لقاء كارثي

لا انا مكنتش اصلا متخيله اني هحزن الحزن الكبير ده حزن مكانش وقتها راكب علي سني بس وقتها يا نعيمه كان لازم احاول عشان اخواتي البنات جايز انا اصغر واحده فيهم بس انتي عارفه اميمه وقمر طيبين قد ايه و ملهمش في اي حاجه يمكن وقتها كان كل واحده فيهم فاتحه بيت و مخلفه بس ملهمش في اي حاجه في حالهم اوي كان لازم اثبتلهم قد ايه انا قويه و ميتخافش عليا عشان يطمنوا اني هقدر اكمل بعد امي بس انا مقدرتش و وقتها حسيت ان علاجي في البعد عن اي حاجه بتفكرني بامي البيت المكان البلد كلها

يمكن السفر ساعدني بس انا قدامك اهو لحد الوقت لما بفتكرهم مبقدرش اتحمل و فاكره كل حاجه حصلت في اليوم ده بالتفصيل كانها لسه حاصله حالا فاكره ايد امي وهي بتقع من ايدي وهي في حضني فاكره قبضه قلبي وقتها كانت عامله ازاي فاكره كل كلمه مش مترتبه طلعت مني وقتها فاكره اني من كتر خوفي و لغبطتي وقعت علي ضهري و انا ببعد عن امي عشان انادي علي حد يلحقها فاكره اول صرخه طلعت مني كشرت كل حته في ضلوعي لما عرفت ان امي ماتت ومش مغم عليها فاكره وانا بكلم اميمه و بصرخ و بحاول استنجد باي حد

فاكره صريخ اميمه وقمر لحد الوقت بيرن في ودني لدرجه اني كنت مرعوبه عليهم و كان عقلي وقتها بيقولي صريخهم ده هيوقف قلبهم و من خوفي كنت بصرخ في وشهم واحط ايدي علي بوئهم عشان ميروح ش مني هما كمان فاكره عياط وليد و قعدته تحت رجل امي زي العيل الصغير و عمال يتحايل عليها تقوم كأنها هتسمعه و تقوم فعلاً

فاكره الدوشه والزحمه و الناس الغريبه اللي واقفين وسط شقتنا وشوش اعرفها و شوش اول مره اشوفها كفوف بتطبطب و كلام غريب بيتقال يواسوكي بيه و عقلك رافض يسمعه او يصدقه

فاكره البروده اللي هجمت علي جسمي فجأه وبقيت اترعش مش من البرد بس مكنتش عارفه وقتها ايه سببه

فاكره كل تفصيله يا نعيمه الوجع بيهدا و بيرجع بس انا حاولت قدرت اتعايش معاه جايز بصعف اوقات كتير بس لما ببص في وش اخواتي بهدأ عشان كده لازم تبقي عارفه الوجع هيفضل عايش معامي هيروح ويجي هتفتكري تفاصيل كتير بس لازم تفكري في اخواتك هما الوقت مسؤولين منك انتي كبيرتهم انتي اللي هتهوني و تطبطبي و تعملي حجات مش بتاعتك بس كفايه انهم موجودين

كانوا بيسمعوها كلهم و دموعهم نازله