لقاء كارثي

ليله….طب احمدي ربنا انه عداها عشان شاف الموقف ميسمحش و لو مش بيحبك بجد مكانش عداها و الاهم من كل ده الوقت انتي لازم تصلحي اللي حصل منك سلمي وايه بيحبوكي يا نعيمه و مينفعش بحصل بينا كده ولا ينفع الكلام اللي قولتيه هنا اكيد هيراعوا ان نفسيتك مش حلوه بس كمان انتي غلطتي فيه جامد ساكته ليه يا ايمي ما تقولي حاجه

ايمي…..وهي باصه لنعيمه انا مش فارق معايا الوقت حوار سلمي وايه و لا نادين هما في النهايه اخوات و اصحاب و النفوس تهدأ و هيتصالحوا انا اللي فارق معايا كلامها اللي مش عارفه استوعبوا بصي يا نعيمه انك توصلي لحاله زي دي مع فضل لازم يكون في سبب

يعني لو حبيتي مثلا قبل كده او علاقتك بخطيبك الاول عقدتك. هبقي فاهمه شعورك ده كويس عادي انك تخافي من القرب الزياده احسن تفشلي بس انتي عارفه كويس ان فضل مش زي اي حد دخل حياتك ولا انتي الشخصيه اللي اتعقدت من علاقه قديمه

ليله….اكيد لا طبعا نعيمه من البدايه متحمسه و بتحب فضل

ايمي….والله بعد كلامها ده بدأت احس ان نظرتي كانت صح

ليله….نظره ايه؟

ايمي….انها مكانتش متحمسه ولا حاجه نعيمه اقل حماس فينا للعلاقه صح يا نعيمه يعني بصراحه انا طول الوقت شايفه ان فضل اللي بيبادر اكتر اه جايز تكوني كنتي مبسوطه في اوقات كان بيظهر فيها حبك لفضل بس الوقت لا انا مش حاسه بده بس انا عندي سؤال مهم و جاوبي بصراحه

بصتلها نعيمه

ايمي…..انتي بجد مش حابه تكملي مع فضل ولا دي مجرد لغبطه و بتفضفضي بيها

نعيمه…..انا مش عارفه انا مخدتش قرار بس انا مش مبسوطه و حاسه انه مش هينفع اكمل

ايمي…..كل ده عشان اختك حبت سليم

ليله….ايميييييي

ايمي…..بنبره جاده بلا ايمي بلا زفت ماهي لازم تعرف اننا عرفنا هانت عليكي اختك يا نعيمه

نعيمه….هي نسمه قالتلكم حاجه

ايمي….لا نسمه مقالتش نسمه لما لقت اختها قفلت الباب في وشها فضفضت مع صاحبتها و احنا حبينا نعرف مالك و قولنا يمكن في مشاكل في البيت هي اللي مخلياها متعصبه وطايحه في الكل واكيد تقي ممكن تبقي عارفه حاجه بما انهم صحاب و تقي قالت لليله اللي حصل بس اللي انا مش فهماه مشاكل ابه اللي انتي خايفه نسمه تعملها انتي بتضحكي علي مين يا نعيمه علي نفسك ولا علينا ولا علي اختك ده انتي اختك واخده نصيبها من اسمها نسمه محدش بيحس بيها لا بتاعت مشاكل و لا بتعرف ترد علي مشاكل