لقاء كارثي

لقاء كارثي
أميره أسامه
صاحبة البطل الواحد

. البارت المئه 156.

………………………..

في الحياة مش كل اللي بيتكسر بيكسره الوجع أوقات اللي بيكسرنا بجد إننا نستنى من ناس معينة حاجة وتيجي من ناس عمرنا ما توقعناها.

العوض عمره ما كان نسخة من اللي راح العوض الحقيقي بييجي بالشكل اللي قلبك كان محتاجه مش بالشكل اللي كنت مستنيه.

ممكن ربنا ياخد منك حضن ويعوضك بكلمة من صاحب
ياخد أمان شخص ويحطه في طبطبة غريب.
يقفل باب كنت فاكر إن روحك واقفة عليه ويفتحلك قلوب مفيش بينكم دم بس في بينكم رحمة.

العوض مش دايماً بيكون في الحاجات الكبيرة أوقات بيكون في نظرة فهم وسط زحمة.

في إيد اتمدت وقت وقوعك.
في حد سمعك من غير ما تشرح.
في شخص اختاره القدر عشان يطبطب على جزء جواك أهلك نفسهم ماعرفوش يوصلوله.

وأغرب حقيقة في الدنيا
إن فيه ناس غريبة ماجوش من رحم العيلة لكن كانوا أحن من الأهل وأصدق من الوعود وأدفى من أي بيت.

العوض مش كلمة تتقال العوض إحساس بييجي بعد ليالي طويلة من الخذلان كأن ربنا بيقول لقلبك.

أنا شوفت كسرتك وسيبتلك في الطريق ناس تجبرها فا أطمئن.

………………

في بداية اليوم صحيت نغم من بدري و كانت مبسوطه و عندها حماس غير طبيعي مش بس عشان البنات هيزوروها في البيت لأول مره

لكن عشان كانت بتجهز مفجأه ليهم من كام بوم وهي بتفكر فيها و محبتش تعرف حد

اليوم اللي راحت فيه هي وايه يجيبوا فستان عشان تحضر بيه فرح محمود و سلامه عدي عليهم كانت مصممه تصميم غير طبيعي انها تمشي و قالت ان عندها حجات تعملها.

ايه استغربت تصميمها انها ترجع لوحدها بس هي وسلامه فكروا انها مكسوفه وحابه تسيبهم لوحدهم

لكن الحقيقه انها كانت عايزه تستغل كل لحظه تجهز فيها المفجأه عشان تلحق تخلص قبل ما يجوا في اليوم اللي عزمتهم فيه..

و المفاجأه كانت انها عايزه تعملهم اجواء الحنه كانت عارفه انهم مش هيعملوا حنه و لا فاضيين يعملوا و يجهزوا فا اكتفوا بس بكتب الكتاب و الفرح فكانت حابه تفرحهم او تردلهم جزء ولو بسيط من اللي عملوه معاهم.

الفكره كانت في دماغها من اول ما باعت الشقه قررت تفرحهم اتواصلت مع بنوته بتعمل اي حاجه خاصه بالمناسبات علي الانستجرام مش بتعمل الحنه نفسها لا بتعمل توزيعات زي هدايه و بتعمل زي الفرامات اللي بيتصوروا وراها اللي بيبقي مكتوب عليها المناسبه اذا كانت سبوع او حنه او خطوبه او جواز فا دخلت و اتواصلت مع البنت و فهمتها ان العدد مش هيكون كبير كانت حاسبه البنات كلهم و حاسبه اهلهم من الستات وبس مكانتش عامله حاجه لرجاله لان الحنه و التوزيعات بتبقي بنات اكتر.