لقاء كارثي

عشري….هي ليله فين كل ده

نعيمه…..مش عارفه ادتنا الشنط و قالت انزلوا جايه وراكم اكيد بتقفل البيت و بتطمن علي الغاز و المايه كالعاده..

في الشقه فوق وقفت ليله في اوضتها تبص عليها بهدوء حاسه انها هتفتقدها اكيد رايحه مكان جديد مكان بتحبه مكان هتبدأ في حياه جديده مع الشخص اللي قلبها اختاره بكامل إرداته لكن كانت حاسه انها هتفقد اوضتها والبيت اللي عاشت في ذكريات كتير كلها احلي من بعض ابتسمت بهدوء و خرجت وقفلت الباب وراها و بصت علي الشقه كلها و فضلت تتحرك في كل مكان و تلمسوا كانت حاسه بمشاعر غريبه و لغبطه جواها مش قادره تفهمها اول مره تجربها ابتسمت بهدوء و بعدين خرجت وقفلت وراها و نزلت علي تحت

اول ما فتحت الاسانسير و الشباب شافوها هما و البنات رفعوا صوت الاغنيه بتاعتها ((ليله عند الحبايب))

ضحكت ليله و قربت منهم سلمت علي الشباب كلهم.

عسال….مبروك يا عروسه

حسان……مبروك يا ليله

رشيد…..مبرووووك يا بلطجيه

ليله….بضحك الله يبارك فيكم يارب

سلامه….اوعي عروستنا القمر النحس اتفك و هتتجوزي انتي والبلطجي

ليله….بضحك بطل قر فيها انت

فضل……اه والنبي خلينا نخلص منهم الاول

بصت ليله لعشري قرب منها و النظره اللي كانت في عينه لايمكن ليله هتنساها طول حياتها كانت شايفه في عينه نظره جديده و غريبه سعاده متتوصفش فرحه طالعه من قلبه باينه في لمعه عينه و راحه و اطمئنان غريب.

عشري…..بحب حط ايده علي كتفها وشدها لحضنه و باس راسها بحب وهو بيهمسلها عروستي

ابتسمت ليله بهدوء.

ليله…..اخبارك ايه

عشري…..طول ما انتي بخير انا بخير مبروك يا احلي عروسه

ليله…. بابتسامه توتر غير معهوده وهي بتتنهد مبروك علينا

بعدت عنه خطوه و بصت علي الشباب والبنات اللي عمالين يضحكوا و صوتهم عالي في الشارع.

عشري…..اااا طيب ايه مش يلا بقي خلينا نتحرك

رشيد….اه يلا بينا

ايمي….بهدوء چوي اركبي يلا

چوي…حاضر مدام

قرب رشيد من ايمي

رشيد…..ايمي نسيت اسألك انتي جيبتي فستان لچوي زي ما قولتي ولا نسيت

ايمي….لا طبعاً منستش خليت نادين امبارح جابتلها و كانت فرحانه اوي بيه

رشيد….طيب الحمد لله المهم وانتي هناك خايها معاكي طول الوقت عشان لو احتجتي اي حاجه و كمان اوعي تخليها تخرج من الاوضه اللي هتبقي فيها عشان متتوهش بره