لقاء كارثي

نادين…..بحزن ليله ايمي متقصدش تضايق بس هي خافت عليكي وكلنا عليكي جدا انتي كان ممكن يحصلك حاجه و المفروض رحاب كانت اتكلمت عشان نتصرف

سلمي….ليله انتي غلطتي بعيدا عن غلط رحاب لس بجد مكانش ينفع تيجي علي نفسك بالشكل ده مهما كانت الظروف

نعيمه….بدموع الظروف اللي عملتي حسابها دي يا ليله لو كان حفاظك عليها دفعك تمنها حياتك انا اول واحده كنت هعيش طول عمري حاسه بالذنب و مكانش حد فينا يا ليله هيعرف اصلا يعيش من غيرك

ايمي…..انا نفسي اعرف انتي بتفكري ازاي ؟؟ لا بجد انتي بتفكري ازاي ؟
يعني عقلك ازاي خلاكي تعملي فينا كده انتي لما عرفتي اني حامل و جيتي معايا عند الدكتوره و سمعتي منها التعليمات اللي المفروض امشي عليها شيلتي الشغل كله كتافك لمجرد انك تريحيني بقيتي رايحه جايه عليا ان ماكنش قبل الشغل يبقي بعده لو عندنا اي مشاوير تيجي تاخديني بنفسك و كل ده ليه عشان انا واثقه يا ليله انك خايفه عليا و علي اللي في بطني خايفه يجرالي حاجه طيب مفكرتيش بقي

لو انتي جرالك حاجه انا كنت هعمل ايه طيب انتي عارفه يا ليله اني ممكن اعيش من غيرك طب بلاش ياستي محدش بيموت عشان حد بس انا حياتي كانت هتمشي من غيرك يا ليله انتي قررتي بينك وبين نفسك تخبي و تداري عشان احنا مش ناقصين و الظروف كانت اقوي من الكل تمام معاكي

بس انتي متخيله يا ليله ان لو كان جرالك حاجه كنتي هتكملي علينا كلنا

كملت بدموع و صوت حزين و موجوع وعصبيه و هي بتشاور علي نعيمه اللي قدامك دي عاشت اسود يوم في حياتها بس انتي مدركه انها كان ممكن تروح فيها لو انتي اللي جرالك حاجه انتي عارفه هي متعلقه بيكي قد ايه ؟ طب نادين متعلقه بيكي قد ايه ؟ طب كلنا يا ليله انتي عارفه بجد احنا متعلقين بيكي ازاي ولا انتي مش متخيله وجودك في حياتنا قد ايه مهم ؟

خبيتي علينا عشان متوتريناش متتعبيناش خوفتي علينا بس لو كان جرالك حاجه كان بجد هنروح فيها للاسف حسبتيها غلط يا ليله و لولا ستر ربنا بس كان زمان جرالك حاجه

ربنا نجدك مش عشانك ربنا نجدك عشاننا كلنااااااا و انتي مفكرتيش لحظه قرارك اللي خدتيه ده كان ممكن يعمل فينا ايه وفي الاخر رايحه تقولي سرك لواحده سابتك تتصفي اكتر من 24 ساعه

سلمي…..ليه مقولتليش يا ليله من الاول انا او نادين او عشري ليه مقولتيش لاخواتك البنات لاي حد يقدر يتصرف انا عارفه ان العتاب ده فات وقته واللي حصل حصل بس احنا بجد مضايقين يعني لو شايفه ان نعيمه مش في ظروف حلوه انك تقوليلها لو خايفه علي ايمي لو شايفه ان ايه تعبانه و مش هتقدر تتصرف اصلا كان ممكن تعرفينا احنا