لقاء كارثي
لقاء كارثي(أميره أسامه صاحبة البطل الواحد)
انا من صغري يا رشيد بتعامل مع ابويا وامي علي انهم ولادي ناس كتير كانت بتستغرب واولهم البنات يعني انا اتجوزت واتفصلت و شخصيتي قويه و بحب الاستقلال و بحب جدا الخصوصيه ازاي بعد انفصالي رجعت اعيش معاهم و ليه اصلا محاولتش اخد مكان بره مع اننا مش العيله اللي ده عندها عيب او ممنوع يحصل او لو حصل هتبقي بمشاكل لا خالص بس انا عمري ما تخيلت اني اسيبهم الا لو في سبب زي اني اتجوز مثلا
مكنتش اقدر اسيبهم يا رشيد حماده و زوزو ظروف جوازهم اللي انت عارفها خلاهم خسروا ناس و اللي اتبقي في حياتهم من عيلتهم ماتوا و اللي سافر و اللي ظروف الحياه خدته فا هما الاتنين ملهمش غيرنا احنا الثلاثه انا و محمود و امنيه عيلتهم الوحيده يمكن عمرهم ما اعتمدوا علينا او قصروا معانا بالعكس شالونا و عملوا كل حاجه عشاننا بس في كمان شعور متناقض معرفش هتفهمني ولا لا
رشيد….هفهمك اكيد
ايمي….يعني علي قد ماهما بيعرفوا يتصرفوا و مش من النوع اللي بيعتمد علي عياله حتي بعد ما كبروا في سنهم ده الا انهم جواهم حته بتظهر اوي انهم زي الاطفال ميعرفوش يعيشوا من غيرنا اوقات بحس انهم مسؤولين مني ولادي في الوقت اللي لو حصل معايا حاجه بجري عليهم
رشيد…بابتسامة فاهمك جدا ودي حاجه انا لاحظتها فعلا بينكم وبين بعض
ايمي…..فا قربي منهم خلاني علاقتي بيهم تجنن و بجد مقدرش احط نفسي للحظه في موقف نعينه انا اتوجعت اوي عشان نجلاء وعادل لان اللي بينا كبير احنا عشره و اهل بس كمان مقدرتش اتخطي وجع نعيمه مجرد التخيل موتني فا عمري ما هقدر احس بيها بالتخيل بس عشان كده هموت عليها و انا واقفه مش عارفه اعملها حاجه
كمان اللي حصل مع ليله رغم انه كان جزء كبير من معاناتي بعد الانفصال و خوفي اني ممكن مبقاش ام الا فا ليله قتلتني
انا لما خسرت الفايل اللي ممكن يوصلني بتجميد البويضات و قتها حسيت اني ام فقدت عيالها و مستحيل تعرف تبقي ام تاني كنت بموت فا انا عارفه حجم الالم اللي ليله حاسه بيه و اللي واجعني بقي اكتر اني عارفه ليله اكتر من نفسي هي لو هتموت مش هتبين جزء ولو بسيط من اللي هي حاسه بيه لان في اوقات انا بعمل زيها بس انا فهماها زي ما هي فهماني
رشيد…عشان كده اتعصبتي عليها
ايمي….لا انا اتعصبت من الموقف كله يا رشيد ليله كانت ممكن تروح مني في لحظه بسبب الي عملتوا لما وصلنا المستشفي و عشري شالها وجري بيها و شوفت الدم مغرق عربيته وعلي الارض و هو بيجري حسيت اني للحظه بقيت مغيبه ليله بتموت !!! عقلي وقف لما فاقت بقي واطمنت عليها كنت اتشحنت اكتر بسبب ان رحاب خبت فا ملاقتش حد اطلع فيه ده غير ليله و بعدين احنا اصلا كنا مضغوطين اتنين ماتوا و اتنين في رعايه و هي بتروح مني لا مكنتش قادره كمان زعلت بجد علي ايه و سلمي ونادين عرايس لسه ملحقوش يفرحوا و مضطرين فرحهم يتبدل لحزن
