لقاء كارثي

الجميع….اللهم امين

بعد يوم طويل و كلام خارج من القلب بجد و بكل حب و نصايح و دعاء بالصبر و الرضاء والرحمه و المغفره..

الكل اتحرك عشان يمشي ركبوا العربيات و مشيوا وراء بعض

و بعدين بدأ كل واحد فيهم ياخد طريقه و الشباب راحوا مع البنات

طلعوا علي البيت كان باين عليهم الارهاق بشكل مش طبيعي حنان و ريهام ومصطفي روحوا عشان مكانش معاهم غيار كفايه و اطمنت حنان ان البنات مع نعيمه وليله فا رجعت و قالت هتيجي تاني يوم

دخلوا الشقه اللي راح قعد واللي راح التويلت واللي راح غسل وشه

كان حقيقي يوم متعب جدا و مصدقوا انهم يرتاحوا و بعد دقايق بسيطه قعدوا كلهم مع بعض كان في حاله بسيطه من الصمت و يادوب همسات بسيطه بين كل اتنين

ايمي…بهمس رجلك وجعاك

رشيد….لا مش اوي شاده بس عليا شويه من الوقفه بس متقلقيش مفيهاش حاجه

ايمي….طيب حاول تريحها بقي شويه عشان مترجعش تتعب و يمكن الشوز اللي انت لابسها هي اللي وجعاك

رشيد….ممكن انا من وقت ما عملت العمليه و مش بلبس حاجه ضيقه مع الوقفه تعبت شويه

ايمي…..ريح بقي شويه يا رشيد وارجع البس حاجه تريحك

رشيد…..ماشي يا قلبي المهم انتي بخير في اي الم

ايمي….لا العادي متخافش

رشيد….حاولي انتي كمان تريحي شويه يا ايمي

ايمي….حاضر خلاص كده كده التعب بتاع الفتره الي فاتت يعتبر خف خلاص

…….

سلامه….ماشي يا امي يلا حبيبتي تصبحي علي خير قفل معاها وبص لايه

ايه…..في حاجه ولا ايه ؟

سلامه….لا امي بتطمن عليكي انتي والبنات

ايه….هما روحوا صح

سلامه…اه روحوا هي مضايقه والله انها سابتكم بس قولتلها تروح تظبط نفسها شويه هي وريهام مش معاهم لبس كفايه و كمان تقريبا ريهام هتبدا تنزل الشغل بكره او بعده مش عارف انتوا هتفتحوا امته المطعم

ايه….مش عارفه والله يا سلامه هي وايمي اتفقوا علي ايه بس احسن انهم روحوا بصراحه حنون تعبت اوي الكام يوم دول

سلامه…..خالص والله هي مكانتش عايزه تمشي اصلا

ايه….عارفه والله بس احنا مع البنات ترتاح هي شويه بقي

سلامه…خير ان شاء الله

……..

نادين…بهمس بجد يعني مش انت اللي قولتلهم

عسال….خالص والله العظيم انا متكلمتش معاهم انهارده خالص

نادين…انا بصراحه شكيت ان انت اللي طلبت منهم يأجلوا السفر كام يوم لاننا اتكلمنا انهارده مع بعض في نفس الموضوع