لقاء كارثي

لقاء كارثي
أميره أسامه
صاحبة البطل الواحد

. البارت المئه 155.

………………………..

جمال العلاقات بيظهر ..

في اللحظات اللي الحياة بتشد فيها علينا فجأة لما كل حاجة حوالينا بتتهز ملامحنا بتتعرى من أي تمثيل ساعتها بس الحقيقة بتبان

الحب الصافي مش كلام بيتقال في وقت الهدوء ولا وعود بتتزين في لحظات عادية الحب الحقيقي بيظهر لما الدنيا تضيق
لما الخوف يتسلل جوا القلب
ولما الروح تبقى محتاجة حد يسندها من غير ما تطلب
بيبان في إيد بتتمد من غير تردد

و بتظهر في صوت بيطمن رغم ارتجافه وبتظهر كمان في شخص بيختارك حتى وهو مكسور

وفي نفس الوقت بيبان أكتر في الفرح الفرح اللي من القلب اللي مفيهوش مقارنة ولا غيرة الفرح اللي يخلي حد يبتسم علشانك كأنه هو اللي كسب الدنيا.

اللي يشوفك بتلمع ويقف جنبك مش علشان ياخد جزء من النور لكن علشان يحميه.

الحب الحقيقي مش بيحتاج مواقف كتير علشان يثبت نفسه هو بيختار لحظاته بعناية يا إما في قاع الوجع
يا إما في قمة الفرح

وفي الاتنين بيكون صادق لدرجة تخوف وواضح لدرجة ما ينفعش تتجاهله.
يمكن علشان كده أصعب اختبار لأي علاقة مش الأيام العادية لكن اللحظات اللي بتكشف القلوب على حقيقتها..

الفرحة اللي طال انتظارها أو اللي جت بعد وجع و تعب بيبقى ليها طعم مختلف. بنعيشها بزيادة بنخزنها في قلبنا بنحاول نبطأ الوقت علشان ما تخلصش بسرعة. نضحك أكتر نبص حواليينا أكتر ونحفظ كل وش كل كلمة كل إحساس كأننا بنسرق من الزمن لحظة مش من حقه ياخدها وساعتها ما بنبقاش متعلقين بالمناسبة نفسها قد ما إحنا متعلقين بالإحساس اللي اتولد فيها. احساس إننا بخير إن الدنيا ولو للحظة اختارت تطيب خاطرنا.

علشان كده لما الفرح بيكون صادق ومن القلب ما بنسيبوش يعدي بسهولة بنمسك فيه كأننا بنقول للحياة اللحظة دي بتاعتي ومش هسمح إنها تضيع.

وده بالظبط اللي حصل مع الشباب و البنات فرحتهم كانت المرادي فرحه مضاعفه ثلاثه منهم بيبدأوا حياه جديده بيكتبوا فيها اول سطر في صفحتهم..

السعاده اللي كانت فيها ايه وسلمي و ريهام كانت سعاده مختلفه عن اللي كان فيها حسان و سلامه و محمود..

و علي قد فرحة البنات اللي كانت واصله للسماء و باينه علي ملامحهم للكل الا ان فرحة الشباب مكانش ليها مثيل