لقاء كارثي
لقاء كارثي
وهما واقفين في النص قدام الكل حاضنين بعض و مش مبطله عياط
عشري…..ششششش انا هنا يا قلب عشري اهدي وحياتي انتي في حضني شششش
وبعد دقيقه كامله حس انها هديت بعد بهدوء من حضنها و بصلها بسعاده متتوصفش عيونه كانت بتضحك و بتلمع مسح دموعها ضحكت بحب
عشري باس كفها و اداها البوكيه اخيراً
خدتوا منه و ضحكت
عشري…..انتي ازاي حلوه كده يا بلطجيه
ليله….بضحك بجد شكلي حلو
عشري…..انتي احلي عروسه شافتها عيني زي القمر
ليله…..بضحك انت كمان شكلك حلو يا بلطجي
ابتسم عشري و شاورلها علي دراعه ابتسمت و حطت ايدها في ايده و بصوا علي الناس بفرحه كبيره
صوت الزغاريط و التصقيف و التصفير بقي عالي اوي و لسه النار بتطلع حواليهم و الالعاب الناريه مش مبطله مع صوت المعزوفات العالميه اللي تجنن.
و بعدين دخلت فرقه تانيه شباب كتير معاهم طبول متركبه بقطعه حبل علي رقبته و في ايدهم عصيان لابسين لبس شامي نزلوا لحد عندهم
و بدأت اغنيه( من فوق رمش العين)
بقوا يضربوا علي الطبول والصوت بيعمل صدي مرعب و بعد كده بقول يرقصوا دبكا وهما بيضربوا علي الطبول و فضلوا ياخدوهم و ينزلوا بيهم لحد تحت و بقوا وسط الناس
صحابها جريوا عليها و هما منهارين و فرحانين حضنوا بعض و ايمي كانت منهاره بجد هي و نادين بالاخص ..
توما كان واقف جنبهم و هيتجنن عشان محدش يعيط و الميكب يبوظ و في نفس الوقت فرحان انه بعد كل الدموع دي الميكب ثابت كانوا عمالين يضحكوا عليه من وسط دموعهم حضنت ليله اخواتها البنات اوي و بعدين خدوها كلها يرقصوها مع عشري و الفرقه
الاجواء كانت تجنن خلصت الفرقه العرض بتاعهم و مشيوا و بدأت فقره سريعه الكل بيسلم و بيارك و بيتصور و ليله و عشري عمالين يسلموا و مبسوطين و هي طايره و بتتفاجئ بكل الناس اللي تعرفهم و جم مخصوص عشانها .
قرب عشري الكبير خد ليله في حضنه وباركلها بحب و سعاده
عشري الكبير…..مبروك يا احلي عروسه مبروك يا بنتي
ليله…..بابتسامه الله يبارك فيك يا حبيبي
عشري الكبير…..خد بالك منها و حطها في عينك ربنا يسعدكم و يبارك في حياتكم و يچعلها جوازة السعد والهنا
عشري…..بحب باس ايده اللهم امين يا باااه و يخليك لينا
قربت امينه خدتها في حضنها و فضلت ماسكه فيها و تطبطب عليها
بصتلها ليله بتأثر
امينه….لو دخلتي جلبي هتلجيه بيرجص من فرحته
