لقاء كارثي

واللي في حياته أشخاص مستعدين يخسروا وقتهم وراحتهم ويمكن عمرهم كله علشان يشوفوه بخير فهو كسب الدنيا بما فيها حتى لو كان لا يملك منها شيئاً.

وأندر من كل ده الناس اللي وجعك بيوجعها حتى لو ما كانتش هي السبب فيه.

الناس اللي لو عرفت إنك كنت بتتألم في صمت أو كنت شايل همك لوحدك ما تزعلش منك لأنك ما قلتلهاش لكنها تزعل من نفسها

وتفضل تلوم قلبها قبل عقلها وتقول إزاي مقدرناش نحس؟ إزاي ساب نفسه يتوجع و إحنا موجودين؟

الناس اللي بيعتبروا إن عدم إحساسهم بوجعك تقصير في حقك وإن دموعك لو نزلت من غير ما يشوفوها يبقى هما اللي خسروا قبل ما تكون أنت اللي اتوجعت.

دول مش ناس بتحبك وخلاص دول ناس شايفين إن راحتك جزء من راحتهم وإن سلامك النفسي مسؤولية بيحملوها بقلوبهم من غير ما حد يطلب منهم.
لما ربنا يرزقك بالناس دي اعرف إنك مش غني بالناس أنت غني بدعوة مستجابة ورحمة من ربنا ونعمة لا تُشترى بمال الدنيا كله.

……………..

فاقت ليله و انتبهت كتير لكن شعور الدوخه و الزغلله و الهمدان والتعب الواضح والجسم الضعيف كان ملازمها بس طلبت من عشري يقومها و فعلا سلمي رفعت المخده شويه و عشري مسكها سندت عليه ورفعت نفسها شويه الدكتور قال تشرب بس شويه بسيطه عشان مترجعش شربوها شويه مايه بسيطه و قربت منها نادين لمت شعرها و بعد ما فاقت شويه رفعت راسها وبصتلهم بصوت باين عليه الاجهاد والتعب

ليله…..رحاب فين؟

بصوا لبعض و بصولها

فضل….ااا مشيت كلهم مشيوا احنا طلبنا منهم يمشوا عشان الزحمه و بعدين الدكتور قال انك ممكن تمشي لو حاسه انك كويسه فا كده كده ملهوش لزوم يفضلوا

وليد….اخواتك مكانوش راضين يمشوا ابدا بس خليناهم يمشوا عشان من امبارح الولاد لوحدهم اصلا مكانش في اي حد عايز يمشي خالص حتي ست امينه و حاج عشري الكل والله كان عايز يطمن عليكي

ليله….هزت راسها بضعف كويس انهم مشيوا حرام تعبوا اوي وانا بخير

وليد….يارب ديماً يا قلب اخوكي

نعيمه….بحزن حمدالله علي سلامتك يا قلبي كنت هتجنن عشانك

ليله….متقلقيش انا زي الفل والله المهم الوقت انا عايزه امشي من هنا

سلمي….طيب ايه رايك تخليكي لحد بكره الصبح نكون اتطمنا عليكي اكتر

عشري…بهدوء خليكي يا ليله افضل مجاتش من كام ساعه

ليله….انا كويسه يا عشري و انتوا لسه بتقولوا الدكتور قال اني اقدر امشي و بعدين محدش في البنات هيرضي يمشي و انت شايف مناظرهم لازم الكل يرتاح و انا هرتاح في البيت اكتر