لقاء كـ،ـ،ـ،ـارثي

نغم…..صدقني ده الصح خليني اخلص و اشوف حياتي و شغلي انا عارفه ان محدش فيكم اشتكي و لا حد فيكم حسسني اني عيبئ عليه بس انا لازم اكون بحس مش هستني اني اشوف ده بعيني

تامر…..يابنتي بلاش غباء مين فينا هيعمل كده اصلا كملنا معاكي ليه لو هنحس انك عيبئ

نغم….صدقني يا تامر ده القرار الصح

تامر….انتي حره انا قولتلك رايي عموما بس علي فكره مكنتش متخيل انك ضعيفه و جبانه كده كنت شايفك قويه و كنت واثق في اصرارك و عارف انك هتقدري تجيبي حقك و حق اختك بس اللي هيخليكي تفرطي في حقك طبيعي يخليكي تفرطي في حق اختك

نغم بصتلوا و نزلت دموعها و معرفتش تنطق قامت بهدوء

تامر…..نغم استني

وقفت و بصت عليه بهدوء و هي بتمسح دموعها

قام بهدوء و بصلها

تامر….اااا انا اسف مقصدش والله العظيم انا بس لما عرفت من بابا انك هتتنازلي و هتطلبي من المحامي يساومهم علي الشقه اتصدمت و متزعليش مني صدمتي مش بس كانت في قرارك صدمتي في انك بجد هتعملي كده و كنت حابب اعرف انتي خايفه ولا اتهددتي و احنا منعرفش

نغم…..بدموع انا مش ضعيفه و اكيد مش بدور علي مصلحتي بس البيت ده اتاخد مني انا واختي غصب يمكن اختي وقتها مفرقش معاها لانها كانت متجوزه وعندها بيتها وحياتها و كانت بتحب جوزها و حتي الفلوس اللي خدتها كانت عارفه انها مش تمن البيت بس قالتلي عادي و خلاص بس البيت ده كان في كل ذكرياتي و انا فجأه اتحرمت منه و روحت عيشت مع مريم غصب عني بعد ما كان ليا بيت بقي ليا اوضه بعد ما كنت عايشه براحتي اعملي اللي عيزاه في اي وقت بقيت مجبره علي خدمه اكبر مني تنضيف بيت عمايل اكل اهتمام بجدتي المريضه و هي ترجع من الشغل كل حاجه جاهزه و حتي فلوسي حقي من البيت خدته و قالتلي لما تتجوزي ابقي خديهم لما كنت بحتاج حاجه كنت بتكسف اطلبها اشتغلت عشان اقدر اجيب طلباتي نص الفلوس كانت بتروح علي الركوب بس كنت راضيه وزاد المجهود شغل مع دراسه مع بيت و طلبات مريم و طلبات جدتي و لما كان حد يجي او تعزم حد كنت بقف علي رجلي طول اليوم لحد اخره

انغام ماتت يا تامر و هي الحاجه الوحيده اللي كانت مخلياني اسكت
ولما قررت اجيب حقها مش هينفع لانها انتحرت يعني مهما قولت حقها مش هيرجع لان مفيش قانون بيحاسب علي انتحار حد و لو قولنا هما سبب و اتحاسبوا علي قذارتهم هياخدوا كام سنه؟ سنه اتنين ثلاثه هيستأنفوا و يطعنوا في الحكم و يا اما باخدوا براءه يا اما الحكم يتخفف و في الحالتين هيطلعوا ناوين علي الشر و مش هيرحموني يعني في كل الاحوال انا خسرانه و الفلوس بتاعتي و بتاعت انغام مش هطولها و بيتي برضوا مش هطولوا يعني انا خسرانه في كل الاحوال و قوفكم جنبي حاجه كبيره عندي بس اكيد و قوف عيلتي وابويا كان هيبقي اكبر لانهم كانوا هيجيبوا حقي و هيحموني بجد منهم لكن للاسف قدام مريم الكل بيسكت يعني حقي ضايع صدقني انا والله مش ضعيفه بس معنديش الحاجه اللي استمد منها قوتي جايز انا موجوعه اوي اني هسيب حق انغام بس غصب عني صدقني غصب عني