لقاء كارثي

قربت منه بهدوء بص علي كفها كانت ضاغطه عليه بكام منديل

نعيمه….بصوت هادي و واطي البس ده بدل اللي اتبهدل

فضل….لا سيبيه عادي

نعيمه….فيك دم كتير غير واقعد

فضل…خده من ايدها حطه جنبه و رجع بصلها اديك كويسه

بصت علي ايدها كانت قافله كفها علي المناديل

نعيمه…اه تمام

فضل….بتنهيده طيب تعالي اقعدي هنا

نعيمه…اااا طيب هروح اعمل قهوه بدل اللي وقعت ووو

فضل….ما انا عملت اهو

نعيمه مكانتش مركزه خالص و عايزه تعمل اي حاجه عشان متقعدش اصلا هزت راسها بهدوء شاورلها فضل بكفه علي الكنبه دخلت بهدوء و قعدت هو كان قاعد علي كرسي و جنبه الكنبه اللي هي قاعده عليها و قاعده في اخرها بعيد عنه.

سكتوا ثواني شرب من القهوه و عينه كانت عليها و هي حاسه انه باصصلها كانت عماله تضغط بكفها علي المنديل و تلعب في ضوافرها

ساب الفنجان و فضل مركز معاها رفعت عينها بتوتر فظيع و شبح ابتسامه بسيطه علي شفايفها تبين توترها اكتر فضل كان عارف ان هي متوتره و جدا و كان اول مره يشوفها كده اصلا فا قرر يهديها و يفك التوتر ده عشان يقدر يتكلم معاها..

فضل….احممم حمد الله علي السلامه

نعيمه…الله يسلمك

فضل….ايه الاخبار طمنيني كويسه

نعيمه..اااا اه اه الحمد لله

فضل…..النزول من هناك سهل و لا لا

نعيمه….يعني مش اوي هي المطارات فتحت بس في ناس كتير بتنزل و في ناس اكتر خايفه تنزل

فضل….بس اقصد النزول عموما مسهلين الدنيا

نعيمه…اه جدا يمكن كمان لا بيركزوا مع وزن ولا شنط كتير بيعدوا بس الناس عشان زحمه كمان جدا و اكيد مش هيقدروا يضيعوا الوقت في وزن و شنط بيدخلوا علي طول

فضل…. بابتسامه هاديه بس اسعار الطيران عاليه صح

نعيمه…بهدوء ابتسمت اه جدا تقريبا الضعف او الضعفين بس اللي عايز يسافر و يبعد مش فارق معاه الفلوس الكل خايف

الفضل….اه الوضع مش بخير

نعيمه…ااا اه الدنيا بايظه و في قلق جامد و الناس خايفه

الفضل….المهم انك جيتي بالسلامه

نعيمه….الحمد لله اااا مبروك

بصلها بهدوء

فضل….علي ايه؟

نعيمه….المكان الجديد بتاعك

فضل….ابتسم وهز راسه اه الورشه الله يبارك فيكي

نعيمه…..مبسوطه انك بتحقق حلمك عارفه ان مشروعك ده فارق معاك اوي

فضل….بابتسامه ده اكيد بس لسه يعني معملتش حاجه خالص قدامي وقت طويل

نعيمه…مش مهم المهم انك بدات فيه و انا عارفه انك هتنجح و هتعمل حاجه حلوه