لقاء كارثي

نغم….ابتسمت و اتكلمت بنبره هاديه انا عمري ما كنت بخاف يا تامر و اللي كان يعرفني كان بيقول عني جريئه و مش بخاف من حاجه عمري ما سألت مين بيخبط و لا بصيت من عين سحريه كنت بفتح علي طول البيت كان في مكان يعتبر شعبي مكان كله حياه و الرجل فيه مش بتقف عمال و صنايعيه طالعين نازلين يسألوا عن مريم او ياخدوا حاجه من البيت ليها و ناس كتير في الشارع بتشتري ومحلات مش بتقفل

كنت ديما حاسه بامان مش بس عشان انا جريئه لكن عشان كان ورايا في ضهري حد بيديني الامان ده بس فجأه اللي كان بيديني الامان هو بنفسه اللي زرع جوايا خوف كبير و عدم ثقه وعدم امان و رعب من اي صوت او حركه فا غصب عني لما تفقد ثقتك مره واحده ومن حد غالي عندك مش بتعرف تثق بسهوله تاني و بتختف من اي حاجه

تامر…..تمام معاكي حق بس اللي بيعيش عمره خايف مش بيعرف يعيش يا نغم اوعي تخلي الخوف يمنعك من انك تعيشي حياتك لو في حاجه خايفه انها ممكن تحصلك صدقيني لو مكتوبالك اصلا لو قفلتي الباب ده عليكي من جوه بعشر ترابيس وبالف مفتاح هتحصلك تسمعي عن المثل الي بيقول اللي يخاف من العفريت يطلعلوا

نغم……ايوه

تامر….المثل ده انا طول عمري كنت فاهمه غلط كنت فاكر ان معناه حرفي يعني لو خوفت بجد من العفريت هيطلعلي لما ماما ماتت الله يرحمها كنت صغير كنت عايز أثبت لبابا اني راجل و مش بخاف و اقدر احمي اخواتي و لما كنت اشوف فيلم رعب بجد او يحصل اي حاجه تخوفنب اتظاهر باني مش بخاف و افضل اردد ده جوايا انا مش بخاف كنت عبيط بضحك علي نفسي بقول اني مش بخاف عشان العفريت لو سامعني يعرف اني مش خايف فا ميطلعليش ابتسم بهدوء
وهي ابتسمت

تامر…..بس لما كبرت عرفت ان كنت بترجم المثل ترجمه حرفيه بس ده مكانش معناه المعني الحقيقي للمثل ده ان كتر التفكير في حاجه تخوفك بتحصل بالظبط زي جملة اقداركم تؤخذ من افواهكم يعني مثلا ليا واحد صاحبي في مره وقع من السلم وهو نازل وقعه جامده كسرت سنانه و فتحت شفايفه بقي كل ما يجي ينزل السلم ديما خايف و عقله يقولوه هتقع كان بنزل مركز و باصص علي كل درجه بيحط عليها رجله من كتر خوفه كل مره الاحساس ده يسيطر عليه لازم يقع

في ناس حصلها تسمم او تعب في معدتهم و ربطوا ده باكله معينه كانت اخر اكله كلوها لما تعبوا لدرجه انهم بقوا كل مره تتحط الاكله دي قدامهم خوفهم منها يخليهم يتعبوا كل ما ياكلوها و ناس تانيه حصلهم مواقف مع اشخاص في الشارع عقلهم تعبان مرضي نفسين يعني