لقاء كارثي

ايه ابتسمت و بصتلوا كانوا ماسكين كفهم في كف بعض

احمد…. بابتسامه حزينه اول حاجه مبروك يا ست البنات ربنا يجعلها جوازة العمر كله و يسعدك و يهنيكي و يفرحك انتي و سلامه

ايه….بتأثر ابتسمت الله يبارك فيك يا حبيبي

احمد…..طبطب علي كفها و بصلها بصي يا ست البنات انهارده اخر ليله ليكي هنا هتتنقلي من بيت ابوكي لبيت جوزك

بسرعه الدموع اتجمعت في عين ايه و هي بصاله و بعدين نزلت عينها لتحت

احمد…..طبعا البيت ده هيفضل بيتك انتي واختك ديماً بس انا مش عايزك تدخليه انتي و هي الا زايرين او حابين تقضوا وقت حلو غير كده بيتك هو حياتك

البيت اللي انتي ريحالوا يا ايه ما يدومش بالحب لوحده يدوم بالرحمة والتقدير والاحتواء وقت الزعل قبل الفرح.

جوزك يا حبيبتي شريكك مش خصمك لما الدنيا تضيق عليه لازم تكوني ليه سكن ولما تضيق عليكي اختاري ديماً الكلام اللي يقرب مش اللي يوجع و قولي اللي جواكي ليه من غير كسوف هو بقي ستر و غطاء عليكي .

اوعي تستقوي بصوتك واستقوي بعقلك وقلبك الصوت العالي و العناد بيعصب الراجل.

بس في نفس الوقت ما تسمحيش لحد يكسرك أو يطفي نورك.

بصتلوا ايه بهدوء و هي دموعها نازله و ابتسمت

احمد…..ابتسم و مسح دموعها هديكي بقي نصيحه و يمكن تكون اهم نصيحه هتنفعك في جوازك
لو عايزه بيتك ديما كله حب و موده و رحمه
ما تطلعيش أسرار بيتك لحد ولا تخلي لحظة غضب تهد اللي بتبنوه مع بعض حتي لو كان الحد ده اختك وخزنة أسرارك اللي بره دي حتي لو اخوكي حتي لو انا اوعي من باب الغضب تفضفضي بسر بينك انتي و جوزك اوعي في لحظه غضب بينك و بين سلامه تعري جوزك قدام حد فينا لان الست لو بتحب بجد بعد اي مشكله الراجل ياخدها في حضنه بتسامح و بتنسي بس اخواتك وانا

مش هننسي و يمكن نضايق منه و نفضل فاكرين الموقف و يتولد بينا فجوه او حاجز.

لو اختلفتوا يا أيه متسمحيش لحد يدخل بينكم لا قريب ولا بعيد صدقيني البيوت بتضعف لما أسرارها تبقى على كل لسان.

متحكيش جاب ايه مجابش ايه معاه كام ناجح بيشتغل ظروفه علي قده البيوت اسرار داري علي شمعتك

ايوم ما تفكري تدخليني في حاجه تكون حاجه قويه انتي مش قادره عليها لوحدك غلط فيكي مد ايده و طبعا انا عارف ان سلامه ابن حلال و ميعملش كده بس انا بفهمك الخالتين دول بس اللي تعرفيني غير كده اللي بينك وبينه مش عايز اعرفه و لا تعرفيه لمخلوق انتي سره هو سرك.