لقاء كارثي

فضل…..و انا خدت قرار يا نعيمه وليكي حريه الاختيار توافقي او ترفضي براحتك عايزه تسمعيه

بصتلوا بخوف حقيقي و هي دموعها نازله رفعت كفها بسرعه مسحت دموعها و بصتلوا بقوه وهزت راسها كانت بتحاول تبين قدامه انها مش ضعيفه و انها مش خايفه من قراره بس هي من جواها قلبها كان بيتنفض.

فضل…اتنهد تنهيده طويله بصي يا نعيمه انا بحبك و مقدرش انكر ده و انتي عارفه كويس و الدنيا كلها عارفه اني بحبك و ان انتي الست اللي اختارتها بكامل ارادتي عشان تبقي مراتي..

بس اللي حصل صعب و مش اي راجل يقبلوا بس انا مش عايز دي تبقي النهايه و كمان مش قادر ارجع اكمل بنفس الطريقه كده علي طول.

لاسباب كتير اولهم يا نعيمه و من غير زعل او كلامي يجرحك ان بسببك فقدت ثقتي فيكي

زي ما انتي كنتي خايفه من المستقبل وان يحصل ويحصل انا كمان خايف من المستقبل خايف اصحي في مره وانتي مراتي الاقيكي مشيتي خايف نختلف فا تاخدي قرار مع نفسك و تلغيني و وقتها الغلطه مش هتبقي سهله

خايف يا نعيمه اديكي الامان اللي كان في ايدك بالكامل و انتي ضيعتيه خايف اثق فيكي و اقول عادي و محصلس حاجه و اسامح تحت مسمي الحب و انتي تفكري ان ده ضعف و تفكري انك ضمنتي اي غلطه ليكي اني هسامح وعادي ماهو سكت وعدي…

بس في غلطات يا نعيمه لازم فيها عقاب ولو الشخص غالي علينا و معفي من اي عقاب عشان بنحبه يبقي لازم يكون في حدود احترام تقدير و انتي لا حطيتي حد لغلطك ولا احترمتيني و لا قدرتيني يبقي عشان نفكر نبني الثقه من التاني لازم نحط حدود و شروط و اتفاقات

عشان اقدر اثق فيكي اديكي الامان مبقاش مهدد معاكي مبقاش خايف من مشكله تحصل تخدي بعضك وتمشي او نفسيتك تتعب من اي حاجه بعيد عني وبرضوا انا اللي اتحاسب عليها عشان كده يا نعيمه

انا هدي فرصه لعلاقتنا بس بشروط و متفهميش كلمه شروط دي بشكل مش حلو احنا هنرجع زي الاول خالص قبل حتي ما نبقي مخطوبين

هنعمل زي ما كنت اتمني يحصل قبل ما تسافري اننا نفترق بس واحنا في حياة بعض و جنب بعض اعتبري اننا بنتعرف علي بعض من جديد بنفهم بعض بنشوف و بنختبر بعض هنتحمل ايه و مش هنتحمل ايه.

باختصار يا نعيمه احنا هنبدأ من الصفر عايز ثقتي فيكي ترجع عايز اديكي الامان من تاني عايز ابقي مطمن وانا في حضنك مش خايف