لقاء كارثي

في حجات يا نعيمه مينفعش فيها كلمه اسفه او اسف..

الكسره مبتلمهاش حقك عليا !!
الكسره بتهد الثقه و بتبني جدار عازل مينفعش نتخطاه و عشان نقدر نتخطي الجدار ده لازم نفهم ليه ده حصل عشان اقدر اقتنع واعدي

الكل هاجمني لما قولت اني محتاج سبب عشان اقدر اسامحك بس لو كل واحد فيهم حط نفسه مكاني لو ثانيه كانوا هيفهموا اني صح

بتحبيني و بحبك محصلش بينا مشاكل مكنتش وحش معاكي مشوفتيش مني اي شر او اذي ديما كنت براعي ربنا في كل حاجه بعملها معاكي ديما كنت براعي اني اخليكي مبسوطه مقصرتش معاكي يا نعيمه في اي حاجه لما حصلت المشكله في بيت عشري وليله بينك و بين البنات فضلت ساكت منطقتش مغلطتكيش ولا هاجمتك و جيتلك لحد هنا بليل و برضوا لما غلطتك غلطتك بهدوء مكنتش حابب اجي عليكي رغم اني عارف انك غلطانه بس كنت مراعي نفسيتك وحالتك

فهمتك انك غلطت بس مقستش عليكي لما كدبتي اكتر من مره حتي في السجاير عصبيتي وقتها كنت متحكم فيها مكانش فارق معايا تشربي او لا كان فارق معايا انك بداتي تكدبي و تغلطي و فيكي حاجه مش طبيعيه و مع كل ده انا كنت بتعامل عادي لحد ما انتي خدتي قرارك قبل بيوم او يومين كنا مع بعض و كنا تمام حتي لما سمعت منك كلامك اللي وجعني مركزتش قولت نعيمه فيها حاجه او عندها مشكله مقصره علي نفسيتها عادي هعدي و لما تهدي هعاتبها بس انتي مشيتي يبقي اقل واجب لما ترجعي افهم السبب قوليلي انت غلطت معايا في ده او عملت ده جايز يبقي معاكي حق بس متقوليش اسفه

لان اسفه دي مش هي الكلمه اللي انا مستنيها واااااه من حقي افهم سبب مقنع بما اننا بنحب بعض محصلش بينا حاجه يعني مكانش في سبب يخليكي تعملي فيا كده يبقي لازم افهم

واوعي تفتكري ان انا عايز افهم عشان احدد اذا كنت هقدر اكمل ولا لا خااالص انا عايز افهم عشان اهدأ من جوايا عشان ده حقي عشان انا طرف في علاقتنا و فجأه لاقيت نفسي ملغي من حياتك تماما قرار سفرك كان بدون علمي قرار انفصالك مخدتيش رأيي فيه ولا حتي مهدتي للقرار ده اعتبرتي اني طرف ملوش لازمه و خليتي شكلي قدام الكل قليل انا عايز اسمع يا نعيمه منك و بطليييي عيااااااط انا مش بهاجمكم انا تعبان يا نعيمه بجد تعبان و محتاج ارتاح..

أسفه وحقك عليا مش هتريحني اللي هيريحني بجد اني اعرف ليه عملتي فيا وفيكي كده ايه اللي وصلك لكده لما عملتي فيا كده كنتي بتفكري في ايه وقتها كنتي مستوعبه الموقف اللي هتحطيني فيه ولا لا كنتي قاصده توجعيني بالشكل ده ولا لا كسر كرامتي و رجولتي قدام الكل فكرتي فيهم ولا مفرقش معاكي اصلا فهميني يا نعيمه فهميني ايه اللي وصلك للقرار ده.