لقاء كارثي

سلمي…..بص اليوم اللي بعد فرح محمود نغم عايزه تعزمنا يعني عشان البيت الجديد و احنا حابين نفرحها بصراحه و نباركلها
البنات بقي هيقسموا نفسهم يوم 11 ده يعني قبل الفرح بيومين جزء فيهم هيجي عندنا وجزء هيروح يفرش لايه و انا وايه مش هنروح نشوف بقي تجهيزات الصالون و الحجات دي يعني

حسان…طيب حلو يعني مش هتعملوا يوم ليكي ويوم ليها

سلمي….لا لا في نفس اليوم بس هيتقسموا

حسان…طيب كويس واحسن ان في يومين فرق عشان حرام يرتاحوا

سلمي…متقلقش

حسان…..مين هيجي عندك

سلمي….والله هما اتفقوا ايمي و زوزو و امنيه و نغم و نوني هيروحوا عندي معرفش هيحصل تغيير ولا لا ااه وممكن نادين عند ايه بقي حنون وريهام و ليله و ممكن نسمه و تقي

حسان….طيب كويس عشان ينجزوا بسرعه

سلمي…انا برضوا هعرفك قبلها بيوم هيجوا امته عشان تبقي عامل حسابك

حسان….تمام

سلمي….حسان انا عايزه أسلم سؤال و بصراحه كل ما احب أسالوا ببقي متردده عشان مضايقكش بس بصراحه عندي فضول

حسان….لا اسالي طبعاً

سلمي….هو احمد اخوك مش هينزل عشان الفرح بعني انا عارفه انه مستقر بره و اكيد مش هيجي شبكه او كتب كتاب بس احنا عاملين فرح مش هيجي

حسان….بابتسامه هاديه و الله بصي يا سلمي انا مفيش خطوه خدتها معاكي الا وكان هو علي علم بيها يعني لما حددت معاد خطوبتنا عرفتوا لما حددنا معاد كتب الكتاب انهارده برضوا عرفتوا و حتي الفرح هو عارف معاده و قولتلوا انزل عشان اعرفك علي سلمي هو مبسوط وبارك والدنيا تمام بس بصراحه انا سايبه براحته يعني كل مره يقول هنزل ومش بيجي و يرجع يقول الشغل والدنيا والدين فا تمام ربنا معاه و يوفقه

سلمي….جبيبي متزعلش والله انا مش قصدي اضايقك بس انا يعني بسالك عشان فكرت انك مقلتلهوش

حسان…..يعني معقول مش هعرف اخويا

سلمي…لا مش قصدي بس قولت انك ممكن تقول هو مسافر و مش هيقدر فا معرفتوش و هو ممكن يزعل

حسان….لا طبعا عارف مني و من امي و من ابويا و للدنيا تمام

سلمي…معلش اعذره ممكن فعلا يكون مضغوط او شغله صعب و مش هيقدر

حسان….بصي يا سلمي احمد خد علي الغربه و استقر واتأقلم عايش حياته بالطول والعرض عمل صحاب هناك و عمل علاقات مراته معاه و والدتها عايشه معاهم فا مش فارق معاه حاجه بقي

سلمي….ليه بتقول كده مش يمكن هو مش هيقدر ينزلهم معاه و في نفس الوقت مش هيعرف يسيبهم لوحدهم في الغربه