لقاء كارثي

ايمي…..لا يا سلمي مقولتش انك غلطتي انا بتكلم عن الموقف عموما انا كنت في حالة صدمه خصوصا لما الكلام بقي معاكي انتي وهي يعني لو هي وايه هعدي الاتنين بينكشوا بعض ديما بس معاكي و بالكلام اللي سمعتوا مبقتش عارفه اتكلم هي غلطانه مفيش كلام بس انا حاسه اني مش فهماها محتاجه اقعد معاها و اعرف فيها ايه

رشيد….اعملي كده خلاص انتي برضوا مش طرف في المشكله واكيد نعيمه هتفتحلك قلبها و يمكن فعلا هي مضايقه ان ليله سابتها يعني كانوا عايشين مع بعض اتعودت عليها بقت بالنسبه ليها هي كل اهلها

ايمي…..لا يا رشيد الموضوع اكبر من جواز ليله و انها بقت لوحدها نعيمه عندها مشكله و فكره انها تسيب الشغل مع نادين دي اكتر حاجه مخلياني واثقه من كلامي لان نعيمه لما نادين زمان قالت علي الشغل ده اكتر حد كان متحمس هي نعيمه اه كلنا بنحب اللبس والموضه و الجو ده بس مش لدرجه اننا نشتغل فيه

بس هي كانت حابه و ماشاء الله شغلهم ناجح و ماشي كويس جدا واللي واجعني اكتر ان نعيمه ونادين بعد كل النجاح ده لسه كان عندهم افكار اكتر طموحات اكبر كانوا بيحفزوا بعض و بيكبروا سوا و رغم طباع نعيمه الا انها كانت متحمله نادين جدا نادين في الشغل لا تعرف ابوها ولا امها جد اوي و الفلوس اللي بتطلع بتعرف توظفها في مكان تاني بتطلع بس لنعيمه مصارفيها الشخصيه لانها عارفه ان نعيمه ممكن تخرب الدنيا لو مسكت مبلغ و هيضيع علي الشوبينج و مع ذلك معترضتش لانها عارفه ان نادين بسبب اللي عملتوا ده قدرت تخليها عندها راس مال قوي تتسند عليه

لو عرفت انها سحبت فلوس من رصيدها بتطين عيشتها لو المبلغ ده رايح علي حاجه تافهه و بصراحه نادين قدرت تمسكها ماسكه حلوه ونعيمه كانت مبسوطه لانها كانت ملاحظه التطور اللي بيحصل في حسابها الشخصي و شايفه الشغل اللي هي دخلت فيه و بقت شريكه من غير مجهود قوي و الدليل كلام نادين قالتلها انا مش عايزه الفلوس خليها معاكي او دخليها في شغل

يعني الحوار مش فلوس و لا زهق من الشغل لانها بتحبه فا ازاي قدرت تسيب شغلها اللي بتحبوا الا لو في سبب قوي

حسان….طيب تفتكري ايه السبب ده

رشيد….هو فضل مقالش قدامك او حسيت ان في بينهم مشكله

حسان….لا خالص

ايمي….المشكله الوقت مش في ان في بينهم مشكله ولا لا المشكله الحقيقه واللي مخوفاني بجد ان نعيمه لو فضلت كده انا واثقه ان في مشكله هتحصل بينها وبين فضل