لقاء كارثي

بمجرد ما ليله سمعتها كانت فقدت السيطره علي دقات قلبها خلاص

موسيقي مرعبه ليها رهبه المكان لوحده رهبته كانت مأثره عليها لكن بعد ما المعزوفه اشتغلت و بقت تعمل صدي في المكان و هي شايفه السماء كلها مليانه انوار و الاهرامات وراها عماله تغير الاضاءه عظمه المكان و رهبته مع المعزوفه خلوها تحس ان فاضل ثانيه و يغم عليها..

نفس المشاعر دي كان الكل حس بيها بمجرد ما المعزوفه اشتغلت البنات كانوا مش عارفين يسيطروا علي دقات قلبهم هما كمان و شايلين هم ليله مبتسمين و ملامحهم متأثره و عيونها بتلمع من الدموع الي بيحاولوا يحبسوها..

موسي…..قرب من ليله يا عروسه اسمعيني كويس بمجرد ما المعزوفه تخلص هتقربي بهدوء امشي براحه خالص من هنا لحد الباب هتقفي و بعدين تعدلي نفسك و تبصي ناحيه الباب هتقربي ثلاث خطوات هتقفي عند العلامه اللي في الارض لونها ابيض في الوقت ده هيشتغل ميكس كده اللي هتدخلي عليه تمام الفرقه اللي هناك دي هتدخل بهدوء قبلك

و ودنك هتبقي معايا اول ما اقولك قربي هترجعي تمشي بهدوء تاني و تدخلي و تفضلي واقفه في مكانك وسط الفرقه مش عايزك تقلقي او تتوتري تمام

ليله…..برعب تمام

موسي…..يلا مستعده

ليله….اوووووف مستعده

بعد موسي جري من قدمها و اتوجه عليها اضاءه قويه من فوق المفروض ان الاضاءه دي بتعكس مشيتها زي الخيال و هي بتتحرك و الخيال ده اللي هيشوفوا عشري و الكل من الناحيه التانيه خيالها بيظهر من غير ما يبان شكلها الاضاءه كلها خفت عندهم و اتوجهت لحائط كبير اوي الفاصل بينها و بينهم و بمجرد ما المعزوفه بتاعت كارمينا بورانا خلصت.

اشتغلت موسيقي بتاعت الف ليله وليله..

اداها موسي الاشاره خدت نفس و بدأت تمشي بخطوات هاديه عكست الحيطه خيالها و هي بتتحرك كان الخيال كأنها جايه من بعيد اوي بتمشي

بمجرد ما عشري لمح خيالها بس قلبه بدأ يدق بعنف ابتسامه هاديه علي ملامحه عينه ماشيه بكل هدوء مع خيالها البنات بدأوا ميسيطروش علي نفسهم هما كمان منظر الدخله و خيالها مع الاجواء و الاضاءه و الموسيقي بتاعت الف ليله وليله كانت تاخد العقل كانها حلم جميل

وقفت ليله و بعدين اتحركت بهدوء و بصت علي الباب و رجعت مشيت بكل هدوء ثلاث خطوات خيالها وهي بتقرب ناحيه الباب كان عمال يكبر و الشكل يزيد رهبه.