لقاء كارثي
لقاء كارثي
لقاء كارثي
أميره أسامه
صاحبة البطل الواحد
. البارت المئه 168.
………………………….
مش كل الأرزاق بتتعد بالورق ولا كل الغنى بيتقاس بالأرقام.
في رزق مهما ملك الإنسان بعده يفضل فقير لو اتحرم منه !!
ورزق تاني لو امتلكه يبقى أغنى من ناس معاها الدنيا كلها !!
((الرزق ده رزق الأشخاص))
الناس اللي وجودها في حياتك بيطمن قلبك قبل ما يحل مشاكلك واللي أول ما الدنيا تضيق بيك تلاقيهم وسعوا ليك قلوبهم قبل بيوتهم ناس ما تعرفش تسيبك لوحدك ولا تعرف تتفرج عليك وأنت بتغرق وهي واقفة على الشط.
دول مش مجرد أصحاب ولا مجرد أهل دول نعمة عظيمة ولطف من ربنا ورسالة بتقول لك إنك مش هتحارب الدنيا لوحدك أبداً
يمكن عشان كده كل ما كبرت في العمر تكتشف إن قيمة الإنسان مش في اللي بيملكه من مال لكن في اللي بيملكه من قلوب.
قلوب تعرف السند قبل الكلام وتفهم وجعك من نبرة صوتك وتحس بغيابك قبل حضورك و توصلك قبل حتى ما تنطق إنك محتاج.
في ناس مجرد معرفتك إنهم موجودين في حياتك بتخليك تواجه الدنيا بقلب أهدى.
مش لأنهم هيقدروا يمنعوا عنك الأذى لكن لأنك عارف إنك مهما وقعت هتلاقي إيد بترفعك ومهما اتكسرت هتلاقي قلب بيضمك.
أجمل الناس مش اللي بيقفوا معاك وقت ما يكون الوقوف معاك سهل أجملهم اللي يسيبوا راحتهم، ويغيروا خططهم ويأجلوا نفسهم لمجرد إنك قلت أنا محتاجكم.
اللي يقسموا لقمة عيشهم قبل فلوسهم و وقتهم قبل أعذارهم وطاقتهم قبل راحتهم واللي يعتبروا إن حزنك جزء من حزنهم وإن فرحتك مكسب شخصي ليهم من غير انتظار لشكر ولا رد جميل ولا مقابل.
في ناس بتعتبر الجدعنة موقف لكن في ناس الجدعنة عندهم طبيعة.
بيجروا عليك قبل ما تفكر تطلبهم و يدافعوا عنك كأنهم بيدافعوا عن نفسهم و يحاربوا معاك معارك مش معاركهم بس لأنهم رافضين يشوفوك لوحدك.
ممكن ربنا يرزق الإنسان بشخص واحد من النوع ده ودي لوحدها نعمة عظيمة لكن لما تبص حواليك وتلاقي أهلك و أصحابك والناس اللي حواليك كلهم بيتسابقوا عشان يسندوك و يخافوا عليك و يفرحوا لفرحك من قلبهم.
فاعرف إن ربنا أحبك حباً عظيماً فاختار يرزقك بأندر نعمة في الدنيا.
لأن المال ممكن يضيع والمناصب ممكن تزول والدنيا كلها ممكن تتغير في لحظة.
أما الشخص اللي يحبك بصدق ويسندك بإخلاص ويقف جنبك من غير مصلحة فده رزق لو اجتمعت كنوز الأرض كلها ما تقدرش تشتريه.
