لقاء كـ،ـ،ـ،ـارثي

البارت الثاني و التسعين .

………………………

بعد ما خلصت نادين لعبتها و عملت جو حلو و غيرت الجو العام اللي حصل من التوتر و القلق علي تقي.

راحت عند حنان جوه في المطبخ تساعدها كانت معاها سلمي قاعدين بيتكلمو

نادين….بابتسامه بتعملوا ايه؟

حنان…..سلمي بتساعدني و بنرغي شويه محتاجه ايه يا نور عيني

نادين….بابتسامه جميله مش محتاجه انا عايزه أساعدكم عشان مش لاقيه حاجه اعملها

سلمي…..تعالي قطعي السلطه دي و انا هساعد حنون في حاجه تانيه

حنان….يلا تعالي لاقيتي حاجه اهو تعمليها

نادين….ماشي

دخلت نادين وقفت مكان سلمي

البنات كانوا رايحين جايين و كل شويه بنت فيهم تيجي تقف علي البار من بره و تسمع حنان و تندمج معاها.

قربت نعيمه وقفت جنب الكرسي

سلمي……كملي يا حنون كلامك

حنان….انا نسيت كنا بنقول ايه

سلمي….قولتي ان زمان كان في اختلاف عن الوقت

حنان….كل حاجه زمان كانت مختلفه يا سلمي عن الوقت يمكن انا في حجات زمان محستش بيها اوي لاني شيلت مسؤليه كبيره لوحدي بس مقدرش أنكر ان كل حاجه زمان كان ليها طعم و روح مختلفه عن الوقت

سلمي….طيب ايه هي الحجات اللي مقدرتيش تحسي بيها زمان و ليه

حنان……يااااااه حجات كتير اوي يا سلمي يعني مثلاً علاقتي بالجيران و الناس عموماً كانت علاقه سطحيه اوي و مكانش في اي اختلاط كنت في حالي اولاً انا طول عمري خجوله شويه و بتحرج اروح لاي حد بيتي كنت فتحاه بس كنت اتكسف اروح لاي حد او اخبط يبان من طبعي اني مش اجتماعيه بس انا بحب الناس جداً بس زي ما بقولك هو كسوف و بحي اكون في حالي بس ده من بعد جوازي لكن افتكر زمان اوي لما كنت لسه صغيره و مع امي افتكر علاقتها بالجيران كانت حلوه اوي وانا كنت اعرفهم كلهم زمان لما كانت جاره تخبط عليكي تطلب منك كوبايه سكر ترجعهالك صنيه بسبوبسه او كيك المهم انها تردهالك لما كانت جاره تزعل مع جاره يتصالحوا بكوبايه شاي لما كانت واحده ابنها يتوه تلاقي الشارع كله بيدور معاها

كانت كل واحده تخلص شغل بيتها علي الضهر و ينزلوا و يطلعوا لبعض قبل العصر يشربوا الشاي والقهوه مع بعض و قبل المغرب كل واحده تكون في بيتها مستنيه جوزها و قاعدين و متغدين و البيت هادي لما يبقي في ميت في بيت واحده من الجيران الحزن يبقي في كل البيوت

و كان عيب تشغلي التلفزيون قبل ثلاث ايام احتراماً للي مات و لو عندك اطفال و مضطره تشغليه توطي الصوت علي اقل درجه و تلاقي العيال الصغيره مقربين من التلفزيون عشان يسمعوا و هما كمان ميقدروش يعلوا الصوت.

الحياه اختلفت اوي عن زمان الوقت مبقاش حد يطلب حاجه من حد و لو حد طلب اللي بيطلب منه يبقي مضايق اللي يزعل من التاني مبقاش في كوبايه شاي تراضيهم لا دول بيمسكوا في بعض اكتر و يوقعوا كبار و رجاله في مشاكلهم النت بقي و سيله للردح و التلقيح و الخناق

لو حد عنده مصيبه عيل تاه ولا بيته اتحرق و لا حصل اي حاجه تلاقي الف بيصور و وكام واحد يتعد علي الصوابع بيساعد اللي يموت عنده حد اخرنا الوقت نعزي و نقول عملنا الواجب و نرجع نعيش حياتنا نشغل تلفزيونات واغاني و منراعيش بعض
الحزن اصلاً اختلف عن زمان اخرنا يوم و اتنين و خلاص

كل الحجات دي انا فكراها كويس في بيت امي الله يرحمها بس لما اتجوزت وروحت بيت جوزي كنت في حالي اوي لان ده طبعي وكمان جوزي وقتها طلب مني مختلطش بأي حد مكنتش اعرف غير جيران امي في بيتنا و طبعاً بعد ما انفصلت

حبيت الخصوصيه دي مش هنكر لاني كنت لوحدي لا كنت حمل مشاكل ولا حمل اي حاجه ممكن تحصل بره بيتي اكتفيت بأمي و باولادي و بس

كمان مش بس الجيران اللي مقدرتش احس بيها اوي في حجات تانيه مقدرتش تحس بيها او اعيشها

زي مثلا اني احب او اتحب يمكن زمان الموضوع مكانش مفتوح اوي زي الوقت بس بردوا علي ايامي كان في علاقات حب كتير

سلمي….ايوه بابا كان بيحب ماما اوي

نادين…..وبابا و ماما بردوا كان بينهم قصه حب

نعيمه…..بابتسامه حتي بابا و ماما و احد الوقت بيحبوا بعض

حنان…..بالظبط كان في حب يمكن كمان قصص حبنا كانت مختلفه عن الوقت و كانت العلاقات محترمه اكتر و الحب فيها صادق اكتر مش قصدي ان حبكم الوقت مش صادق او في عدم احترام بالعكس انتوا بنات جميله و محترمه و متربين و الشباب الله يحميهم رجاله و عارفين قيمتكم بس اللي اقصده الشباب والبنات الوقت مش زي زمان انتوا كمان اه مش كبار و لسه شباب بس نضجتوا كلامي عن المراهقه زمان مراهقتنا كانت غير الوقت اللي كانت نحب شاب جارهم زمان لما كانت تخرج البلكونه و تشوفوا تبقي مكسوفه و نظراتهم لبعض بتقول كل حاجه كانت نظره بس كفيله تخلي البنت طول اليوم مبسوطه و بتحلم و بتتخيل و عايشه حاله حب بريئه و جميله حتي الشاب كان يشوفها يبقي هيتجنن عليها و لما يشوفها نازله يفضل مراثبها من بعيد لبعيد خايف حد يضايقها و في نفس الوقت معندوش الجرأه انه يمشي وراها او يكلمها.

و بعدين اللي فيهم كان ممكن يتكلم و يبقي في قصه حب واضحه و خلاص البنت عارفه ان الشاب ده ليها و الشاب عارف ان البنت ليه كمان علاقتهم كانت محترمه

البنت كانت تقعد بالشهور مستنيه كلمه حلوه عايشه طول الوقت علي النظرات لان الرجاله كانت كلامها قليل بس لما كانوا يقولوا كلمه حلوه كانت البنت تعيش عليها شهور في سعاده كانوا يفهموا بعض من نظره الحب نظره ووالغيره نظره والغضب نظره والفرح نظره و رغم ان الكلام كان قليل بس الحب كان كبير اوي

ليله كمان وقفت جنب نعيمه و فضلت تسمع حنان و هي مستمتعه بالحوار سندت علي كتف نعيمه

ليله…طيب و انتي يا حنون محبتيش خالص او عيشتي الحاله دي

حنان …بابتسامه زي ما قولت يا ليله في حجات كتير محستش بيها للاسف يمكن عيشتها مع الناس اللي حواليا سمعت عنها لكن انا شخصياً معيشتهاش

نعيمه….ولا مع بابا سلامه

حنان…..لا انا اتجوزت صغيره اوي يعني 15 سنه مكنتش افهم حاجه كنت وقتها فرحانه زي اي بنت اهلها يقولولها هنجوزك فرحت اني هلبس فستان و ان هيبقي ليا بيت انا اللي مسؤوله عنه تفكيري وقتها كان بسيط يعني وقتها اكتر حاجه كانت مفرحاني اوي يمكن تضحكوا عليا فكره اني اصحي احضر فطار لجوزي واجهز هدومه و افضل طول اليوم لوحدي انضف بيتي اشوف اللي ورايا اعمل اكل دي كانت حاجه مفرحاني اوي و مخلياني متحمسه
فكره اني شويه و يبقي عندي طفل و اخلي بالي منه كانت مسيطره عليا اصلاً اكتر حاجه كنت عايزه اتجوز عشانها اني اجيب اطفال وابقي ام

ليله….بابتسامه جميله لنادين زي نادين هي عايزه تبقي ام

سلمي…..ايوه صح

ابتسمت نادين و كملت السلطه

حنان…..بالظبط المشاعر دي لوحدها كانت كفايه بس مكانش في حب خالص مكنتش اعرفوا اصلاً واحد اتقدم واهلي وافقوا و انا سمعت الكلام شوفتوا بالظبط مرتين قبل الجواز و مرتين ميتعدوش النص ساعه

قريت ايمي وقفت جنبهم و ولعت سيجاره و بدأ البنات يجوا وراء بعض و الشباب كلهم كانوا بره و اللي في الڤيلا التانيه.

نعيمه…..طيب حبتيه بعد الجواز يا حنون

حنان…..زمان يا نعيمه الحب كان بسيط و اللي مكانش بيعيش قصه حب كانت العشره بتخلق الحب ده
مع الافعال طبعاً و احنا البنات او الستات عموماً زمان كانت طموحتنا بسيطه اوي راجل محترم لسانه حلو و عشرته طيبه و الشهاده لله هو كان راجل محترم و طيب و عمره ما قالي كلمه او لفظ خارج او حتي مد ايده عليا و انا عمري ما زعلتوا كان في بينا عشره طيبه

ليله…..بابتسامه بس اكيد العشره دي مع طباعكم خلقت بينكم حب

حنان…..طبعاً في ناس تقولك لا العشره متخلقش حب جايز متخلقش قصه حب بس الست كانت بمجرد ما تتجوز و يتقفل عليها باب واحد مع جوزها خلاص بقي هو كل دنيتها تحب و تغير و تعيش كل المشاعر ماهو جوزها بقي عارفه انه بقي شريكها مدي الحياه.

ايمي….طيب سؤال يا حنون لو مش هيضايقك يعني

حنان….اسالي يا ايمي طبعاً

ايمي…..زعلتي لما انفصلتي عنه ولا كنتي واخده القرار و انتي مش ندمانه

حنان…..كنت واخده القرار و انا مش دمانه بس زعلت اوي يا ايمي اوي

ايمي…..زعلتي عشان العشره و لا عشان حبتيه و لا عشان كنتي فاكره انك لما تكلبي الانفصال هيرفض

حنان…..هو رفض علي فكره و فضلنا فتره قبل الانفصال يحاول معايا و يبعتلي ناس من اهلوا ويحاول ان الانفصال ده ميحصلش بس انا قراري كان نهائي لان هو كمان لما كان بيحاول يمنع الانفصال ده كان لسه عنده رأيه مغيرهوش كان رافض مسؤوليه ميدو يمكن انا عذرته علي فكره لانه مش مجبر يربي طفل مش ابنه بس كمان رفضت قراره ده انا زعلت علي العشره و علي حبي ليه لاني مش هكدب حبيته و طول السنين اللي عيشتها معاه مشوفتش منه حاجه وحشه حتي الوحش اللي شوفته منه بعد الانفصال مزعلتش منه عليه لاني كنت عارفه انه قاصد يعمل كده عشان يضغط عليا و ارجع ليه بس في العموم لما كنت علي ذمته كان حد محترم و طيب

ليله…..عيشتي معاه قد ايه يا حنون

حنان….بابتسامه انا اتجوزته وانا 15 سنه حملت في سلامه بعد اربع شهور من جوازي و انفصلت منه كان سلامه عنده 10 سنين تقريباً و كان شهر يعني كان عندي 25 وقتها او 26 قعدت معاه يعني حوالي عشر سنين و كام شهر

ليله….بابتسامه انتي صغيره اوي يا حنون لسه

حنان….بأبتسامه انا 52 و داخله علي 53

ايمي…..يا عمري لسه صغيره

سلمي….طيب قرارك ده كان صعب عليكي

حنان….طبعاً قرار الانفصال ده مش سهل خالص يا بنات حتي لو كان الراجل و الست مفيش بينهم حب و في بينهم مشاكل و علاقتهم اصلا مش حلوه مبيبقاش سهل الست لو شايفه ان حياتها مستحيله مع الراجل و مصممه علي الطلاق صدقوني بتتوجع و هي بتطلق يمكن في ناس تشوف ان ده انفصام في الشخصيه بس لا هي مشاعر كده غريبه بتحصل محدش هيحس بيها غير الست صدقوني وانا مكنتش بكرهوا ولا كان في بينا مشاكل اصلاً

وحياتنا كانت هاديه و بسيطه بس انا مكانش قدامي حل يمطن وقتها اكتر حاجه في الدنيا كانت مخوفاني ان لما ولادي يكبروا و يفهموا ياخدوا مني موقف و اللي كان راعبني اكتر انهم ياخدوا نفس الموقف من ميدو و يشوفوا انه هو السبب عشان كده طول السنين اللي فاتت علي قد تعبي في تربيتهم و علي قد تعبي في اني اوفر كل قرش عشان اعرف اربيهم و اكبرهم واعلمهم اني ازرع جواهم حبهم لبعض يمكن انا مش متعلمه مش معايا غير الابتدائيه الحمد لله بعرف اقرا و اكتب و كنت شاطره اوي و خطي حلو جدا انا يمكن لما كبرت شويه كنت بحاول اقرا كتير و اثق نفسي بكل الطرق حتي لما كنت بذاكرلهم كنت بتعلم معاهم و عرفت حجات كتير الحمد لله المهم يعني انا وقتها مكنتش متعلمه ولا كنت مثقفه و لا عندي سياسه اني اتعامل بطريقه ايجباييه مع الاطفال زي الوقت بعد ما بقي ليا خبره بس وقتها عشان الحجات اللي كنت خايفه منها دي خدت قرار اني اتكلم مع ولادي و هما صغيرين كده

و كل ماكانوا يكبروا اكتر ارجع تاني اتكلم معاهم في نفس الموضوع و نفس الموقف اللي اتحطيت فيه كنت ديماً عندي فكره اني اشاركهم اللي مريت بيه و اللي قررت اعملوا

عشان مكانش عندي استعداد بعد ما شيلت الليله دي كلها لوحدي و ولادي يكبروا اعيش معاهم معاناة تانيه انا مش قدها مكنتش هقدر ابداً افهمهم كل ده لما يكبروا و يبقوا شباب و اتفاجئ برد فعلهم لما حد فيهم يجي يقولي عملتي كده ليه او ليه حرمتينا من ابونا مكنتش هقدر اشوف ولادي و اقفين قصاد ميدو و بيحسسوا حتي لو بالافعال ان انت السبب في فرقتنا كا أسره و الحمد لله قدرت اني اربيهم و ازرع جواهم الحب لبعض قدرت اخليهم ايد واحده عرفت اعلمهم واكبرهم و اخليهم بيتنفسوا حبهم لبعض

ليله….بأبتسامه تأثر قدرتي فعلاً يا حنون هما ماشاء الله يجننوا الاربعه ربنا يحفظهم و يحميهم و يخليهم لبعض و ليكي

حنان……يارب يا ليله

ايمي…..طيب مواجهتيش اي سؤال غريب منهم بخصوص الموضوع ده
و هما صغيرين

حنان…..لا خالص لاني زي ما قولتلك انا اتكلمت معاهم وقتها يمكن اللي ثدر يفهمني شويه سلامه لانه كان اكبرهم اه لسه طفل عشر سنين مش كبير بس كان مستوعب شويه كلامي ميدو و ريهام كانوا بين الخمس سنين و الاربعه ونص مكانوش فاهمين و ميدو مكانش مستوعب اللي بيحصل مصطفي كان لسه عيل علي ايدي عشان كده كنت بتعمد كل ما سنهم يكبر شويه افتح الموضوع و افهمهم و اسألهم زعلانين مني ولا لا و اخد رايهم في اللي عملتوا كنت بحاول علي قد ما اقدر اشاركهم معايا الحوار واحسسهم انهم كبار واني باخد رأيهم

ليله…..عمرك ما حسيتي مع الوقت يعني ان سلامه او ريهام او مصطفي مضايقين او حتي سألوكي ليه عملتي كده او ليه محاولتيش تلاقي قرار تاني غير الانفصال

حنان…..اكيد كل الأسئله دي سألوها بس الحمد لله انا طول عمري بفهم ولادي من نظره و مفيش مره حسيت من نظرتهم و هنا بيسألوا بتأنيب ضمير ليا او زعل مني كان سؤالهم ديماً فضولي اكتر او تقدروا تقولوا انهم كانوا بيجبوا يسمعوا الحكايات بتاعت زمان زي ما بحكيلكم الوقت بالنسبه ليهم يعني كانت تسليه

سلمي…..طيب سؤال يا حنون اسألتهم دي و كلامك معاهم كان قدام ميدو و لا لا

حنان….لا عمرها ما كانت قدامه يمكن وهما صغيرين شويه خصوصا سلامه لما كان بيسأل مكانش يعرف يعني ايه اسأل من غير ما ميدو يكون موجود كان طفل و ميدو مكانش فاهم بس الحب اللي زرعتوا فيهم خلاهم لما كبروا شويه من غير ما انا حتي اقول او الفت نظرهم مكانوش عمرهم يسألوا قدامه احتراما لمشاعره

نادين…..طيب ميدو مسألكيش يا حنون خالص

حنان ….لا خالص ميدو طول عمره هادي و حساس اوي و ساكت يبقي في عينه الف سؤال و ميسألش و يمكن ميدو شخص اجتماعي و بيحب الناس و الناس تحبه مرح و دمه خفيف و قعدته حلوه بس في الموضوع ده بالذات كان ديماً ساكت فاهم بس مش بيتكلم و هو عرف طبعاً كل الحكايه و عاش معانا تفاصيل كتير بس مكانش بيتكلم يمكن ميدو عنده نظره كده لحد الوقت بشوفها بتموتني اللي هي اني صعبانه عليه

نظره اني انا السبب في اللي حصل ده كله بحاول علي قد ما اقدر ابعد الفكره دي عنه من غير ما اتكلم بس هو حساس جداً حتي في افعاله ديماً حابب يسعدني بكل الطرق بيهتم بيا اكتر من ولادي نفسهم مع ان ولادي الحمد لله بيهتموا بيا و عارفه بيحبوني و متعلقين بيا قد ايه بس المشاعر اللي عند ميدو ليا ديماً وصلالي من غير مجهود منه انا عارفه انه بيحاول يعوضني بس انا مش محتاجه كل ده لاني معملتش ده مغصوبه او مضايقه بالعكس انا كنت مبسوطه وراضيه بقراري جداً

ايمي…..زي ما قولتي هو ميدو حساس و فكره انه كبر و فهم اللي حصل زمان اكيد بتأثر عليه و بيحس انه بسببه حصل كل ده

حنان…..اكيد بس هو عارف كويس ان لو رجع بيا الزمن الف مره في كل مره هختار ميدو

ليله…..بتشوفي دي تضحيه يا حنون منك

حنان…..لااااا دي مش تضحيه ده واجب عليا يا ليله

نعيمه….طيب ليه يا حنون موافقتيش ان ميدو يقعد مع مامتك و تهتمي بيه من بعيد لبعيد

حنان….بنظره تاثر مقدررررتش قلبي مطاوعنيش ازاي اسيب طفل مكانش لسه كمل الخمس سنين مع ست كبيره ازاي طفل يتجمل يشوف خالته جايه بولادها تشوف طلبتته و طلبات امها الكبيره و في اخر اليوم تاخد ولادها في حضنها و تمشي و تسيبه حطوا نفسكم مكاني كنتوا هتتحملوها يمكن و جايز في كتير ممكن يعملوها و يشوفوا طلبات ابن اختهم علي اكمل وجه و ميقصروش و الحياه كانت هتمشي بس والله ما قدرت انا واختي مكانش لينا غير بعض كنت بحبها حب مش طبيعي و هي كمان علاقتها بيا كانت قويه من حبها في سلامه سمت ميدو محمد علي اسمه اللي بينا كان كبير و زي ما انا ربيت ولادي يحبوا بعض هي كمان زرعت فينا الحب ده مقدرتش ابداً اسيب ميدو اتولد علي ايدي و انا اول واحده شيلته و قبل وفاة اختي لما كان نروح لامي كان يفضل طول الوقت في حضني و مينامش او يسكت غير معايا كانت اوقات تجيبه يقعد مع الولاد و لما تاخدوا ابقي هموت عليه واقولها سيبيه تقولي لا مقدرش اسيبه ينام بعيد عني كنت بعذرها لاني زيها بس كنت ببقي هتجنن عليه وهو ماشي

انا حاولت اسمع كلام الكل و اعمل بنصيحتهم بس والله ما قدرت كان عيل خسر امه وابوه فجأه مقدرتش اجي عليه انا كمان و اسيبه مقدرتش احسسه لحظه باليتم مكانش معاه اخ او اخت ياخدوا بحسه و يبقوا ونس لبعض كان طفل صغير وحيد

كان امانه اختي اللي كانت بتخاف عليه من الهواء الطاير انا افتكر كمان
اني روحت عيطت لجده و جدته لانهم كانوا عايزين ياخدوا هما كانوا عايشين و طبعاً بعد وفاة ابنهم كانوا عايزينه يعيش معاهم قولتلهم لا ده من ريحة اختي انا اتطلقت بسببه مش هسيبه و صعبت عليهم و وعدتهم اني اجيبه اي وقت يطلبوا فيه و كانوا محترمين اوي جدته اتوفت بعدها بفتره بس جده عاش كتير و ميدو كام بيروح ديماً يشوفوا ويسأل عليه واشتغل معاه فتره و كان بيحبه اوي

ايمي…..بس معقول يا حنون مفيش مره حسيتي انك اتسرعتي فيا او ندمتي

حنان…..خالص والله يا ايمي بقولك لو رجع الموقق اتعاد الف مره كل مره هختار ميدو

سلمي…..طيب ليه بتقولي ان بعد الانفصال كان في مشاكل بينكم

حنان…..كان بيضغط عليا عشان ارجع يعني عاند معايا لما حاول كتير ولقاني مصممه علي قراري في الانفصال و بعد كده رفض يدفع اي فلوس خاصه بولاده هو كان عارف اني عبيطه اوي لا ليا في الشغل ولا التعامل ولا اعرف احتك بالناس و خجوله و معرفش اخد وادي و ابقي بنت سوق زي ما بيقولوا ودي حقيقه كانت شخصيه بعيده عني خالص انا مش كده طول عمري انا واختي امي اللي بتعملنا كل حاجه و بتنزل و بتروح و تيجي و احنا بنخاف او مش بنخاف مش بنعرف نتعامل اوي و بنتكسف.

بس فاهو كان حابب يضغط عليا خصوصا ان معايا اربع اطفال صغيره بس انا قررت اتحدي اي رهبه او خوف او كسوف جوايا مكانش قدامي حل غير كده بس طبعاً لما قرر يمنع المصاريف الحمل اتضاعف عليا انا كان كل اللي في دماغي وقتها اني انزل اشتغل واصرف عليا انا وميدو وهو يتكفل بنفسه وامي ليها معاشا من ابويا بس طبعاً كل اللي فكرت فيه باظ بقيت مره واحده مسؤوله عن نفسي وعلي اربع اطفال و امي طبعاً كانت بتحط معاشاها كله لاننا عيشنا معاها

ايمي…..حنون هو انتي بجد سيبتي البيت ليه عشان يعيش فيه و لا هو اللي موافقش

حنان….لا سيبته عشانه بيت العيله بتاعهم اتباع واخواته متجوزين ومكانش عنده بديل و انا كان قدامي بيت امي اللي هو بيتنا يعني فا مقبلتهاش عليه يتمرمط و يتبهدل و في النهايه ده ابو ولادي

ليله…طيب هو محسش ان ده جميل ليكي مثلا و ردهولك في المصاريف بعد ما قررتي تسيبي البيت ليه بصت ليله و خدت بالها ان ريهام واقفه معاهم

حنان…لا ماهو انا في الاول سيبت البيت ليه و بعد كده بدأنا بقي في قصه المصاريف دي

ليله…..بابتسامه اااا طيب نغير بقي الموضوع ريهام متزعليش والنبي

ايمي….ايه ده صحيح ريهام معانا

ريهام….بابتسامه لا انتوا فاكرين اني ممكن ازعل عادي خدوا راحتكم كل اللي بيتقال ده انا عرفاه

حنان…..ريهام مش بتزعل متقلقوش

نادين……طيب ريهام انتي مكنتيش بتحسي خالص ان بباكي واحشك

حنان ….هو طول الوقت كان موجود يعني كنت بشوفوا و كنت بروح عنده كل اجازه عادي

ايمي…..طيب بصراحه يا ريهام موقف حنون انتي معاها فيه ولا لو انتي مكانها مش هتعملي كده

ريهام…..هو مبدأياً يارب ما اتحط فيه ابداً و يخليلي اخواتي بس ان مع ماما طبعاً ولو لاقدر الله اتحطيت في نفس الموقف هعمل زي ما هي عملت بالظبط و عنري ما زعلت منها ولا حسيت انها كانت غلط او كان لازم تختار حل تاني ولا عمري لومتها او حسيت ان ميدو مثلا كان السبب في كل ده بالعكس خالص والله و بعدين انا اتربيت علي ايد ماما و بيتهيألي لازم اخد طباعها اصلا التجربه دي علمتني معني التضحيه بكل انواعها يعني موقف ماما ده لوحده يخليني فخوره بيها

موقف تيته بصراحه كانت نفس ماما بالظبط مع اختلاف الشخصيه هي كانت اقوي شويه من ماما كانت ست جدعه عمري ما حسيت انها مضايقه من وجودنا و لا تعبت من زن اربع اطفال حواليها طول الوقت لان خدوا بالكم قبل تعبها كانت هي اصلا اللي قاعده بينا طول الوقت بتأكل و بتشرب بتنضف و بتساعد في المصاريف فكره انها كمان تحط المعاش علي فلوس مانا و تقعد هي و ماما وقت القبض يقسموا الفلوس علي كل احتياجاتنا و احتياج البيت

كانت ست شاطره اوي بتعرف تمشي اليوم و تظبط المصاريف مكانتش بتحسي ماما و لا بتحسسنا بالفلوس البسيطه اللي بتتقسم علي ست اشخاص كمان تضحيه ماما و تيته في اخر كام يوم من الشهر دي كانت بالنسبالي درس كبير اوي في الحياه لو عيشت عمري كله مش هقدر اتعلموا غير منهم.

سلمي….بابتسامه كان بيحصل ايه في اخر الشهر

ريهام…..بابتسامه يعني كان اخر خمس ايام دول خلاص كل حاجه بتخلص في البيت المصاريف علي القد جداً الاكل بسيط كانوا يعملوا حسابنا احنا الاول و ماما وتيته كان ممكن يعدي عليهم بالذات اخر يومين دول بياكلوا بس عيش حاف عيش و بطاطس مثلاً لو في اكل باقي ياكلوا رز من غير اي حاجه

الفاكهه اللي تبقي باقيه تتقسم علينا وهما لا بصوا في تفاصيل كتير عيشناها معاهم يمكن وقتها كنا اطفال و مش مقدرين كل ده بس لما كبرنا شويه بقينا فاهمين اكتر بس سبحان الله يعني وقتها كان ربنا واقف معانا واقفه مش طبيعيه وكانت الايام بتعدي يعني و ماما الحمد لله عرفت تربينا صح و قدرت فعلاً تزرع الحب ده جوانا

افتكر في مره كنا في اخر الشهر زي كده كان فاضل تقريبا علي القبض حوالي ثلاث ايام البيت كان فيه رز و بطاطس بس مفيش حاجه تانيه غير توابل حتي مكانش في خضار تاني و كان باقي مع ماما 90 جنيه

يمكن وقتها كانوا ال90 جنيه ممكن يعملوا حاجه و يمشونا بالعافيه

وقتها كنت انا وميدو عندنا عشر سنين و سلامه كان حوالي 15 سنه و كام شهر سلامه تعب اوي جاتله نزلة برد قويه و حرارته كانت اربعين و بدأ يخرف كمان ماما خدته وجريت بيه علي المستشفي و اتكتبلوا علي علاج بحوالي 120 يعني اكتر من اللي معاها ب30 جنيه كنت انا محوشه يومها 10 جنيه و مصطفي اخويا كان معاه خمسه اديناهم لماما طبعاً هي شالت عن العلاج بس مجابتهوش كان حقن و ادويه و خافض و مضاد حجات كتير بقت عماله تتكلم هي و تيته بابا وقتها كانت اتجوز و كان عامل عنليه وقتها فا ماما مقدرتش تقولوا

طبعاً ميدو سمع كل الكلام ده و خد بعضوا ونزل قال هينزل يلعب شويه غاب حوالي اربع ساعات و ماما وقتها هي و تيته مكانوش مركزين اوي في غيابه بسبب تعب سلامه

ولما ركزت راحت تبص عليه من البلكونه ملاقتهوش استنت شويه و لما قلقت عليه نزلت تشوفوا كان في علي اول الشارع بقاله كده صغيرن

ماما لمحتوا واقف يحط حجات في الشنطه لواحد و بيبيع اتصدمت قالتلوا انت بتعمل ايه يا ميدو قالها بشتغل عشان اجيب فلوس و نجيب علاج سلامه

ليله…..ياعمري انا

ابتسمت نادين بتأثر

ماما في اليوم ده كانت مضغوطه و اول مره تزعق لميدو يومها واتعصبت جدا فا افتكر ان الراجل صاحب البقاله كان كبير وقتها يعني في الخمسينات بس كان طيب ومحترم اوي قالها متزعقيلوش هو معملش اي حاجه و واقف معايا و قالي انه عايز يشتغل معايا و يساعدني انهارده عشان عشان يجيب حاجه حلوه لسلامه تفرحوا لانه تعبان

حنان…..هو الحلو في الموضوع مش بس انه حب يساعد هو اصلا مقالش للراجل انا عايز اشتغل ليه يعني معرفهوش ان البيت مش فيه فلوس او ان احنا مش معانا نكمل تمن الروشته

ليله….بابتسامه جدع

حنان…..بس فا هديت شويه لما عرفت ان هو مقالش حاجه طبعاً الراجل يومها وده كان مبلغ كبير طلع خمسين جنيه اداها لميدو وقالوا خد يا عم ميدو حق شغلك انا يومها اتصدمت قولتلوا لا طبعاً كتير قالي ميدو كان وشه حلو عليا بشكل مش طبيعي من اول ما دخل عليا وانا مش ملتحق علي الزباين و دي اول مره تحصل المكان زي ما انتي شايفه رزقه حلو و واسع ودي طالعه من ذمتي لميدو هو كان عايز يفرح اخوه و انا ربنا رضاني عشان وافقت و ده حقه كنت فرحانه فرح و هو كمان يا عمري كانت ابتسامته مش مفارقه وشه و احنا خارجين الراجل قالوا هتجيلي تاني يا ميدو

فا ميدو ضحك وبصلي قالي ينفع لما اخلص مذاكره كل يوم اجي اشتغل

و سبحان الله يعني الراجل كان جارنا اصلا وعارف ان ظروفنا مش قد كده و عارف حالتنا فا هو حب يساعد بطريقه تلقائين فا قولتلوا ماشي بس هتقعد حبه صغيره و تكون مخلص اللي عليك و تنزل تساعد عمك حسن شويه و فعلاً نزل تاني يوم خد منه 30 جنيه

يومها لما رجعنا جيبت العلاج كان باقي 15 جنيه علي الفلوس و اتبقي كمان 35 جنين و تاني يوم هو جاب 30 و اليوم اللي بعده جاب 30 وقدرنا نكمل الكام يوم بسبب ميدو و بعدها قبضنا بس الراجل مكانش قادر يستغني عن ميدو ابداً هو اصلا طول عمره مرزق و وشه حلو اوي

كان كل يومين كده ينزل يشتغل معاه و مكنتش برضي اخد منه الفلوس لانه طفل و خلاص معانا القبض بس هو كان بيحوشوا من ورايا و يجي اخر الشهر يطلع الفلوس اللي عملها طول عمره جدع و راجل و بيعرف يشيل المسؤوليه.

ريهام….بايتسامه سلامه بقي لما خف و بقي كويس انا و مصطفي خدنا منه العدوي بس كانت اخف شويه هو كمان حب يساعد زي ميدو و نزل اشتغل في فرنة عيش

ضحكوا كلهم

حنان…..كان يطلعلي مليان دقيق و متبهدل و ازعق وامي تقولي سيبيه خلي يشتغل ده بقي راجل خليه يتحمل المسؤوليه و يعرف يجيب القرش سيبتهم شويه هما الاتنين و بعد كده وقفت ميدو خالص عشان يركز في مذاكرته بس سلامه مرضيش ابداً طول عمره دماغه حطب مع انه سلس في حجات كتير

بس الشهاده لله سلامه كان ليه دور كبير اوي في شيل الحمل عني و لما دخل ثانوي كان بيشتغل و بيذاكر و كان بيعرف يجيب فلوس

و في ثالثه ثانوي اشتغل كذا شغلانه كان بيروح ينقل كل ثلاث ايام بضايع من مصنع حلويات للعربيات اللي هتوزع و كان شغال في قهوه و اشتغل في مكتبه كبيره مكانش بينام كنت حاطه ايدي علي قلبي من امتحاناته بس الحمد لله عدي و كمل وهو في الجامعه و كان تقريبا هو اللي فاتح البيت و بعدها ميدو حصلوا تاني و بدات احس بالراحه شويه مستوانا المادي بقي احسن كتير و بفضل الله طول عمرهم رجاله بمعني الكلمه و قنوعين بيرضوا باي حاجه و كانوا ديما كل همهم يوفروا طلبتت ريهام و مصطفي و البيت و يشيلوا مبلغ بسيط علي جنب لاي ظرف طارئ علاج حد يتعب حاجه تبوظ في البيت.

و طبعاً طول السنين دي بيت امي كان اتعدم مجددناش فيه اي حاجه و اللي كان يتكسر او يبوظ منعرفش نجيب غيره و الدهان باظ و ايدهم كانت مبصمه في كل مكان و ايدي باظت من كتر ما نضفته لحد ما الدهلن بقي يطلع

افتكر في مره ميدو وسلامه قرروا يفرحوني في عيد الام كنت وقتها انا في شغلي اتفقوا مع بعض و جابوا جردل دهان و دهنوا البيت كله و جابوا شويه حجات كده جديده

و مصطفي و ريهام عملولي كيك و رز بلبن و رجعت بليل في اليوم ده قعدت كتير رجعت من فرحتي بقيت اعيط علي الباب و حاسه ان ده مش بيتي جديد وغريب و فرحتي مكانتش سيعاني