لقاء كارثي

ايمي…طب اسمعيني كويس يا ليله و دي اول واخر مره هتكلم معاكي في حاجه زي دي و اعتبري كلامي ليكي ده انذار لو عايزه بجد تحافظي علي اللي بيني و بينك و الكل هنا شاهد علي كلامي عشان يوم ما تكرري اللي حصل ده تاني محدش يلومني علي رد فعلي معاكي

ليله… ايمي اااا انا

قاطعتها ايمي بحزم

ايمي….ولا كلمه متفتحيش بوئك من انهارده انتي هتسمعي وانا اللي هتكلم

سكتت ليله وهزت راسها بهدوء و سمعتها

ايمي….من اللحظة دي يا ليله انتهى زمن إنك تلغي نفسك عشان غيرك.

يمكن طول عمرك بتفكري في الناس قبل نفسك و بتستحملي وجعك عشان محدش يتوجع و انا عارفه كويس جدا انك لما بتحبي حد من قلبك مستعده تموتي عشانه لكن اللي حصل المرة دي مكانش تضحية يا ليله اللي حصل كان استهانة بحياتك.

ومن النهارده صحتك قبل أي حد حياتك قبل أي حد و روحك قبل أي حد

ولو في يوم لقيت إن خوفك على حد أو حبك لحد أو إحساسك بالذنب تجاه حد هيخليكي تعرضي نفسك للخطر بالشكل ده يبقى اسمعيها مني كويس.

كل الناس دي هتطلع من حياتك

بصتلها ليله

ايمي…أيوه انا هطلعهم كلهم ومش هسمح لحد فيهم يقرب منك حتى لو كان أنا.

لأن اللي يخليكي توصلي لمرحلة إنك تفضلي تنزفي أربع وعشرين ساعة وتخبي وتستني وتغامري إنك تتحرمي من الخلفة أو تخسري حياتك يبقى وجوده في حياتك بقى خطر عليكي مهما كان مين.

أنا مش عايزاكي بطلة ولا عايزاكي جدعه ولا عيزاكي قوية على حساب نفسك.

أنا عايزاكي عايشة يا ليله فاهمة يعني إيه عايشة؟

لأن النهارده كان ممكن نعيط عليكي بدل ما نعاتبك

ولو ربنا كتبلك عمر جديد بعد اللي حصل انهارده ده يبقى ده مش عشان ترجعي تعملي نفس الغلطة مرة تانية ده عشان تتعلمي إن حياتك أمانة ومش من حقك تفرطي فيها عشان حد

مش هسمحلك يا ليله تلغي نفسك و حياتك هتبقي هي الاولويه و لو في يوم شوفتك بتعرضي نفسك للخطر قسما بالله هكون اول واحده تبعد عنك اللي حصل منك مش شجاعه ده تهور و مش تضحيه ده ظلم لنفسك

وأنا مش هقف أتفرج عليكي وانتي بتموتي بالراحة وهعيدها تاني يا ليله
و اسمعيها مني كويس.

لو حبك لينا و خوفك علينا هيخليكي تستهوني بصحتك

يبقي كلنا ملناش مكان في حياتك

لأن وجود أي شخص يخليكي توصلي للحالة اللي شفتك فيها النهارده لعنة عليكي مش نعمة.

ومش من حقك تقرري لوحدك إن حياتك ثمنها أقل من راحة أي حد.