لقاء كارثي

تامر…..بص للبحر و هو بيقرب منها بهدوء جميل مش كده ؟

بصتلوا نغم بهدوء و هو باصص للبحر

نغم…..بس شكله مخيف اوي

تامر….جايز يكون شكله مخيف بليل لكن الصبح بيكون مختلف خالص تحسيه هادي وجميل و فيه سحر غريب بس لو اتعلقتي بيه و حبتيه بجد و قولتيلوا سر لاول مره من اسرارك هتحبيه اوي و مش هيفرق معاكي شكله لا بليل ولا الصبح

نغم….بصتلوا وابتسمت بهدوء اقولوا سر ؟

تامر…..بصلها وابتسم بهدوء اه عادي انتي متعرفيش ان البحر ده شايل اسرار كتير لناس اكتر

نغم…..لا انا قولت دي اول مره اجي فيها

تامر…..لا ده شايل كتير اوي و جايز يكون شايل اسرار صحابها نفسهم نسيوها ونسيوا انهم قالوها ليه كمان بس هو عمره ما بينسي

نغم…..وانت قولت قبل كده سرك للبحر ؟

تامر…..بص للبحر وابتسم سر واحد بس !

لا ده انا قولت اسرار كتير اوي ده اسرار و أمنيات و حكايات و اتكلمت معاه كأني بتكلم مع حد فاهمني وفاهمه حد بيسمعك من غير ما يمل
و من غير ما يقاطعك و من غير ما يطلعك غلطانه و من غير ما يتعاتبك

نغم….بابتسامه هو في حد ينفع يتكلم مع حاجه عارف انها مش هترد عليه

تامر…..اه عادي جدا اوقات اصلا بنحتاج حد بس يسمعنا

نغم…..بس ديما اللي بيتكلم بيكون تايهه و عايز حد يرد عليه

تامر….مش ديماً لا لو فكرتي فيها هتلاقي ان سرك اللي بتقوليه انتي عايزه تحكيه بس مش عايزه حد يناقشك فيه و الاهم انك واثقه لما هتحكي مش هيقول سرك ده لحد ولا هينطق..

اوقات لما بتبقي محتاجه تتكلمي و تخرجي اللي جواكي حتي لو مش سر انتي بتبقي عارفه حل اي مشكله عندك مش مستنيه تحكيها لحد عشان يديكي نصيحه قد ما انتي محتاجه تخرجي اللي جواكي و تفكري مع نفسك بصوت عالي

نغم……طيب و ايه دخل الامنيات في كلامك مع البحر هو البحر بيحقق الامنيات

تامر…..لا بس بيكون شاهد علي امنيه اتمنتيها في حضوره لما بترجعيلوا تاني و هي امنيتك متحققه بتحسي انه فرحان معاكي

نغم…..ولو متحققتش

تامر…..بتقدري تشاركيه حزنك و بتكشفي ضعفك قدامه في عدم تحقيق امنيتك و بتحسي انه بيطبطب عليكي و يا اما يطمنك انه لسه مجاش وقتها او يخليكي قايمه من مكانك راضيه ان مش كل الامنيات بتتحقق

نغم…..انت بتتكلم عن البحر كأنه بني ادم بجد و معاه حل كل مشاكلك و لغز لكل اسرارك