لقاء كارثي

لقاء كارثي
أميره أسامه
صاحبة البطل الواحد

. البارت المئه 146.

……………………….

في منزل نعيمه قفلت مع البنات و قامت ظبطت شويه حجات في البيت بصت شويه من الشباك الجو كان هواء جامد و في مطر قفلت كل الشبابيك كويس.

و بعدين راحت علي اوضتها خدت غيار و دخلت خدت شاور و طلعت سمعت صوت بره الباب بصت من العين السحريه لقت عامل النظافه بياخد الباسكت افتكرت ان هي عندها جوه في الباسكت دخلت خدت الشنطه و فتحت براحه حطتها بره و قفلت تاني و راحت علي اوضتها سرحت شعرها و لبست الچاكت بتاع الترنج.

سمعت الجرس بيرن افتكرت ان عامل النظافه بره واكيد هيطلب فلوس الشهر خدت بسرعه المحفظه وخرجت تاني علي بره فتحت الباب
و فجأه لقت فضل قدامها لابس بنطلون چينز و سويت شيرت خفيف لابس الكاب بتاع التيشرت و غرقان شويه من المطر اول ما فتحت حست ان قلبها وقع منها علي الارض نظره فضل ليها كانت ثابته من تحت الكاب واقف حاطت ايده في جيب البنطلون و باصص عليها بنظره ثابته و حزينه ضربات قلبها بقت تدق بعنف نفسها كان طالع ونازل عينها ثابته عليه و مكانتش فاهمه هو واحشها ولا خايفه منه طيب تترمي في حضنه ولا تقفل في وشه وتجري من قدامه كل دي كانت افكار لكن في الحقيقه هي مكانتش بتتحرك ولا بتنطق و سكوته خلاها واقفه زيه ساكته..

بعد حوالي دقيقه او اكتر من الصمت

فضل….ايه مش هتقوليلي ادخل؟

بصتلوا نعيمه و منطقتش وشها كان ابيض شفايفها باهته خالص اتصدمت صدمة عمرها عقلها وقف عن التفكير و عن الرد و عن كل حاجه.

رفع فضل راسه بهدوء لفوق و شال ايده من جيبه سمعت صوت عامل النظافه من السلم و هنا حركة فضل و صوت عامل النظافه خلت نعيمه تفوق شويه

فضل….ايه هنفضل واقفين كده؟

هزت راسها ببطئ فظيع بلأ و بعدت خطوه عن الباب من غير ما تنطق

دخل فضل بخطوات ثابته وهاديه استنت عدت من جنبها غمضت عينها ثواني لما شمت ريحته اللي وحشتها بجد

قفلت الباب بهدوء و سابت محفظتها علي التربيزه اللي جنبها و فضلت تاخد نفسها بسرعه اتحركت وراه كام خطوه و هي ماشيه مش متزنه

قرب فضل من الكرسي قعد بهدوء و نزل الكاب من علي راسها هدومه كانت غرقانه و شعره كمان رفع شعره بهدوء و بصلها كانت واقفه ماسكه أيدها الاتنين وصدرها مش مبطل طلوع و نزول و صوتها مش بيطلع