لقاء كارثي

هو بجد الوجع بيعمل كده ولا انا تعبانه ومش عارفه

مسحت ايمي دموعها وملقتش رد و البنات كمان مكانش عندهم اي رد

نعيمه…..لفت وشها براحه بصت لليله هو انتي يا ليله حسيتي بنفس الاحساس ده لما امك وابوكي ماتوا ولا كنتي اصغر و محستيش اوي

رفعت ليله وشها و نزلت دموعها بصتلها بهدوء و هزت راسها

نعيمه….بدموع حسيتي باللي انا بقوله يعني انا مش ببالغ صح

هزت راسها شمال ويمين وهي مبتسمه ودموعها نازله

نعيمه….طيب قوليلي والنبي ارتاحتي بعد قد ايه او عملتي ايه عشان الوجع يروح او الحاله دي بيبقي ليها علاج ولا لا

ليله حطت ايدها علي وشها و انهارت حرفياً مقدرتش لا ترد و لا تمسك نفسها لدرجه انهم اتصدموا من رد فعل ليله وكلهم عيطوا اكتر

نعيمه…ضمتها و هي بتعيط حقك عليا والنبي والله ما اقصد

فضلت ليله تعيط بوجع و بصوت صوت عياطها كان في قهره مش طبيعيه مكانش حد عارف هي افتكرت وجع فقدانها لامها وابوها من كلام نعيمه ولا صعبان عليها نعيمه ولا موجوعه علي حملها وما صدقت حاجه تعيطها

قامت سلمي قربت شويه منها وطبطبت علي ضهرها

سلمي….لا والنبي يا ليله اهدي

مسحت ايمي دموعها ليله ليله اهدي يا قلبي

نعيمه…حقك عليا والنبي والله ما اقصد انا بحاول افهم بس منك بحاول اشوف حل

بعدت ليله عنهم بهدوء مسحت دموعها وفضلت تاخد نفسها و تظبطه عشان تهدا و بعدين بصت لنعيمه بصوت كله وجع و مهزوز

ليله….اووووف ده الوجع يا نعيمه اللي ملوش علاج يمكن بيهدأ مع الوقت بتتأقلمي معاه و بتعيشي معاه وهو جواكي بيسكن فتره و يهدا جواكي و اوقات بيجيلك هجمة حنين تصحي الوجع ده جواكي صوره اكله قاعده مكان فيلم كلمه

ترجعك تاني لنقطه الصفر و تقوم الوجع جواكي و يخليكي تحسي ان الشعور اللي حسيتي بيه لسه حاصل

اووووووف بصي يا نعيمه انا سهل اقولك هترتاحي هتهدي الوجع هيروح بس انا مش هكدب عليكي

انتي بتتعايشي معاه و اللي زينا يا نعيمه مجبر يتعايش مع الوجع خصوصا لو في حد متعلق في روحه

انا لما امي ماتت يا نعيمه مش كلام بس انا الدنيا قفلت في وشي بقفل و جنزير حديد لدرجه اني في عز الشتاء كنت حاسه اننا في عز الصيف مفيش هواء مفيش نفس بعافر عشان اخد نفس ولو بسيط يعيشني و مش هقولك بقي انا غمري ما تخيلت اني اتحط في الموقف ده او مكنتش عامله حسابه