لقاء كارثي

نعيمه….بدموع فضل انا عارفه انك مضايق و مقدره كل مشاعرك دي و فهماك و حاسه بيك و انت عندك حق في كل حاجه و يمكن انا لو مكانت هعمل زيك واكتر بس قبل ما افهمك لازم تفهم حاجه واحده اني بجد بحبك و اكتشفت ان حبي ليك اكبر بكتير من اللي كنت متخيلاه سفري و بعدي عنك خلاني اعرف و اتاكد ان انت الشخص الصح خلاني اعرف اني مستحيل حياتي تكمل من غيرك

اوقات يا فضل بيحصلنا تشتيت او لغبطه بتخلينا مش فاهمين حتي نفسنا الوقت اللي حصل فيه كل ده انا مكنتش انا كنت تعبانه بجد انت محتاج مبرر او سبب قوي يخليك تديني عذر و لو بسيط و ده حقك

بس جايز يا فضل و للاسف متلاقيش العذر ده عندي لان باختصار انا وجعي و نفسيتي
كانت مش من سبب معين كانت من اسباب كتير اوي يمكن اول حاجه بوظت نفسيتي بجد جواز ليله يمكن انت هتقول ايه التفاهه دي و هتحس ان عادي ما كل الناس بتتجوز صح بس انا اتاثرت بجوازها
اتاثرت ببعدها عني حتي لو هي مش بعيده وحتي لو انا خلاص شويه وهتجوز وهبقي عندها كل الردود اللي ممكن اسمعها منك او من غيرك فهماها كويس بس ده اللي حصل معايا فكره اني ارجع البيت وليله مش فيه كانت وجعاني غكرة اني انام في البيت و اصحي و هي مش موجوده و مش هتبقي موجوده اثرت عليا كملت بدموع ليله في وقت من الاوقات كانت هي كل حياتي انا وهي كنا اكتر اتنين ممكن نختلف و نتخانق بس وجودنا في حياة بعض مكانش فيه نقاش

هي جايز متأثرتش زيي لان هي بتحب عشري و الظروف الاي مروا بيها في علاقتهم خلتها ارتاحت لما بقت معاه و ده حقها هي تعبت كتير

بس انا حياتي وقفت مره واحده بقيت افكر يعني خلاص كده البيت اللي جمعنا ده مش هيجمعنا تاني غير صدف او قعدات بسيطه طيب ذكرياتنا و حياتنا خلاص بقت ماضي

فكرة بقي ان خلاص انا كمان هتجوز و شويه وابقي في بيتي مسؤوله كانت رعباني توتري و زعلي علي فراق ليله مع خوفي من الخطوه دي

خلوني رجعت سنسن كتير وراء خلزني افتكرت مشاكل ابويا وامي هتقولي انا مش ابوكي وانتي مش امك هقولك صح بس انا خوفت و خوفي يا فضل مش جريمه اتحاسب عليها انا بني ادمه و اي بني ادم فينا معرض انه يبقي تحت تأثير عقله معرض ان عقله يخليه يبقي عنده خوف و تروما من حجات ممكن اصلا متحصلش انا كنت مضغوطه و الفتره دي خدت قرارات غلط كتير اولهم اني اسيب شغلي اللي بحبه.