لقاء كارثي

ايه…..علي فكره صح والله احنا خرجنا من المقابر علي صوت سلمي عماله تصرخ وكل اللي سامعينوا الحقوا ليله احنا فكرنا انك اغم عليكي تعبتي بتعيطي منهاره بس فجأه كلنا بجد اتلهينا و نعيمه نفسها فعلا مش نسيت بس كانت مشغوله بيكي

ليله…..بالظبط وانا الجمله دي علقت معايا كمان ايمي قالتلي يمكن ربنا عمل كده عشان نفرح بيكي في ظروف احسن من دي او جايز من الحزن و الضغط اللي كنا فيه كان يفضل موجود بس يتأذي او يتأثر او يحصل تشوه في كل الاحوال انا مليش نصيب فيه يا أيه مهما زعلت خلاص اللي حصل حصل الحمد لله

ايه……الحمد لله طبعا و اكيد ربنا عمل اللي فيه خير ليكي انتي وعشري و حتي البيبي يعني لاقدر الله لو فعلا كان اتاذي بسبب ضغط عالي او واطي كنتوا هتتعبوا اوي معاه اكيد ده خير ليكم والله و بعدين مش يمكن ربنا عايزك تحملي معانا و اهو نحمل كلنا مع بعض علي الاقل محدش يتريق عالتاني

ليله….بابتسامه انتي شايفه كده

ايه… بابتسامه صراحه اه عشان انا اكبر متنمره فيكوا محدش فيكم هيرحمني لكن لو كاكم حملتوا معايا هخلص من طوله لسانكم

ليله…عارفه نفسك يعني

ايه…بابتسامه لا بجد والله اوعي تزعلي ولا تتوجعي اكيد حتي لو اتوجعتي ده شئ طبيعي بس والله يا ليله انتي ربنا بيحبك و انا واثقه انه شايلك حاجه تفرح قلبك بجد

ليله….الحمد لله كله خير من ربنا سيبك مني انا بقي طلعي حوار انك تسيبي شغلك ده من دماغك صدقيني يا ايه مش هتقدري شوفتي نعيمه لما سابت الشغل و رجعت كانت هتتجنن و هي قاعده مش بتعمل حاجه لحد ما نزلت تاني بس نعيمه تقظر تنزل اي وقت لان الشغل من غيرها كان ماشي نادين ونغم كانوا شغالين محدش وقف لكن انتي لو سيبتي شغلك فتره طويله هتلاقي كل الناس اللي بتتعامل معاكي دورت علي غيرك لان مفيش حد يمسك الشغل بدالك

صدقيني هتندمي خصوصا انك بتحبي شغلك انا اتجوزت و انتي عارفه انا بحب عشري قد ايه بس اللي اتعود عالشغل بيزهق من القاعده جايز تحسي براحه شهر اتنين بس بعد كده هتملي

ايه…..انا حاسه بخنقه يا ليله في حاجه تقله علي قلبي اوي

ليله….طبيعي يا ايه خارجه من دور تعب قوي ملحقتيش تخفي منه دخلنا في مصيبه الجو العام كله حزن يعني مشاعرك طبيعيه بس هتبقي غلطانه لو صدقتي مشاعرك دي لانها مشاعر مؤقته ياقلبي