لقاء كارثي

ربنا يعلم يا أيه ان من يوم ما دخلتي البيت ده و انتي بنتي بالحب و الروح و القلب و العقل يشهد ربنا اني حبيتك حب ملوش حدود اسف لو اتعصبت عليكي في مره ده خوف عليكي اسف لو قصرت في حاجه كنتي عيزاها او كلمه محتاجه تقوليها و مسمعتيهاش اسف لو نسيت حاجه طلبتيها مني من غير قصد اسف لو في مره نمت من غير ما تكملي حكايتك و رغيك

ضحكت ايه من بين دموعها

احمد….بابتسامه اسف علي اي حاجه كنتي عايزاها مني و معرفتش احققهالك بس اتأكدي اني بحبك اوي و بتمنالك سعادة الدنيا وربنا يسعدك انتي و سلامه يا اخر العنقود

ايه…بدموع قربت منه وضمتوا اوي و هي بتعيط

ابتسم احمد بتأثر و طبطب علي ضهرها

بعدت عنه و باست كفه

ايه….اااا انا بحبك اوي اوي اكتر من اي حاجه في الدنيا انا اللي اسفه لو عصبتك جننتك ضايقتك انت عمرك ما قصرت معايا في اي حاجه خالص

عمري ما اتمنيت حاجه و معاك و مجاتش عمري ما طلبت حاجه و نسيتها انت كنت ديما بتقولي حاضر و بتحب تشوفني مبسوطه انت احسن واحن اب في الدنيا دي كلها

كملت بضحكه وجع جايز انا اسمي مش علي اسمك بس انا نادراً لما بفتكر حاجه زي دي و ده ياكد انك بجد كنت اب تجنن و احن راجل شوفته في حياتي انا عمري ما حسيت معاك اني عندي نقص عمري ما حسيت اني يتيمه عمري ما حسيت اني مفتقده ضهر و سند لانك كنت ديما سند وضهر و ديما قبل ما احتاجك الاقيك

انا عارفه انك زعلان و مضايق و انا كمان والله زعلانه و مضايقه بس انا زعلانه عشان انت زعلان مش عشان همشي لان حتي لو مشيت مش هسيبك و هقرفك انا وسلامه لحد ما تطردنا بنفسك

ضحك احمد بهدوء

احمد….عمري ما هعملها

ايه….انا بحبك اوي يا حمودي

احمد….وانا بحبك اكتر من اي حاجه في الدنيا بحبك اكتر من اخواتك كمان

ايه….بضحك وانت تقدر تحبهم اكتر اصلا انا اخر العنقود

احمد…بضحكه هاديه تعالي في حضني

ضمها اوي و هي ضمتوا

……….

عند تامر وسلمي

من اول ما دخلت سلمي و هي ملاحظه لغبطة تامر و ملامحه اللي بيحاول يخليها عاديه

كان واقف يحضر حاجته عشان لما يمشوا الصبح مينساش حاجه

تامر…اااا ابقي خرجي حاجتك انتي و ايه بره لو جهزتوها عشان الصبح نبقي يادوب نلبس و نمشي علي طول

سلمي…..بهدوء ابتسمت جهزتها يا قلبي

تامر…ااا انا كمان خلصت

سلمي….طيب انت بتدور علي ايه ليه رايح جاي كده