لقاء كارثي

و لما لاقته مقربش او حتي سلم مقدرتش تروح هي من نفسها كانت محروجه و قررت ان هو اللي لازم يقرب و يبادر..

البنات ملهم سلموا و بدأوا يتعاملوا و يتأالموا علي الوضع .

سلامه من اول ما خرج بأيه و هو عينه من بعيد علي تامر رغم كل اللي حصل و كلامه مع تامر و تفهمه لموقفه و محاوله زرع الثقه فيه من تاني الا انه من غير ما يحس ركز معاه و كان حابب يشوف رد فعله و نظرته ليها لما يشوفها غصب عنه هو ضغط علي نفسه و حاول يلم الموضوع بعقل و حكمه بس في النهايه النقطه اللي جوه قلبه لسه موجوده بيحاول يكون طبيعي و نسي و بيتعامل مع تامر عادي و رجع تاني شعور الامان لايه بس هو راجل و الراجل بيصدق نظره العين اكتر من الكلام.

و بمجرد ما تامر شافها بص ناحيتها وبص ناحيه سلمي و وزع نظراته علي الاتنين بالتساوي و ابتسم وده الي حد ما طمن سلامه شويه و استني يشوف لما يقرب

قرب منهم تامر و ابتسم

تامر….الله الله الله ايه القمر ده انا بقول في اتنين عرسان و في اتنين عرايس وفي فرح و معازيم نجيب ماذون ونخلص

حسان….بضحك انا موافق

سلامه….وانا كمان

سلمي…..بضحك دول ما صدقوا

تامر….حقهم شكلكم حلو اوي بجد

حضنتوا سلمي بحب

سلمي….عقبال ما نفرح بيك يا حبيبي

تامر…..افرح بيكي انتي والاوزعه دي الاول

ايه….بضحك اوزعه في عينك مش شايف الهيلز

تامر….بضحك اديكي قولتي هيلز يعني من غيره اوزعه

ضحكت ايه و قربت منه

ايه….قول اللي تقولوا خلاص سلامه اتدبس

باس تامر راسها وهو بيضحك

تامر……صح هو اتدبس خلاص بس تدبيسه حلوه ولا ايه يا سلامه خد بالك لو قولت غير كده هتتحدف من الهرم ده

سلامه….بضحك لا وعلي ايه تدبيسه حلوه

ايه…..بضحك قصدك ايه بقي بتمشي الدنيا

حسان….جيبته لنفسك

سلامه…..انا نطقت يا اوزعه علي رايه و بعدين مش اوزعه اوي انتي اوزعه بالنسبه لتامر

سلمي….ايوه صح كلنا اوزعه بالنسبه لتامر

سلامه….عقبالك يا تيمو يارب

تامر….حبيبي يا سلامه في حياتك يارب بس برضوا افرح فيكم الاول

سلامه…..ياعم مش مهم المهم نفرح بيك

تامر…..يارب يا حبيبي

ارتاح سلامه كتير و بدأ يبعد الشك تاني من جواه او يبعد التركيز اللي كان تاعبه

……………

قربت ايمي من محمود و حطت ايدها في ايده و مالت عليه بهدوء.

ايمي…..هو صحيح قولنا ناخد الدنيا واحده واحده و منهجمش و نسيب مشارعنا تمشي بهدوء بس كمان احنا بنحب الاهتمام بنحب نسمع كلمه حلوه مدح شيك بنحب الراجل الچنتل اللي بيعبر و البت زي القمر و شكلها يجنن مش عيب يعني لما نعبر عن اعجابنا واهو نقدم خطوه صغيره بدل ما انت بتتفرج من بعيد