لقاء كارثي

عشري….. شوفي اللي يريحك وانا معاكي فيه بس لو حاسه انك تعبانه خليكي وانا هخلي الشباب يمشوا هما والبنات

ليله….انا كويسه والله و بعدين عايزه اروح مش قادره اقعد هنا

سلمي…طيب هنخلي الدكتور يشوفك تاني ولو قال انك بخير نمشي

ايه……طيب هي ازاي هتروح ؟ هي مش معاها غيار

ايمي…..بصت لليله بعتاب بسيط فهمته ليله من نظرتها لا عادي تاخد غيار من شنطة نعيمه زي ما عملت

بصتلها ليله بهدوء و سكتت

نعيمه…..بصوت مرهق جدا و عيون دبلانه ايوه شنطتي معاها في العربيه فيها لبس كتير اروح اجيبلك الوقت ولا لما نشوف الدكتور هيقول ايه

سلمي….خليكي يا نوني مرتاحه انا هروح اجيبلها

نادين….انا هنزل معاكي

ليله….المهم رحاب يعني ااا هي كويسه؟

ايمي…..ايه بتسألي عليها ليه في حاجه مخبياها تاني معاها واحنا مش عارفينها ؟

بصت ليله لايمي و من نبرتها فهمت انهم عرفوا ورحاب قالت اللي حصل و ان في حاجه حصلت بينهم وبينها

ليله….بألم عملتي فيها ايه يا ايمي؟

ايمي….لا انا لسه معملتش و حظها حلو انك بخير

رشيد….ايمي مش وقته الدكتور قال بلاش نتعبها

عشري كان واقف ساكت لا قادر يعاتبها و لا قادر يلوم ايمي لانه نفسه يعمل ويقول اكتر منها

ايه….احنا مش بنتعبها يا رشيد بس ايمي معاها حق بصراحه انا كمان مش طايقه رحاب بعد اللي عملتوا

ليله….بلعت ريقها بصعوبه والم عملت ايه بس يا ايمي؟

ايمي…عملت ايه ؟! انتي بجد بتسألي و لا عايزه تحرقي دمي ليله انتي كنتي هتموتي بسببها

رشيد…..ايمي عشان خاطري كفايه مش وقته

ايمي…..لا وقته انا كنت ساكته و حاطه جزمه في بوئي و هي اللي سالت عنها تتحمل بقي انا اول مره احس اني غريبه عنك حاسه اني معرفكيش انتي ازاي تخبي عني حاجه زي دي ازاي تخليني اتحط في الموقف ده ابقي قاعده جنبك و مش حاسه انك بتموتي و بتتصفي

و في المقابل رحاب عارفه وساكته و شيفاكي بتموتي و عادي

بصتلها ليله وسابتها تتملم لانها عارفه ان ايمي مش هتسكت ولا هترتاح غير لما تخرج كل اللي في قلبها

رشيد…..ايمي مش وقته عشان خاطري

وليد…..هنتكلم يا ايمي بس لما نمشي او لما ليله تشد حيلها شويه

ايمي….بغضب وعصبيه بصت لرشيد و وليد انا محدش يقولي اسكتييي لو متكلمتش وقولت الي جوايا مش هرتاح

ليله….بهدوء و صوت باين عليه التعب سيبوها يا رشيد كملي يا ايمي