لقاء كارثي

عشري…..ولو عطلت احنا هنشيل بدالك بس اللي هو هيعملوا معاكي يا نعيمه احنا ممكن منقدرش نعملوا يعني جايز نقف معاكي مع اخواتك لكن وجود فضل جنبك احنا مش هنقدر نسده فا ملكيش دعوه بالاتنين دول

نعيمه…طيب تمام قول بقي كلمه حق معايا للبنات واولهم مراتك

عشري….طيب انا هتكلم عن ليله اولا انا يوميا هبدأ انزل شغلي سواء في المافبهات او المعارض و اكيد مش هسيب فضل وسليم فا مش هبقي موجود باستمرار في البيت لان بعيدا عن الظروف اللي احنا فيها احنا تقريبا مش مهتمين اوي بالشغل من وقت فرح حسان وسلامه وبعدها ميدو فا محدش فينا كان مركز و الطبيعي اننا نرجع نهتم تاني بالشغل

فا اكيد مش هبقي مطمن علي ليله طبعا امي و البنات والمل جنبها بس ليله مش هتسيبك يا نعيمه حتي لو انا اللي طلبت منها ده بقولها قدامها اهو مش هتسمع الكلام مش عشان عند فيا لكن هي مش هتقدر و نتكلم بصراحه اكتر مش هينفع تسيبك في الظروف دي اكيد انا عايزها ترتاح و متبقاش تعبانه بس كمان انتي ليكي حق عليها فا هتفضل كل بوم تنزل المشوار ده و انا مش هبقي مطمن فا الافضل تبقي معاكي الكام يوم دول

كمان انا بركه هاخدها للدكتور نطمن عليها فا هنا اقرب ليها و وقت ما تحس انها تقدر تسيبك ترجع براحتها يعني من الاخر سليم وفضل وليله بره عني و انا راضي و تمام ملكيش دعوه بيا

نعيمه…يا عشري مش هينفع انا مش هيرضيني المرمطه ليك و لاي حد من الشباب رايحين جاين عشان تطمنوا عليهم و هما قاعدين معايا و سايبين بيوتهم بص يا عشري انا مش عارفه ارتاح حاسه بالذنب بشكل مش طبيعي حاسه بالذنب من ناحيه امي وابويا واخواتي احساسي ان انا السبب مش راضي يطلع من دماغي احساسي ان انا السبب في اللي حصل لليله مش قادره اسامح نفسي عليه حاسه بالذنب في كسره فرحه سلمي وايه ونادين وهما لسه متجوزين مش حمل بقي ذنب تاني اني ممرمطاكم معايا و البنات سايبين البيت و انتوا لا عارفين ترتاحوا ولا تناموا ولا تاكلوا

عشري….انتي عبيطه يا نعيمه ذنب ايه اللي كل شويه تتكلمي عليه بس هو انتي تقدري تمنعي قدر تقدري تزودي او تنقصي دقيقه واحده في عمر بني ادم ايه ذنبك في ان انتي كنتي عايزه تطلعي مع اهلك عمره هو انتي كنتي مودياهم نايت كلاپ انتي كنتي وخداهم يزوروا بيت ربنا يعني مفيش موته احسن من دي نعيمه انا مش عايز افضل افكرك واضايق بس ابوكي اتوفي بلبس الاحرام يعني يابخته وامك كمان و اخواتك ايه الذنب في ده