكدب لو حس أن مشاعره مع غيري و جه قالي
عشري….لا والله مش هتكسري الدنيا علي دماغه
ليله….لا لانه صارحني و خلي القرار في أيدي و لانه محبش يكمل في الخيانه
عشري….طيب وافرضي هو مش عايز يسيبك و باقي عليكي؟
ليله…..لا اني احترم صراحته وضع و اني أقرر ده وضع تاني افضل معاه أو انفصل ده قراري و هو مينفعش يكون اناني لأنه لما حب غيري او حتي اعجب بغيري مفكرش غير في نفسه انا كمان حقي افكر في نفسي و اشوف اللي يرضيني اكمل ابعد ده قراري
عشري…..بس اعترفلك اعتراف
ليله….اعترف
عشري…..مش ديما الراجل لما بيخون بيبقي قاصد الخيانه و كمان لما بيكدب بردوا مش بيبقي قاصد أنه يكدب هو بيبقي باقي علي العشره والحب و مش عايز البيت يتخرب لأن عارف أنه غلط
ليله….عارفه بس كمان لو قلبنا الايه يا عشري و الست هي اللي خانت مش هيبقي عندها اصلا نفس الفرصه اللي عند الراجل انها تعتذر زي ما هو بيخون و بيعمل
عشري……بغضب بسيط بصلها بعنف لااااا في فرق
ليله….بابتسامه من نظرته اللي كلها غضب انت هتتحول ولا ايه
عشري….بهمس كله غضب الراجل لما بيخون بيخون عشان حاجه معينه وبس لكن الست بتخون بمشاعرها و قلبها
ليله….يا سلاااام و تفرق
عشري…..تفرق كتير مع أن ده مش مبرر و لو هتكلم عن نفسي انا مش الراجل اللي ممكن يخون خيانه جسديه بس لو من وجهة نظر الراجل عموما هو لما بيخون عشان عايز حاجه معينه من الست لكن الست لما بتخون بتخون بقلبها و بتحب غير الراجل اللي معاها و بتنفر من كل حاجه و مستحيل لو حبت غيره ترجع تاني ليه.
ليله….تمام بس انت ليه مستهون بالخيانه الجسديه و شايف أن هي أقل من خيانه المشاعر
عشري….مش مستهون وحاجه كبيره كمان بس بالنسبه للرجال هو عارف كويس أن الست اخر حاجه تفكر فيها انها تترمي في حضن راجل عشان عاجبها ااااا هو عارف أن لو ده حصل الست تبقي حبت غيره و دي توجع اوي اي راجل بالنسبه لينا احنا بقي يا ست احنا طفسين و ميملاش عنينا غير التراب بس في النهايه الراجل لو خان بيرجع للست اللي حبها
ليله…..و عادي تتجرح لما تعرف انك روحت لغيرها واترميت في حضنها
عشري….مش عادي خالص انا مقولتش عادي بس لو هي عاقله هتفهم أن الراجل دي طبيعته
ليله…..وليه ميبقاش حد محترم و ليه اصلا يعمل كده مع ست غير مراته مش شرط علي فكره يكون العيب فيها
عشري….طيب اقولك سر
ليله….اه قول
عشري…..اصلا مبيبقاش فيها عيب يا ليله ده مبرر اهبل الراجل بيقوله عشان ميحملش نفسه الغلط لوحده و انا عن نفسي بشوف أن الراجل اللي يقول عن مراته أن العيب فيها هو مش راجل لأن الطبيعي أن هو اللي بيعمل الست كل حاجه هي بتدخل بيته و هي متعرفش حاجه بتعلم علي أيده و بيبقي اول واخر واحد يفهمها و يعلمها يعني لو فعلا في تقصير منها يبقي العيب عليه
ابتسمت ليله بإحراج و بعدت عينها عنه
عشري….العيب بيبقي فينا يا ليله بنقول اي حاجه عشان نبرر الخيانه بس من الاخر ده طبع فينا عنينا زايغه و الراجل بيحب يجرب كل الستات بيضا سمره رفيعه كيرڤي عايز كل حاجه هو كده طماع بس اللي في قلبه واحده بس صدقيني
ليله….بردوا انا ايه اللي يخليني استحمل حرقة الدم و ايه اللي يخليني اعيش حياتي في حرقة اعصاب و قلة ثقه
عشري…..بابتسامه سلامتك من حرقه الدم
ليله….بإحراج علي فكره انا قايمه و هسيبك
عشري….اقعدي هنا
ليله…..طيب اسمع هسألك سؤال و ترد بصراحه
عشري…..اسألي
ليله…..انت انهي نوع من الرجاله يعني خاين و لو خاين خيانتك واصله لفين
عشري….غمزلها و السؤال ده بقي إجابته تهمك
ليله…..اااا لا عادي يعني هو انت لما سألتني كل الاسئله دي السؤال كان يهمك
عشري…..انا
ليله….اه انت
عشري…..اه يهمني في مشكله
ضحكت ليله بإحراج و عضت علي شفايفها و هي رافعه حاجبها
ليله….هقوم علي فكره
عشري…..بضحكه جميله الله تقومي ليه مش انتي لسه بتقولي بحب الصراحه وانا صريح و بقولك ايه كان يهمني اسألك كل الاسئله دي بتكدبي وتلفي و تدوري ليه بقي علي فكره ده تناقض ها
ليله….لا مش تناقض و اه يا سيدي اعتبر أنه يهمني اصل شيفاك بتدافع اوي
عشري….مش بدافع و الله بس بفهمك الموضوع من وجهة نظر الرجاله زي ما انتي شرحتي احساس الست في موضوع الخيانه من وجهة نظرك بس هقولك حاجه انا لو هتكلم عن نفسي انا بشوف أن الراجل لو حب بجد من قلبه و اختصر كل ستات الدنيا في ست واحده مستحيل يخون يا ليله
ليله….حلو اختصر كل ستات الدنيا في ست واحده دي بس وضحلي اكتر
عشري….يعني الراجل لو حب بجد بيعتزل الستات و بيكتفي باللي معاه و تموت في عينه كل بنات الدنيا ده في حالة لو فعلاً حب و خدي بالك الحب درجات عند الراجل
ليله…..درجات ازاي
عشري….يعني انا كا عشري ممكن اكون معجب بيكي اتعرف بس لما نتعرف احس انك لذيذه و كل حاجه بس متنفعيش شريكة حياه و ممكن احس اني مشدود ليكي واني اكون مشدود دي خطوه بعد الاعجاب و دي ممكن تخليني لما اتعرف عليكي اتجوزك أو افضل معاكي سنه اتنين أو نتخطب بس لو حصل جواز احتمال كبير نتفصل لأن وارد الاعجاب و اني اكون مشدود ليكي يروح شويه شويه بعد الجواز اما بقي الدرجه الثالثه اني احبك و هنا ببقي واخد قرار اني هتجوز البنت اللي حبيتها و بنعيش مع بعض و بنكمل و بنجيب اطفال كمان بس مع الوقت من المشاكل و المسؤوليات و الضغط الحب بيقل من الراجل و الست و بيفضل بينهم حاجه اسمها عشره يعني عايشين مع بعض عشان مبقاش ينفع يسيبوا بعض
أما النوع الرابع ده بقي و هو العشق و ده اخطر درجه في الحب عند الراجل ده اللي بيخلي ستات العالم تموت في عينه عشان وجود الست اللي معاه عامله اكتفاء و مهما كانت الضغوطات و المسؤوليات اللي عليه بينساها بمجرد ما يترمي في حضنها بيقدر كويس اوي يفرق في معاملته ليها وهي أم و وهي حبيبه بيتقبل شكلها في اي وضع مبهدله مهمته بنفسها منكوشه قاعده بجلابيه تعبانه مهما غلطت مبيقدرش يقسي عليها و بيروح هو اللي يصالحها حتي لو مش غلطان العشق يا ليله بيخلي الراجل يتنازل عن كل حاجه في مقابل أنه يكمل مع الست اللي قلبه اختارها فهمتي
ليله….بابتسامه اعجاب فهمت بس بردوا مجاوبتش علي سؤال عشري خاين و لو خاين انهي درجه من الخيانه
عشري…..لسه موصلش لمرحلة العشق عشري شاب عادي زي اي شاب ممكن اشوف بنت تعجبني من بعيد اتعرف لكن صدقيني عمري ما هكون الراجل اللي يخون خيانه جسديه و عمري ما عملتها وانا شاب عاذب
ليله…..بابتسامه جميله اااا ماشي
عشري…..ماشي ايه مصدقاني
ليله…..اه صدقتك بس يعني حتي لو مصدقتش عادي انت حر
عشري….والله طيب يا ستي كملي
ليله….اكمل ايه
عشري….اسئله
ليله…..وانا هفضل اسأل ما تسأل انت شويه
عشري….طيب انا بصراحه عندي فضول كبير اعرف مين ليله
ليله….ما انا قولتلكم لما كنا بنتعرف علي بعض امبارح
عشري…..قولتي بس اختصرتي
ليله….اممم وانت بقي عايز بالتفصيل
عشري….لو مش هضايقك طبعاً
ليله….لا مش هتضايقني بس هتزهق
عشري….بالعكس أنا حابب اعرفك اكتر
ليله…..اشمعني
عشري….هو كده و بعدين مش كل شويه تردي علي سؤالي بسؤال يلا قولي
ليله….طيب خلاص براحه بص يا سيدي انا بنت عاديه جداً اهلي مش أغنياء بس مبسوطين اتعلمت تعليم عادي في مدارس حكوميه جبت في ثانوي 90 في الميه مكنتش شاطره اوي
عشري….لا لحظه 90 في الميه و مش شاطره كمل بضحك علي كده انا كنت فاشل
ليله….بابتسامه لا والله دي حقيقه انا مكنتش شاطره بس كنت ذكيه و كنت قبل اي امتحان بشهر أقفل علي نفسي و ابقي في معركه انا و الكتب و الملازم يا قاتل يا مقتول احفظ و ادخل الامتحان احلى طبعاً في ناس عندها القدره دي و في ناس لا مستحيل تقفل مواد في شهر بس زي ما قولتلك كنت باخدها جد في الشهر ده انا من الشخصيات اللي مبتحبتش حاجه تتفرض عليها يعني محبش اذاكر لو ماما قالتلي قومي ذاكري بكرهه المدرسه عشان مجبره انزل كل يوم الساعه سبعه الصبح انا اي حاجه كنت بحس انها مفروضه عليا كانت بتبقي تقيله علي قلبي خصوصا لأن انا شخصيتي قويه يعني علي سبيل المثال في شويه اطباق في الحوض اكون قايمه اعملهم من نفسي بدل ماما لسوء الحظ ماما تنادي عليا قومي اغسلي المواعين اقولها شويه اللي هو لا انا كنت قايمه لوحدي و قيس علي كده حاجات كتير قومي صلي انزلي هاتي طلبات اعملي ده شيلي ده بمجرد ما بكون انا في نيتي اعمل ده و حد يقولي قبل ما اقوم بتقفل
عشري….عنيده يعني
ليله….بابتسامه برج العقرب
عشري….اااااالله
ليله….بضحك ده احنا كيوت والله المهم دخلت الجامعه و اتخرجت من كلية تجاره بس قبل كل ده بسنين حلوه كده الدنيا دعكت ببوزي الأرض اشتغلت و انا في تالته اعدادي في محل تليفونات مش التليفونات اللي هي موبايلات لا اللي هو محل في كبائن تليفونات زي السنترال كده
و اشتغلت مع واحده كانت خياطه بتعمل هدوم و انا كنت بروح افرجهم للمحلات اللي بتتعامل معاهم و اجيب فلوس منهم و ارجع اسلمها اشتغلت كمان في مصنع شيكولاته كنت بلزق استيكر كده علي الشيكولاته بعد ما تتغلف في مصنع حلويات و وقفت مع واحده جارتنا و بنتها في كوافير صغير بتاعهم اشتغلت حجات كتير اوي
عشري….بابتسامه استغراب سنترال و خياطه و مصنع حلويات و كوافير انتي
ليله….بضحك اه انا مش باين عليا و لا ايه
عشري….صراحه لا يعني اللي قدامي دي مصدقش أبداً انها اتبهدلت كده
ليله…..من ناحية البهدله فا انا اتبهدلت مع مكنتش محتاجه بس انا مقدرش اطلب من اي حد حاجه عشان كده حبيت اعتمد علي نفسي
عشري…..بس انتي قولتي انكم مبسوطين
ليله….اه شوف انا هقولك انا قولتلك أن ليا ثلاث أخوات أكبر مني بنتين و ولد اللي قبلي علي طول بينا ست سنين انا اصغر واحده لما خلصت سنه خمسه ابتدائي و دخلت أولي اعدادي ماما و بابا انفصلوا
اخواتي كانوا أكبر مني حاول ياخدهم بس هما مرضيوش و طبعاً أنا أولي اعدادي كنت لسه صغيره مينفعش يا خدني فا سابنا و عشان يعني يضغط علي امي و اخواتي قرر أنه ميصرفش علينا مع أنه كان باشا بجد و علي ما افتكر كده عمره ما خلانا محتاجين حاجه احلي اكل والحلي لبس و احلي فسح بس عند في امي قرر أنه يخليها تتعب بينا و يجيب آخرها بس امي كملت و صرفت علينا بمعاش ابوها
و لما اخويا بدأ يشتغل هو كمان بقي يصرف شويه مع امي اخواتي البنات الكبيره نزلت اشتغلت و شقيت بجد و بعدين اتقدملها جوزها اللي هو معاها و اتجوزت و مكملتش بعد.ثانوي و بعدها بسنه و نص تقريبا اختي التانيه اتجوزت هي كمان وبردوا اكتفت بالثانويه و كام شهر و اخويا اتجوز هو الوحيد فيهم اللي كان في معهد اربع سنين بس و انا كملت مع ماما لوحدي و في وسط بقي ما هما بيتجوزوا قررت اني اشتغل و روحت اول يوم في السنترال ده من غير ما اقول لحد و فاكره وقتها كان علقه محترمه من ماما
بس بعدها فضلت اتحايل عليها و خليت اخواتي يقنعوها و قولتلها اني بتسلي اختي الكبيره اقنعتها و قالتها ده جنب البيت بس اخويا كان رافض و زعل مني وقتها و من ماما طبعا لما الموضوع وصل لبابا عمل مع ماما مشكله كبيره و قولت بس هتقعدني بس هي كانت دماغها زيي عمدت معاه و قالتلي والله ما هقعدك يضرب رأسه في الحيط
و من هنا بدأت عداوتي مع ابويا كان ديماً يقولي تربيه امك انا ملحقتش اربيكي و كان ديما يقولي انتي خلفه عار و كسفتيني
يعني عشان زي ما قولتلك بابا و اهل بابا ناس مبسوطه و شيك كده ريحتهم حلوه يعني
ابتسم عشري بهدوء و فضل مركز معاها
ليله…..بس المهم كملت حياتي هو في حاله وانا في حالي لحد ما دخلت امتحانات ثالثه ثانوي و افتكر في يوم قبل الامتحانات صحيت من النوم في مره حسيت أنه واحشني اوي و نفسي اشوفه عشان بحضني بس كلمته من وراء ماما لأن علي قد ما كانت بتحبه علي قد ما كان بيركبها مليون عفريت لو جبت سيرته
قولتله اني عايزه اشوفه الصبح قبل الامتحانات قالي عيني بس بشرط
قولتله شرط ايه ؟ قالي هتخرجي من الامتحانات تلاقيني مستنيكي و هنروح ناخد حاجتك و تيجي تعيشي معايا و متعمليش زي اخواتك
قولتله طيب و ماما قالي ملكيش دعوه بيها و عادي ابقي روحي شوفيها وقت ما تحبي بس انتي لازم تعرفي أن مستقبلك معايا هخليكي تكملي تعليمك اديكي شايفه اخواتك مكملوش عشان فضلوا مع امك و لو حبيتي تفتحي اي مشروع هعملك لو حبيتي تسافري بره تكملي دراسه هسفرك من الاخر كل اللي انتي بتحلمي بيه هيتحقق معايا بس بشرط تيجي عندي
عشري…..و طبعاً رفضتي
ليله…..بحزن اكيد اولا رفضت عشان امي ثانياً رفضت لأنه قدر يسمح لنفسه أنه يشرط عليا اني اشوفه مقابل اني اقبل عرضه كان فاكر أنه هيقدر يقصر عليا لما يزغلل عيني ميعرفش أن ده ممكن يبعدني عنه اكتر انا مكنتش طالبه كل اللي قاله ده يا عشري و الدليل اني عملت كل اللي هو عرضه عليا ده بنفسي و بمجهودي انا بس كنت عايزه حضنه عايزه احس انه لسه معايا و ليه لازمه في حياتي مش مجرد اسم في بطاقه اليوم ده انا كنت محتاجاه اوي بس نفس اليوم ده اللي خلاني محتاجش ليه تاني خالص يومها خدت قرار بيني و بين نفسي اني لازم افرح امي لازم اخليها ترفع راسها و تشوف نفسها فيا لازم اجي علي نفسي و أنجح واجيب مجموع وادخل جامعه و الحمد لله اشتغلت صرفت علي نفسي و نجحت
و بعدها بسنين بقيت ليله اللي انت مستغرب انها شقيت و تعبت
عشري….طيب و والدك عمل ايه بعدها
ليله….بابا اتوفي بعدها بكام شهر اصلا بس قبل ما يتوفي عرف أن النتيجه طلعت و اني جبت مجموع كويس و اني قدمت في الجامعه و مستعده للسنه الجديده و علي فكره جالي في يوم و شوفته و حضني قالي يومها دماغك نفس دماغي انا وامك عنيده باركلي و يومها انا فاكره اداني ظرف فيه خمس الاف جنيه و قالي هاتي لبس للجامعه و شوفي اللي ناقصك
عشري…..خدته منه
ليله….بضحكه هاديه هزت راسها لا مع أن الوقت ده يا عشري كان كل اللي في شنطتي 500 جنيه و الف جنيه شيلاهم مع ماما دي كانت آخر فلوس معايا لأن مكنتش بشتغل من قبل امتحانات الثانويه بشويه عشان اقدر اركز هو صمم وانا صممت بس يظهر أن دماغي كانت انشف منه و مخدتش حاجه
عشري….طيب لما اتوفي روحتي و زعلتي عليه
ليله….طبعاً ده ابويا يا عشري و كان نسخه مني علي فكره في الطبع كأنه توأمي انا اكتر من اخواتي بكتير و انا واثقه أنه كان بيحبني اه كان بيتغاظ مني بس كنت بشوف في عينه نظره اعجاب من نسخته المصغره اكيد حزنت عليه و روحت لما اتوفي انا واخواتي و امي
عشري…..طيب حضنه ليكي قدر يسد احتياجك لما كنتي طلباه اول مره
ليله…..فرحني و اتبسطت و حضنته من قلبي بس لا مقدرش يسد احتياجي يا عشري للحضن الاول اللي طلبته اول مره كنت محتاجاه بس هو شرط عليا و انا في اليوم ده كنت في امس الحاجه لحضنه الحاجه لما بتجيلك يا عشري بعد ما بتكون قدرت تتخطاها عمرها ما بتأثر فيك
عشري….اكيد طيب وبعدين
ليله….عادي كملت حياتي و خلصت جامعه و في خلال ال قت ده كنت اتعرفت علي الشخص اللي كان في حياتي و كنت كمان اشتغلت في الشركه اللي نادين فيها و بعدها امي ماتت و انا قررت اسافر و انفصلت انا و الشخص اللي في حياتي و بس و قدرت انجح و عملت حجات كتير اوي عمري ما فكرت اني اعملها و كنت اتمني أن ابويا يفضل عايش و انا بحقق كل ده و بقوله اني كبرت لوحدي و بطولي و مكنتش محتاجه منه أي حاجه غير حضنه و ياريته فضل هو وأمي و عرفوا أن العند اللي كان بينهم ضيع حياتهم و حرمني منهم
عشري…..هما ليه انفصلوا اصلا
ليله….خلافات كتير هنا الاتنين دماغك ناشفه كل واحد ليه رأي الاتنين شخصيتين قياديه غير زن ابويا سيبها دي مش شبهنا كده يعني مع أن امي والله كانت ست طيبه مش عشان امي بس هي كانت تبان قويه لكن مكانش في احن ولا اجدع منها
عشري…..الله يرحمهم هما الاتنين يارب
ليله…..اتكلم انت شويه كفايه اسئله عني
عشري….انتي مش لسه قائله اسأل انت حبه
ليله….بابتسامه لا خلاص اسال انا
عشري….اتفضلي
ليله…..خليني اقلدك مين عشري
عشري….بضحك عشري ده شخص عادي بردوا معندوش اي حاجه غريبه في حياته
ليله……خالص خالص يعني الحياه هاديه
عشري….بابتسامه لا استني في حاجه مهمه
ليله…..ايه هي
عشري…..عريس منتظر
ليله….بابتسامه احراج طيب كويس مبروك
عشري…..مبروك
ليله…..اه مبروك انت تستاهل كل خير
عشري…..بغيظ والله و انتي كمان تستاهلي كل خير و هتبقي عروسه زي القمر
ليله……بابتسامه انت شايف كده
عشري…..اه شايف كده
ليله……بارتباك ااا طيب ايه تاني يا عريس قولي بتحب ايه بتعمل ايه في حياتك كده يعني
عشري…..هقولك يا ستي
وفضلوا يتكلموا مع بعض و يكملوا تعارف لا عشري فهم أن هي مفهمتش موضوع عريس منتظر و لا ليله فهمته و للحظه حست انها كلمه عاديه أو تلميح بحاجه عشان كده ارتبكت و ابتسمت و غيرت الموضوع.
أما عسال فا كان عامل زي النحله الحيرانه كل شويه يغير مكانه عشان يكون أقرب ليها عشان تبص عليه عشان يلمح عينها بس مكانش في اي فايده نادين مندمجه مع ايه و سلامه في الكلام و معتمده متبص ناحيته لحد ما حست أن بجد رقبتها وجعتها من كتر ما هي مش بتحركها حس أن الحوار اللي بينهم كلهم بدأ يتفكك و كل اتنين كانوا ماسكين و دن بعض حوارهم بقي جماعي اكتر مكانش في غير ليله و عشري اللي لسه بيتكلموا مع بعض فا قررت انها يندمج مع الكل عشان يحاول يوجهلها اي سؤال.
رشيد….طيب و موضوع الولاد يا ايمي
ايمي…..عمره ما شغل بالي يعني لو ليا نصيب اكيد هيكون ام لو مش ليا لو حاربت مش هقدر اكون ام يعني انا عكس شويه طليقتك جايز انا ظروفي مختلفه لاني مطولتش في الجواز انا خلعت بدري بدري بس بعد كده الشغل خد وقتي كله
رشيد….بس اكيد نفسك تكوني ام
ايمي….اكيد طبعاً مفيش ست مش نفسها تبقي ام بس افكر في الموضوع لما الاقي النصيب الاول
رشيد….طيب افرضي لاقيتي نصيبك ده و وحاولتي تبقي ام و معرفتيش
ايمي ….معرفش شعوري هيكون ايه اكيد هزعل و اكيد هحاول بس لو مفيش امل انا هعيش حياتي مره واحده و مستحيل اقضيها بعيط علي حاجه مش في ايد حد غير ربنا و بعدين يا رشيد انا اتربيت في بيت و سط ناس بتحب الحياه بجد مهما حصل معاهم من صعوبات ساعه بالكتير تلاقيهم بيضحكوا و نسيوا و يمكن انا شخصيتي بقت كده بفضلهم مبزعلش علي اي حاجه مش نصيبي ما يمكن احارب عشان اكون ام و ابقي ام فعلا بس ولادي ميبقوش كويسين أو يتعبوني فا لا مستحيل ازعل علي اي حاجه ربنا مش كاتبها ليا
عسال….ايمي انا عندي سؤال هموت واسأله ليكي بس بصراحه مش عارف المفروض اساله ولا لا
كلهم انتبهوا ليه معادا نادين اللي مبصتش عليه و فضلت عينها على ايمي و ده لفت نظره اكتر و طبعا ليله و عشري اللي مندمجين في الكلام مع بعض .
ايمي……طبعا اسأل يا عسال
عسال…..انتي عايشه في بيت بأجمعه ديانتين يمكن هو عادي و في كتير كده بس بصراحه انا اول مره اتعرف علي حد بعيش الظروف دي فا انا عندي فضول اعرف ازاي عايشه معاهم و ازاي بتتعاملي و ايه الوضع عندكم في البيت
حسان…..حلو السؤال ده يا ابن اللذيذه صراحه كنت هموت واسأله و مقدرتش
ايمي…..وليه تخليها في قلبك ما هو عسال سأل اهو.
حسان….خوفت يعني الموضوع يكون حساس و تضايقي
ايمي….لا خالص هضايق من ايه
سلمي….بالعكس دي هي اللي ديماً بتحكي
ايمي….بص يا عسال لو تلاحظ انا بعد انفصالي و بعد ما وصلت للسن ده مقدرتش اسيب اهلي و اعيش بعيد عنهم وده لأسباب كتير اوي أولهم أن انا معنديش اي مشاكل معاهم اني مقدرش ابعد عنهم أن قعدتهم بجد جميله تحس معاهم بالسلام النفسي و ده مش رأيي عشان انا بنتهم خالص والله تقدر تسأل البنات هتعرف أن بيتنا هو بيت العيله بجد
انا اتربيت في بيت مليان حب و هدوء و نقاء بيت مفيهوش اي قلق أو توتر حتي المشاكل اللي ممكن تحصل بين اي زوج و زوجته مفتكرهاش لأنها كانت بسيطه و بتخلص في وقتها من غير غلط او صوت عالي أو تجريح المشكله اللي كانت بتحصل كانت بتبقي عباره عن نقاش و كل طرف فيهم كان بيحترم التاني و بيدوا فرصه لبعض أنهم يسمعوا بعض يعني لو اني غلطانه تبرر غلطها و ابويا يفضل ساكت لحد ما تخلص كلامها من غير ما يقاطعها والعكس لو ابويا هو اللي ضايق امي بتسمعه للنهايه ودي من الصفات اللي انا اكتسبتها منهم عندي القدره افضل اسمعك مهما كنت مضايقه منك مقدرش اقاطعك في الكلام كمان اتربيت و سط ناس مبتعرفش تشيل جواها زعل و بتسامح علي طول اتربيت وسط عيله بتعرف تفرح نفسها بنفسها و الاهم من كل ده انا اتربيت في بيت بتجمعه ديانتين يا عسال أب مسلم و أم مسيحيه.
كل واحد عنده دينه و طباع مختلفه و معتقدات مختلفه مناسبات مختلفه ثقافات مختلفه و يمكن ده اللي كون شخصيتي خدت من كل واحد فيهم حاجه
يمكن في بيوت مصريه كتير سواء مسلمين أو مسيحين بيحتفلوا بمناسبات بعض بس انا عشت ده بجد و كنت جزء من كل احتفال في رمضان امي بتكون حريصه انها تهيأ البيت لاستقباله تعمل الزينه و تجيب الفوانيس تخصص مكان الصلاه و العباده انا واخواتي كان لينا نصيب كبير في اننا طول الوقت بشتري لبس في العيدين بتاعنا عيد الفطر و عيد الاضحى و كمان في كل اعياد المسيحين بنحتفل و بنجيب لبس .
رأس السنه عندنا مختلف بنحتفل بيه و شم النسيم يعني زي اي بيت مصري بس احنا بيختلف عندنا شويه لان عندنا فرد من أفراد عيلتنا مسيحي فا الاحتفال بيكون مميز لما بنصوم امي مستحيل تاكل او حتي تشرب احتراماً ليها بس وقت صيامهم بتهتم انها تعمل لينا اكل وليها اكل
بس بابا لانه بيحبها اوي بياكل معاها هي مش بترضي بس بيقولها أن هو اللي حابب يرتاح شويه من الاكل العادي بتاعنا و ياكل صحي اكتر.
امي عمرها ما اتدخلت في الدين بتاعنا بالعكس أنا اتعلمت الصيام بفضل امي اتعلمت الصلاه بفضل امي حفظت القرآن بفضل امي افتكر لما كنت لسه صغيره و مكانش لسه في غيري كانت توقفني و تعلمني ازاي اتوضأ و تحفظي سور القران الصغيره اللي اقدر اصلي بيها و تقولي اقول ايه انا أسجد و اقول ايه لما اركع
في المدرسه هي اللي كانت بتذاكرلي دين و بتحفظني و كنت ديماً اجيب درجات نهايه في الدين و افتكر في مره كنت في ثانوي أو اعدادي لمحتني ماسكه ورقه صغيره بكتب فيها سوره عشان اغشها في الامتحان لأن السوره كانت طويله شويه و مفيش وقت كان صابح تاني يوم عندي امتحان قالتلي بتعملي ايه قولتلها بعمل برشام للسوره عشان مش حفظها كويس و هي طويله و مفيش وقت اضايقت مني و زعلت بجد قالتلي بتغشي في دينك يا ليله
و صممت اني احفظها وقعدت معايا حفظتني سطر سطر لحد ما حفظتها و سمعتها اكتر من مره و نجحت الحمد لله
فا انا بيتي بيت مصري اصيل ديماً كله بهجه وفرحه بيت بيحتفل بكل الاعياد بيت كل فرد فيه بيحترم ديانه التاني
كل الشباب كانوا بيسمعوا و هما مبتسمين و متشوقين أنهم يعرفوا اكتر
ليله…..بس دي كل الحكايه و ده بيتي و دول اهلي اللي بحبهم و بفتخر بيهم و بفتخر بامي مش عشان هي امي بس هي بجد ست عظيمه و قويه و ذكيه و ابويا كان محظوظ بيها
رشيد….خلتيني نفسي اتعرف عليهم
نعيمه….بابتسامه صدقني مش هتندم خالص انا والبنات احلي وقت بنقضيه لما بنكون عندهم بيتهم مريح لاقصي حد ممكن تتخيله و قعدت زوزو بجد جميله هي و عمو محمد بيحبوا بعض اوي في بينهم تواصل جميل و غريب بيفهمواوبعض من نظره بيحترموا بعض
كمان يا رشيد يعني اسفه اولا انا مش بحب اتكلم في موضوع الديانات ده خالص بس اللي هقوله ده بيحصل في ناس من المسيحين يقولوا لا في نوع من المسلمين مقبضين و متشددين مش بنحب نتعامل معاهم و احنا المسلمين مش كلنا في ناس تقول لا مبحبش اتعامل مع مسيحين و بتقبض منهم بس صدقني ده مش حقيقي يمكن هي نفسيات و يمكن كمان جزء بسيط لكن البيت ده تحديداً انا عن نفسي برتاح فيه يمكن اكتر من بيتي ودي قولتها كتير لايمي بيتكم هادي في راحه لو صادفت ونمت عند ايمي بنام نوم عميق عمري ما اتقبضت من بيتهم
باكل من ايد زوزو احلي اكل في الدنيا عكس ناس تانيه ممكن تقول لا مناكلش من حد مسيحي بس بالعكس صدقني ايمي لو بتحب الطبخ بيتهيألي ده بفضل زوزو ايمي اصلا متجيش واحد فالميه منها.
رشيد…..بابتسامه زمان يا نوني مكانش في حزازيه الأديان دي خالص و ده مش كلام دي حقيقه الجيران كانوا مسلمين و مسيحين بيحبوا بعض بيجاملوا بعض لما كنا عيال نلعب مع بعض في المناسبات نعايد بعض مكنتيش تفرقي مسلم عن مسيحي الكل بيلعب والكل قاعد مع بعضه
حسان….انا افتكر زمان وانا صغير كان لينا جاره الله يرحمها بقي كنت بقولها ماما لأن هي وأمي كانوا قريبين من بعض اوي و انا اتولدت وهي موجوده من قبلي في البيت بكتير ربتني مع امي كنت ديما قاعد عندها لأن كان عندها ولد أكبر مني بسنه وانا زمان كنت شقي اوي و كنت بعمل مصايب و لما كنت اغلط أو اعمل مشكله اجري عليها و استخبي وراها و اقولها الحقيني ماما هتضربني كانت تقف قدام امي تقولها والله ما هتمدي ايدك عليه سبيه ده عيل و بجد عمري ما فكرت ولو ثواني في انها مسيحيه بالعكس كانت عشرتها جميله.
سلامه….انا و عسال كمان افتكر كل واحد فينا كان ليه صحاب مسيحين كتير
عسال…..ايوه كنت باخد في بيوتهم دروس و كان ليا واحد صاحبي كانت أمه بصراحه ست جميله كانت كل ما تشوف وشي تقولي انت جعان و تصمم تأكلني اقولها والله ما جعان تقولي لا انت خارج من المدرسه علي الدرس هتاكل انت و مينا لحد ما الاستاذ يجي كانت حنينه اوي
رشيد…..شوفوا انا موضوع الأديان ده عمري ما ركزت فيه وبشوف أن زي ما فيه مسلمين ميتعاشروش في برد ا مسيحين المعامله معاهم صعبه و العكس في مسلمين حلوين اوي و مسيحين جدعان
ايمي…..لو كل واحد فينا اتعامل مع الشخص اللي قدامه بانسانيه مش بدين كنا هنبقي في مكان تاني بس للاسف احنا أغلبنا بندخل الدين و الشكل في ناس كتير انا اشهد أنهم عنصرين من الدرجه الأولي
فضل….ده حقيقي علي فكره انا عن نفسي اقدر اتعامل مع اي شخص مهما كان هو ايه بس مقدرش اتعامل مع شخص عنصري انا افتكر مره زعلت مع واحد صاحبي و قطعت معاه بسبب انه كان مش بيحب يتعامل مع اي حد بشرته سمراء كان يقولي بقرف و بحس اني مقبوض و حقيقي مكانش بيتعامل مع اي حد لونه اسمر خالص هو كان اشقر شويه و مش عارف ليه كان بيضايق و يعمل مشاكل مع اي حد لونه اسمر وقتها مقدرتش لاني حسيت أن دي اهانه محدش فينا اختار شكله أو دينه أو أهله يعني ايه بجد
سلامه……مع أن احنا واطيب ناس اصحاب البشره السمراء و بعدين احنا هنا عندنا كتير بشرتهم سمراء
فضل…ده كان معقد باين
ايمي…..العنصريه في اي حاجه بجد صعبه اوي انا بقي عانيت بسبب موضوع امي وابويا ده كتير اوي سواء من مسلمين أو مسيحين كان في ناس صحابي خصوصا في فتره ابتدائى و اعدادي كانوا مسلمين لما يعرفوا أن امي مسيحيه يبعدوا عني و المصيبه أن أمهاتهم اللي كانت بتحرضهم علي ده يعني من وجهة نظرهم الام اللي ديما بتربي و بتعمل فا اكيد أثرت عليا بديانتها و خايفين علي ولادهم ميعرفوش أن بفضل امي أنا اتعلمت ديني و انا لسه طفله و طبعاً كان في مسيحين معترضين أن ابويا مسلم فا هو الموضوع أنه بشوفه
تربيه و ثقافه و للاسف احنا مجتمع مفتقر للاتنين تربيه و ثقافه لازم نتعامل مع بعض بكل حب من غير اي تدخل في اي حاجه متخصش حد.
حسان….بس في ثانوي و جامعه بيتهيالي الموضوع اختلف
ايمي…..اختلف خالص طبعاً كل ما بنكبر بنفهم و بالعكس صحابي في ثانوي و جماعه كانوا بيحبوا امي جداً والحقيقه ان في ناس من بعيد ممكن تتاخد شويه بس لما كانوا بيتعرفوا علي امي من قريب و بيشوفوا بيتنا كانت نظرتهم بتختلف
ايه….بيتهم بقي ده اللي حكايه بجد هو بيت كده من دورين عامل زي الڤيلا الصغيره الالوان بتاعته عامله زي البيوت بتاعت الاقصر و اسوان ابيض و ازرق تحس براحه بجد جميله
سلامه….لا احنا كده لينا زياره اكيد
ايمي…..يا سلام زياره واحده نرجع احنا بس بالسلامه و اكيد لازم تيجوا عندي و تتعرفوا عليهم و يعترفوا عليكم
حسان…..باذن الله
ايمي…..ها يا سي عسال عرفت بقي ازاي عايشه في بيتنا
عسال…..بابتسامه عرفت و بجد اتبسطت اوي و مامتك واضح انها بجد حد جميل و محترم
ايمي…..بجد اه هي جميله بتحب الحياه و ديما متفائله بتحب تسيب كل واحد علي راحته لما تشوفها انا واثقه انك هتحبها و ليها حكايات كتير انا اختصرت كمان يعني من الاخر روحها قريبه من مامتك انت وعسال لما كنت بتحكي عنها حسيت انها قريبه لامي اوي
سلمي…..ايوه صح يا ايمي والله فيهم من بعض كتير بيتهيألي لو اتعرفوا علي بعض هيبقي في بينهم كيميا جميله.
سلامه…..أن شاء الله ده اكيد
حسان…..طيب قوليلي يا ايمي مين اقرب واحده ليكي من البنات
ايمي…..بضحك لا كلهم انت عايز تعمل لينا مشاكل ولا ايه
حسان….لا ربنا ما يجيب مشاكل اكيد بتحبي الكل بس اكيد في حد فيهم بترتاحي معاه اكتر
ايمي….والله كلهم اصل احنا ديما مع بعض ميتهيأليش في حد فيهم بحبه اكتر من التاني
حسان….مقصدش حب
رشيد….حسان يقصد اللي بترتاحي معاه في الكلام اكتر يعني مثلا لو في موقف مضايقك مين اكتر حد ممكن ترفعي عليه الموبايل
حسان….ايووووه ردي بقي
ايمي….بضحك بص التانيه اللي كانت بترغي عينها جات علينا ازاي
ليله….بضحك ايه بسمع
ايمي….انا قولت كلهم منطقتش وانت غير السؤال الله يكرمك انت متعرفهش
سلامه….علي فكره عادي يعني ملهاش علاقه بالحب والله و مش معني انك بترتاحي لشخص مثلاً في حاجه إنك بتفضليه
حسان…..اه عادي انا مثلا كلهم حته مني بس لما بحب اتكلم في حاجه مهمه أو حاجه محتار فيها و عايز حد يقولي رأيه من وجهة نظره صراحه بكلم رشيد و عسال
ايمي…..لا عسال انت مفاجئني علي فكره
حسان…..عسال علي فكره تحبي الكلام معاه اوي
بصت أخيراً نادين بطرف عينها علي عسال و هو ابتسم اول ما بصت عليه
رشيد….علي فكره انا كمان برتاح مع عسال و حسان في الكلام
ايمي…..بص هقولك انا كل واحده من البنات ليها عندي نظره معينه او احتياج معين بمعني أن كل واحده فيهم بتكلم فيا الجزء اللي انا محتاجه و افتكر أن اللي بقوله ده هو نفس شعورهم
حسان….حلو اوي الوصف ده بس اشرحي اكتر
ايمي…..يعني مثلاً عندي موضوع مهم محتاجه اتكلم فيه و عايزه حد يقولي انا صح ولا لا و يديني الرأي الاخير بروح لسلمي
حسان….بابتسامه لسلمي ايووووه بقي
سلمي…..بابتسامه عاقله انا شويه
ايمي…..عندي طاقه رغي و هرمونات نكد علي هزار نوني اكيد
نعيمه……بضحك اصل انا برج الجوزاء يعني نكد هتلاقي ضحك هتلاقي
فضل….اعوذ بالله جوزاء
نعيمه…..ايش فهمك انت ده احنا قمر
رشيد….طيب وايه
ايمان…..ضحك و جنان و طاقه حلوه
ايه…..قلبي انتي
سلامه…..بابتسامه حلو
ابتسمت ايه بهدوء
عشري….بضحك طيب وليله
ايمي…..بضحك هقولك
ليله…..بتضحكي ليه احترمي نفسك
ايمي …..استني هقول حاجه حلوه في حقك
ليله….طيب قولي
ايمي…..بس هقولك حاجتين اول حاجه منهم أنا شخصياً حد جرئ اوي و قليل اوي لما اعمل مشكله بس في أوقات بتخط في مواقف مش بتبقي محتاجه جرأه قد ما بتبقي محتاجه شخصيه قويه و لسان طويل و دي بقي ليله و علي سبيل المثال اخر موقف اتحطيت فيه اتدبست في جهاز كده يعني بيعمل بسكوت و وافل و حجات كتير يعني معاه قطع غيار المهم لما روحت و جربته الفئه ضربت مع أنه جهاز غالي و ماركه كويسه فا ليله كانت عندي قولتلها مش مهم هغير الفيشه دي تسكت
فضل….بضحك طلعت السلاح اكيد
ايمي….بضحك خدت الجهاز حطيته في الكرتونه وراحت علي المحل و انا معاها و المحل اصلا بتعامل معاه الراجل يقولها هجبلك واحد ودي لا هاخد فلوسي اقولها خلاص نغيره و نجربه قبل ما نمشي و دي أبداً وفعلا خدنا الفلوس و راحت مكان تاني و جابتلي جهاز تاني فا ليله بالنسبالي صاحبة المواقف الجدعه ده غير بقي أن لما بحس اني عندي طاقه بروحلها عشان ارقص معاها
ليله….بضحك و احراج الله يكسفك يا شيخه
عشري…..بابتسامه ترقص
ايمي…..اه ليله بتعرف ترقص
ليله….مااااا خلاص يا ايمي خلاص يا حبيبتي
ضحكوا كلهم علي ليله
عسال…..طيب و نادين
بصتلوا نادين و سكتت نفسها تقوله انت مالك و مالي سيبني في حالي
ايمي…..نادين بقي الحته الهاديه بتاعتي مع انها مش هاديه خالص بس لما بحس اني مضايقه و مش عايزه اتكلم حتي لو مفيش حد ضايقني بس اوقات بتحس أن مودك مش حلو بروحلها و افضل قاعده في حضنها بتفهمني و بتقدر أن انا مش حابه اتكلم انا عايزه اسكت و بس بتفضل ساكته مش بحس بيها لدرجه اني اوقات بلمحها بتتحرك بهدوء بتمسك اي حاجه من غير صوت نادين من الشخصيات اللي بتقدر و تحترم تقلبات المزاج لاي شخص يعني بتسيبك تعبر و مش بتفضل تزن
فضل….بابتسامه هو انا بس عندي استفسار بسيط ليه كلكم مصممين تقولوا أن نادين مش هاديه
ايمي…..عشان هي مش هاديه والله
ليله…..نادين يمكن لسه مش متعوده عليكم بس نادين مرحه و شقيه هي شهاده حق طبعها يبان هادي و كيوت كده بس معانا أو مع اي حد.تعرفه مش كده
فضل…..صحيح الكلام ده يا نودي
ولا هما ظالمينك
نادين….بابتسامه بص انا مش بعرف اتعود علي الناس بسرعه يمكن بخاف و يمكن كمان انا مش الشخص اللي بسرعه يدخل في المود مش عارفه كملت بابتسامه جميله بس انا مش هاديه أوي يعني
عسال مكانش حاسس بابتسامته الواسعه طول ما هي بتتكلم.
رشيد….يعني ايه بتخافي من الناس مش بتثقي يعني بسرعه
نادين…..لا مش حكاية ثقه هو الطبيعي اصلا أن محدش يثق في حد الا لو عاشره بس انا بخاف معرفش السبب بي ممكن نقول اني بخاف اتعلق و اتساب و يمكن ده ليه علاقه باللي حصل معايا من وانا صغيره بس في العموم انا اجتماعيه يعني مش انطوائيه خالص.
حسان…..علي فكره يا نادين يمكن متكلمناش كتير مع بعض بس انتي من الشخصيات اللي تدخل القلب بجد
بص عسال لحسان و حس أنه هو اتوتر و فضل يهز رجله
نادين….ميرسي يا حسان و بجد انتوا كمان تدخلوا القلب يمكن احنا مع بعض من امبارح الصبح بس كأني اعرفكم من كتير
سلامه…..ايوه صح انتوا متخيلين أن احنا نعرف بعض بس من 24 ساعه و تقريباً قربنا اوي من بعض
حسان….هقولك ليه لان في العادي لو اتعرفنا علي بعض في اي ظروف تانيه بالكتير هنقعد مع بعض ساعه اتنين بالكتير و مش هنتكلم في كل اللي اتكلمنا فيه ده و في الاخر كل واحد هيرجع بيته بس احنا هنا حرفياً من امبارح الساعه تسعه الصبح و احنا مع بعض في نفس المكان عشنا مع بعض نفس الوضع الصعب و اتقفل علينا باب واحد و الوقت الساعه داخله علي خمسه يعني عدينا 24 ساعه و ده وقت كبير احنا طول الوقت في وش بعض و اتكلمنا و اتناقشنا و اتعرفنا يعني عدد الساعات اللي قعدنا فيها مع بعض تساوي شهر لو كنا نعرف بعض بره
سلامه….تصدق صح
ايمي…..فعلاً احنا لو حسبناها بالظبط كده احنا بقالنا 33 ساعه و بيتهيألي اتكلمنا في حجات كتير عدد الساعات دي لو انقسمت ساعتين كل اسبوع لا هو وقت طويل
حسان…..بالظبط عشان كده قولت لو في ظروف تانيه كان تعارفنا علي بعض خد اكتر من شهر
فضل….طيب سيبكم بقي من الكلام و الرغي اللي اكيد هنرجع ليه تاني قولولي بقي هناك ايه و محدش يقولي سندوتشات انا هموت من الجوع
ايمي…..خلاص الاكل عليا
عشري….وانا كمان في الخدمه لو حابين
ايمي …بتعرف تطبخ
عشري…عيب عليكي مفيش بدوي مبيعرفش يطبخ
ايمي….خلاص يلا بينا نشوف هنتغدا ايه
رشيد….وانا ممكن اساعدكم
فضل….يلا خلينا نقوم احنا كمان و نساعد بعض كلنا بدل ما احنا قاعدين كده.
ليله….بقولكم ايه انا كنت قايله لسالم يجيب شويه حجات كده للشوي ايه رايكم نشوي
فضل……تمام صحيح يا عشري انا نسيت سالم خالص
عشري…..والله انا كمان افتكرته الوقت لما ليله قالت اسمه الراجل ده يظهر حصل معاه حاجه ما هو مش طبيعي اختفائه ده
رشيد….حتي مسألش مشينا ولا لا و هما استلموا ولا لا
حسان…..يمكن حصل معاهم حاجه المشكله ان احنا هنا بعد اللي حصل كأننا في منفي بس خير ان شاء الله
عشري….تصدق كلهم لسه موبايلاتهم مقفوله
فضل…..في حاجه مش مفهومه
ايمي…غريبه بصراحه
ليله….يمكن بيتهم اتضرر أو حاجه
عشري….مش عارف ربنا يستر
سلامه….اكيد هنعرف
فضل….طب ايه الكل موافق علي الشوي
الجميع ….ايوه
عسال خلاص وصل لمرحله اللي هو لا لازم الاقي فرصه و اقعد معاها لوحدنا
عسال…..ااا طيب تمام ادام شوي بقي ايه رايكم اغير الشكل شويه هنا و نعمل قاعده حلوه يعني تغيير
نعيمه….اه ياريت و نفتح الستاير دي شويه عشان خلاص شويه و هكتئب
عسال…..تمام يبقي نادين تساعدني ممكن
بصوا البنات لبعض بهدوء و ابتسموا و بعدين بصوا لنادين اتوترت منهم اكتر
نادين…اااااا اااه تمام اااا ايه ساعدي عسال طيب لحد ما اجي اوك انا فوق يا بنات شويه
جريت نادين علي فوق بص عسال في الارض و هو مبتسم و رفع حاجبه و عرف انها هربت منه
وقفت ايه معاه تساعده هي و نعيمه و قعدوا يضحكوا و يهزروا عملوا جو حلو يغير المواد شويه حطوا في الأرض مخدات كتير يقعدوا عليها بدل السفره و عملوا جو عربي جميل
و حطوا بره علي الباب الشوايه و ولع عشري الفحم و وقفت نادين تساعده.
أما عسال فا مقدرش يعديها لنادين انسحب بهدوء و طلع علي فوق
و للحديث بقيه……
