لقاء كارثي

محمود يمكن مكانش مصدق انه خلص من حصار عشر سنين دفن فيهم نفسه جوه وهم اسمه حب من طرف واحد جايز يكون حب فعلا بس الحب من غير تبادل حب ملهوش روح حب مطفي و ريهام قدرت تنور محمود بحبها ليها بدأ يحس ان الحب مختلف عن الطريقه اللي كان بيحب بيها و يمكن فكر كمان انه مكانش بيحب قبلها لانه حب بس مجربش يتحب..

حسان يمكن تكون حكايته مختلفه عن محمود هو حب و بدأ حياته بدري اوي و مش الطريق و عمل بيت واسره بس مع الوقت اكتشف ان مش هو ده الحب اللي كان بيدور عليه و مكانش في قدامه غير حلين يا يسلم للطريق اللي مشي فيه بإرادته و يعيش حياه بارده هاديه مفيهاش حب يظلم نفسه و يظلم انسانه هي كمان عايشه معاه نفس السيناريو او يحط سور و يقفل الطريق و ينزل بالنهاية بكل احترام و ود و يبدا حياه جديده جايز مكانش واثق في قراره بس سلمي ظهرت و اكدتلوا انه اختار القرار الصح و عاش معاها الحب كما يجب ان يكون ..

اما سلامه فكانت حكايته اكثر اختلاف عن محمود و حسان مكانش في حاجه تمنعه من الحب الا احساسه بالمسؤليه تجاه عيلته اللي حبها بإخلاص و اللي عاش معاهم ظروف قاسيه و كان مضطر يهونها عليهم باي شكل من الاشكال و لما بدأت ظروف الحياه تتحسن مكانش متخيل ان عوض ربنا هيكون كبير اوي كده هو مش بس رزقه بحب أيه هو رزقه بحب كل اللي حواليه رزقه بعلاقات سويه علاقات نضيفه غيرت حياته و محت من ذاكرته قساوة الظروف اللي عاشها هو وامه و اخواته و اللي حتي لو بقي يفتكرها بقت تعدي قدامه ذكري حلوه مضحكه رحله طويله بس اخرها كان راحه و سعاده و حب ربنا رزقه بزوجه و بحبيه و صاحبه و بنت
خلت لحياته معني تاني خالص.

لاخر لحظه في الاحتفال بتاعهم كانوا بيفرحوا و بيتجننوا مش عايزين اليوم يخلص من كتر ما كان جميل و كله مشاعر تاخد القلب

تقي و نسمه ونغم و عدي وسليم و تامر و نادر ومصطفي و محمود وريهام وسلامه وايه عمالين يرقصوا
تامر سحب سلمي وحسان رقصوهم معاهم حسان كان ماسك ايدها بس بيرقصهاو مبسوطين

عشري من اول ما بداوا يرقصوا مال علي ليله و قالها اياك تتحركي

كانت واقفه معاهم بترقصهم بس مش بترقص وكل ما حد يشدها مترضاش عشري يلف وشه عنها ترقص بدلع بسيط معاهم اول ما يبصلها و يرفع حاجبه تقف ساكته و تبصلوا وتعمل فيها بريئه كان الكل عمال يضحك عليهم