لقاء كارثي

دخلت نعيمه بسرعه علي المطبخ و بعدت عن البار عشان ميشوفهاش وقفت نعيمه و هي مش قادره حطت ايدها علي قلبها و فضلت تاخد نفسها بسرعه حاولت تظبطه و تتنفس براحه لكن مكانتش عارفه مدت كفها قدامها ايدها كانت بتترعش جامد سندت ضهرها علي المطبخ كل حته فيها كانت بتترعش

بعدت تاني مدت ايدها خدت كنكه فتحت علبه البن اللي وقعته اكتر من اللي حطته من كتر ما كانت ايدها فيها رعشه قربت حطت المايه و بعدين حطتها علي النار كانت بتتحرك بسرعه فظيعه شمال و يمين وتلف حوالين نفسها فتحت الدرفه عشان تجيب الفنجان و الصنيه و هي بتسحب الصنيه و قعت اكتر من فنجان و كوبايه علي الارض اتدغدغوا نزلت بسرعه علي رجليها تلم و هي بتتنفس بسرعه و عينها متحجره من كتر الدموع اللي حبساها

سمع فضل صوت التكسير ضيق عينه.

فضل…..انتي كويسه ؟

هزت راسها كانه شايفها و بعدين افتكرت انه مش شايفها

نعيمه….كويسه

قالتها بصوت مخنوق و مش كويس كانت بتلم الزجاج اللي اتكسر في ايدها قام فضل بهدوء راح عليها لقاها موطيه في الارض و عماله تلم

فضل…..ايه ده كله؟

مردتش عليه و راسها كانت في الارض مرفعتهاش عماله تلم كفها اتملأ و لسه بتكمل

فضل….قرب انتي بتعملي ايه سيبي هتتعوري

بص حواليه لمح مناديل المطبخ شد منديل كبير و قرب منها نزل علي رجله فرد المنديل

فضل….حطي اللي في ايدك علي المنديل و قومي انا هلم بصلها و لمح عينها

فضل…..انتي كويسه؟

هزت راسها و مبصتش عليه

فضل…..نعيمه انتي اتعورتي ؟

هزت راسها بلا كانت عارفه انها لو نطقت هتنفجر من العياط

فضل…..قومي يا نعيمه قومي انا هلم اغسلي ايدك في دم اتعورتي

سمعت نعيمه صوت القهوه بيفور
قامت بسرعه و سندت علي كسر زجاج تاني و اتعورت تاني في بطن ايدها بس متوجعتش نطرت ايدها بطريقه تلقائيه مجرد رد فعل سعيد من الالم..

فضل….حاااسبي

مخدش باله انها اتعورت لانها قامت بسرعه قربت من الكنكنه مسكتها من الايد كانت مولعه صوابعها اتحرقت سابت الكنكنه مره واحده علي الرخامه و هنا هي مقدرتش تسيطر علي نفسها اكتر من كده بصت علي الرخامه و القهوه اللي وقعت و غرقت الدنيا و بقت تنزل من علي الرخامه للارض شعرها كان جاي علي جنب و مش مبين وشها

فضل بصلها توترها كان مرعب ايدها بتنقط دم و مسكت الكنكه اتحرقت اللغبطه اللي كانت فيها كانت مخلياها بتتعامل بعشوائيه تلم الزجاج علي ايدها تمسك الكنكه و هي سخنه بتتحرك بجسم من غير روح او وعي